Afositolo 17
17
MiTesalonaika Folo hivekwageyena.
1 #
1Te 2:1-2
Folo Sailosi hinauna tu melala adi egana Amififolisi Afoloniya hinumiyamiyanana, kadu hinauna tu melala ana egana Tesalonaika againe hiyemu, ada medede againe miYuda yadi manuwa-abavehawala sinagogi gidauda. 2#Lu 24:26-27; Af 9:22Ada Folo yana dewa tova moya'aina amine sinagogi againe ginauna, ada sabati tohiye Yaubada bonana tuwai-mo'ena Veyao Tuwaina ana bukiya hi'etoladina-ma againe gilumamaledi. 3Au bonai-nadi giyauyauna, Yaubada yana Tovegida Keliso fa'ine gikivetuvetunudi. Gigahedi gigayo, “Yaubada bonana eto'etoladina gigahe vaita Keliso aulolo kaliva nimadiya anafaiweya gidavaina, kadu gida'alika be gidamididi-havagi. Ada Yaubada yana gahe keke ginabe'u fa'ina, au hida gaitoma yana Tovegida Keliso againe ahe gilakayemu. Ada Bana hida kalivai-nadi ana egana Yesu tova adamoya omi agaimiya galulukahihiyena, medema Yaubada yana Tovegidai-nadi.” 4Ada miYuda tufoidi Folo yana gahe hivetumaganena, ada Folo Sailosi hivetobohiyanedi. Meda anafaiweya yo'o tulidiyao kavewagadi miGilika tufoidi moya'aidi Yaubada tova moya'aina hihawadavadavana-ma hivebutu Yesu againe hivetumagana. Kadu wakwamayokudiyao moya'aidi hivetumagana.
5Tu miYuda ma higa'uma'uma, fa'ina melala ana kaliva koyodiyao hinunu-kawowo ma hivaga'auhidi be hisiveyo'odi-yo hivebutu hi'ago'agodadaga, ada au kaliva moya'aidi hive'atalalakalaka. Ada bana kaliva ana egana Yesoni yana wamanuweya amine himaduna, yana wanafali hidobona, higa vaita Folo Sailosi hidanuhagadi be yo'o agaidiya hidasehobuyedi. 6#Af 16:20Tu hilele-wayogedi fa'ina, bana Yesoni kadu tovetumagana velugadiyao buye hikive'avidi be melala ana tonagona agaidiya hitaidi. Hiyemuyemu tu hikovakova higayo, “Hida hima kalivai-dina fafali tulina tulina agaidiya vekwageya hiseyemayemaunena, ada adamoya yada melala againe kadu hivebutu. 7#Lu 23:2Ada bana Yesoni yana manuweya giselukuwedi. Au badi moya'aidi yada Tokaiwabu lakahina Sisa yana vehimeya hiyawelina, fa'ina higahe vaita yadi tokaiwabu kaliva tulina, ana egana Yesu.” 8Ada yadi gahe yo'o kadu melala ana tonagona hinogalini-yo au hive'atalalakalaka. 9Au tonagona hivehimeya be Yesoni tobohiyaneyao tovetumagana buye mani againe hinalaufata be higa keke kadu vekwageya hinaseyemauneni. Ada hilaufata-yo au hiyaudi be hina yadi manuweya.
Beliya melala againe Folo vekwageya kadu ginuhagana.
10Tu mala ahe gibogi Tesalonaika tovetumagana Folo Sailosi hi'atuhegedi be melala ana egana Beliya againe hinana. Ada ahe hiyemu au miYuda yadi sinagogi againe hina. 11#Yo 5:39Ada badi miYuda Beliya againe keke miTesalonaika nuwadi abodana amine, au miBeliya nuwadi yauyaugina. Nuwanuwadi lakahina Folo yana laumamala hinanogalina, ada aiyeta sa'eyana sa'eyana Yaubada bonana tuwai-mo'ena hi'etoladina-ma hi'ita'itanuwenuwena be hinahalamanena ka'i Folo yana laumamala velemo'ena o ka'i fwaya. 12#Af 17:4Ada au miYuda tufoidi moya'aidi hivetumagana, kadu Gilika vevine wakwamayokudiyao moya'aidi ada Gilika kaliva moya'aidi hivetumagana.
13 #
Af 14:19
Tu badi miYuda Tesalonaika againe Folo valeyana hinogalina, higa Yaubada bonana Beliya againe kadu gilulumamalena. Hinogalini-yo Beliya againe hiyemu, hivebutu kaliva hivesilakahidi ada hisiveyo'odi be hinuwanuwakoyo. 14Yo'o hinuwanuwakoyo fa'ina, tovetumagana auhe'ama bana Folo melala taliya againe hivagahegena be ginayage, tu badi Sailosi Timoti Beliya againe himiya. 15Ada badi kaliva Folo hivebwa'uliyena-ma melala ana egana Adenisi againe hivegaloveni tu Beliya againe hiyewadi. Nagona Folo venuwa'ata Sailosi Timoti fa'idiya giveledi gigayo, “Wanagahedi be iya agaikuya hinamadu'ela.” Gigahedi-yo badi hilowoga.
Folo miAdenisi agaidiya gilumamala.
16Tu Folo Adenisi againe Sailosi Timoti fa'idiya gibodaboda tu ase'asena gi'u'aulolo, fa'ina kilumina keke sa'eyadi melalai-nadi againe hidauda-ma gi'itadi. 17Kilumina moya'aidi gi'itadi fa'ina, aiyeta sa'eyana sa'eyana Yaubada bonana gilulumamalena. Badi miYuda kadu yo'o tulidiyao kalivai-dina Yaubada hihawadavadavana-ma sinagogi againe bana buye hive'agahegahe, kadu gaveyao melala hinafane hinunudadana-ma badi agaidiya gilulumamala. 18Kadu tonuwahuya tufoidi bana Folo buye hive'agahegahe adi yo'o luhei, sa'eyana adi egana Efikuliyani, kadu sa'eyana adi egana Sitoika. Tufoidi higayo, “Hida hima togakahikahi kwavakwavana vaita gavaimi gidalukahihiyeni?” Kadu tufoidi higayo, “Ka'i viviluwa tulidi fa'idiya gilulumamala.” Hidedemi higahe higa Folo Yesu Tauna kadu yana mididi-havagi gilumamalena fa'ina. 19Tova moya'aina gilulumamala fa'ina, hiyowanina be Koniselo yadi vaga'auta againe hivega'aulena, abavaga'auta ana egana Aliyofago. Ada ahe hivaga'auta-yo higahe higayo, “Nuwanuwama hida eda ivaguna o ululukahihiyena-ma anahalamanena. Gavaimi uvehawala? 20Nuwanuwa tufona ulumamalena-ma boi keke tamo hidede amine adanogalini, ada nuwanuwama ana kaivila anahalamanena.”
21Tu miAdenisi kadu hawahawala melalai-nadi againe himiyami-ma, higa keke tamo gavadi hidagani tu tova moya'aina nuwanuwa ivaguna tulina tulina hilulukahihiyena o ka'i hivanevanenegena. 22Badi higahe tu bana Folo gitowamidi Koniselo yadi vaga'auta Aliyofago againe givebutu gilukahihi, gigayo, “MiAdenisi-yo! Omi'iyao viviluwa tulina tulina wahawadavadavadi ma a ga'itana. 23Yami melala hinafane ahe ganudadana yami abahawadavadava ga'ita'itana tu atudidiga sa'eyana ganuhagana-ma againe etoladi gidadauda gigayo,
Viviluwa sa'eyana ana egana
keke kadahalamaneni-ma ana abahawadavadava.
Bana keke wadahalamaneni tu au ai'adi wahawadavadavana-ma, adamoya iya ga'ela be Bana fa'ine ganahawavemogatala. 24#Af 7:48Bana ana egana Yaubada, babi gibubuna kadu gaitoma moya'aina babiya himimiyami-ma gibubudi, ada Bana Yaubadai-nadi lobama kadu babi ana Kaiwabu, tu keke manuwa-tafalolo tomiyababi hikivemididina-ma agaidiya gidamiyami. 25Kadu keke tomiyababi nimada gidavetumaganeni vaita Bana fa'ine tamo gavadi kadafaisewani, keke. Au Bana Tauna tomiyababi moya'aida yawaida inubana, kadu gaitoma moya'aina giveleda. 26#Aba 10:32, 11:9Ada nagona kaliva sa'eyana gibubuna ada bana kalivai-nadi againe yo'o tulidi tulidi hitubuyemu, ada givehimeyedi be hinave'aliyahega babi matatabuna hinavemagana. Ada Bana anakaibe yo'o tulidi tulidi yadi tova gisena, yadi tubuyemu kadu yadi lauyabu givehimeyena, ada gava fafali gava fafali agaidiya hinamiyami-ma kadu givehimeyena. 27#Ais 55:6Ada Yaubada hidedemi gibubudi be kaliva Bana'e hinalelena fa'ina. Nuwadi uyu'uyuyuna fa'ina hinalelena ada ka'i hinakidadanina be hinanuhagana. Tu Bana Yaubada keke lauveya gidamiyami, au moya'aida lilideya gimimiyami. 28E, tamo hakwadi gigahe gigayo, Bana'e yawaida inubana, kadu yada naudadana inubana, kadu yada miyami inubana. Kadu anafaiweya yami tonuwahuya tufoidi ahe higahe higayo, Kadu ide moya'aida Bana natuneyao.
Folo yana laumamala giluyabuna.
29 #
Aba 1:27; Af 19:26 Ada Yaubada gibubuda fa'ina, keke kananuwanuwa vaita Bana anununa kilumina amine, higa gola o siliva o ka'i kuga againe kaliva yadi nuwenuweya yadi ikilukiluma yamumuna amanadi. 30Au kaliva kilumina hibubudi aimo fanifanidiyao ana toveya, ada medema tovai-nadi Yaubada keke gidanuwenuwedi vaita matahiwadi gidaveledi, tu tova adamoya kaliva moya'aidi fafali tulina tulina agaidiya givehimeyedi be yadi dewa koyona hinavenikohiyena. 31#Yo 5:22; Af 10:42Hidedemi hinahagaviladi fa'ina vedewayauga ana tova ahe gisena be tomiyababi moya'aida ginavedewayaugida. Yada dewa kabi'ona be lakahina gihalamane-'owona fa'ina, yana vedewayauga au tunutunugina. Ada Kaliva sa'eyana givegidena be Bana ginavedewayaugida. Ada Bana Kalivai-nadi alikeya gisivemididina fa'ina, ide kahalamanena Bana velemona ginavedewayaugida.” Au hidedemi Folo yana laumamala.
32Tu badi Folo yana gahe kaliva yana mididi-havagi fa'ina hinogalina againe, tufoidi hihawavelaigena tu tufoidi ma higahena higayo, “Nuwanuwama hidevama fa'ina unalukahihi-havagi be ananogalina.” 33Ada au Folo Koniselo yadi vaga'auta againe gihobu. 34Tu kaliva tufoidi Folo hivetobohiyanena, hivebutu hivetumagana. Ada badi agaidiya kaliva sa'eyana gimiyami, ana egana Daiyonisiyo, bana Aliyofago koniselo sa'eyana, kadu kwamayoku adi egana Damalisi, kadu kaliva velugadiyao.
ទើបបានជ្រើសរើសហើយ៖
Afositolo 17: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
