Afositolo 19
19
Folo Efeso againe gilumamala.
1-2 #
1Ko 3:6; Af 2:38, 8:15-16 Tu Afolosi Kolinita againe aimo gimiyami tu bana Folo eda guwameya gina-ma amine ginauna, ada gina gihobu melala ana egana Efeso againe. Au medede againe tovetumagana tufoidi ginuhagadi, ada gitoliluveluvedi gigayo, “Boi omi wamidivetumagana ana toveya, ka'i Alu'aluwa Mahalina giluvaiyemi o ka'i keke?”
Badi higayo, “Keke. Alu'aluwa Mahalina ana egana boi keke tamo hakwadi gidayakahini-yo adanogalini.”
3Bana Folo gigayo, “Taumadi! Gavaiya'amine wabafitaiso?”
Badi higayo, “Yoni yana gahe amine abafitaiso.”
4 #
Md 3:11
Au bana Folo gigayo, “Yoni ma kaliva yadi dewa koyona hivenikohiyena-ma gikivebafitaisoyedi, ada gigahedi gigayo, Bana mulikuya gina'ela-ma wanavetumaganena, higa Yesu fa'ine gigahe.” 5Ada badi hidedemi hinogalini-yo au Kaiwabu Yesu ana eganeya hibafitaiso. 6Ada Folo nimana badi agaidiya giseni tu Alu'aluwa Mahalina giluvaiyedi-yo mali meya agaidiya hilukahihi kadu Yaubada yana venuwa'ata gitunevehabalutugidi-yo hi'awatalatalainena. 7Ada adi yo'o ma kaliva tuwelo amine.
8Tu Folo givebutu manuwa-abavehawala ana egana sinagogi againe ginauna ada vaikohi tohiye agaidiya ase'asena bouna kaliva agaidiya gilulumamala, buye hive'agahegahe tu Folo Yaubada yana yo'ogaga ana luku fa'ina gilulukahihi toyogina, higa gidasive'auyedi. 9#Af 19:23Tu badi tufoidi tagadi kuluna, keke nuwanuwadi hinavetumagana, ada kaliva moya'aidi matadiya Kaiwabu yana Eda hihawavekoyoyena. Au Folo ginuyabuyabudi, ada tovetumagana gigahedi be buye hinuvehaila. Au aiyeta sa'eyana sa'eyana kaliva sa'eyana, ana egana Tilano, yana manuwa-abalaumamala againe kaliva buye hiveve'agahegahe. 10Ada au hidedemi ginunauwena malamala luhei, fa'ina miYuda kadu yo'o tulidiyao kavewagadi miGilika moya'aidi fafali ana egana Esiya againe himiyami-ma Kaiwabu bonana hinogalina.
Siva natuneyao higaluvaluva be yafune hinawavidi.
11 #
Af 14:3
Tu Yaubada Folo gifaiwalavelena be aituha fifiwala-mo'ena gififaisewana. 12#Af 5:15Ada Folo kaliva gihawahegedi be bana u'una ana kaleko hitana fa'ina kadu kaleko faisewa fa'ina goline gihifohifona-ma hivaivaina be hinunauwena, to'aulolo agaidiya hiseseni-yo hiyamuyamumu, kadu yafune badi to'aulolo agaidiya hiyemuyemu.
13Tu Yuda tokwelikweli tufoidi hinunumiyamiyanana be yafune hiwaviwavidi. Ada au hinuwanuwa vaita ka'i Yesu ana egana hinayakahina, au yadi kwelikweli ginafaiwala, fa'ina hivebutu Kaiwabu Yesu ana egana hiyakayakahina be yafune hinawavidi fa'ina. Au yafune agaidiya higahe higayo, “Yesu Folo gilulumamalena amanadi, Bana ana eganeya avehimeyemi be wanayemu.” Hidedemi higahegahe. 14Ada kwanaYuda sa'eyana, ana egana Siva, natuneyao kaliva seveni hidede amine hihuluhuluva. Bana Siva higa abaveyao ana tofaisewa adi tonagona sa'eyana. 15#Mk 1:24Badi kaliva adiveseveni hidedemi Yesu ana eganeya hihuluva tu tova sa'eyana yafune gigahedi gigayo, “Bana Yesu gahalamanena kadu bana Folo gahalamanena, tu omi'iyao ma kaliva gaveyao?” 16Kaliva wayafunena hidemi gigahe-yo kaliva tabodiya gihegelakahina, yana wafaiwala gimunukoyokoyodi, au konekonediyao kadu wadayadayagidiyao yana manuwa himadu'otayabuyabuna.
MiEfeso yadi kwelikweli ana buki hikabuna.
17Ada miYuda kadu yo'o tulidiyao kavewagadi miGilika moya'aidi Efeso againe himiyami-ma hida kaliva valeyana hinogalini-yo himatautave'ine, tu kadu Kaiwabu Yesu ana egana hikilakahi-mo'ena. 18Ada au tovetumagana moya'aidi hi'ela adi yo'o matadiya yadi dewa uyu'uyuyuna higa yadi kwelikweli tulina tulina hiyakayakahina-ma hiyauna. 19#2Veh 18:10-12Ada tufoidi moya'aidi tokwelikweli yadi faisewa hi'abi'abina. Au yadi kwelikweli buki againe hi'etoladina-ma se'eyaine hi'aliyena be kaliva matadiya hikabuna. Au buki fatana hikilagalagana ada ana ve'atutamo'aina mani lakahi-mo'ena, kaliva fifiti tausani (50,000) yadi faisewa aiyeta sa'eyana fatana amine. 20Ada au hida gaitoma lakahina gilakayemu fa'ina, Kaiwabu bonana au toyogina ma moya'aidi hi'itana, ada valeyana give'aliyahega be kaliva moya'aidi hivebutu hivetuvetumagana, kadu yadi vetumagana gitubutubuga.
Folo yana naudadana fa'ina givevai.
21 #
Lo 1:13
Tu hida gaitoma ahe gilakayemu-yo au Alu'aluwa Mahalina Folo givehimeyena be higa Yelusalema againe ginayewana, ada fafali adi egana Masedoniya Akaiya amidiya ginana. Au tobohiyaneyao givenuwa'atadi kadu gigayo, “Hida fafali agaidiya ganana-yo gilubodaku be Loma againe gadana gadawakawaka.” 22Au ana toveluga adi'iselu Timoti Elasito gi'iveninisedi be Masedoniya againe hina tu bana tauna aimo fafali ana egana Esiya againe gimiyami.
Vekwageya lakahina Efeso againe gilakayemu.
23Ada medema tovai-nadi vekwageya keke kabi'ona Efeso againe gilakayemu, au Kaiwabu yana Eda fa'ina kaliva hivekwageya. 24Kaliva sa'eyana gimiyami, ana egana Demitiliyo, bana yana faisewa ma lokoloko siliva babiya hiyalayalana-ma againe gibububuna. Badi miEfeso ma yadi viviluwa kwamayoku, adi egana Atemisa hihawadavadavadi, ada bana Demitiliyo yana tofaisewa buye Atemisa yadi manuwa-tafalolo anununa kabikabi'ona siliva againe hibububuna higa kaliva yadi abahawadavadava fa'ina. Ada anununa moya'aina hififaisewadi be kaliva hikimokimonedi fa'ina, tofaisewai-dina yadi mani keke kabi'ona hivaivaina. 25Au Demitiliyo yana tofaisewa kadu mali kaliva yadi faisewa bana amine ma buye gikovavaga'auhidi gigahedi gigayo, “Kaliva wanogali! Hida yada faisewa againe mani lakahina kavaivaina ma wahalamanena. 26#Af 17:29Au taumiyao Folo yana huluva wa'itana o ka'i valeyana wanogalina. Bana gigahe vaita kilumina kaliva nimadiya hibubudi-ma keke velemo'ena viviluwa, ada kaliva moya'aidi ginuwa'abiyedi. Hidedei yada melala Efeso againe kadu fafali ana egana Esiya matatabuna againe ginuwa'abiyedi be bonana hivenogalena. 27Medema keke gidalubodani, fa'ina ka'i kaliva hinavebutu yada faisewa hinahawavekoyoyena, au yada mani inubana ginahavahavaina. Kadu'e ka'i yada viviluwa kwamayoku Atemisa yadi manuwa-tafalolo hinakilowena, ada badi taudi yadi kikaiwabu ginahavaina, badi yada viviluwa kwamayoku Esiya kaliva moya'aidi kadu fafali tulina tulina kalivadi hihawadavadavadi amanadi.”
28Tu yo'o Demitiliyo yana gahe hinogalini-yo hi'ila'a, hivebutu hikovakova higayo, “Badi Atemisa adi egana lakahina, ide miEfeso yada viviluwa badi'e.” 29#Af 27:2Hidedei hikovakova tu melala kalivai-dina moya'aidi hive'atalalakalaka. Au yo'o miMasedoniya adi'iselu hikive'avidi, badi Folo ana bwa'uli adi egana Gaiyasi Alisitako. Hikive'avidi-yo abavaga'auta lakahina againe se'eyaine himadunauwedi. 30Tu bana Folo nuwanuwana tauna ginana, yo'o matadiya ginamidi ginalukahihi tu tovetumagana hihawatana. 31Kadu Esiya fafali ana tonagona tufoidi, badi Folo ahe hivetobohiyanena-ma kalivai-dina, venuwa'ata bana againe hi'iveninisena higayo, “Keke-mo'a abavaga'auta againe unaluku. Au siule, yama gahe udavenogalena.”
32Tu abavaga'auta againe kaliva tufoidi hidede amine hikovakova kadu tufoidi medede amine hikovakova, yadi kova tulina tulina fa'ina tufoidi moya'aidi gavadi-yo hivaga'auta-ma keke hidahalamaneni, au hiyo'o-kawowo. 33Kaliva sa'eyana gimiyami, ana egana Alekisanida, ada bana'e miYuda hituwamadumadugena be yo'o matadiya ginamidi, fa'ina yo'o hivaita bana'e vekwageya inubana gidahalamaneni. Au nimane giluhawatadi be yo'o ginakivetuvetunudi ada hinahalamanena vekwageya inubana keke bana againe. 34Tu bana kwanaYuda ma hihalamanena againe, moya'aidi hivebutu seyaseya'aine hikovakova higayo, “Badi Atemisa adi egana lakahina, ide miEfeso yada viviluwa badi'e.” Ada yadi kovakova hinunauwena bai luhei.
Melala ana kalaka vekwageya gikwe'una.
35Hidedemi hinunauwena tu kaliva sa'eyana, melala ana kalaka, gifaiwala be gigaheve'ilovedi. Hi'ilova-yo gigahedi gigayo, “Omi miEfeso wanogali! Kaliva moya'aidi hihalamanena ide miEfeso Atemisa yadi manuwa-tafalolo ka'ita'itave'avina, badi'e yada viviluwa kwamayoku lakahidi. Kadu'e ide yadi kabala tabutabuna lobameya gihobu be ka'ita'itave'avina ma moya'aidi hihalamanena. 36Ada keke tamo hakwadi hida gaitoma anafaiweya ginahawavefwayayeni, fa'ina yami ago'uga auwe wa'iloveni. Keke kaliva kwavakwavadiyao amine wanahuluva. 37Hida kalivai-dina keke manuwa-tafalolo ana lokoloko tabutabuna hidaki'afuni, kadu yada viviluwa kwamayoku agaidiya keke hida'ihawadamana. Keke hidedemi hidahuluva nonogana wakive'avidi be hidei abavaga'auta lakahina againe wa'aliyedi. 38Ka'i bana Demitiliyo yana tofaisewa buye nuwanuwadi tamo hakwadi hinavekotuna digo, kotu ana aiyeta fa'ina vehimeya gidadauda, kadu tovedewayauga himimiyami. Au adifaiweya hinana hinavekotudi. 39Tu ka'i tamo gavadi fa'ina kadu nuwanuwami wanalukahihiyena, au koniselo wadavenuwa'atadi ada yadi vaga'auta againe hidanuwenuwena be vehimeya hidasena. 40Ka'i yada tovehimeya lakahidiyao Loma againe yada vekwageya valeyana hinanogalina, au vita kananuhagana. Ide kavekwageya-kawowo ada ka'i hinatoliluvaluva hinagayo, Gavadi-yo wavekwageya? Au keke-mo'a adafaiweya gavaimi kanagahedi, fa'ina keke kotu ana vehimeya amine kadahuluva.” 41Ada au hidedemi gilukahihi gihavaina, yo'o gigahedi gigayo, “Auwe, wanana yami manuweya.”
ទើបបានជ្រើសរើសហើយ៖
Afositolo 19: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
