Afositolo 16
16
Timoti badi Folo Sailosi gibwa'ulidi.
1 #
2Ti 1:5
Folo ginumiyamiyanana tu melala adi egana Debi Lisidila agaidiya giyemu. Ada medede againe tovetumagana sa'eyana gimiyami, ana egana Timoti. Hinana ma kadu tovetumagana ada badi vineYuda tu tamana ma kwanaGilika. 2#Fl 2:19-22Ada tovetumagana moya'aidi Lisidila againe kadu Aikoniumi againe Timoti hihawaveyamumuyena. 3Au Folo nuwanuwana Timoti bana ginabwa'ulina, ada melala tulina tulina hinanudadanidi-ma agaidiya miYuda himiyami be moya'aidi hihalamanena Timoti tamana kwanaGilika, fa'ina Folo Timoti wowone Yaubada yana iya'iyaya gitomogolohina be miYuda keke hinakiloweni. 4#Af 15:23-29Ada melala tulina tulina agaidiya hinunumiyamiyanana tu afositolo kadu tovetumagana adi tonagona Yelusalema againe gavaimi hivehimeya-ma badi tovetumagana hivenuwa'atadi be higa vehimeyai-dina hina'itave'avidi. 5Ada au tovetumagana adi yo'o tulina tulina yadi vetumagana gitubutubuga kadu aiyeta sa'eyana sa'eyana himoyamoya'ai.
KwanaMasedoniya giyowanina ma Folo gi'avayaunena.
6 #
Af 18:23
Tu Folo ana bwa'uli buye hinunudadana-ma Alu'aluwa Mahalina gihawatadi be keke fafali ana egana Esiya againe Kaiwabu bonana hinalumamaleni. Gihawatadi fa'ina, fafali adi egana Filidiya Galesiya adihinafeya hinauna. 7Ada fafali ana egana Maisiya tufone hiyemu againe, hinuwanuwa vaita fafali ana egana Bidiniya againe hidana, tu Yesu Alu'aluwana kadu gihawatadi. 8Hidema fa'ina Maisiya hinafane hinauna hinauna tu melala sa'eyana ana egana Talowasi againe hihobu. 9Ada bogi againe Folo gi'eno'ita ada yana ita againe kwanaMasedoniya gi'itana, gimidimidi tu give'ove'o'olena toyogina gigayo, “Masedoniya agaimeya uda'ela udavelugama.” 10Ada Folo hidede amine gi'eno'ita fa'ina, (iya Luke badi buye) akidewadewa be Masedoniya againe anamaduna. Au anuwanuwa higa vaita Yaubada givehimeyema be Venuwa'ata Yamumuna miMasedoniya agaidiya analumamalena.
Lidiya Yesu againe hivetumagana.
11Akidewadewa ada wakeya ayage digo Talowasi ahege tu himula ana egana Samodelesi againe adamana. Bogi ada mala gilauna kadu adamana, melala ana egana Niyafolisi againe ayemu. 12Ada medede againe ahobu, au ana melala ana egana Filifai againe. Filifai Masedoniya ana fafaliya gidauda ada medema fafali-nadi againe Filifai melala lakahina. Ada melala-mo'ena miLoma hive'alahina. Ada au medede againe aiyeta tufona amiyami. 13Ada sabati againe melala tufone ana gufeya ahobu. Avaita gufa afa'aine miYuda ve'ove'o'ola fa'ina tova moya'aina hidavagavaga'auta. Au ayemu ada ahiyoto be vevine ahe hivaga'auta-ma agaidiya avebutu alumamala. 14Ada tovanenega agaidiya kwamayoku sa'eyadi himiyami, adi egana Lidiya badi vineTaiyataila. Yadi faisewa ma kaleko likelikena fatana lakahina ana kimonevedamana. Ada badi Yaubada hihawadavadavana. Au Folo gilumamala againe, Kaiwabu nuwadi gikiyauna be yana laumamala hivenogalena. 15#Af 16:33, 18:8Hivetumaganeni-yo hibafitaiso, badi'e kadu yadi manuwa hinagena ana yo'o buye'i. Hibafitaiso gihavaina, hive'o'olema toyogina higayo, “Ka'i omi wanuwanuwa vaita ima Kaiwabu adavetumagane-mo'eni, au wa'ela be yama manuweya wanamiyami.” Ada au hisive'auyema.
Folo Sailosi Filifai againe deliya hisedi.
16Tova sa'eyana ve'ove'o'ola ana abavaga'auta againe anauna tu agetoga kwamayoku edeya amaduhagana, kwamayoku-nadi balauma giluvaiyena. Bana balauma halamana givelevelena be gavadi gavadi aimo ginalakayemu-ma, bana kwamayoku gihawahawavemogatalena. Ada kaliva vevine moya'aidi agetoga ana tovehimeya mani hiveleveledi be aimo gavadi badi agaidiya ginalakayemu-ma kwamayoku ginahawavemogatalena fa'ina. Ada au bana yana hawavemogatala againe ana tovehimeya yadi mani lakahina hivaivaina. 17#Mk 1:24Au kwamayoku Folo kadu ime buye gimulimuliyema, gikovakovadona gigayo, “Hida kalivai-dina Yaubada Getane-mo'ane yana tofaisewa. Kibababala ana eda fa'ina omi agaimiya hilulumamalena.” 18#Mk 16:17Au hidede amine ginunauwena aiyeta a gavaiyehi tu Folo dibuna gitoyoga, fa'ina gihagavilana yafune againe gigahe gigayo, “Yesu ana eganeya gavehimeye be kwamayoku unanuyabuyabuna.” Ada auhe'ama yafune gimadunuyabuyabuna.
19Tu agetoga ana tovehimeya yadi mani inubana kwamayoku yana hawavemogatala againe a gihavaina-ma hi'ayaunena. Hidedemi hi'ayaunena fa'ina, Folo Sailosi himadukive'avidi digo abavedewayauga melala hinafane hitaidi be melala ana tonagona matadiya hisedi. 20#Md 10:17-18Au tonagona, badi miLoma, matadiya hisedi tu higahe higayo, “Hida hima kalivai-dina miYuda, ada badi fa'idiya vekwageya lakahina yada melaleya gilakayemu. 21Dewa tulina hivehavehawalayena ada dewai-nadi againe ide Loma kaliva yada vehimeya hihawatana. Au ide Loma kaliva fa'ina keke adafaiweya yadi vehawala kana'abini o ka'i kanadibumuhigeni.” 22Badi agetoga ana tovehimeya hidedemi higahe tu kadu yo'o hivebutu Folo Sailosi himunumunudi. Au melala ana tonagona hivehimeya be tolugaviya adi kaleko hinavehalilini-yo hinalaulaudi. 23Ada ahe himunukoyokoyodi-yo deliya hihegenauwedi, ada deli ana to'itave'avina hivehimeyena be gina'itave'avi-hagihagiyedi. 24Au to'itave'avina hida vehimeya ginogalini-yo abamiyami hinagene-mo'ane gisedi, ada agedi yowana folefolegina againe hihuya-yo hilokana.
Yaubada li'uli'u gi'iveninisena be Folo Sailosi
deliya gisehobuyedi.
25 #
Kl 3:16
Tu bogi nafone Folo Sailosi hive'ove'o'ola kadu Yaubada againe hikwelikweli tu filisina velugadiyao hivanevanenega. 26Hikwelikweli tu auhe'ama li'uli'u lakahina gilakayemu ada deli ana manuwa gili'uli'u. Kadu auhe'ama wanafali moya'aina gi'ayauyau-'owona, ada filisina moya'aidi adi bulava kainumula gi'agologolohina. 27Au deli ana to'itave'avina gi'enohabalutuga, ada deli ana wanafali gi'ayauna-ma gi'itana againe, ginuwanuwa vaita filisina moya'aidi ahe hida'ota fa'ina yana ilama gisiwakana be tauna ginaluve'alikana. 28Tauna gidaluve'alikana ma Folo gikovadona gigayo, “Umiya, keke tauni unaluve'alika! Au we'a moya'aima amimiyami.”
29Au to'itave'avina mahala fa'ina gikova. Givaini-yo gimaduluku ada Folo Sailosi agediya gi'ibo'ula-mo'a tu yana wamatauta givetavetatava. 30Ada au deliya gisehobuyedi digo gitoliluveluvedi gigayo, “Kaliva, gavadi ganagani-yo Yaubada yana kibababala gananuhagani?”
31Badi higayo, “Kaiwabu Yesu againe unavetumagana be kibababala unanuhagana, o'eni kadu ya manuwa hinagena yo'oi-dina buye'i.” 32Kadu Kaiwabu bonana bana againe kadu yana manuwa hinagena moya'aidi agaidiya hilumamalena. 33#Af 16:15Ada bogi nafona nonogana to'itave'avina ginauwedi be adi koliya gikolana. Ada keke gidaboda, auhe'ama bana'e kadu yana manuwa hinagena moya'aidi hibafitaiso. 34Hibafitaiso gihavaina, to'itave'avina Folo Sailosi yana manuweya givega'auledi be adiga gikidewedewena. Ada au bana'e yana manuwa hinagena buye hivemwamwala-mo'a, Yaubada againe hivetuvetumagana fa'ina.
MiLoma tonagona hikoyo fa'ina Folo gidakeyedi.
35Tu mala gilauna miLoma tonagona yadi filisimani hi'iveninisedi, vehimeya hiveledi be deli ana to'itave'avina hinagahena hinagayo, “Wadema kaliva adi'iselu unayaudi be hinana.” 36Au yadi vehimeya to'itave'avina ginogalini-yo Folo givenuwa'atana gigayo, “Tonagona yadi vehimeya hisena be o'eni Sailosi buye ganayaumi be wanana. Au wanana tu yami lowoga keke kaliva moya'aidi matadiya.”
37 #
Af 22:25
Tu Folo filisimani agaidiya gigahe gigayo, “Badi Loma tonagona nonogana miLoma yada vehimeya gigahe amine keke hidahuluva. Vaita nagona kaliva hidamidivedewayaugidi-yo muliya fanisi ana vehimeya hidaseni. Tu ime Loma kaliva nonogana keke hidavedewayaugima, au himaduvehimeya be tolugaviya kaliva moya'aidi matadiya hilaulauma-yo deliya hihegenauwema. Ada tova adamoya nuwanuwadi hinawavima be ananaukau. Keke-mo'a! Au Loma tonagona taudiyao hidedei hida'ela hidayauma.”
38Au filisimani Loma tonagona agaidiya hida gahe hi'awatalatalainena, ada Folo Sailosi higayo, Ime Loma kaliva, ma badi hinogalini-yo au himatautave'ine. 39Au hina badi agaidiya higahe higayo, “Ime akoyo fa'ina keke adavedewayaugimi miLoma yada vehimeya gigahe amine. Au nuwanuwama wanahobu be yama melala wananuyabuyabuna.” 40Ada au Folo Sailosi deliya hihobu be Lidiya yadi manuweya hina. Ada medede againe tovetumagana buye hivaga'auta be hilu'ageyedi. Hilukahihi gihavaina, au hilowoga.
ទើបបានជ្រើសរើសហើយ៖
Afositolo 16: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
