Say Kumadwan Libro na SARAY MACABEO 12
12
Apatey iray Judio ed Jope
1Nen asumsumpal so paknaan na pankakaaro na saray Judio tan saray taga Siria, pinmawil ed ari si Lisias, tan pinmawil ed dadalusan da iray Judio. 2Balet saray pigaran gobirnador a di Timoteo tan Apolonio a lakin anak nen Gennio, Jeronimo tan Damopon et ag da ra labay a pambilayen ed kareenan; ontan met so ginawa nen Nicanor a pangulo na saray sondalon inupaan a taga Chipre.
3Diad sarayan panaon, saray taga Jope et nanggawa ra na maruksan bengatla ed saray Judion walad siudad da. Nankonkonwanan iran kaaro da ray Judio tan inimbitaan da ra tan saray kabyangay pamilya ra ya onlogan ed saray bapor ya imparaan da, ta mambaroy irad dayat. 4Bangta nampapaknaan yan gawaen na amin a totood baley, ag balut anginap ira may Judio, kanyan inmabubon ira a pangipanengneng day kaabigay linawa ra. Balet nen wala la rad dayat impalner na saramay taga Jope ira may duan lasus a Judio.
5Kadngel nen Judas ed sayan inaayep ya agawad saray kapara ton Judio, impakabat tod saray totoo to so agawa. 6Kayari ran nampikasi ed Dios a matonung a huis, dinogpaan da ra may managpatey na too. Nen sakey a labin ag da ra nanengneng, pinoolan dan amin iray bapor ed daungan, tan pinatey dan amin iray totoon arumog dan onaamut diman. 7Akatalak iray puirta na siudad, kanyan pinmoliktar lay Judas; balet getma ton ompawil ed arum a panaon, ta pateyen ton amin iray manaayam diman.
8Nangelan nen Judas ya iplaplano na saray taga Jumnia a pateyen da met iray Judion manaayam ed siudad da. 9Kanyan dinogpaan tod labi so Jamnia, tan pinoolan toy daungan tan saray bapor diman. Sankanengneng ed Jerusalem so apoy, anta talomplo tan duan kilomitro so kaarawi tod man.
Saray Impanatalo nen Judas ed Lugar na Galaad
(1 Mac. 5:9-54)
10Nen si Judas tan saray totoo to et sakey a duaran kilomitro so kaarawi rad Jamnia diad pibakal dad kinen Timoteo, dinogpaan ira na masoluk a liman libon Arabe a kaiba ray liman lasus a sondalon akakabayo. 11Pinasyan bakal so agawa, balet lapud pananulong na Dios tinalo da ra man a totoon akar-akar ed kalawakan, a kabekta et akikaaro ra lamlamang ed saray Judio. Insipan da ya itdan da ray Judio na saray ayayep tan insipan da met a tulongan da ra diad panamegley na arum iran polaing. 12Inmabubon a mikaarod sikara si Judas, ta ninunot ton say pikakaaro ra et nayarin ikanad amayamay a pamaakaran; kayari to ya, pinmawil ed saray tulda ira may Arabe.
13Dinogpaan met nen Judas so Caspin, say malet tan aliber na padir a siudad. Alauk a Hintil iray totoon manaayam diman. 14Nanmatalek irad biskeg na saray padir da tan maniilalo ran magenap so nisimbom a pambilay da legan na kalakob da. Kanyan niluludlurey da si Judas tan saray totoo to, ineeyag da ray salitan panamabaing ed sikara tan inaayew da so Dios da. 15Balet nampikasi ra may Judio ed Makapanyarin-amin a Katawan na sansinakuban ya angigeba na saray padir na Jerico diad saramay agew nen Josue, anggaman ya ag nikana iray panagbongbong na padir odino saray armas a panlakob. Insan pinaspasya ray indogpa rad samay padir, 16et lapud linawa na Dios, adakep da may siudad. Diad karakel na totoon pinapatey na saray Judio, say asingger ya ilog, a say kaawang to et sakey a kakatlo na kilomitro, et singa napno na dala.
Tinalo nen Judas iray Sondalo nen Timoteo
(1 Mac. 5:34-44)
17Manlapud siudad na Caspin, nankurang si Judas tan saray totoo to na sakey a siamaplo tan siam a kilomitro ya anggad akasabi rad Caraca a panaayaman na saray Judio tan asingger ed siudad na Tob. 18Balet ag da nalmod man si Timoteo, lapud tinaynan to la man a lugar. Anggapod man so agawaan to, likud ed impangitilak tod sakey a pasen na mabiskeg a tirinsira tan saray sondalo. 19Saray duaran panguloy sondalo nen Judas, a di Dositeo tan Sosipatro, et dinogpaan da may tirinsira tan pinatey dan amin iray samplon libon totoo a nipasen diman. 20Insan impankapiga nen Judas ya olup iray sondalo to, tan impasen ton pangulo na sansakey ya olup ira di Dositeo tan Sosipatro. Ginanatan dan inosilan si Timoteo a walay sanlasus tan duamplon libon sondalo ton akaran tan duan libo tan liman lasus a sondalo ton akakabayo. 21Nen akabatan nen Timoteo ya oosilan nen Judas, pinaona tod siudad na Karnaim iray bibii tan saray ogogaw a sankaawit da ray balkut da. Sankairapan a lakoben odino sabien so Karnaim, lapud mainget a tuloy iray dalan a mamaarap diman. 22Balet diad bektan nanengneng la ra may onaan ya olup na saray sondalo nen Judas, agewgew ira may sondalon kalaban, lapud sakey a pasingayew ya impanengneng na Dios a sankanengneng toy amin a bengatla. Diad gaway takot da, ag da amtay abatik-batik da tan amayamay ed sikaray agugatan na saray ispada na dilin kakaiba ra. 23Kanyan si Judas tan saramay totoo to et pinaspasya ran inoosilan ira may kalaban, tan akapatey ira na masoluk a talomplon libo. 24Adakep si Timoteo na saramay sondalo di Dositeo tan Sosipatro. Balet masilib a tuloy, kanyan apanisia to ra ya amayamay iray priso to a kakanayon na saray Judio tan pateyen da ra no walay nagawad sikato. 25Nen insipan ton pasempeten to ray kakanayon da tan anggapoy maoges a nagawad sikara, imbolus da.
Saray Arum ya Impanatalo nen Judas
(1 Mac. 5:45-54)
26Insan dinogpaan nen Judas so siudad na Karnaim tan say timplod man na diosan Atargatis, et akapatey na duamplo tan liman libon totoo 27tan sigput ton dineral so siudad tan say timplo. Insan to dinogpaan so aliber na padir a siudad na Efron a panaayaman nen Lisias tan#12:27 Lisias tan; anggapo ra yan salita ed pigaran manuskrito. saray totoon manaayam diman a nanlapud amin a bansa. Sipaparaan a nanalagey ed arap na saray padir iray mabiskeg a lalakin tobun-balo tan masebeg iran akilaban; tan nisinup iray amayamay ya abasto tan armas ed dalem na siudad. 28Balet saray Judio et kinmerew ira na tulong ed Katawan a mamopoter na pakayari da ray kalaban to. Kanyan adakep da may siudad tan apatey day sakey a duamplo tan liman libon totoo. 29Manlapud man nangganat iran linmad siudad na Betsan, a walomplon kilomitro so kaarawi tod baybay na Jerusalem. 30Saray Judiod man et imbaga rad kinen Judas so ontan lan kinamaung ed sikara na saray totood saman a siudad, nagkalalo la no panaon na kairapan. 31Kanyan akisalamatan nen Judas tan saray kakaiba to iray totood man tan kinerew ton ituloy day kamaungan dad saray Judio diad arapen a panaon. Insan ira amaarap ed Jerusalem, tan akasabi ra nen magano lan onsabi so Pista na Panagani.
Tinalo nen Judas si Gorgias
32Kayari na Pinticostis (a sikatoy tawag ed salitay Grigo na Pistay Panagani) ginanatan nen Judas tan saray totoo to so linman mibakal ed Gorgias a gobirnador na Idumea, 33ya inabet to ra na talon libon sondalon akaran tan apat a lasus ya akakabayo. 34Diad sayan bakal ya agawa, pigaran Judio iray apatey. 35Insan si Dositeo, sakey a Judion taga siudad na Tob#12:35 sakey a Judion taga siudad na Tob; diad pigaran manuskrito sakey ed saray totoo nen Bacenor. tan sakey a makapanyarin kumakabayo, et siningkat tod kawes si Gorgias, insan to inggayugoy diad biskeg to, ta labay ton naerel a mabilay iman ya andi-kakanaan a too. Balet biglan say sakey ed saray kumakabayon taga Tracia et binmatibatik a dinmago, tan pinotut toy taklay nen Dositeo, kanyan akabatik ed siudad na Marisa si Gorgias.
36Abayag la natan a mibabakal iray Judion ipapangulo nen Esdrin tan naknaksawan la ra. Kanyan nampikasi si Judas ya ipanengneng na Katawan a kagampi to ra tan sikatoy mangipapangulo ed saray sondalo ra. 37Insan legan nen Judas a mangakantad dilin salita to na eyag na pibakal, biniglaan na saray Judio a dinogpaan si Gorgias tan saramay totoo to, et pinabatik da ra.
Saray Pikakasin para Saray Totoon Inaatey ed Bakal
38Kayari na bakal, inwanwan nen Judas ed baley na Adulam iray totoo to. Agew ed saman na kasakbayan na Agew na Panagpainawa, kanyan nilinisan day sikaran dili onung na kaogaliyan na saray Judio, insan da nginilinan so masanton agew. 39Diad ontombuk ya agew, nakaukolan a tiponen da ray bangkay na totoon apatey ed bakal tan ikotkot da ra ed saray lobuk na pamilya ra. 40Balet diad dalem na kawes na kapag bangkay akarumog ira na saray ankekelag a talintao da ray diriyos a gagalangen ed Jamnia; isesebel na Ganggan ya isolung ira ya na saray Judio. Naamtaan ed satan na amin a totoo so inateyan na saraman a lalaki. 41Kanyan indayew da iray kagagawa na Katawan, say matonung a huis a mangipapaamtad saray bengatlan akaamut. 42Kinerew dad sikato a napaandi lan sigput komun iyan kasalanan. Insan si Judas a matalonggaring a too et impurpurek tod saray totoo ya arawian day kasalanan, ta anengneng dan dili so agawad saramay totoon nankasalanan. 43Akiala met na kuarta ed saray totoo to, tan masoluk a sakey tan kapalduan kilon pilak so atipon to. Impaiyakar to ya ed Jerusalem, pian nikana ed pangisaklang na bagat a para kasalanan. Ginawa nen Judas yan kamaungan, lapud manisia ed kiolid bilay na saray inaatey. 44No ag to anisia a napaolid bilay iray inaatey, inaambagel tan andi-kakanaan komun so pangipikasid sikara. 45Lapud malet tan masimoon a pananisia nen Judas ya amin a matoor a totoo na Dios et makaawat ira na makapakelaw a tumang, sikatoy angisaklang na bagat a para kasalanan, pian nabolus ed kasalanan da ira may inaatey.
ទើបបានជ្រើសរើសហើយ៖
Say Kumadwan Libro na SARAY MACABEO 12: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983