Say Kumadwan Libro na SARAY MACABEO 11
11
Tinalo nen Judas Macabeo si Lisias
(1 Mac. 4:26-35)
1Ag abayag nanlapud samay inkatalo nen Timoteo, si Lisias a kanayon tan managasikaso na Ari, tan pangulo na gobirno, et nadngelan toy inkagawa. Akapasnuk 2tan impangulo ton sumpad saray Judio so walomplon libon sondalo ya akaran tan amin da ray sondalo ton akakabayo, ta getma ton pagmaliwen a sakey a siudad a Grigo so Jerusalem. 3Pambuisen toy Timplo, a singa amin a pasen a panangigalangan na saray Hintil, tan para lako a tinaon so kipapasen na Pangulon Pari. 4Makaliliket si Lisias ed saramay pigamplon libon sondalo to ya akaran, saray nilibon sondalo ton akakabayo, tan saray walomplon ilipanti, kanyan ag to ingalngalep so pakayari na Dios. 5Nilooban toy Judea tan dinogpaan toy tirinsira ed Bet-sur, a sakey a duamplo tan duan kilomitro diad niabalaten na Jerusalem.
6Nen nadngelan nen Judas tan saray totoo to a lalakoben nen Lisias iray tirinsira da, sikara tan amin a totoo et nanakis tan nanermen ira. Kinerew dad Katawan a mangibaki na sakey a maung ya anghil a mangyagel ed sikara. 7Si Judas so akaonan angala na saray armas to, tan tinanggoyur to ray arum a milad sikaton mangiposta na bilay da diad itulong dad saray kapara ran Judio. Kanyan nankakasakey iran sinmulong a walay baleg a seseg da. 8Balet ag ni ra akaarawid Jerusalem, nen biglan naimano ra ya iwawanwan ira na sakey a toon akakabayo ya akakawes na ampoti tan sankaawit to ray balituk ya armas. 9Tampol a nankakasakey iran akisalamat ed Dios, lapud panangasi to; pinasebeg to ran amin, kanyan aliwa labat a saray totoo so nayarian dan dogpaan, no ag ingen pati saray sankasebegan ya ayayep odino anggan saray balatyang a padir. 10Kanyan nankurang iran sipaparaan a mibakal, tan kaiba ra may imbaki na Katawan ed sikara lapud panangasi to. 11Insan singa ra saray lion a dimogpa ed saray kalaban da. Akapatey ira na labinsakey a libon sondalo ya akaran, tan sanlibo tan anem a lasus a sondalon akakabayo, tan pinasoot dan pinabatik iray arum diad pangyagel dad bilay da. 12Karaklan ed saramay batik et asugatan ira tan intitilak da ray armas da. Nilaban labat si Lisias, lapud binmatik a singa sakey a toon payakot.
Akikaaro si Lisias ed saray Judio
(1 Mac. 6:56-61)
13Inkana nen Lisias so olo to. Diad impandalepdep tod inkatalo to, abirbir to a lapud makapanyarin Dios ya akibakal para saray Judio, ag nayarin balut a taloen ira. Kanyan nansulat ed saray Judio, 14ta tinanggoyur to ran onabubon a mankakaaro ra tan insipan to a gawaen toy anggaay nayarian ton mikaaro so ari ed sikara. 15Ninunot nen Judas Macabeo so pankaabigan na saray totoo, kanyan inmabubon ed amin a labay nen Lisias a nagawa, bangta inter na ari ya amin iray nisulat a kerew nen Judas ya imparontal tod kinen Lisias.
Say Sulat nen Lisias ed saray Judio
16Saya so kopia na sulat nen Lisias ed saray Judio:
Nanlapud Lisias yan sulat a para saray Judio. Awat yo pay maliket a pabanok. 17Saray imbaki yo a di Juan tan Absalom et inyawit dad siak so kasulatan ya impaawit yod sikara, tan kinerew dad siak ya onabubon ak ed saray logan to. 18Impaamtak ed ari iray bengatlan nepeg ton nakabatan, et inmabubon a gawaen so antokaman a nayarin gawaen. 19No mansiansia kayon matoor ed gobirno, gawaen kod arapen a panaon so antokaman a pankaabigan yo. 20Binilin ko la ray mangilalaman ed sikayo tan saray mangilalaman ed siak a mitongtong irad sikayo, pian nasingbat so amiamin a bengatlan nipaakar ed sarayan pamaakaran. 21Maung lawas komun so kipapasen yo. Nisulat ya ed kumalabinliman agew na bulan na Dioscorinto nen taon 148.#11:21 TAON 148: Kapara to yay 164 K.C.
Say Sulat na Ari ed Kinen Lisias
22Nia so kopia na sulat na Ari:
Nanlapud Ari Antioco yan sulat a para kagalgalang a Lisias. Awat mo pay maliket a pabanok. 23Natan ta inatey lay amak tan kaiba to la ray diriyos, labay kon ag nasigensigen iray totood nanarian ko diad panggawa ray labay da. 24Atalusan ko ya ag labay ya aligen na saray Judio so panagbilay na saray Grigo, onung ed ginetma nen amak no ag ingen labay day dilin panagbilay da, kanyan kinerew dan naabuloyan iran mambilay onung ed saray kaogaliyan da. 25Bangta pilalek kon mambilay iran ag nasigensigen a singa saray arum a bansa ed impiriok, igaganggan ko natan a nipawil ed sikara so Timplo ra tan naabuloyan iran mambilay oung ed kaogaliyan na saray lalaki ra. 26Ibagam pad sikara yan getma tan ibagam ya ag da panduaruwaan so pikakaarok ed sikara, pian mareen so panggawa ray labay da tan anggapoy nepeg dan pampagaan.
27Nia so kopia na sulat na ari ed saray Judio:
Nanlapud Ari Antioco yan sulat a para saray pangulo na Judio tan amin da ray Judio. Awat yo pay maliket a pabanok. 28Iilaloan ko a maung lawas komun so kipapasen yo. Maabig so laman ko. 29Imbalitad siak nen Menelao so pilalek yon onsempet la tan makaoley kayo lad labay yon gawaen. 30Kanyan sirin sikayo ran onsempet kasakbayan na kumatalomplon agew na bulan na Xantico et anggapoy nepeg yon takotan. 31Nayarian yo lan ituloy ya onuren iray ganggan yon nipaakar ed panangan tan saray arum a ganggan, a singa gendat a gagawaen yo, tan anggapoy Judion nadusa lapud krimin a ginawa ton ag sikakabat. 32Ibabakik si Menelao a mamareen na kaisipan yo. 33Maung lawas komun so kipapasen yo. Nisulat ya ed kumalabinliman agew na bulan na Xantico nen taon 148.#11:33 TAON 148: Kapara to yay 164 K.C.
Say Sulat na saray taga Roma ed saray Judio
34Saray taga Roma et sinulat da met iray Judio na onggendan:
Nanlapud Quinto Memmio tan Tito Manio a manangilaman na saray taga Roma so sayan sulat a para saray Judio. Awat yo pay maliket a pabano mid sikayo. 35Onaabubon kamid amin ya inter ed sikayo na kagalgalang a Lisias. 36Mamapaarap kami la natan ed Antiokia, kanyan kekerewen mid sikayo ya apiapiger yon aralen iray bengatlan impanon nen Lisias ed ari. Insan ipawit yod sikamin tampol so ebat yo, pian nibaga mid sikato iray manonan pankaabigan yo. Gawa yo yan tampol, 37ya ag kayo la manaabala, pian naamtaan mi ray nampapaknaan yo. 38Maung lawas komun so kipapasen yo. Nisulat ya nen kumalabinliman agew na bulan na Xantico diad taon 148.
ទើបបានជ្រើសរើសហើយ៖
Say Kumadwan Libro na SARAY MACABEO 11: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983