Daa 41
41
Yosɛfu Falaɔ̃ nana bɔɔlɛkɛa
1Wɛ̃̀ bṹu pla gbɛa Falaɔ̃ nana'ò a è á zɛa Niililɛ. 2A è zuda maa mɛkpaaɔ bɔ̀lɛ swapi ɛu mɛn sopla, aalɛ sɛ̃ble dãna guu. 3Ɔ̃ à zuda fɛ̃fɛ̃a wòũwoũɔ è mɛn sopla lɔ. Aa bɔ̀ swa'ɛu, aa bɛ a sɛ̃iaɔ kpɛ, aa zɛ̀ ń saɛ swalɛ. 4Ɔ̃ zù fɛ̃fɛ̃a wòũwoũpiɔ zù maa mɛkpaapiɔ mɔ̀mɔ, ɔ̃ Falaɔ̃ vù.
5À ɛ̀a gɛ̃̀ ń io, ɔ̃ à nana'ò lɔ. A è ese sáo maa wɛde pìa eseli doũwa sáo sopla. 6Ɔ̃ à ese sáo wɛn ala'alana pɔ lou'i kɛ̃̀sãmáɔ è, aa pìa ń gbɛa lɔ sáo sopla. 7Ɔ̃ ese sáo wɛn ala'alanapiɔ ese sáo maa wɛdepiɔ mɔ̀mɔ. Kɛ́ Falaɔ̃ vù, a è nana ɔ̃ á ò.
8Kɛ́ gu dɔ̀, laasoo gɛ̃̀aagu, ɔ̃ à Egipi masokɛnaɔ ń wɛzɛ̃naɔ sìsi pii. À a nana pɔ a òɔ sɛ̀lɛ a sìunɛ́, kási an gbɛ̃e i fɔ̃ à a asi'òɛ̀o. 9Ɔ̃ vɛ̃ɛbɔlɛnaɔ gbɛ̃zɔ̃ɔ fɛ̀lɛ à yã'ò Falaɔ̃ɛ à mɛ̀: Taae pɔ má kɛ̀ yãa dɔ̀magu gbã. 10Ki, n pɔ pà n zɔblenaɔzi yãa, ɔ̃ n ma da kpɛ́u n dɔaiɔ bɛ sãnu ń pɛ̃ɛkɛnaɔ gbɛ̃zɔ̃ɔo. 11Gwãasĩn doũ wa nana'ò, wá baade ń a pɔo ń a àsio. 12Hɛbɛlu ɛwaasoe kuwanɔ we, n dɔaiɔ gbɛ̃zɔ̃ɔ zɔɛ. Kɛ́ wa wá nanaɔ sɛ̀lɛ wá sìuɛ̀, ɔ̃ à wá baade pɔ asi'òɛ̀. 13Yãpiɔ kɛ̀ lá a òwɛ̃ɛwaɛ. N ɛa n ma da ma zĩu, ɔ̃ n pɛ̃ɛkɛnaɔ gbɛ̃zɔ̃ɔpi lòo líwa.
14Ɔ̃ Falaɔ̃ gbɛ̃́ zĩ̀ Yosɛfu sisii, ɔ̃ wà gɛ̀ wà aà bɔ̀ kpɛ́u kpakpa. À mibò, à a pɔkasaɔ lìlɛ, ɔ̃ à gɛ̀ Falaɔ̃ kĩi. 15Ɔ̃ Falaɔ̃ òɛ̀: Ma nana'ò, kási gbɛ̃e i fɔ̃ à a asi'òmɛɛo. Má mà wà mɛ̀, tó wa ònɛ, ni a asi'onɛ́ɛ. 16Yosɛfu òɛ̀: I kɛ mamɛo, Lua mɛ́ a a asi'onɛ ki. 17Ɔ̃ Falaɔ̃ òɛ̀: Ma nana guu má è má zɛa Niililɛ. 18Má è zuda maa mɛkpaa mɛn soplaɔ bɔ̀lɛ swa'ɛu, aalɛ sɛ̃ble dãna guu. 19Ɔ̃ ma zuda pãleɔ è lɔ mɛn sopla, aa fɛ̃fɛ̃a wòũwoũ, mi zù fɛ̃fɛ̃a bee taaɔ e Egipi la yãao. 20Ɔ̃ zuda fɛ̃fɛ̃a wòũwoũpiɔ zù mɛkpaa sɛ̃ia mɛn soplapiɔ mɔ̀mɔ. 21Baa kɛ́ aa ń mɔmɔ̀, aa gi fɛ̃fɛ̃a lá aa dɛwaɛ, gbɛ̃e a dɔ̃ kɛ́ aa ń mɔmɔ̀ seo. Ɔ̃ ma vu. 22Nana guu lɔ má è, ese sáo maa wɛde sáo sopla bɔ̀ eseli doũwa. 23Ɔ̃ má è, ese sáo teeena wɛn ala'alana pɔ lou'i kɛ̃̀sãmáɔ bɔ̀ an gbɛa lɔ sáo sopla. 24Ɔ̃ ese sáo wɛn ala'alanapiɔ ese sáo wɛdepiɔ mɔ̀mɔ. Kɛ́ má ò masokɛnaɔnɛ, an gbɛ̃e i fɔ̃ à a asi'òmɛɛo.
25Ɔ̃ Yosɛfu òɛ̀: Ki, nana pɔ ń òpiɔ àsi doũɛ. Lua yã pɔ a ye kɛ ɔlɔ̀nɛɛ, ki. 26Zù maa mɛn soplapiɔá wɛ̃̀ soplaɛ, mɛ́ ese sáo wɛde sáo soplapiɔá wɛ̃̀ soplaɛ. Nanapiɔ àsi doũɛ. 27Zù fɛ̃fɛ̃a wòũwoũ mɛn sopla pɔ bɔ̀lɛ aa bɛ a sɛ̃iaɔ kpɛpiɔá wɛ̃̀ soplaɛ. Màa ese sáo wɛn ala'alana pɔ lou'i kɛ̃̀sãmá sáo soplapiɔ dɛ lɔ. Beeɔ mɛ́ wɛ̃̀ sopla pɔ imina a kauɔ ũ. 28Lá má ònɛ tiawa ki, ma mɛ̀ Lua lɛ́ yã pɔ a ye kɛ ɔlɔnɛɛ. 29Blɛwɛna aɔ di Egipi gupiiu maamaaɛ e wɛ̃̀ sopla. 30Bee gbɛa imina i ka e wɛ̃̀ sopla, kãa gbãapi yã i sã Egipiɔgu. Iminapi a to busu blɛ midɛ. 31Imina pɔ a mɔpi aɔ pãsĩ maamaaɛ, kãa gbãapi yã aɔ dɔ gbɛ̃egu lɔo. 32Ki, lá gɛ̃n pla n nanapi ò, bee mɛ̀ Lua mɛ́ dìlɛ màa. A kɛ tiaɛ, a sea vĩo. 33Tiasa ki, ɔ̃nɔde wɛzɛ̃na wɛɛlɛ ǹ dilɛ aàɔ dɛ gbãade ũ Egipi. 34Ki, gbɛ̃́ɔ dilɛdilɛ ziiaɔ ũ Egipi, aaɔ pɔwɛna sɔode kãaa wɛ̃̀ sopla pɔ pɔwɛna aɔ diupiu. 35Aa blɛ kãaa wɛ̃̀ maa pɔ lɛ́ mɔ́ɔ guu, aai pɔwɛna káka dɔ̃ɔ guu wɛ̃lɛ ń wɛ̃lɛo ń n tɔ́o, aaiɔ dɔ̃́a. 36Tó imina pɔ a kɛ wɛ̃̀ soplapi kà Egipi, blɛpi iɔ dɛ kũsũa ũ, kɛ́ iminapi su Egipiɔ dɛdɛo yãi.
Yosɛfu kpalablea Egipi
37Yãpi kà Falaɔ̃gu ń a iwaɔ pii, 38ɔ̃ a ònɛ́: Gbɛ̃́ɛ beeá Lua Nisĩnadeɛ. Wá gbɛ̃e e láaawa lɔe? 39Ɔ̃ a ò Yosɛfuɛ: Lá Lua tò n yãpiɔ dɔ̃̀ pii, ɔ̃nɔde wɛzɛ̃nae ku lánwao. 40Mmɛ ńyɔ̃ɔ dɛ ma ua gbɛ̃zɔ̃ɔ ũ, ma gbɛ̃́ɔ iɔ misiilɛnɛ mpii. Báa mɛ́ a to màɔ dɛnla ado. 41Ɔ̃ à ɛ̀a òɛ̀: Ńyɔ̃ɔ iko vĩ Egipi busuwaɛ gupiiu. 42Ɔ̃ à tãana seelakɛbɔ bɔ̀ a ɔwa, a dà Yosɛfuɛ a ɔwa, à baabaa ula dàɛ̀, à vua yabaa dàɛ̀ a nɔɛ.#Dan 5.29 43À a sɔ̃go plaade kpàwà bɛbɛbɔ ũ, ɔ̃ gbɛ̃́ pɔ dɔaaaɛɔ ìɔ pala: À kulɛ! À kulɛ! Beewa Falaɔ̃ tò Yosɛfu iko vĩ Egipi busuwa. 44A òɛ̀ lɔ: Mamɛ má kia ũ, ãma gbɛ̃e a fɔ̃ yãe kɛ Egipi la n lɛ́ saio. 45Ɔ̃ à tɔkpàɛ̀ Zafɛna Panɛa, ɔ̃ à Hɛliɔpɔli wɛ̃lɛ sa'ona Potifɛla nɛnɔɛna Asɛna kpàwà nɔ ũ.
46Gɔɔ pɔ Yosɛfu zĩ sɛ̀ Egipiɔ ki Falaɔ̃ bɛ, a wɛ̃̀ baakwi vĩ. Ɔ̃ à bɔ̀ Falaɔ̃ kĩi, à gɛ̀ bɛbɛi Egipi gupiiu. 47Kãa gbãa ku e wɛ̃̀ sopla, blɛwɛna di maamaaɛ. 48Ɔ̃ Yosɛfu blɛ pɔ di Egipi wɛ̃̀ soplapiuɔ kã̀aakãaa wɛ̃lɛ ń wɛ̃lɛo kũsũa ũ, wɛ̃lɛ pii ń a pɔo. 49À pɔwɛna kã̀aa zɔ̃ɔzɔ̃ɔ lan isialɛ ũfãawa, ɔ̃ wà zɛ̀ a yɔ̃yɔ̃aɛ, asa wa a lɛ́ dɔ̃ lɔo.
50E imina àɔ gɛ́ kai Yosɛfu na Potifɛla nɛ Asɛna nɛgɔ̃ɛ ì pla. 51Yosɛfu tɔkpà a yoaɛ Manase#41.51 Bee mɛ̀ sãngu à mɛ̀: Lua tò ma mae bɛdeɔ ń ma taasikɛao yã sã̀magu pii. 52Ɔ̃ à tɔkpà a plaadeɛ Ɛflaiũ#41.52 Bee mɛ̀ nɛde à mɛ̀: Lua tò ma gɔ̃ nɛde ũ busu pɔ wà ma wɛtã̀u.
53Kɛ́ kãa gbãa pɔ ku Egipi wɛ̃̀ soplapi lɛ́ kà, 54ɔ̃ wɛ̃̀ sopla pɔ imina kàu dàalɛ lá Yosɛfu òwa. Imina kà busu ń busuo pii, ãma blɛ di Egipi gupiiuɛ.#Zĩn 7.11 55Kɛ́ nɔana gɛ̃̀ Egipiɔgu pii, aa wiilɛ̀ Falaɔ̃wa aà blɛ kpamá. Ɔ̃ a ònɛ́ pii: À gɛ́ Yosɛfu kĩi, lá a oɛ́ í kɛ. 56Imina lì busupila pii, ɔ̃ Yosɛfu dɔ̃ɔ wɛ̃̀wɛ̃, à pɔwɛna yìa Egipiɔwa, kɛ́ imina gbãakũ̀ an busuu yãi. 57Ɔ̃ wà bɔ̀lɛ dũniau gupiiu wà mɔ̀ Egipi pɔwɛna lui Yosɛfuwa, asa imina gbãakũ̀ dũniau gupiiɛ.
ទើបបានជ្រើសរើសហើយ៖
Daa 41: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.