Bɔa 22
22
1Tó kpãi kpɛ́ gbòo, mɛ́ gbɛ̃e aà kũ̀, à aà lɛ̀ a dɛ̀, tó gwãɛ ade tàae vĩo, 2tó ń ĩatɛ̃wɛoɛ sɔ̃, bee mɛ́ tàae vĩ.
Kpãi a fĩaboɛ. Tó a pɔe vĩ sɔ̃o, wà aà yia zɔ ũ pɔ pɔ à a kpãi'ò yãi. 3Tó wà zu ge zaa'ĩna ge sã pɔ à a kpãi'ò è aà ɔzĩ bɛ̃́ɛ, a a fĩabo mɛn plaɛ.
4Tó gbɛ̃́ lɛ́ pɔɔ dã búa ge vɛ̃ɛbu guu, mɛ́ a tò a pɔɔ gbɛ̃pãle búa pɔblè, ade a fĩabo ń a búa ge a vɛ̃ɛbu pɔmaaɔɛ. 5Tó wà tɛsɔ̃̀ sɛ̃wa, mɛ́ à gɛ̀ dà gbɛ̃pãle bugbɛ ge pɔgbau, mɛ́ aà pɔɔ tɛkũ̀, tɛkpana a fĩaboɛ. 6Tó gbɛ̃́ ɔ̃a ge aizɛɛ kpà a gbɛ̃deewa ulɛi, mɛ́ wa sɛ̀ aà kpɛ́u kpãi, tó wà kpãipi kũ̀, a pɔ pɔ à a kpãi'ò fĩabo lɛɛ plaɛ. 7Tó wi e wà aà kũ̀o, kpɛde gɛ́ aà yãgɔ̃gɔ̃naɔ le, aai gwa tó ɔ̃mɛ pɔ pɔ wa kpàwa ulɛipi sɛ̀. 8Tó lɛkpaa gɛ̃̀ gbɛ̃́ɔ zãnguo zu ge zaa'ĩna ge sã ge pɔkasa yãmusu, ge pɔe mɛ́ vũ̀aa, ɔ̃ gbɛ̃e è, à mɛ̀ a pɔɛ, gbɛ̃ɔn plapiɔ gɛ́ yãkpalɛkɛnaɔ kĩi. Gbɛ̃́ pɔ yãgɔ̃gɔ̃naɔ mɛ̀ aà yã nao a fĩabo a gbɛ̃deeɛ lɛɛ plaɛ.
9Tó gbɛ̃́ zaa'ĩna ge zu ge sã ge pɔpãle kpà a gbɛ̃deewa gwai, tó à gà ge a gue kɛ̀'ĩa ge wa kũ̀ gbɛ̃e i eo, 10an gbɛ̃ɔn pla mpii aa ka Diiwa, gbɛ̃́ pɔ wà pɔ kpàwàpi i mɛ i ɔkãwào. Pɔ dii i zɛò wà ká, gbɛ̃́ pɔ à pɔ kpàwàpi sɔ̃, a fĩaboo. 11Tó wa kũ̀wà kpãiɛ sɔ̃, a fĩabo pɔ diiɛɛ. 12Tó wài mɛ́ dɛ̀, aà a seela ɔlɔɛ̀, a pɔ pɔ wài kũ̀pi fĩaboo. 13Tó gbɛ̃́ pɔtuo sɛ̀ a gbɛ̃deewa mɛ́ a gue kɛ̀'ĩa a dii kpɛ ge pɔpi gàn nò, a a fĩaboɛ. 14Tó pɔ dii wáaɛ sɔ̃, a a fĩaboo. Tó wa sɛ̀wà wà fĩabòɛ̀ɛ sɔ̃, ɔ̃a pɔ wa sɛ̀òwà bee a mɔ́.
Kua ń kɔ̃o yã
15Tó gbɛ̃́ pɔyè wɛ̃ndia pɔ wi kpãsã yãaoɛ, a nɔpi wɛɛlɛ'ɔ̃a kpaɛ, i aà sɛ nɔ ũ. 16Tó nɛ mae gì fĩ́afĩa aà zãkɛaanɔ, gɔ̃pi a gi nɔwɛɛlɛ'ɔ̃a kpá lá wì kpawaɛ.
17Ásuli tó nɔɛ pɔdamade àɔ kuo. 18Tó gbɛ̃́ wùlɛ ń pɔtuoo, wà ade dɛ. 19Sa'oa Diiwa ado baasio, gbɛ̃́ pɔ sa'ò dii pãlewa, wà ade tɔlɔzɔ̃.
20Ásuli bɔmɔ wɛtão, ásuli gbãamɔɛ̀o, asa bɔmɔɔn á ũ yãa Egipi. 21Ásuli gyaa ge tonɛ wɛtão. 22Tó a aà wɛtã̀ mɛ́ à wiilɛ̀a, má yãsiaanɔɛ. 23Ma pɔkũma i fɛlɛ, mí tó wà á dɛdɛ zĩ guu, á naɔ i gɔ̃ gyaaɔ ũ, á nɛɔ i gɔ̃ desai.
24Tó a ɔ̃a sɛ̃̀a ma gbɛ̃́ taaside pɔ kuánɔɛ, ásuli ɔ'idiaɛ̀ lan ɔ'idianɛdewao. 25Tó n n gbɛ̃dee zwãa tɔɔmasì, kpawà e ĩatɛ̃ àɔ gɛ̃ kpɛ́u, 26asa aà wulɛbɔ mɛndona pɔ ì kualan we. Bɔ́ a wulɛòi? Tó à wiilɛ̀a, má yãsiaanɔɛ, asa gbɛ̃kɛkɛnɛden ma ũ.
27Ásuli Lua tɔbɛ̃ɛsio. Ásuli á busu gbãade kao.#Zĩn 23.5 28Ásuli á búa ge á vɛ̃ɛ káau pɔ i ma gba gɔɔgagao. Àli á nɛgɔ̃ɛ sɛ̃iaɔ kpaa. 29Àli á zu ge á sã nɛsana sɛ̃iaɔ kpaa. Ali kɛ a dawa gɔɔ soplaɛ, a swaaɔ̃de íli kpaa. 30Àɔ dɛ ma gbɛ̃́ pɔ an kua ńdoaɔ ũ. Ásuli nɔ̀ɔ pɔ wài dɛ̀ soo. Àli kpá gbɛ̃ɔwa.
ទើបបានជ្រើសរើសហើយ៖
Bɔa 22: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.