Bɔa 23
23
Yãkɛa a zɛ́wa
1Ásuli wape baokpao. Ásuli zɛ ń gbɛ̃vãio seelade ɛɛde ũo. 2Ásuli tɛ́ bilazi yãvãikɛa musuo. Ásuli zɛ ń bilao yãkpalɛ guu à bɔ yãzɛde kpɛo. 3Tó taaside yã nao, ásuli zɛaanɔo. 4Tó n ibɛɛ zu ge aà zaa'ĩna sã̀sã, mɛ́ n kpaaũò, kũ ǹ suòɛ̀ bɛ. 5Tó n n zangude zaa'ĩna è, àlɛ fu asowa, dɔaalɛ, nsu to weo.
6Tó taaside yã na, ásuli bɔ aà kpɛo. 7À kɛ̃ mɔafiliwa zã̀. Ásuli taaesaide ge gbɛ̃maa dɛo, asa má tó taaede bɔ pão. 8Ásuli gbagusaɛ sío, asa gbagusaɛ ì to wɛdeɔ vĩ̀akũɛ, mɛ́ ì gbɛ̃maaɔ yã fuangba. 9Ásuli bɔmɔ wɛtão. Á bɔmɔkɛ dɔ̃, asa bɔmɔɔn á ũ yãa Egipi. 10Àliɔ pɔtɔ̃ á búa, íliɔ kɛkɛ e wɛ̃̀ soolo, 11a wɛ̃̀ soplade í tó tɔɔlɛ kãmabo à ĩampa, á taasideɔ i a zã pɔ bɔ̀lɛ weɔ kɔ̃nwɛ, sɛ̃anɔbɔɔ i a kĩni só. À yãdoũpi kɛ ń á vɛ̃ɛbuo ń á kukpɛo. 12Àliɔ zĩkɛ e gɔɔ soolo, a sopladezĩ íli kãmabo, kɛ́ á zuɔ ń á zaa'ĩnaɔ e kãmabo, mɛ́ á zɔɔ ń bɔmɔɔ e ĩampa. 13Àɔ yã pɔ má òɛ́ɔ kũa pii. Ásuli dii pãleɔ sisio. Wasuli ń tɔ́ ma á lɛ́u seo.
Dikpɛ zɔ̃ɔ mɛn aaɔ̃ɔ
(Bɔa 34.18-26; Iko 16.1-7)
14Wɛ̃ ń wɛ̃o àli mɔ́ dikpɛ lɛɛ aaɔ̃ɔ kɛimɛɛ. 15Àliɔ Kaaso dikpɛkɛ lá má dàɛ́wa, íliɔ kaaso e gɔɔ sopla mɔ pɔ wì mɛ Abibu guu a gɔɔwa, asa mɔpiu ɔ̃ a bɔlɛ Egipi. Á gbɛ̃e suli mɔ́ ma kĩi ɔgiio. 16Àliɔ Pɔkɛkɛ dikpɛkɛ gɔɔ pɔ a na pɔkɛkɛawa, íliɔ á buapɔkaauɔ kpaa. Àliɔ Pɔkãaa dikpɛkɛ wɛ̃̀ laaawa gɔɔ pɔ a á buapɔɔ kã̀aa pii. 17Wɛ̃ ń wɛ̃o gɛ̃n aaɔ̃ á gɔ̃ɛ pii lí mɔ́ dikpɛkɛi mapi ma Dii á Luaɛ. 18Ásuli pɔsɛa kpaa sãnu ń á sa'obɔ auoo. Ásuli dikpɛ sa'obɔ nisi dilɛ gu dɔwào. 19Àli gɛ́ Dii á Lua kpɛ́u ń á buapɔkaauɔ. Ásuli blenɛ nɔ̀ɔ kuu ń a da yɔ̃'ioo.
Dii lɛgbɛ̃a Kanaa busu yãmusu
20Má Malaika zĩ aà dɔaaɛ́, iɔ á dɔ̃́a zɛ́u, i gɛ́ánɔ gu pɔ má kɛ̀kɛu. 21À laaidɔ aà yãwa, íɔ aà yãma. Ásu bɔ aà kpɛo, asa a suuukɛánɔ á tàae yãmusuo, kɛ́ ma tɔ́ kuwà yãi. 22Tó a aà yãmà mɛ́ a yã pɔ má òɛ́ kɛ̀ pii, máɔ dɛ á ibɛɛɔ ibɛɛ ũɛ, á wɛ̀lɛɔ wɛ̀lɛ ũ. 23Ma malaikapi a dɔaaɛ́, i gɛánɔ busu pɔ Amɔleɔ kuu ń Hitiɔ ń Pɛliziɔ ń Kanaaɔ ń Hiviɔ ń Yebusiɔ, mí ń midɛɛ́. 24Ásuli kulɛ ń diiɔnɛo, ásuli zɔblenɛ́o, ásuli ń kɛa kɛo. À ń gboo, í ń gbɛpɛlɛɔ wiwi. 25À zɔble Dii á Luaɛ, i baaadaɛ́ á blɛu ń á imiao, i gyãɔ kɛ̃wá. 26Nɔɛɔ nɔbɔlɛ á busuuo mɛ́ fĩi aɔ kuuo. Má á wɛ̃ni dɔɛ́ ń mɔgalaoɛ.
27Má vĩadada gbɛ̃́ pɔ ku á aɛɔzi, mí tó gili gɛ̃ bui pɔ a ka ń kĩiɔgu, mí tó á ibɛɛɔ kpɛkpaɛ́. 28Má bɛɔɔ gbaɛ á aɛ, aa ka Hiviɔ ń Kanaaɔ ń Hitiɔgu, aai ń yaɛ́. 29I kɛ má ń yaɛ́ wɛ̃̀ do guu gɔ̃̀ɔ no, kɛ́ busupi su gɔ̃ lakpɛ ũ, sɛ̃anɔbɔɔ liálao yãi. 30Máɔ ń yaɛ́ busɛbusɛɛ e à gɛ dasikũ à ka busu kũa. 31Má á busu kɔɔ daɛ́ za Isiatɛ̃ai e Filitɛ̃ɔ isiai, za gbáa lɛ́wa e Uflatai. Má busupideɔ naɛ́ á ɔzĩɛ, í ń yá. 32Á lɛ́ su líɔ ku an yãu ge an diiɔ yãuo. 33Ásuli tó aaɔ ku á busuuo, kɛ́ aasu to à duunakɛmɛɛo yãi, asa tó a zɔblè ń diiɔnɛ, a mɔkpà ázĩaɛɛ.
ទើបបានជ្រើសរើសហើយ៖
Bɔa 23: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.