Bɔa 16
16
Mana ń bùuɔ
1Isailiɔ fɛ̀lɛ Eliũ mpii, ɔ̃ aa kà Sini gbáa pɔ ku Eliũ ń Sinaio zãnguo an bɔa Egipi mɔ plaade gɔɔ gɛ̃odezĩ. 2Ɔ̃ aa zɔadɔ̀ Mɔizi ń Aalonaowa gbáau we mpii, 3aa ònɛ́: Bɔyãi Dii i wá dɛdɛ Egipio ni? Wekĩi wi zɔ̃lɛ wà pɔble ń nɔ̀ɔo e wà kãɛ, ɔ̃ a mɔ wá dɛdɛi gbáau la ń nɔanao.
4Dii ò Mɔiziɛ: Kua za musu má blɛ fãɛɛ́,#Zãa 6.31 gbɛ̃́ɔ lí bɔlɛ aa gɔɔ do pɔ sɛlɛ lagulɛdɔ ń lɛ́ lɛu, kɛ́ mà ń lɛ́ mà gwa tó aa ma ikoyã kũa. 5Gɔɔ soolodezĩ gɔɔ pla pɔ ɔ̃ aali sɛlɛ, aaliɔ a blɛkɛ. 6Ɔ̃ Mɔizi ń Aalonao ònɛ́ mpii: Oosia á dɔ̃ kɛ́ Dii mɛ́ á bɔlɛ Egipi, 7zia kɔɔ í Dii gawi e. À zɔa pɔ á kàazi mà, asa pɔen wá ũ kɛ́ a gbasa zɔadɔ̀wáo. 8Mɔizi ɛ̀a mɛ̀: Dii a á gba nɔ̀ɔ à so oosia, zia kɔɔ i blɛ kpawá á lɛ́ lɛu, kɛ́ à zɔa pɔ á kàazi mà yãi. Pɔen wá ũo. I kɛ wámɛ a zɔadɔ̀wáo, Diiɛ.
9Ɔ̃ Mɔizi ò Aalonaɛ: O Isailiɔnɛ pii aa sɔ̃ Diizi, asa à ń zɔakaa màɛ. 10Kɛ́ Aalona lɛ́ yã'onɛ́, aa aɛdɔ̀ gbáa oi, ɔ̃ aa è Dii gawi bɔ̀má tɛlu guu. 11Ɔ̃ Dii ò Mɔiziɛ à mɛ̀: 12Ma Isailiɔ zɔakaa mà. Onɛ́ oosia aa nɔɔso, zia kɔɔ aa blɛble aa kã́, aai dɔ̃ kɛ́ mamɛ má Dii ń Lua ũ.
13Oosi bùuɔ mɔ̀ aa lì an bòoa. Kɛ́ gu dɔ̀, fíi kpà à lìai. 14Kɛ́ fíi kwɛ̀, ɔ̃ pɔ gɔ̃̀ kalɛ tɔɔlɛ kelekele lan pɔwɛnaewa, puapuannɔ lan lougbɛwa. 15Kɛ́ Isailiɔ è, aa òkɔ̃ɛ: Bɔ́n wei? Asa aai dɔ̃ bɔ́ no. Mɔizi ònɛ́: Blɛ pɔ Dii kpàwá à blen we. 16Yã pɔ Dii dìlɛɛ́n kɛ: Á baade lí sɛlɛ a lɛ́ lɛu. À sɛlɛ á baade miwa zaa lɛ dodo á uadeɔ lɛu. 17Isailiɔ kɛ̀ màa. Aa sɛ̀lɛ, gbɛ̃eɔ pɔ zɔ̃ɔ, gbɛ̃eɔ pɔ bilao. 18Wà zaadàdau, kɛ́ gbɛ̃́ pɔ sɛ̀lɛ zɔ̃ɔ pɔ su fɛ̃o, mɛ́ gbɛ̃́ pɔ i sɛlɛ bilao pɔ su kɛ̃sãwào.#2 Kln 8.15 19Mɔizi ònɛ́: Gbɛ̃e su a kĩni to gu dɔwào. 20Gbɛ̃eɔ i Mɔizi yãmao, aa a kĩni tò gu dɔ̀wà, ɔ̃ à kɔɔkà, à yaikɛ̀, ɔ̃ Mɔizi pɔ pàńzi.
21Lagulɛdɔ baade ì sɛlɛ a lɛ́ lɛu. Tó ĩatɛ̃ gbãakũ̀, pɔ pɔ gɔ̃̀ tɔɔlɛ ì yɔɛ. 22Gɔɔ soolodezĩ aa blɛ sɛ̀lɛ lɛɛ pla, baade miwa zaa lɛ plapla. Ɔ̃ an gbɛ̃zɔ̃ɔɔ gɛ̀ aa ò Mɔiziɛ mpii. 23A ònɛ́: Màa Dii dìlɛ. Ziaá kãmabozĩɛ, Dii gɔɔɛ. À pɔ pɔ á ye kpasa kpasa. À pɔ pɔ á ye disa disa, í a kĩni pɔ gɔ̃̀ dilɛ e kɔɔ. 24Aa dìlɛ e kɔɔ lá Mɔizi òwa. Bee i yaikɛo, i kɔɔka sɔ̃o. 25Ɔ̃ Mɔizi ònɛ́: À ble gbã, asa kãmabozĩɛ, á e guei gbão. 26Àliɔ sɛlɛ e gɔɔ soolo. A gɔɔ sopladeá kãmabozĩɛ, aɔ ku zĩbeezĩo.
27Gɔɔ sopladezĩ gbɛ̃eɔ bɔ̀, aa gɛ̀ sɛlɛi, ɔ̃ aai eo. 28Ɔ̃ Dii ò Mɔiziɛ: Áɔ ku ń ikoyã pɔ má dìlɛɔ masaio e bɔɛ ni? 29Àɔ dɔ̃ kɛ́ ma Dii mamɛ ma kãmabogɔɔ dìlɛɛ́. A yãi tò gɔɔ soolodezĩ mi gɔɔ pla blɛ kpawá. Baade líɔ ku a gbɛu, gbɛ̃e suli gɛ́ guei gɔɔ sopladepizĩo. 30Ɔ̃ aa kãmabò gɔɔ sopladezĩ.#Bɔa 20.8-11 31Isailiɔ tɔkpà blɛpiɛ Mana.#16.31 Bee mɛ̀ bɔ́n wei A dɛ lan pɔwɛn pua kelenaɔwaɛ. A í na lan kàa zɔdewa.#Nao 11.7-8
32Mɔizi mɛ̀: Yã pɔ Dii dìlɛn kɛ: Wà mana zaa lɛ do dilɛ wá buiɔnɛ, kɛ́ aa blɛ pɔ a kpàwá wá blè gbáau wá bɔlɛa Egipi gbɛa e sɔ̃. 33Ɔ̃ Mɔizi ò Aalonaɛ: Lo sɛ ǹ mana kau zaa lɛ do, ní dilɛ Dii aɛ, kɛ́ àɔ dilɛa we wá buiɔnɛ.#Hɛb 9.4 34Ɔ̃ Aalona dìlɛ gbɛpɛpɛɛɔ saɛ, kɛ́ àɔ dilɛa lá Dii ò Mɔiziɛwa. 35Isailiɔ mana blè wɛ̃̀ blaɛ#Yoz 5.12; 1 Kln 10.3 e aa gɛ̀ kàò busu pɔ gbɛ̃́ɔ kuu. Aa manapi blè e aa gɛ̀ kàò Kanaa busu zɔ̃lɛuɛ. 36Zaapi lɛ do kà litili pla.
ទើបបានជ្រើសរើសហើយ៖
Bɔa 16: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.