Maarhk 8
8
Niiwink mitaahswaahk pemaatisinitc ekii'-ahshamaatc Ciisahs
(Matthew 15.32-39)
1Miitahsh paanimaa eni kiishikaninikin kihciniipiwa' kaamaawaci'itiwaatc, kaawiin kekoon okii'-ayaahsiinaawaa kemiiciwaatc. Okii'-antomaa' itahsh Ciisahs i'i okihkino'amawaakana' ekiih kanoonaatc: 2“Ninkitimaakenimaak ihsa oko pemaatisiwaatc. Nihsokiishik aasha niwiiciiwikook, ekaa keyaapi kekoon e'ayaahsikwaa kemiiciwaatc. 3Kiishpin ishikiiwenisha'wakwaa, ekaa ahkawe wiihsinihsikwaa, tanoontehshinook, aaniihsh waahsa aaninta kii'onciiwak,” kii'‑ihkito.
4Miitahsh kaa'ishi nahkwehtaakotc: “Aan tahsh teminihk keonci ahshamankwaapan pahkweshikana', o'omaa pikwatahkamikaank e'ayaayank?” okii'-ikoo'.
5Miitahsh okiih kakwecimaa': “Aaniin minihk eyaawek pahkweshikan?” okii'-inaa'.
“Niishwaahswaahtik,” okii'-ikoo'. 6Miitahsh kaa'inaatc i'i kaamaamawenonitc cionapinitc i'imaa mihtahkamik. Miitahsh kaa'ishi otaahpinaatc Ciisahs i'i pahkweshikana' niishwaahswaahtik, ekii'-nanaahkomotc, ekiih pahpahkwepinaatc, ekii'-maamiinaatc okihkino'amawaakana' cimaata'oonaanitc i'i kaamaamawenonitc. Miitahsh i'i kaa'ishihcikenitc. 7Pankii kaye okii'-ayaawaawaa' kinooshenhsa'. Miitahsh kaa'ishkwaananaahkomotc Ciisahs, okii'-inaa' okihkino'amawaakana' onoweniwa' kaye ciahtamawaanitc. 8Miitahsh kaa'ishi wiihsininitc kahkina. Wiinke kiihtewiihsiniwa'. Inkoci ko niiwink mitaahswaahk (4,000) kiihtahshiwa'. 9Miitahsh kaa'ishi mooshakinamowaatc ishkwancikanan iki kihkino'amawaakanak. Niishwaahso (7) kii'mooshkineniwan mashkohsiimahkahkoon. Miitahsh kaa'ishi kiiwenisha'waatc Ciisahs kahkina awiya'. 10Wiin itahsh wiin kiihpoosi kaye okihkino'amawaakana', weti nahke Taalmanoohta ahkiink (Dalmanutha) ekiihpi ishimishakaawaatc.
Iki Perahsiik ekiih kakwecimaawaatc Ciisahsoon cimaamahkaacihcikenitc
(Matthew 12.38-42; 16.1-4)
11 #
Mat 12.38; Luk 11.16. I'i tahsh Perahsiiwininiwa' (Pharisees) okiihpi otihsikoo' ehpi kakweshaakoosomikotc, ekii'-antawaapantamaakotc ishpimink wenciinik kihkinawaacihcikan. 12#Mat 12.39; Luk 11.29. Ciisahs tahsh wiinke kiihkihciniihsanaamo ekii'-inamanci'otc, e'ihkitotc: “Aaniihsh oko noonkom pemaatisiwaatc wenci antawaapantamowaatc kihkinawaacihcikan? Nintepwe e'ininakook, kaawiin kekoon kihkinawaacihcikan tamiinaahsiiwak oko noonkom pemaatisiwaatc,” kii'‑ihkito.
13Miitahsh kaa'ishi nakanaatc ekii'-maacii'otc miinawaa akaamink.#8.13 akaamink: mii 'iwe waapanonk inahkekaam Kaalaliiwi Saaka'ikaniink.
Wekonen i'iwe otoompisikanenhsimiwaa iki Perahsiik kaye Herat
(Matthew 16.5-12)
14Kaawiin itahsh kii'maamihkawihsiiwa' Ciisahs okihkino'amawaakana' cimaaciinaanitc pahkweshikana'. Mii ehta peshikwaahtik okii'-maaciinaawaan ciimaanink. 15#Luk 12.1. Okiih kanoonaa' itahsh okihkino'amawaakana': “Ayaankwaamisik!” okii'-inaa'. “Keko pimentankek i'i otoompisikanenhsimiwaa iki Perahsiiwininiwak (Pharisees) kaye Herat#8.15 Herat: mii hsa wa'a Herat Entihpahs kaaishinihkaasotc. Waapantan 6.14. (Herod),” okii'-inaa'.
16Miitahsh e'nihsitohtansinik Ciisahs okihkino'amawaakana' kaa'ishi maacii tashintamaatinitc, e'opahkweshikanimihsinik.
17Ciisahs itahsh ehkihkenimaatc ekaa e'nihsitohtansinik okii'onci kanoonaa': “Aaniin eshi papaamintiyek e'ayaawaahsiwek pahkweshikan? Kaawiin ina mahshi kikihkentansiim? Kaawiin ina kinihsitaawentansiim? Onsaam ina kipetentaam? 18#Mrk 4.12. Kitayaanaawaan kishkiinshikowaan! Kaawiin ina kiwaapihsiim? Kaye kitoohtawakaam! Kaawiin ina kinoontansiim? Kaawiin ina kaye kimaamihkawihsiim 19naanink mitaahswaahk (5,000) ekiih tahshiwaatc, ekiih pahpahkwepitamawakwaa naanan pahkweshikana'? Aaniihsh minihk kaa'ishkohsekin ishkwancikanan minihk kaamooshkinekin wiikopiimahkahkoon?” okii'-inaa'.
Miitahsh kaa'ikotc: Mitaahshiniishin (12).
20Shikwahsh okii'-inaa': “Miinawaa iki niiwink mitaahswaahk (4,000), niishwaahso (7) pahkweshikana' ekiih pahpahkwepitamawakwaa, aaniin minihk kaamooshkinekin ini mashkohsiimahkahkoon kaamooshakinamek ini ishkwancikanan?” okii'-inaa'.
“Niishwaahso (7),” kii'‑ihkitowa'.
21“Kaawiin ina mahshi kinihsitaawentansiim?” okii'-inaa'.
Ekii'-waapi'aatc Ciisahs peshik wiyaapihsinik ininiwan
22Miitahsh i'imaa kiihpimishakaawak ootenawenhsink Pehseta (Bethsaida) e'ishinihkaatenik. Kiihpiitawaa tahsh Ciisahs peshik wiyaapihsinik ininiwan, ehpakohsenimintc citaankinaatc. 23Miitahsh kaa'ishi sakinihkenaatc ekii'-ishiwinaatc ohpimeya'ii ootenawenhsink. Miitahsh kaa'ishi sihkwaatamawaatc oshkiinshikoni, minciniish oninciin okiih saaminaan, ehkakwecimaatc: “Kiwaapantaan ina kekoon?” okii'-inaan.
24Miitahsh e'inaapinitc, kii'‑ihkitowan: “Niwaapamaak pemaatisiwaatc. Mihtikook itahsh ehpapaamohsewaatc nintishinawaak,” okii'-ikoon.
25Miitahsh miinawaa aapitink okiih saaminamawaan Ciisahs ini oshkiinshikoni ini ininiwan. Miitahsh kwayahk kii'‑inaapiwan, ekii'-minoayaanitc ini oshkiinshikoni. 26Miitahsh kaa'ishi kiiwenisha'waatc Ciisahs weti eshitaanitc ini ininiwan. “Keko ahkawe cehkishkanken ootenawenhs,” okii'-inaan.
Kwayahk iko ekii'-wiinaatc a'a Piitar ini Ciisahsoon
(Matthew 16.13-20; Luke 9.18-21)
27Miitahsh kii'ani maacaa Ciisahs kaye okihkino'amawaakana', weti ekii'-ishaawaatc ootenawenhsink pehshoo 'imaa Sehsariiya Pilipaayink#8.27 Sehsariiya Pilipaayink: waapantan Matthew 16.13. (Caesarea Philippi) kaa‑ayaanikin. Miitahsh e'ani pimohsewaatc okiih kakwecimaa': “Aaniin eshiwaatc pemaatisiwaatc e'aawiyaan?” okii'-inaa'.
28 #
Mrk 6.14-15; Luk 9.7-8. “Cwaan (John) Siika'antaakewinini kitikook,” okii'-ikoo'. “Aanint kaye awiya kitikook Ilaaica#8.28 Ilaaica: waapantan 6.15. (Elijah), kaye aanint, ‘Peshik ini mewisha Kishemanitoo otipaacimowininiima' kaakiih kanootamaakotc aawiwitok,’ kitikook,” okii'-ikoo'.
29 #
Jhn 6.68-69. Miitahsh kaa'ishi kakwecimaatc: “Awenen kiinawaa enentamek ciaawiyaan?” okii'-inaa'.
Miitahsh kaa'ishi nahkwehtaakotc ini Piitaran (Peter): “Kiin kitaaw Kishemanitoon kaakii'-onenimikotc ciPimaaci'iwetc,” okii'-ikoon a'a Ciisahs ini Piitaran.
30Okii'-ayaankwaamimaa' itahsh Ciisahs i'i okihkino'amawaakana': “Keko awiya wiintamawaahkek e'aawiyaan,” okii'-inaa'.
Niiyaak ekii'-wiintank Ciisahs keishi kakwaataki'intc kaye keishi nihsintc
(Matthew 16.21-28; Luke 9.22-27)
31Miitahsh okii'-maacii kihkino'amawaa' ekii'-inaatc: “Niin Inini oKosihsan, oncita hsa ko niipiwa' cikakwaataki'ikoyaan, kaye cipahkeyaahkoniwaatc i'i Coowak oniikaanisiimiwaa', iki kaye Kihcianami'ewikimaak, iki kaye kaakihkino'amaakewaatc Onahshowewin. Shikwa ninka nihsikoo. Miinawaa tahsh nihsokiishihkwakaak ninka kiiwepimaatis,” kii'‑ihkito. 32Mii'iwe kwayahk okii'-wiintamawaa' Ciisahs okihkino'amawaakana'. Piitar (Peter) itahsh ohpimeya'ii okii'-ishiwinaan ini Ciisahsoon e'maaciikihcikanoonaatc cionci'aatc. 33Miitahsh ehkwehkikaapawitc Ciisahs e'waapamaatc kotak okihkino'amawaakana', okiih kihcikanoonaan Piitaran: “Inkoci hsa ishaan, Setan!” otinaan. “Kaawiin kiin kiwiici'aahsii Kishemanitoo enentank, ikihsh wiin kiwiici'aak ininiwak enentamowaatc,” okii'-inaan Ciisahs ini Piitaran.
34 #
Mat 10.38; Luk 14.27. Miitahsh kahkina okii'-antomaa' i'i kaaohkwenonitc kaye okihkino'amawaakana', ekiih kanoonaatc: “Kiishpin awiya wiihpimiwiiciiwitc, oncita ko ishinaakwanini ciaanawenintisohpan, cipakitinitisohpan, ampooshke piinihsh ci‑ishi nipohpan aashiteyaahtikonk. Mii'i ci‑ishi pimiwiiciiwitc,” okii'-inaa'. 35#Mat 10.39; Luk 17.33; Jhn 12.25. “Awenehsh iko waa'manaacihtootc i'i opimaatisiwin, taishi tipa'amawaa ciwanihtootc opimaatisiwin. Awenen itahsh kepakitinank opimaatisiwin niin onci kaye 'i minwaacimowin onci, oka pimaacihtoon opimaatisiwin,” okii'-inaa'. 36“Wekonehsh i'i keontisihpan awiya kahkina kekoon aanakiih tepipitamaasotc o'omaa ahkiink, kiishpin wanihtootc i'i opimaatisiwin? Kaawiin kekoon taontinamaasohsii. 37Wekonehsh kemiikiwehpan miinawaa cikiiwe miinintipan i'i opimaatisiwin? Kaawiin kekoon,” okii'-inaa'. 38“Inashke niipiwa' oko noonkom pemaatisiwaatc okii'-nakanaawaan Kishemanitoon, e'nihtaa maci‑ishiwepisiwaatc. Awenen itahsh iko noonkom pemaatisitc keakatenimitc kaye keakatentank nintihkitowinan, mii 'awe keniin keakatenimak pi takwihshinaan. Niin aaniihsh Inini oKosihsan ehtinowiyaan ninka pikikis kihciwaahsesiwin taapishkoo eshi waahsesitc a'a ninTete, piwiiciiwimak kaye i'i Kishemanitoo otencalima',” mii'i kaa'inaatc.
ទើបបានជ្រើសរើសហើយ៖
Maarhk 8: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society