Maarhk 6
6
Ekii'-aanawenimikotc Ciisahs owiicionciimaakana'
(Matthew 13.53-58; Luke 4.16-30)
1Kii'anionci maacaa tahsh a'a Ciisahs ekii'-ishaatc i'imaa otayaawinink kaakiih tashiompikitc,#6.1 otayaawinink kaakiih tashi ompikitc: mii maawiin Naasarit kaaicikaatek ootenawenhs. ekii'ani wiiciiwikotc ini okihkino'amawaakana'. 2Miitahsh ekii'-ishikiishikahk kaaotAnwepiiwi kiishikanohkewaatc iki Coowak, kii'maaciikihkino'amaake Ciisahs i'imaa Coowa' otanami'ewikamikoniink. Niipiwa' itahsh i'imaa kii'ayaawak. Kahkina tahsh awiya okii'-maamahkaasihtawaawaan ini Ciisahsoon, e'ihkitowaatc: “Aaniinti naa wentinank wa'a inini ono kekoonan? Wekonen tino kakiihtaawentamowin kaamiinintc? Ina kaa‑ahpiihci maamahkaacihciketc!” kii'‑ihkitowak. 3“Kaawiin ina mii wa'a mihtikonaape, kaaokosihsimikotc Meriin (Mary)? Mii wa'a kaaohshiimenshitc Ciimisan (James), Coosihsan (Joses), Cootahsan (Judas), Saayimanan (Simon). Kaawiin ina kaye mii wa'a otawemaa' kaawiiciayaamankwaa o'omaa ootenawenhsink?” kii'‑ihkitowak. Miitahsh i'i kaawiin okiiwii'-otaahpinaahsiwaawaan.
4Miitahsh kaa'ihkitotc Ciisahs: “Awiya otipaacimo Kishemanitoon kaakanootamawaatc omacenimikoo' owiicionciimaakana' ehta, kaye otinawemaakana', iniweniwa' kaye kaawiiciyayaamikotc. Pahkaan awiyan otishpenimikoon,” kii'‑ihkito. 5Kaawiin i'imaa okiih kashkihtoohsiin kihcianohkiiwin citootank, mii ehta cimihci ishininciinitc pankii awiya' e'aahkosinitc, ekii'-minoayaa'aatc. 6Kii'maamahkaatentam itahsh awiyan ekiih tepweyenimikohsik.
Ekii'-maacinisha'waatc Ciisahs neniishin
i'i mitaahswahshiniishin okihkino'amawaakana'
(Matthew 10.5-15; Luke 9.1-6)
Miitahsh i'i kiihpapaaishaa i'imaa ootenawenhsan ekiih kihkino'amaaketc. 7Okii'-antomaa' i'i kaamitaahshiniishinitc okihkino'amawaakana', ekii'-maacinisha'waatc ekii'-neniishinitc, ekii'-inaahkonaatc cishaakooci'aanitc maciahcaahkwa'. 8Okii'-inaa' itahsh: “Keko kekoon pimiwitoohkek e'maacaayek, mii ehta sahka'onan. Kaawiin kaye pahkweshikan, kaawiin kaye pakohsencikewipiina'ikan. 9Kika kikahkisinem itahsh. Keko tahsh niishwekihkonayehkek. Eshi'oyek ehta ko ishi maacaak,” kii'‑ihkito. 10Mii 'o kaye kaa'inaatc: “I'imaa keishi kiiyooteyek waahkaa'ikanink, mii'imaa peshikwan ayaak piinihsh i'imaa cionci maacaayek ootenaank. 11#Luk 10.4-11; Act 13.51. Kiishpin itahsh inkoci ani takohshinek otaahpinikoohsiwek, nehpicipisintaakoohsiwek, inkoci 'imaa onci ishaak. Paahpaawisitehshimoonok cionci kihkentamowaatc e'wanitootamowaatc,” okii'-inaa'.
12Miitahsh kaa'ishi maacaawaatc iki kihkino'amawaakanak, ekii'ishi kakiihkwewaatc, i'i pemaatisinitc cikwehkaatisinitc. 13#Jas 5.14. Miitahsh niipiwa' okiih saakicinisha'amawaawaa' maciahcaahkwa' awiya', ekiih poosinaawaatc kaye niipiwa' kaa‑aahkosinitc ekii'-minoayaa'aawaatc.
Cwaan Siika'antaakewinini ekii'-nihsaakaniwitc
(Matthew 14.1-12; Luke 9.7-9)
14 #
Mat 16.14; Mrk 8.28; Luk 9.19. A'a tahsh Herat (Herod) kihciokimaa#6.14 Herat kihciokimaa: mii hsa wa'a Herat kaakii'-ishinihkaasotc Entihpahs (Antipas), kaakiih tipentank Kaalaliiwi ahkiini. okii'-noontaan ehpapaamimimintc ini Ciisahsoon. Aanint kii'‑ihkitowak: “Mii nankwana wa'a Cwaan (John) Siika'antaakewinini ekiih kiiwepimaatisitc. Mii maawiin i'imaa wentinamokwen cimaamahkacihciketc,” kii'‑ihkitowak. 15Aanint tahsh wiin kii'‑ihkitowak: “Mii wa'a Ilaaica#6.15 Ilaaica: waapantan Matthew 16.14. (Elijah).” Aanint kaye kii'‑ihkitowak: “Mii wa'a peshik otipaacimo peshikwan e'ishinaakositc iki weshkac kaakiih-kanootamawaawaakopanen Kishemanitoon,” kii'‑ihkitowak.
16Ahpii tahsh e'noontank a'awe Herat, kii'‑ihkitoo: “Mii wa'a Cwaan Siika'antaakewinini kaakiih kiishkikweta'wak. Kiihkiiwepimaatisi kehcinaac!” kii'‑ihkito. 17#Luk 3.19-20. Wiin aaniihsh Herat kii'anoohkiipan citepipinimintc ini Cwaanan kaye citashimamaancikwahpisonitc kipaahkwa'otiiwikamikonk ciayaanitc. Mii hsa 'owe kaakii'onci ishihciketc Herat, ciminwentaminitc ihkwewan Hirootiyahs (Herodias) kaaishinihkaasonitc. Aaniihsh mekwaa okii'-wiitikemaan. Wa'a tahsh ihkwe aasha kii'onaapemi ini Pilapoon (Philip), miiwan ini wiicihkiweyan a'a Herat. 18Cwaan itahsh okii'-inaapaniin ini Heratan: “Kaawiin inahtehsinoon kiicihkiwe owiitikemaakanan ciwiiciyayaamatipan,” okii'-inaan.
19A'a tahsh ihkwe, mii 'awe Hirootiyahs, okiionci nishkenimaan ekiiwii'-nihsaac ini Cwaanan. Kaawiin itahsh okiih kashkihtoohsiin. 20A'awe aaniihsh Herat okiih kohsaan ini Cwaanan, ekiih kihkenimaatc kwayahk e'ishiwepisinitc, kaye e'onakimikonitc ini Kishemanitoon. Mii'i kaa'ishi kanawenimaatc. Okii'-minohtawaan ini Cwaanan ehpisintawaatc. Ahpii tahsh iko e'noontawaatc, kii'mikoshkaatentam.
21Inkotink itahsh kii'ani kashkihcikaateni 'iwe kaamihsawentank a'a ihkwe. Inkotink ehkiishikaninik Herat kii'wiihkwanke ehtipishkank. Miitahsh ekii'-wiihkwamaatc iniweniwa' kaaniikaanentaakosinitc okimaawiwinink, kaye shimaakanihshiiwikimaa', iniweniwa' kaye kaaniikaanentaakosinitc Kaalaliiwi ahkiink (Galilee). 22Hirootiyahs itahsh otaanihsan kiihpi piintikewan ekii'-niimihtawaanitc, ekii'-minwentami'aanitc ini Heratan, iniweniwa' kaye kaakii'-wiihkwamimintc. Miitahsh kaa'inaatc a'a Herat ini oshkiniikihkwen: “Wekonen iko mehsawentaman kakwecimihshin, kika miinin,” kii'‑ihkito. 23Shikwa tahsh kiihkihciahshotamaake, ekii'-ahpimotc Kishemanitoon: “Wekonen iko kekakwecimiyan kika miinin, impooshke kakwecimiyan aapihta kaatipentamaan kika miinin,” okii'-inaan.
24Miitahsh kaa'ishi saaka'ank a'a oshkiniikihkwe, ekii'awi kanoonaatc ini omaamaan: “Wekonen kekakwecimak?” okii'-inaan.
Miitahsh kaa'ikotc: “Cwaan Siika'antaakewinini ohtikwaan, mii'iweni kakwetwen,” okii'-ikoon. 25Miitahsh weyiip kaa'ishi naasihkawaatc ini kihciokimaan e'inaatc: “Shemaak ninantawentaan i'i Cwaan Siika'antaakewinini ohtikwaan kihcionaakanink ciahtenik, cimiishiyan,” kii'‑ihkito a'a oshkiniikihkwe.
26Miitahsh kaa'ishi kihci mincinawesitc a'a kihciokimaa. Kaawiin itahsh kii'‑inentansii ciaanwehtawaatc, ekiih kihciahshotamawaatc ekii'-noontaakotc kahkina iniweniwa' kaakii'-wiihkwamaatc. 27Shemaak itahsh peshik okii'-antomaan shimaakanihshan ekii'-anoonaatc cipiitoonitc i'i Cwaanan ohtikwaanini. Miitahsh shemaak kaa'ishi ishaanitc weti kipaahkwa'otiiwikamikonk ekii'awi kiishkikweta'waanitc. 28Miitahsh kaa'ishi piitoonitc i'i ohtikwaanimaa onaakanink, ekii'-miinaanitc ini oshkiniikihkwen. Mii'i kaa'ishi miinaatc omaamaan i'i ohtikwaanimaa, a'a oshkiniikihkwe. 29Ahpii tahsh kaa'noontaminitc i'i Cwaan okihkino'amawaakana' okiih pinaasihkamini i'i wiiyaw, ekii'-ninkwa'aminitc.
Naanink mitaahswaahk awahshime e'ahshamaatc Ciisahs
(Matthew 14.13-21; Luke 9.10-17; John 6.1-14)
30Iniweniwa' itahsh Ciisahs kaakii'-maacinisha'waahpan#6.30 kaakii'-maacinisha'waahpan: waapantan Mark 3.14; 6.7. kiihpi ishikiiwewa' i'imaa eshi ayaatc, ekiihpi wiintamaakotc kahkina kekoon kaahpapaaishihcikenitc, kaye tahsh kaahpapaaishikihkino'amaakenitc. 31Miitahsh kaa'-inaatc: “Ampeyohk, inkoci ishaataa kiinehtawint nihshihkeaya'ii ciayaayank pinamaa cianwepiyek,” okii'-inaa'. Aaniihsh niipiwa' okiih pinaasihkaakowaa' kaye kii'ani maamaacaawa', ekii'ishi ocaanimahkamikisiwaatc Ciisahs kaye okihkino'amawaakana'. Ampooshke kaawiin kiihtawihsehsiiwak ciwiihsiniwaatc. 32Miitahsh i'i ciimaanink kaa'ishi maacii'owaatc weti nihshihkeaya'iink ewii'-ishaawaatc wiinehtawaa.
33Niipiwa' itahsh okii'-waapamikowaa' e'ani maahkwakomowaatc, ekiih kihkenimikowaatc. Miitahsh kaani ishi pimaashakaamepa'itinitc ekii'-aasihkaakowaat ekii'-onciinitc i'imaa kahkina ootenaank. 34#Num 27.17; 1Ki 22.17; 2Ch 18.16; Ezk 34.5; Zech 10.2; Mat 9.36. Ahpii ehpimishakaatc aasha okii'-waapamaa' Ciisahs ehpaahtenonitc awiya' kaapimaawaci'itinitc. Okiih kitimaakenimaa' e'ishi ayaanitc maanahcaanihshink ekaa awiya ehkanawenimikohsinik. Miitahsh kaa'ishi maacii kihkino'amawaatc niipiwa' kekoon. 35Aasha tahsh e'ani onaakohshininik okiihpi kanoonikoo' okihkino'amawaakana': “Pikwacaya'ii o'omaa, aasha tahsh naacionaakohshin. 36Taka maaciinisha'o weti eshi pehshowankin ayaawinan kaye ootenawenhsan, ciwii'-ataawewaatc kemiiciwaatc,” okii'-ikoo'.
37Miitahsh kaa'inaatc: “Kiinawaa ko miinihkook kemiiciwaatc,” okii'-inaa'.
O'o tahsh okii'-ikoo': “Aaniin tahsh niinawint keshi ataaweyaankipan a'a minihk pahkweshikan ciahshamankitwaa? Inkotwaahsokiisihs awahshime taakii'-anohkii awiya ini minihk cikashki'aahpan shooniyaan,” okii'-ikoo'. 38Miitahsh kaa'inaatc: “Awi waapamihkook aaniin tahswaahtik pahkweshikan eyaawek,” ihkito.
Ahpii tahsh kaahkihkenimaawaatc aaniin minihk eyaawaawaatc okiihpi inaawaan: “Naanan ayaawak, shikwa niishin (2) kinooshek,” ihkitowak.
39Ciisahs itahsh okii'-inaa' kahkina ciayoohkwapinitc i'imaa eshi minwashkohsiwaninik. 40Miitahsh kaa'ishi ayoohkwapinitc, aanint neninkotwaahk, aanint nenaanimintana ekiih tetahsopiwaatc. 41A'a tahsh Ciisahs okii'-otaahpinaa' i'i naanan pahkweshikana' kaye i'i niishin kinooshe'. Ishpimink itahsh kii'‑inaapi, ekii'-nanaahkomotc, ekiih pahpahkwepinaatc pahkweshikana', ekii'-nenaawinamawaatc okihkino'amawaakana' cimaamaata'oohkiinitc. Kaye ko 'i niishin kinooshe' okii'-nenawinamawaa' cimaamaata'oonimintc entahshinitc. 42Miihsh i'i kahkina kaa'onci tewiihsininitc. 43Miitahsh kaa'ishi papaa maawantoonamowaatc ishkwancikanan ikiwe kihkino'amawaakanak, pahkeshikana' kaye kinooshe'. Mitaahshiniishin wiikopiimahkahkoon kii'mooshkineniwan. 44Ikiweniwak itahsh kaakii'-wiihsiniwaatc, naanink mitaahswaahk (5,000) kiihtahshiwak iki ininiwak.
Wakicipiik ekii'ishi pimohsetc a'a Ciisahs
(Matthew 14.22-33; John 6.15-21)
45Miihsh i'i shemaak kaa'ishi kanoonaatc okihkino'amawaakana' 'awe Ciisahs: “Mii'i kiinawaa ani ishimaacii'ok. Weti akaamink#6.45 akaamink: mii 'iwe ninkaa pii'anonk inahkekaam. ootenawenhsink ani ishimishakaak Pehseta (Bethsaida) kaaishinihkaatek. Paanimaa kaye niin ninkapi ishi takohshin,” okii'-inaa'. Ahkawe tahsh wiin okiih kanoonaa' ini kaamaamawenonitc ciani kiiwenitc. 46Ahpii tahsh kaahpooshoo'aatc, wiinehta kii'‑ishaa ehpihkwatinaanik ekii'awi anami'aatc. 47Ahpii tahsh enimikiishikaninik aasha mihshawakaam kii'ayaawa' okihkino'amawaakana' i'imaa ciimaanink. Wiin itahsh wiin Ciisahs nihshihke kii'ayaa mihtahkamik. 48Okii'-waapamaa' itahsh okihkino'amawaakana' ekii'-ocaanima'okonitc ehkakwe ashepoyenitc e'oncishkawa'aminitc. Paanimaa tahsh ahpii paataapaninik okii'-naasihkawaa', ekiih pimohsetc wakicipiik ekiiwii'ani mayaashkawaatc. 49Ahpii tahsh kaa'waapamaawaatc e'wakicipiikinaminitc, “Ciipay maawiin a'awe,” kii'‑inentamook, ekiih shaakowewaatc. 50Aaniihsh kahkina okii'-waapamaawaan, kaakii'onci sekisiwaatc. Shemaak itahsh okiih kanoonikowaan Ciisahsoon: “Mashkawite'ek!” okii'-ikowaan. “Niin ohsha! Keko sekisihkek,” okii'-ikowaan. 51Miitahsh kaa'ishi poosinotaakowaatc. Mii kaa'ishi kipihtaanimahk. Wiinke tahsh kiihkwiinawi inentamook. 52Kaawiin aaniihsh mahshi okii'-nihsitaawentansiinaawaa 'iwe kaahtoocikaniwinitc pahkweshikana', onsaam ekiih petentamowaatc.
Kenehsaritink otaahkosiik ekiih pimaaci'aatc Ciisahs
(Matthew 14.34-36)
53Mii hsa kaa'ishi aashawa'amowaatc, ekii'ishi mishakaawaatc ahkiink Kenehsarit#6.53 Kenehsarit: waapantan Matthew 14.34. (Gennesaret) e'ishinihkaatek, ekiih kihciwaahkwahpitoowaatc ociimaaniwaa. 54Piciinak iko ehkapaawaatc okii'-nihsitaawinaakoo' Ciisahs i'i pemaatisinitc. 55Misiwe ayaawinink awiyak okiih papaa ishi naacipa'aawaa' otaahkosii' ehpi ishiwinaawaatc otahpihshimoniniink ehpimihshininitc i'imaa e'noontamowaatc Ciisahsoon e'ayaanitc. 56Miitahsh aanti ko kaa'ishaatc Ciisahs, ootenawenhsink kaye kihciootenaank, kaye ohpimeya'ii, okii'ishi pimihshimaawaa' otaahkosii' i'imaa entashi ataawenk. Shikwa tahsh okiih pakohsenimaawaan Ciisahsoon: “Taka oka mihcisaaminaanaawaa wanahkwek kikikishkikanink,”#6.56 wanahkwek kikikishkikanink: kii'niihsiikikwaacikaateniwan okashkiikiiwiniwaan iki Coowak ewiih kihkinawaaci'itisowaatc Kishemanitoonk ekii'-onci tipentaakosiwaatc. Waapantan Num. 15.37-41. okii'-inaawaan. Awenenak itahsh iko kaahsaaminank wawiinke kii'minoayaawak.
ទើបបានជ្រើសរើសហើយ៖
Maarhk 6: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society