Ekihsatahs 9
9
Aya'aawihshak Kiinipowaatc
1Miihsh o'o Moosihs (Moses) kaa'ikotc kaaTipencikenitc, “Maacaan anta waapam Peroo (Pharaoh) o'o ci'inatc, ‘Mii hsa 'o ehkitotc kaaTipenciketc, Hiiparoowak (Hebrews) weKishemanitoomiwaatc, “Pakitin nimpimaatisiimak cimaacaawaatc, ciawi anami'ehtawiwaatc.” 2Kiishpin itahsh wiin inentansiiwan cimaacaawaatc, nehpici kihciwinatwaa tahsh, 3miitahsh kaaTipenciketc cinana'ahsihk ciaahkosii'aatc kahkina kitaya'aawihshimiwaa' entahswewaanakisinitc mihshawahkamik eyaanitc; mihtatimoo', maanshimihtatimoo', pihkwaawikane mihtatimoo', pishihkiwa', maanahcaanihsha', maanatihkwa'. 4KaaTipenciketc hsa pahkaan owiih tootawaa' Isriyala' (Israel) otaya'aawihshimini, i'i tahsh kaye Iicip (Egypt) kaa‑ayaanitc otaya'aawihshimini. Kaawiin hsa tanipohsiiwa' aya'aawihsha' Isriyalak kaatipenimaawaatc,’ ” okii'ikoon ci‑ihkitotc. 5KaaTipenciketc iitok okii onahtoon o'o ahpii keishihsenik ekii ihkitotc, “Waapank hsa 'o ninka ishihcike i'imaa ahkiink,” kii‑ihkito.
6Eani waapaninik hsa mii 'i kaaTipenciketc kaaishihciketc. Kahkina aya'aawihsha' Iicip kaatinowinitc kaakiih tipenimaanitc kinipowa'. Kaawiin itahsh wiin kanake peshik aya'aawihsha' Isriyala' kaakiih tipenimaanitc kiinipohsiiwa'. 7Peroo tahsh kii‑ishinisha'owe cianta kihkencikenaaniwaninik. Miihsh kaaishi kihkencikaatenik awaac peshik ekii nipohsinik iinsan aya'aawihsha' Isriyala' kaakiih tipenimaanitc. Shaakooc itahsh Peroo kiiani shashiipihtam, kaawiin itahsh okiih pakitinaahsii' Isriyala' cimaacaanitc.
Kii'oshinkipihsiiminaaniwank
8Miitahsh Moosihs, Eran kaye kaaikowaatc kaaTipencikenitc, “Kanihkinamok pinkwi wencihsek pootawaanaapihkonk, Moosihs itahsh oka ishpi wepinaan i'i pinkwiini eshi'ayaanitc Peroon. 9Miitahsh i'i keani piihsaawankihsek ciani paashkinehsek misiwe Iicipahkiink, miitahsh i'imaa keani oncihsek shinkipihsiiwaahpinewin. Pemaatisiwaatc itahsh, aya'aawihshak kaye taoshinkipihsiimiwak cipaashkiminiishkaawaatc,” okii'ikowaan. 10#Rev 16.2. Miitahsh kaaishihcikewaatc ekii otaahpinamowaatc pinkwi wencihsenik pootawaanaapihkonk, ekii awi niipawiwaatc eshi'ayaanitc Peroon. Miihsh Moosihs kaakii ishpi wepinank. Miitahsh i'imaa kaaoncihsenik shinkipihsiiwaahpinewin. Pemaatisinitc itahsh, aya'aawihsha' kaye kiioshinkipihsiimiwa' ekiih paashkiminiishkaanitc. 11Memaantaawisinitc itahsh kaawiin okiih kashkihtoohsiini cipi anta waapamikotc aaniihsh wiinke misiwe kiioshinkipihsiimiwa' taapishkoo kotak Iicip kaatinowinitc. 12Mii iitok kaaTipenciketc ekiih tootawaatc Peroon aanciihke cishashiipihtaminitc. Kaawiin itahsh okiih pisintawaahsiini Moosihsoon, Eranoon kaye mayaa ekii ishihsenik kaaTipenciketc kaakii'inaakopanen Moosihsoon.
Kiikihcisehsekahk
13Miitahsh Moosihs (Moses) kaa'ikotc kaaTipencikenitc, “Wiipa kikishep wanishkaahkan cianta waapamatc Peroo (Pharaoh) ciawi niipawiwatc eshi'ayaatc o'o ci'inatc, ‘Mii hsa 'oweni ehkitotc kaaTipenciketc, Hiiparoowak (Hebrews) weKishemanitoomiwaatc: Taka pakitin nimpimaatisiimak cimaacaawaatc ciawi anami'ehtawiwaatc. 14Noonkom itahsh wiinke kiwiih kihci tootawin o'o kaawii maanshihse'inaan, iki kaye kitaanihkewikimaamak, kipimaatisiimak kaye, cikihkentamek kotak awiya niin tino eayaahsik o'omaa misiwe ahkiink. 15Kiishpin hsa nininc aapacihtooyaampaan cikiih pahkite'onaampaan, kipimaatisiimak kaye cikii aahkosii'inakookipan aasha ohsha kaawiin noonkom kitaakiih kihkentaakosihsiim o'omaa ahkiink. 16#Rom 9.17. Mii hsa 'i tepwe kaaonci ineniminaan cipimaatisiyan ewii waapanta'inaan nimashkawisiiwin, niwiinsowin kaye ciani onci waawiintek misiwe ahkiink. 17Shaakooc itahsh keyaapi kikihci inenintis ahpiihc nimpimaatisiimak, kaawiin itahsh kika pakitinaahsiik cimaacaawaatc. 18O'o hsa ahpii waapank, ninka ishihcike wiinke cikihci sehsekahk, wiihkaa mahshi kaapi kihkencikaatehsinok cipi ishiwepahk kiimaacihsekopanen o'o Iicipahki (Egypt) piinihsh itahsh o'o ishi ahpii. 19Anoohkiin itahsh kitawahkaanak eyaawaatc mihshawahkamik ci‑ishiwinintwaa eshi tapinawaahkwaa'ikaatenik, kahkina kaye kekoon eyaayek ci‑ishiwicikaatekin eshi tapinawaahkwaa'ikaatek, aaniihsh o'o kaawiih sehsekahk misiwe kahkina awiyak, aya'aawihshak kaye oka miihkoshkaakonaawaa kepiintikanaahsiwintwaa. Minihk hsa ko eyaawaatc mihshawaya'ii oka nihsikonaawaa kaawiih sehsekaninik,’ ” okii'ikoon ci‑ihkitotc. 20I'i tahsh aaninta Peroo otaanihkewikimaama' kaakiih kohtaanentaminitc ehkitonitc kaaTipencikenitc weyiip okiih piintikanaani pemiihtaakonitc, otawahkaanini kaye. 21I'i tahsh wiin kotak kaakiih papaamihtansinik ehkitonitc kaaTipencikenitc kaawiin okiih piintikanaahsiini pemiihtaakonitc, otawahkaanini kaye, ekii ayaanitc mohshehkamik.
22Miitahsh Moosihs kaa'ikotc kaaTipencikenitc, “Ishpimink inahke ishi niiminihkenin cisehsekahk misiwe Iicipahkiink. Tashi sehsekan hsa eshi'ayaawaatc pemaatisiwaatc, aya'aawihshihkaank kaye. Misiwe kaye mohshehkamik kekoon eshi nihtaawikink i'imaa misiwe Iicipahkiink,” okii'ikoon. 23Miitahsh Moosihs ishpimink inahke kaaishi niiminihkenitc. KaaTipencikenitc itahsh kii‑ishihcikewan cipinehsiiwaninik, cisehsekaninik, mihtahkamik itahsh inahke ekii ishi paakinenitc ekii kihci waawaahtehsenik. KaaTipencikenitc itahsh kii‑ishihcikewan cisehsekaninik misiwe Iicipahkiink. 24#Rev 8.7; 16.21. Kiihsehsekanini hsa, ekiih kihci aashawi waawaahtehsenik. Mii hsa 'iwe maawac iko ekiih kihci ishiwepahk i'imaa ahkiink ahkonaak kaakiih pi ayaak Iicipahki. 25Misiwe hsa ko Iicipahkiink kii‑ishi sehsekan mohshehkamik, pemaatisiwaatc eshi'ayaawaatc, eshi'ayaawaatc kaye aya'aawihshak; kahkina kekoonan kaakii nihtaawikihkin kihtikewahkamikohkaank kiinihshiwanaatanoon, mihtikook kaye kiimashashkohsewak. 26Weti hsa ehta Kooshin (Goshen) ahkiink kaakii ishitaawaatc Isriyalak (Israel) kaawiin kii‑ishi sehseka'ansinoon.
27Miitahsh Moosihs, Eran kaye kaakii antomikowaatc Peroon ekii'ikowaatc, “Mii hsa 'i noonkom kiimacitootamaan; kaaTipenciketc hsa wiin kwayahkohcike, niin itahsh nimpimaatisiimak kaye kaawiin sesik nintishihcikehsiimin. 28Anami'ehtawihk cikakwecimek kaaTipenciketc, mii 'i teminihk kii‑ishihciketc o'o kaapinehsiiwaninik, kaasehsekaninik kaye. Miitahsh i'i cipakitininakook cimaacaayek, kaawiin itahsh memwehc keyaapi o'omaa kika ayaahsiim,” okii'ikowaan.
29Miihsh o'o Moosihs kaa'inaatc, “Shemaak hsa ko onci saaka'amaan o'omaa ootenaank, ninka niiminihkehtawaa kaaTipenciketc. Miitahsh i'i cipooni pinehsiiwank, miikaye'i cipooni sehsekahk, cikihkentaman kaaTipenciketc ehtipentank o'o ahkiini. 30Shaakooc itahsh ninkihkentaan, kiin, iki kaye kitaanihkewikimaamak mahshi ekohtaanenimaahsiwek kaaTipenciketc Kishemanitoo.”
31I'i hsa kaanihtaawikink ishiikinowaahtik kiinihshiwanaatan, a'a kaye parlii manoomin aaniihsh aasha kiihkiishatihtewaakopan. 32A'a tahsh wiin pahkweshikanimin, mayaki pahkweshikanimin kaawiin kiinihshiwanaatisihsiiwak, kaawiin aaniihsh mahshi kiihpi saakikiihsiiwak.
33Moosihs itahsh ekiih saaka'ank i'imaa ootenaank okii niiminihkehtawaan kaaTipencikenitc; miihsh kaaishi pooni pinehsiiwaninik, miikaye'i kaaishi pooni sehsekaninik, kaawiin itahsh kaye awahshime kiihkimiwansinoon i'imaa ahkiink. 34Ahpii tahsh Peroo kaawaapantank ehpooni kimiwaninik, ehpooni sehsekaninik kaye, ehpooni pinehsiiwaninik kaye, miihsh miinawaa kaaishi macitootank aanciihke ekii ani shashiipihtank, i'i kaye otaanihkewikimaama'. 35Mii hsa 'i Peroo aanciihke kaakii ani shashiipihtank. Kaawiin itahsh okiih pakitinaahsii' Isriyala' cimaacaanitc, ekii ishihsenik mayaa kaaTipencikenitc kaakii ihkitonitc eaapaci'aanitc Moosihsoon.
ទើបបានជ្រើសរើសហើយ៖
Ekihsatahs 9: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society