Ekihsatahs 8
8
Omahkahkiik Kiipaahtiinowaatc
1KaaTipencikenitc itahsh Moosihs (Moses) okii'ikoon, “Anta waapam Peroo (Pharaoh) o'o ci'inatc, ‘Taka pakitin nimpimaatisiimak ciawi anami'ehtawiwaatc. 2Kiishpin itahsh inentansiwan i'i ci‑ishihcikeyan, mii hsa 'i ketootamaan kitahkiim misiwe ciayaawaatc omahkahkiik keahpiihci sanakaahkoninaan. 3I'imaa hsa Naayal (Nile) siipink wiinke tamooshkine ayaawak omahkahkiik. Miitahsh i'imaa keonci akwaasiiwaatc cipiintikewaatc kitookimaawikamikonk, kaashi nipaayan kaye, kinipewinaahkonk kaye. Taishaawak kaye owaahkaa'ikaniniink kitaanihkewikimaama', eshi'ayaanitc kaye kipimaatisiima', awaac kaye kaashi piintaapihka'ikeyek, kaashi pahkweshikanihkeyek kaye. 4Omahkahkiik hsa kika naasihkaakook, oka naasihkawaawaa' kaye kipimaatisiima', kitaanihkewikimaama' kaye,’ ” okii'inaan.
5Miitahsh kaaTipencikenitc kaa'ikotc, “O'o ishi Eran (Aaron), ‘Ishi niimaahkonan i'i kisahka'onaahk eshi sasiipiihkaak inahke, eshi'ayaakin kaye siipiinhsan, saaka'ikaniinhsihkaanan kaye, miihsh omahkahkiik misiwe ciayaawaatc o'omaa Iicipahkiink (Egypt),’ ” okii'ikoon. 6Miitahsh Eran kaaishihciketc, ekii ishi niiminank osahka'onaahk eshi nanipiihkaanik Iicipahkiink. Miitahsh omahkahkii' kaakiih pitakohshininitc misiwe ekii ayaanitc i'imaa ahkiink. 7I'i tahsh memaantaawisinitc, mii 'i peshikwan kaaishihcikenitc ekii maamahkaacihcikenitc, ekii kashki'aanitc omahkahkii' cipiishaanitc i'imaa Iicipahkiink.
8Miitahsh Moosihs, Eran kaaikowaatc Peroon, “Anami'ehtawihk kaaTipenciketc cipooni ayaanitc o'o omahkahkii' o'omaa eshi'ayaawak, eshi'ayaanitc kaye nimpimaatisiima'; miitahsh cipakitinakwaa kipimaatisiimak cimaacaawaatc ciawi pakitinaahsoohtamawaawaatc kaaTipencikenitc,” okii'ikowaan.
9Miihsh Moosihs kaa'inaatc Peroon, “Kiin hsa piko onentan aaniin ahpii ishihsek keanami'ehtamawinaan. Miitahsh cianami'ehtamawinaan, iki kaye kitaanihkewikimaak, kipimaatisiimak kaye. Miihsh cipooni ayaawaatc omahkahkiik kiwaahkaa'ikaniwaank. Weti tahsh ehta Naayal (Nile) siipink tashi ishkwiinowak,” okii'inaan.
10“Waapank ihsa anami'ehtamawihshiihkan,” itahsh okii'ikoon Peroon.
Miihsh Moosihs kaa'inaatc, “Mii hsa 'i keishihsek kaaihkitoyan, miihsh cikihkentaman pahkaan kotak awiya einentaakosihsik eshi'ayaanitc ninKishemanitoominaanin. 11Miitahsh omahkahkiik cipooni ayaawaatc, kiwaahkaa'ikaniwaank kaye, eshi'ayaanitc kaye kitaanihkewikimaa', eshi'ayaanitc kaye kipimaatisiima'. Iki hsa ehta Naayal (Nile) siipink eyaawaatc omahkahkiik taishkwiinowak,” okii'inaan. 12Miitahsh Moosihs, Eran kaye kaaishi nakanaawaatc Peroon. Moosihs tahsh okii anami'ehtawaan kaaTipencikenitc cipooni ayaanitc omahkahkii' kaakiih piinaanihpan eshi'ayaanitc Peroon. 13Mii hsa 'i kaaTipencikenitc kaaishihcikenitc Moosihs kaakii ishi kakwecimaatc. Omahkahkii' ekii niponitc waahkaa'ikanihkaank, akwaciink kaye eshi wawiimpihcikaatenik, mihshawahkamik kaye. 14Wiinke hsa ko okiimamaanki okohshimaawaa' omahkahkii', wiinke kaye kiimaanshi maakwan Iicipahki. 15Ahpii tahsh Peroo ewaapantank omahkahkii' eniponitc, mii 'i aanciihke kaakii ani shashiipihtank ekiih pisintawaahsik Moosihsoon, Eranoon kaye, ekii ishihsenik mayaa kaakii ihkitonitc kaaTipencikenitc.
Pihkociihsenhsak Kii'ayaawaatc
16Miitahsh kaaTipencikenitc Moosihs (Moses) kaa'ikotc, “Kanoosh Eran (Aaron) ciniimaahkonank osahka'onaahk, cipahkihte'ank itahsh kaapaashkinehsenik ahki, miitahsh i'imaa keonciinitc pihkociihsenhsa' misiwe keayaanitc Iicipahkiink (Egypt),” okii'ikoon. 17Miitahsh kaaishihcikewaatc. Eran tahsh okii niimaahkonaan osahka'onaahk ekiih pahkihte'ank kaapaashkinehsenik ahki. Miitahsh i'imaa paashkinehsenk kaaoncihsenitc pihkociihsenhsa' misiwe Iicipahkiink ekii ayaanitc. Misiwe hsa kiiayaawa' pihkociihsenhsa', ekii ishi pooniihsantawaanitc pemaatisinitc, aya'aawihshihkaank kaye. 18Memaantaawisinitc itahsh otaanakiih kocihtooni cimaamahkaacihcikenitc ewiih piinaanitc pihkociihsenhsa', kaawiin itahsh okiih kashkihtoohsiini. Misiwe hsa ko kiiayaawa' pihkociihsenhsa' pemaatisinitc kaaishi'ayaanitc, aya'aawihshihkaank kaye. 19#Luk 11.20. Miitahsh iki memaantaawisiwaatc kaa'inaawaatc Peroon (Pharaoh), “Mii'osha'oweni Kishemanitoo otishihcikewin,” okii'inaawaan. Miitahsh aanciko Peroo kaakii ani shashiipihtank, ekiih pisintawaahsik Moosihsoon, Eranoon kaye, mayaa ekii ishihsenik kaakii ihkitonitc kaaTipencikenitc.
Oociinsak Kii'ayaawaatc
20Miitahsh Moosihs (Moses) kaa'ikotc kaaTipencikenitc, “Wiipa kikishep wanishkaahkan cianta mekwaashkawatc Peroo (Pharaoh) ahpii naasipiitc. Miihsh o'o ke'inatc, ‘O'o hsa ihkito kaaTipenciketc: taka pakitin nimpimaatisiimak cimaacaawaatc, cianta anami'ehtawiwaatc. 21Kiishpin itahsh pakitinaahsiwatwaa nimpimaatisiimak cimaacaawaatc, mii hsa ketootawinaan cipiicinisha'wakwaa oociinsak wiinke cipaahtiinowaatc. Ciayaawaatc kaye eshi'ayaanitc kitaanihkewikimaama', kipimaatisiima' kaye. Kiwaahkaa'ikaniwaank kaye ta‑ayaawak. Iicip (Egypt) kaa‑ayaawaatc hsa eshi owaahkaa'ikaniwaatc wiinke tamamooshkinewa' oociinsa', misiwe kaye mihtahkamik eshitaaniwaninik ta‑ayaawa'. 22I'i tahsh ahpii ishi kiishikaninik pahkaan hsa wiin niwiih tootaan i'i Kooshin (Goshen) ahki, eshitaawaatc nimpimaatisiimak. Kaawiin wiin weti ta‑ayaahsiiwak cipaahtiinowaatc oociinsak, cionci kihkentaman Niin kaaTipencikeyaan eayaayaan omaa ahkiink. 23I'i tahsh ahpii kiishikahk, pahkaan hsa niwii inenimaak nimpimaatisiimak, iki tahsh kaye kipimaatisiimak. Waapank itahsh o'o maamahkaaci kihkinawaacihcikewin taishihse,’ ” okii'inaan. 24Miitahsh kaaTipenciketc kaaishihciketc. Wiinke hsa kiihpaahtiinowa' oociinsa' kaakiih pakami ayaanitc Peroo owaahkaa'ikanink, owaahkaa'ikaniniink kaye otaanihkewikimaama'. Wiinke hsa misiwe kiinihshiwanaasinaakwan aaniihsh misiwe kiiayaawa' oociinsa' i'imaa Iicipahkiink.
25Miihsh Moosihs, a'a kaye Eran (Aaron) kaakii antomikowaatc Peroon ekii'ikowaatc, “Maacaak awi pakitinaahsoohtamawihk kiKishemanitoomiwaa o'omaa ahkiink,” okii'ikowaan.
26O'ohsh Moosihs kii‑ihkito, “Kaawiin hsa kwayahk nintaa ishihcikehsiimin i'i ishihcikeyaank. Kepakitinaahswaatamawankitc hsa kaaTipenciketc ninKishemanitoominaan otaa kakwaanihsakentaanaawaa Iicipahkiink kaa‑ayaawaatc. Kiishpin itahsh waapamiyamintwaa aapacihtaawankitc pakitinaahswaakeyaank kekwaanihsakentamowaatc, maakishaa nintaa papiimwahsina'ikonaanik! 27Miitahsh eshinaakwahk nihsokiishik minihk cipimi ayaayaankipan ci‑ishaayaank weti pikwatahkamik, ciawi pakitinaahsoohtamawankitc kaaTipenciketc ninKishemanitoominaan taapishkoo kaakii'ishiyamintc,” okii'inaan.
28Miihsh o'o Peroon kaa'ikotc, “Kika pakitinininim hsa cimaacaayek, ciawi pakitinaahsoohtamawek kaaTipenciketc kiKishemanitoomiwaa weti pikwatahkamik, keko tahsh wiin waahsa ishaahkek. Anami'ehtamawihshiihkek itahsh,” okii'ikoon.
29Miihsh o'o Moosihs kaa'inaatc, “Inashke'o kaanakaninaan, mii hsa 'i cikakwecimak kaaTipenciketc i'i kaapaahtiinonitc oociinsa' waapaninik ninkoci i'imaa cionci ishaanitc eshi'ayaayan, cinakanaanitc kaye kitaanihkewikimaama', kipimaatisiima' kaye. Kaawiin itahsh kika kayeshimihsiinaam miinawaa cipakitinaahsiwatwaa pemaatisiwaatc ciawi pakitinaahsoohtamawaawaatc kaaTipencikenitc,” okii'inaan.
30Miitahsh Moosihs kaaishi nakanaatc Peroon, ekii anami'ehtawaatc kaaTipencikenitc. 31KaaTipenciketc itahsh kii‑ishihcike kaakii ishi kakwecimikotc Moosihsoon ekii ishi'aatc oociinsa' cinakanaanitc Peroon, otaanihkewikimaamini kaye, opimaatisiimini kaye. Kaawiin hsa ko peshik inkoci kiiayaahsiiwan. 32O'o tahsh ishi ahpii Peroo aanciihke kiiani shashiipihtam. Kaawiin okiih pakitinaahsii' cimaacaanitc pemaatisinitc.
ទើបបានជ្រើសរើសហើយ៖
Ekihsatahs 8: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society