Ekihsatahs 11
11
Moosihs Kiiwiintank Nihtam Nehtaawikinitc Kwiiwisenhsa' Ciniponitc
1KaaTipencikenitc itahsh Moosihs (Moses) okii'ikoon, “Keyaapi peshik ehta kekoon niwiihtootawaa ewiih kihci sanakaahkonak a'a Peroo (Pharaoh), i'i kaye opimaatisiima'. I'i hsa kii‑ishkwaa tootawak, miitahsh i'i cipakitininek pisaan cimaacaawek. Kehcinaac hsa ko kahkina kaatahshiyek inkoci kika ishinisha'okowaa. 2Inashke tahsh kanoosh pemaatisiwaatc Isriyalak (Israel), ciwiintamawatwaa kahkina ininiwak, ihkwewak kaye ciantotamawaawaatc owiicitaamaakaniwaa' kekoonan kaawaapaapihko shooniyaa waapihkowaninikin, kaaosaawi shooniyaa waapihkowaninikin kaye,” okii'ikoon. 3Miitahsh kaaTipenciketc kaakiih tootawaatc Iicip (Egypt) kaatinowinitc cikihtenimaanitc Isriyala'. Tepwe hsa ko kaakii aanihkewikimaawinitc, kahkina kaye pemaatisinitc okii'inaani Moosihsoon ehkihci inentaakosinitc.
4Miihsh Moosihs kaaihkitotc, “Mii hsa 'oweni ehkitotc kaaTipenciketc, ‘Inkociko aapihtaa tipihkahk niwii ishaa mekweya'ii Iicipahkiink. 5Kahkina hsa nihtam kaanihtaawikiwaatc kwiiwisenhsak taawinink i'imaa Iicipahkiink tanipowak. Kihciokimaa Peroo okosihsan kekii ani kihciokimaawinihpan, piinihsh a'a kwiiwisenhs wekosihsimikotc ihkwewan pemiihtaakenitc kaashikwa'waanitc pahkweshikanan. Iki kaye awaac nihtam kaanihtaawikiwaatc pishihkiwak tanipowak. 6Inashke tahsh wiinke takihci mawinaaniwan misiwe o'omaa Iicipahkiink, kaawiin itahsh wiihkaa otaanaank i'i kiipishi kihci mawinaaniwansinoon, kaawiin kaye wiihkaa i'i inahke ta‑ahpiihci kihci mawinaaniwansinoon. 7Awaac kaye animook kaawiin oka mikinaahsiwaawaa' Isriyala', komaa kaye otawahkaanini. Miitahsh cikihkenimiyek niin kaaTipencikeyaan epahkaanenimakwaa Iicip kaatinowiwaatc, iki kaye Isriyalak,’ ” okii'ikoon. 8Miihsh Moosihs kaa‑ani ihkitotc, “Kahkina hsa kitaanihkewikimaamak ninka pi naasihkaakook, cipi animihkohtaawaatc keshi'ayaawak, cikanooshiwaatc cimaaciinimak kahkina nimpimaatisiima' inkoci ci‑ishiwinimak. Miitahsh i'i payesh cimaacaayaan!” Miitahsh kaaishi nakanaatc Peroon wiinke ekii nishkaatisitc.
9O'o Moosihs okii'ikoopaniin kaaTipencikenitc, “Peroo hsa kaawiin kika pisintaakohsii, miitahsh i'i ahpii nimaamahkaaci kihkinawaacihcikanan awahshime kenaakohtooyaan i'imaa Iicipahkiink,” okii'ikoopaniin. 10Moosihs tahsh a'a kaye Eran (Aaron) aanakii‑ishihcikewaatc ono maamahkaaci kihkinawaacihcikewinan enaahsamiinitc Peroon, shaakooc tahsh kaaTipenciketc oncita okiih tootawaan Peroon cishashiipihtaminitc. Miihsh kaakii onci pakitinaahsinik Isriyala' otahkiimink cionci maacaanitc.
ទើបបានជ្រើសរើសហើយ៖
Ekihsatahs 11: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society