Ekihsatahs 1
1
Isriyalak Kiikakwaataki'intwaa Iicipahkiink
1 #
Gen 46.8-27. Mii hsa 'owe Cekap (Jacob) kaaishinihkaasonitc okosihsa' kaakii ishi wiiciiwikotc Iicipahkiink (Egypt) kii‑ishaakopanen. Entahso peshikonitc hsa ko kii‑ishaanikopan, tako kaye kaakiih tahshinitc otaawininiink. Miihsh o'o kaaishinihkaasonitc: 2Oroopan (Reuben), Simiyan (Simeon), Liipaai (Levi), Coota (Judah), 3Isahkaar (Issachar), Sepiyolan (Zebulun), Penciman (Benjamin), 4Ten (Dan), Napihtalaai (Naphtali), Kat (Gad), Aahshar (Asher). 5Niishwaahsimitana (70) hsa maamaw kiihtahshiwak Cekaponk kaakii ontahkaanesiwaatc. Ini hsa wiin okosihsan Coosap (Joseph) eshinihkaasonitc aasha weti kiiayaawan Iicipahkiink. 6Coosap itahsh kaawiin keyaapi kiihpimaatisihsii, wiicihkiweya' kaye. I'i kaye kahkina kaakii wiici ahpiihtaatisiimaahpan. 7#Act 7.17. Opiiwesiimiwaa' Isriyala' (Israel) kiiani nihtaawikiwa', kiiani paahtiinowa' kaye. Aahpici kaye kiiani soonkentaakosiwa'. Wiinke hsa ko kiiani misihteyiinowa' i'imaa Iicipahkiink.
8 #
Act 7.18. Kiiayaa tahsh oshki kihciokimaa kaakiih tipentank Iicipahkiini, kaawiin itahsh aapiinc iko okiih kihkenimaahsiin Coosapoon aaniin kaahpi ishihcikenitc. 9Miitahsh kaa'inaatc opimaatisiima', “Inashke Isriyalak (Israel) aahpici paahtiinowak, nawac kaye wiinawaa soonkentaakosiwak ahpiihc kiinawint. 10#Act 7.19. Taka hsa kakwe kipihtinaataanik awahshime ciani paahtiinohsikwaa. Maakishaa hsa otaa wiici'aawaa' pi'anta miikaashiyamintwaa kaashiinkeniminankitwaa. Miitahsh o'omaa ahkiink cionci tapasiiwaatc,” kii‑ihkito. 11Miitahsh Iicip kaatinowiwaatc kaakii onahsaawaatc kekakwaatakanohkii'aanitc Isriyala'. Ekiih tootawaawaatc wawiinke piko cikakwaatakanohkiinitc. Miihsh kaakii oshihtamawaanitc kihciokimaan kihci ootenawan keshi ahtaasonitc. Paaihtam (Pithom), Oremasiihs (Rameses) kii‑ishinihkaateniwan ini kihci ootenawan. 12Aanciko tahsh ekiih kakwaataki'aawaatc, mii 'i aanciko kaa‑anishi paahtiinonitc, misiwe kaye ekii ishi misihteshkaanitc i'imaa ahkiink. Iicipahkiink kaaonciiwaatc itahsh wiinke okiih kihci kohsaawaa' Isriyala'. 13Wiinke hsa okiih kakwaataki mihtanohkii'aawaa'. 14Miitahsh kaa‑ahpiihci kakwaataki mihtanohkii'aawaatc, kaawiin weweni kiihpimaatisihsiiwa'. Ekiih tootawaawaatc cioshi'aanitc kaakahkahkeyaapihkisinitc ahsinii', cioshi'aanitc kaye keonci kihci waapihkihshininitc i'i ahsinii'. Kahkina hsa ko kekoon okii inanohkii'aawaa' mihshawahkamik, maawac iko ekiih kakwaatakanohkii'aawaatc. Kaawiin awaac pankii cikoohpaatenimaawaatc.
15A'a tahsh kihciokimaa i'imaa Iicipahkiink okii inaa' niishin (2) Hiiparoo (Hebrew) ihkwewa' kaakii otaahpinaawahsonitc. A'a peshik ihkwe Shipara (Shiphrah) kii‑ishinihkaaso, a'a kotak Piyooah (Puah) kii‑ishinihkaaso. 16Miihsh o'o kaa'inaatc, “Ahpii hsa kiiwiici'ekwaa Hiiparoowihkwewak kiinihtaawikinaawahsowaatc, kiishpin kwiiwisenhsan ayaawaawaatc, shemaak hsa kika nihsimaawaan. Kiishpin tahsh wiin ihkwesenhsan ayaawaawaatc, pisaan hsa tapimaatisiwan,” okii inaa'. 17Iki tahsh ihkwewak wetaahpinaawahsowaatc okiih kohtaanenimaawaan Kishemanitoon, kaawiin tahsh kii‑ishihcikehsiiwak kaakii ishi anoonikowaatc kihciokimaan, pisaan hsa ko kaye okiih pakitinaawaa' kwiiwisenhsa' cipimaatisinitc. 18Miitahsh a'a kihciokimaa i'imaa Iicipahkiink kaakii antomaatc i'i ihkwewa' wetaahpinaawahsonitc ekii ishi kakwecimaatc, “Wekonen tahsh o'o wenci ishihcikeyek, ehpakitinekwaa kwiiwisenhsak cipimaatisiwaatc?” okii inaa'. 19Miihsh o'o kaaishi nahkwehtaakotc, “Hiiparoowihkwewak hsa kaawiin ishi'ayaahsiiwak kaaishi'ayaanitc Iicipiiwihkwewa'. Etatawe ohsha wiinawaa owencihtoonaawaa enihtaawikinaawahsowaatc. Kaawiin tahsh ninte takohshinsiimin, mii 'i aasha kii‑ishkwaa nihtaawikinaawahsowaatc,” okii'ikoo'. 20Kishemanitoo tahsh okii minotootawaa' i'i ihkwewa' wetaahpinaawahsonitc. Miitahsh Isriyalak aancihke kaakii ani paahtiinowaatc, wiinke kaye kiiani soonkentaakosiwak. 21Iki hsa ihkwewak ekohtaanenimaawaatc Kishemanitoon, mii 'i kaakii miinikowaatc wiinawaa piko ciotapinoonciishimiwaatc. 22#Act 7.19. Miitahsh kihciokimaa Peroo (Pharaoh) kaainaahkonaatc pemaatisinitc kaakiih tipenimaatc ekii'inaatc, “Entahshiwaatc hsa Hiiparoowi kwiiwisenhsak kenihtaawikiwaatc, kika pahkopii wepinaawaak i'imaa Naayal (Nile) siipink. Iki tahsh wiin kahkina kaaihkwesenhsiwiwaatc pisaan iko tapimaatisiwak,” kii‑ihkito.
ទើបបានជ្រើសរើសហើយ៖
Ekihsatahs 1: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society