Ishihcikewinan 18
18
Pwaal kiiayaatc Kwaarint ootenaank
1Ahpii tahsh o'o kaa'ishkwaa ishihsek, Pwaal (Paul) okii'-nakataan Aahtins (Athens) ootena. Weti tahsh kii'ishi takohshin Kwaarint (Corinth) ootenaank. 2Miitahsh kaakii waapamaatc peshik Coowan Ahkwila (Aquila) eshinihkaasonitc Paantahs (Pontus) ahkiink wenciinitc. Noomayiihke Itali (Italy) ahkiink kiihpiionci takohshinoon ekiihpi wiiciiwaanitc wiiwini Parihsila (Priscilla) eshinihkaasonitc. Maawac Kihciokimaan Kalaatiyahsan (Claudius) iitok kii'inaahkonikewan kahkina Coowa' ninkoci Oroom ootenaank ci'onci'-ishaanitc. 3Miiwan itahsh ini kaa'wiiciayaamaatc ekii'-wiitanohkiimaatc aaniihsh peshikwan kii'inanohkiiwak ekii'-oshihtoowaatc pakwaanekamikoon. 4Entahso Anwepiiwi kiishikaninik tahsh anami'ewikamikonk okiih tashikakwe kashkimaa' Coowa', i'i kaye Kariihk (Greek) tenowinitc.
5Ahpii tahsh Saailahsan (Silas), Timahtiin (Timothy) kaye Maahsitooniya ahkiink (Macedonia) kaahpi'onci takohshininitc, Pwaal mii 'i pishihshik kaa'ishihciketc ekiih tashintamawaatc Coowa' otihkitowinini kaaTipencikenitc, ekii'-wiintamawaatc Ciisahsoon ayaawinitc kaakii'-Onaapamikonitc Kishemanitoon. 6Ahpii tahsh enanaahkwehtaakotc Coowa', noociko kaye e'ikotc, miihsh kaa'ishi paahpaawiwepinank okikishkikanan o'o ekii'inaatc: “Kiinawaa hsa piko kika naasihkaakom kekashkihtamaasoyek, kaawiin kekoon i'i ninka papaamisihsii. Miitahsh intawaa meshkwac cinaasihkawakwaa kaaCoowiwihsikwaa,” okii'inaa'. 7Miitahsh i'imaa kaa'ishi nakanaatc. Ininiwan itahsh Tiitiyahs Castahs (Titius Justus) eshinihkaasonitc okiih piintikawaan owaahkaa'ikaniniink pehsho eshitaanitc anami'ewikamikonk. Miiwan ini kaakii'-anami'ehtawaanitc Kishemanitoon. 8Karispahs (Crispus) tahsh kaatipentank anami'ewikamik okiih tepweyenimaan kaaTipencikenitc, kahkina kaye eyaanitc otaawinink. Niipiwa' tahsh Kwaarint ootenaank wenciinitc kaakii'-noontaminitc kiihtepwehtamoo', kiihsiika'antaasowa' kaye.
9Ehtipihkaninik tahsh Pwaal ishinamowinink okii'onci kanookikoon kaaTipencikenitc ekii'ikotc: “Keko sekisihken, maano ko kaakiikiton, keko noontepakiciihken. 10Niin ohsha kiwiiciiwin, kaawiin awiya kika miikaanikohsii ciwiihsakaahpinanihk, niipiwa' ohsha o'omaa ootenaank ayaawak awiyak tepenimakwaa,” okii'ikoon. 11Pwaal i'imaa kii'ayaa peshiko aapihta pipoon ekiih kihkino'amawaatc pemaatisinitc Kishemanitoon otihkitowinini.
12Ahpii tahsh Kaalio (Gallio) kiionahshowewikimaawitc Ahkeya (Achaia) ahkiink, Coowa' okiimaamawi otihtinikoo' Pwaal ekii'-ishiwinikotc onahshowewikamikonk 13ekii'-ihkitonitc: “Wa'a hsa inini okakwe kashkimaa' awiya' nahpaac inahke cishi anami'ehtawaanitc Kishemanitoon, kaawiin eshihsininik onahshowewin,” kii'ihkitowa'.
14Pwaal tahsh iko ewii'ani kiikitotc, Kaalion kii'onci kiikitowan e'inaanitc Coowa': “Kiishpin ihsa 'owe noociko kekoon, komaa kaye mamaanshiiwin tinowankipan, taakii'-ishinaakwanoopan iitok cikiih pisintawinakookipan. 15Kiishpin tahsh wiin ehta ihkitowinan, wiinsowinan kaye, i'i kaye otoonahshowewiniwaa onci kiihkaantiyek, kiinawaa piko wiin i'i nana'ahtook. Kaawiin niin kekoon niwii'-inaahkonikehsii,” okii'inaa'. 16Miitahsh kaa'ishi saakicinisha'waatc i'imaa onahshowewikamikonk. 17Okii'-otihtinaani tahsh Saastiniisan (Sosthenes) kaatipentaminitc anami'ewikamik ekiih pahpahkihte'waawaatc i'imaa akwaciink onahshowewikamikonk. Kaawiin Kaalio awaac okiih papaapisiskenimaahsii'.
Pwaal kiishikiiwetc Entiyaahk inahke
18 #
Num 6.18. Kinwesh tahsh i'imaa Kwaarint (Corinth) ootenaank Pwaal (Paul) kii'ayaa. Miitahsh kaa'ishi nakanaatc otepwehtamoo' ekii'-inaahshitc weti Siiriya (Syria) ahkiink, ekii'-wiiciiwikotc Ahkwilawan (Aquila), Parihsilawan (Priscilla). Cipwaa maaciiyaahshitc tahsh weti Senkariiya (Cenchreae)#18.18 Senkariiya (Cenchreae): ootena ciiki kihcikamiink kiiayaa i'imaa kaakii onci nihtaa poosinaaniwank kihciciimaanink i'imaa pehsho Kwaarint (Corinth) ootenaank. okiipashkoshaan ohtikwaan, aaniihsh kii'ishi ahpimonotawaakopan Kishemanitoon.#18.18 aaniihsh kii'ishi ahpimonotawaakopan Kishemanitoon: Coowak kii‑ishihcikewak, kiishpin eahshotamawaawaatc kihcikekoonini Kishemanitoon kaawiin kiihpashkwa'amaahsiiwak. Ahpii tahsh ehtipihsenik otahshotamaakewin mii kaaishi pashkwa'amaawaatc. 19Kiihpi takohshinook tahsh i'imaa Ehpihsahs (Ephesus) ootenaank ecikaatenik. Miitahsh i'imaa kaakii'ishi nakanaatc Ahkwilawan, Parihsilawan kaye. Wiin tahsh wiin kiihpiintike Coowi'-anami'ewikamikonk ekiih tashintamawaatc Coowa' kekoonan. 20Ahpii tahsh ehkakwecimikotc keyaapi kinwesh i'imaa cikii'-ayaahpan, kaawiin kii'inentansii. 21Ahpii tahsh kaahpooshoo'aatc okii'inaa': “Miinawaa kika pianta waapamininim kiishpin Kishemanitoo inentank,” okii'inaa'. Ehpihsahsink tahsh kii'onci maaciiyaahshi. 22Ahpii tahsh kaahkapaatc Sehsariiyaink (Caesarea) kiikohpii ekii'-ishaatc weti Ceroosalamink (Jerusalem) ekiih pooshoo'aatc otepwehtamoo' kaamaawaci'itinitc. Miihsh kaa'ishi'-ishaatc weti Entiyaahk (Antioch) ootenaank. 23Kinweshiihsh itahsh iko i'imaa kii'ayaa. Miitahsh kaakii'-maacaatc misiwe ekiihpapaa ishaatc Kalehshiya (Galatia) ahkiink, Pariciyahkiink (Phrygia) kaye, ekiihpapaa mashkawisii'aatc kahkina otepwehtamoo'.
Apaalahs ehtashimintc
24Peshik tahsh Coo Apaalahs (Apollos) eshinihkaasotc, Aalikihsaantariya (Alexandria)#18.24 Aalikihsaantoriya (Alexandria) ootena kiihkihci‑inentaakwan i'imaa Iicipahkiink (Egypt). Kiiayaa imaa kihci kihkino'amaatiiwikamik. Mii 'iwe ootena kaakiionci kihci‑inentaakwahk ekiih tashi kihkino'amaakaaniwank kaaishpaak kihkino'amaakewin. ootenaank e'onciitc kiihpi takohshin i'imaa Ehpihsahs ootenaank. Wiinke kiinihtaa kakito, niipiwa' kaye okii kihkentaan Kihcimasina'ikan. 25Wa'a hsa inini kiihkihkino'amawaawintipan inahke keshi naasihkawimintc kaaTipencikenitc, wiinke tahsh kiiaahkohcike ehtashintank, ekihkino'amaaketc enaacimimintc Ciisahsoon. Cwaanan tahsh kaakii'ishi siika'antaakenitc ehta okii kihkentaan. 26Kii'maacii kakiihkwe tahsh i'imaa anami'ewikamikonk ekiih soonkite'etc. Ahpii tahsh Ahkwilawan (Aquila), Parihsilawan (Priscilla) kaye enoontaakotc okiihkiiwe wiishaamikoo' eshitaanitc awahshime ekiihpehte wiintamaakotc inahke kaashi naasihkawimintc Kishemanitoon.
27Apaalahs tahsh kii'inentam ci'ishaatc Ahkeya akiink (Achaia), otepwehtamoo' tahsh okiih kakaansomikoo' pisaan ci'ishaatc, ekii'-oshipii'amawaanitc otepwehtamoo' weti eyaanitc cipiintikanikotc. Ahpii tahsh weti kaahtakohshink okiikihci wiici'aa' i'i kaakii'onci tepwehtaminitc Kishemanitoon okishewaatisiwininiink. 28Wiinke tahsh kiimashkawikiishwe ekiih shaakoosomaatc Coowa' eshi paahtiinonaaniwaninik, Kihcimasina'ikanink ekii'onci pehtenaakohtootc Ciisahsoon eyaawinitc Kishemanitoo otoOnaapancikanan ciPimaaci'iwenitc.
ទើបបានជ្រើសរើសហើយ៖
Ishihcikewinan 18: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society
