Ishihcikewinan 16
16
Timahti kiimaaciiwiiciiwaatc Pwaalan, Saailahsan kaye
1Pwaal (Paul) hsa kiihpitakohshin i'imaa eshi ootenaawaninik Tarpi (Derbe), Listara (Lystra) kaye kaaicikaatenikin. Kii'ayaawan itahsh i'imaa peshik otepwehtamoon Timahti (Timothy) eshinihkaasonitc. Omaamaani hsa Coo kiihtinowihkwewiwan, oteteni tahsh wiin Kariihk (Greek) kiihtinowiwan. 2Kahkina hsa otepwehtamook eyaawaatc i'imaa Listara ootenaank, Aaihkooniyam (Iconium) ootenaank kaye okii'-mino tashimaawaan Timahtiin. 3Miiwan tahsh ini Pwaal kaakii'-antawenimaatc ciwiiciiwikotc, miihsh kaakiih kihkinawaatashakeshwaatc. Miitahsh kaakii'onci tootawaatc aaniihsh kahkina Coowa' i'imaa kaakii'-ayaanitc okii kihkentamini Timahtiin oteteni Kariihk ekiih tinowinitc.#16.3 oteteni Kariihk ekiih tinowinitc: Timahti kaawiin kiionci kihkinawaatashakeshikaniwihsii ahpii kaaoshkapinoonciishiwitc, aaniihsh ekiih Coowiwihsinik oteten. 4Kii'ani ayishaawak itahsh eshi waootenaawaninik, ekii'-wiintamaakewaatc aaniin kaakii'ishi onentaminitc ishinisha'waakana' ke'ishihcikenaawiwaninik, kaaniikaanisinitc kaye Ceroosalamink (Jerusalem) kaa'ayaanitc. Miitahsh kaakii'-inaawaatc cikanawentaminitc ini inaahkonikewinan. 5Otepwehtamook tahsh entashi maamaawaci'itiwaatc awahshime kii'ani mashkawi tepwehtamook, kii'ani paahtiinowak kaye entahsokiishik.
Pwaal kii'ishinank ci'ishaatc Caroowahsink
6Misiwe tahsh kii'ishaawak i'imaa Pariciya (Phrygia) ahkiink, i'imaa kaye Kalehshiya (Galatia) ahkiink. Kaawiin tahsh okiih pakitinikohsiiwaan Kishemanitoon otAhcaahkoni citashintamowaatc kaaTipencikenitc otihkitowinini Eshiya (Asia) kihci ahkiink. 7Ahpii tahsh kaamayaashkamowaatc Mihshiya (Mysia) ahkiink kiihkakwe ishaawak Pihtiniya (Bithynia) ahkiink. Kaawiin tahsh okiih pakitinikohsiiwaan Ciisahsoon otAhcaahkoni i'imaa ci'ishaawaatc. 8Okiih shaaposhkaanaawaa tahsh Mihshiya ahki, weti tahsh kii'ishi takohshinook Caroowahs (Troas) ootenaank. 9Ahpii tahsh ehtipihkaninik Pwaal okii'-waapantaan ishinamowin. Okii'-waapamaan ininiwan ematwe niipawinitc Maahsitooniya (Macedonia) ahkiink ehpakohsenimikotc o'o ekii'-matweikotc iinsan: “Piishaan cipi yaashawishkaayan ciwiici'iyaank,” okii'ikoon. 10Ahpii tahsh kaawaapantank i'i ishinamowin shemaak iko ninkii'-oshiihtaamin ewii'-ishaayaank#16.10 ninkii'-oshiihtaamin ewii'-ishaayaank: Lok (Luke) a'awe kaakii oshipii'ank Ishihcikewinan i'imaa Caroowahs (Troas) ekii onci maacii wiiciiwaatc ini Pwaalan (Paul) weti kaaishi tako wiiciiwaatc i'imaa Pilipaai (Philippi) ootenaank. Maahsitooniyaa ahkiink. Ninkiih kecinaa'omin tahsh Kishemanitoo weti ekii'ishi antomiyamintc ciwiintamawimankitc minwaacimowin weti eyaanitc.
Aaniin Litiya kaa'ishikwehkaatisitc
11Caroowahs (Troas) ootenaank tahsh ninkii'-onci maaciiyaahshimin tiwehk iko Saamohtaarehs (Samothrace) minihsink ekii'ishi pakamaahshiyaank. E'ani waapank itahsh Niyaahpolihs (Neapolis) ootenaank ninkii'-inaahshimin. 12Miitahsh weti kaa'onci kohpiiyaank ekii'-ishaayaank ootenaank Pilipaai (Philippi) eshinihkaatek. I'i hsa ootena kiiniikaanentaakwan#16.12 ootena kiiniikaanentaakwan: niiwin ahkiin ekii onci tipentaakwahkin Maahsitooniya (Macedonia) ahkiink. Nihtam kaaniikaanentaakwahk i'iwe ahki mii 'imaa kaashiayaak iwe Pilipaai (Philippi) ootena. kii'onci tipentaakwan Maahsitooniyaa ahkiink, Oroomink (Rome) kaa'onciiwaatc okii'-oshihtoonaawaakopan.#16.12b Oroomink (Rome) kaaonciiwaatc okii'-oshihtoonaawaakopan: weti kaakii‑inentaakosiwaatc Oroomink (Rome) mii peshikwan enentaakosiwaatc o'omaa Pilipaayink, miinawaa ekaa citipahamawaawaatc kaaokimaawaatisinitc kaye wiinawaa piko ehtipenimitisowaatc. Paahtiino kiishik tahsh i'imaa ninkii'-ayaamin. 13Ahpii tahsh e'Anwepiiwi kiishikahk ninkii'-ishaamin akwaciink kaashi ishkwaantemiwank ootena, eshi siipiiwank inahke ekii'-ishaayaank, ekii'-inentamaank kehcinaac maawiin cimihkamaank Coowak entashi anami'aawaatc. Ninkii'-onapimin tahsh ekiih kakanoonankitwaa ihkwewak i'imaa kaakii maawaci'itiwaatc. 14Peshik tahsh ihkwe kaakiih pisintawiyamintc Litiya (Lydia) kii'ishinihkaaso, Tayahtaira (Thyatira) ootenaank ekii'-onciitc. Mii hsa kaa'inanohkiitc e'ataawaaketc mahkatemiskwekinoni, kaa'anami'ehtawaatc Kishemanitoon hsa kiihtinowi. Miitahsh kaakii'-miinikoowisitc cinihsitohtank, citepwehtank kaye kahkina Pwaalan kaakii'-ihkitonitc. 15Ahpii tahsh kaahsiika'antaasotc, i'i kaye otaawinink eyaanitc, ninkiih kakaansomikonaan ekii'-ishiyanmintc: “Kiishpin enakimiwekwen kwayahk ehtepweyenimak kaaTipenciketc, piintikek nintaawinink, ciwiici'-ayaamiyek,” ninkii'ikonaan. Ninkii kashkimikonaan itahsh ci'ishaawankitc.
Pwaal, Saailahs kaye kiikipa'ontwaa i'imaa Pilipaai ootenaank
16Aapitink tahsh ehkiishikahk e'ishaayaank entashanami'aaniwank, ninkii'-mekwaashkawaanaan oshkiniikihkwe kaapamiihtaaketc ekikishkaakotc maciahcaahkwan, ekii'-inishkaakotc cikashkihtootc ciwiintank niiyaak keni'-ishihsenik. Niipiwa' kii'onci shooniyaahkewa' otookimaama' a'a oshkiniikihkwe ekiih kashkihtootc ciniikaaniwiintank aaniin kekoon keni'-ishihsenik. 17Mii 'awe kaakiih piminisha'waatc Pwaalan (Paul) e'wiiciiwimankitc o'o ekii'ishi shaahshaakowetc: “Miiwak hsa oko ininiwak kaa'anohkiihtawaawaatc Maawac Eshpentaakosinitc Kishemanitoon, kewiintamawinekwaa aaniin inahke keshi pimaaci'ikoowisiyek!” ekii'-ihkitotc. 18Paahtiino kiishik tahsh o'o kii'ishihcikewan. Kekahpii tahsh Pwaal okii'-mikoshkaatentamo'ikoon, miihsh kaakiih kwehkikaapawihtawaatc ekii'inaatc ini maciahcaahkwan kaakikishkawaanitc oshkiniikihkwewan: “Ciisahs Christ owiinsowinink kitishi kanoonin cinakanatc a'a ihkwe,” okii'inaan. Shemaak itahsh okii'-nakanaani.
19Ahpii tahsh oshkiniikihkwe otookimaama' ekihkentaminitc e'wanihtoonitc kaashi'-ahpenimonotaakotc kaanihtaa onci shooniyaahkenihpan, okii'-otihtinaani Pwaalan, Saailahsan kaye. Okii'ishi waawiihkopinaani tahsh i'imaa kaaishi nihtaa tanataawenk mekwe ootenaank eshi ayaanitc otoonahshowe'. 20Okiih piinaani tahsh eshi ayaanitc onahshowewikimaan Oroomink (Rome) kaaonci tipentaakosinitc o'o ekii'inaanitc: “Oko hsa ininiwak kaaCoowiwiwaatc wawaanentamihcikewak kitootenaaminaanink, 21ekihkino'amaakewaatc ishihtwaawinan ci'otaahpinamowank citako ishihcikewank itahsh. Kaawiin kiinawint iitok kitaa otaahpinamowaahsiimin ehkitowaatc aaniihsh Oroomink kitoonci tipentaakosimin,” kii'ihkitowa'. 22Ikiweniwak tahsh kaakii'-maamawi ayaawaatc i'imaa kiihtakwiiwak emiikaanimintc Pwaalan, Saailahsan kaye. Onahshowewikimaak kii'anoohkiiwak cikiihcikonayepicikaniwinitc cipahpahshanshe'omintc, cipapahkihte'omintc kaye. 23Kaa'ishkwaa kihci pahpahshanshe'waawaatc itahsh okiihpiinci wepinaawaa' kipa'otiiwikamikonk. Kanawencikewi shimaakanihsh tahsh kii'anoonaa ciyaayiici kipa'waatc cikashki'ohsinik. 24Ahpii tahsh a'a kanawencikewi shimaakanihsh i'i kaa'ishi anoonintc okiih piintike wepinaa' maawac anaamink kipa'otiiwikamikonk, ositiniink kaye ekii'ishi kihciwaahkwa'waatc.#16.24 ekii'ishi kihciwaahkwa'waatc Niishwaa hsa kiihpakonehcikaate mihtik kaakii'ishi nihtaa kihciwaahko'ontwaa tahkonikanak mewisha.
25Ninkoci ko e'ani aapihtaatipihkaninik Pwaal, Saailahs kaye kii'anami'aawak, ekii'-anami'e nikamoohtawaawaatc kaye Kishemanitoon. Kotak tahkonikana' okiih pisintaakowaa'. 26Miitahsh i'i kwetahto kaakii'kihci koshkohsek ahki. Kiiwahkawihse kaye kaakii'ishi patahkitek kipa'otiiwikamik. Ishishemaak tahsh kahkina kipa'otiiwi'-ishkwaanteman kiihpaahkihsewan, kahkina kaye omamaancikwahpisowiniwaan kiipahkihseniwan. 27Kanawencikewi shimaakanihsh tahsh ekoshkohsetc ekii'-waapantank ishkwaanteman epaahkihsininikin, kii'inentam tahkonikana' ekii'-maaciipa'iwenitc. Miitahsh kaakiih kicipitootc opashipa'ikewihkomaan ewii'-nihsitisotc. 28Pwaal tahsh okiih shaakowaanaan: “Keko kekoon tootaasohken! Kahkina ohsha 'omaa nintayaamin,” okii'inaan.
29Kii'anoohkiiwan tahsh cipiicikaatenikin waahsahkonencikanan, miihsh kaakiih piintikepahtoonitc ekii'-animihkohtaanitc eshi ayaawaatc Pwaal, Saailahs kaye, ekii'-nininkishkaanitc ehpiihcisekisinitc. 30Okiih saakisi'ikowaan tahsh ekii'ikowaatc: “Aaniin keishihcikeyaan cipimaaci'ikoyaan?” okii'ikowaan. 31O'o tahsh okii'ishi nahkwehtawaawaan: “Tepweyenim kaaTipenciketc Ciisahs, miitahsh i'i cipimaaci'ikooyan, iki kaye kitaawinink eyaawaatc,” okii'inaan. 32Okiih kakanoonaawaan tahsh ekii'-wiintamawaawaatc otihkitowinini kaaTipencikenitc, i'i kaye kahkina i'imaa eyaanitc otaawininiink. 33Shemaak tahsh iko i'i ahpii etipihkaninik kanakwencikewi shimaakanihshan okii'-ishiwinikowaan ekiih kisiihsipatoonitc kaakii'ishi ayenakanaasowaatc. Shemaak tahsh kaye kiihsiika'antaasowan, ini kaye kahkina otaawininiink eyaanitc. 34Okii'-ishiwinikowaan tahsh eshitaanitc ekiih piintikanikowaatc ekii'-ahtamaakowaatc kemiiciwaatc. Wiinke kiikihci minwentamoon kahkina ko entahshinitc aaniihsh okiih tepweyenimaani Kishemanitoon.
35E'ani waapaninik tahsh onahshowewikimaak okii'-ishinisha'waa' aanihkewikimaa' ci'awi kanoonaanitc kanawencikewi shimaakanihshan: “Mii 'i ishipakitin iki ininiwak,” ci'inaanitc. 36Kanawencikewi shimaakanihsh tahsh okii'-wiintamawaan Pwaalan ekii'inaatc: “Onahshowewikimaak kiihpi'-ihkitowak pisaan cipakitinikooyan, a'a kaye Saailahs. Saaka'amok tahsh weweni cini maacaayek,” kii'ihkitowan. 37Pwaal o'o okii'inaa' aanihkewikimaa': “Wiinke hsa mohsheya'ii ninkiih pahpahshanshe'okonaanik, kaawiin kanake ninkiih tipaahkonikohsiinaanik, Oroomink (Rome) tahsh e'onci tipentaakosiwankitc. Kaawiin i'i nintinentansii ci'ishihsekipan. Wiinawaa hsa piko ninka pinaasihkaakonaanik cisaakici wiiciiwiyamintwaa,” okii'inaa'. 38Anihkewikimaak tahsh okii'awi wiintamawaawaa' onahshowewikimaa' aaniin Pwaalan kaa'ihkitonitc. Wiinke tahsh kiihsekisiwa' ahpii enoontaminitc Oroomink ekii'onci tipentaakosinitc Pwaalan ini kaye Saailahsan. 39Kiihpiishaawa' itahsh ekiihpi kakwe waankawi'ikowaatc pehkihsh ekiihpi saakisi'ikowaatc kaye. Miihsh kaakiih kanoonikowaatc ninkoci 'imaa ootenaank ci'onci'-ishaawaatc. 40Kipa'otiiwikamikonk tahsh kaa'ishkwaa onci saaka'amowaatc, kii'ishaawak Litiyawan (Lydia) owaahkaa'ikaniniink. Miihsh weti kaa'ishi waapamaawaatc otepwehtamoo' ekiih kanoonaawaatc cimashkawentaminitc. Miihsh kaa'ani'ishimaacaawaatc.
ទើបបានជ្រើសរើសហើយ៖
Ishihcikewinan 16: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society
