1 TISSALONIANG 5
5
Ru:tumkc Gvkunamdok Lcgangc Mosv:sula Du:tok
1Cmpige:la kapc ayirdo:pclang odokkc lendv-a:dv-kvdv:do:pc, bvrokvdvnga nolukkc o:kosin adlvgbipcnammc kamang. 2Kapila:nc nolu av avkvdv:dc kinsudag aiyo:pc jc Ru:tumkc longcdc pvngayc yummcm dopsongko gva:nammcmpc. 3Cdvlo tani:kvdv:dc luycji, “mc:pomcnganc odokkc kvnggv:la dung,” odo vgcmpc omvg osvgc pvnga:yc bulukkolo kapc ommang pa:dom nc:ngc kidoji cdcmpc. Odokkc odo sc:kosin dugsila:ma:yc. 4Cmpige:la nolu kcmolo du:mang, bvrokvdvnga, kapcnc cdc longcdc nolum dopsongcmpc mcngapla:ma:pc imoycpc. 5Kapcnc nolu appvngc pva:lok ommangc odokkc longclok ommangc; ngolu yumclokkcmang cdcmanggom kcmolokkcmang. 6Cdcmpidag kajc ngolu yubla du:yoka, kapc akke du:dagji, cmpige:la kajc darra du:lai odokkc asinc ansv:la du:lai. 7Kapila:nc cdc sc:kobulu yubbdagnc yummcm yubdag, odokkc cdc sc:kobulu tvngvrsudagnc yummcm tvngvrsudag. 8Cmpige:la, ngolu longcdokkcpc ila:yam, kajc ngolu asinc ansv:lai, odokkc mc:jvgloklang aipc mc:namlo angkcng torasunancdcm gclai, odokkc tukkudok tornc dumlupko moturdokkcm gclai. 9Kapcnc Ru:ncpvncbv ngolum aglv:la palvgnamdok lcgangc lc:mang, cmpige:la ngoluk Ru:tum Jisu Kristokokki moturcm pa:dopc cmna:mvn, 10sc:kobv ngoluk lcgangc sika:ji odomvlo jen ngolu darra du:daggom cdcmanggom yubla du:daggom ngolu Bvk lcdulo turra du:ycpc. 11Cdcmpidag akoncm akonc asincm pvtamolang odokkc akoncm akonc mosa:lang, kappar nolu ila du:ji.
Lutcrpc Luyir Lunamclang Kumtadsunam
12Cmpige:la ngolu kumna:sola: ludung nolum, bvrokvdvnga, cdc noluk ara:lo ager gernckvdv:dcm mcnggcdopc odokkc nolum Ru:tumkolo noluk tayc:lo odokkc luyirgvyirdagji, 13odokkc bulum airu:pc arckancpc mc:la aya:lo buluk agerkvdv:dok lcgangc. Mcnganna du:toka noluk av-avkc ara:do.
14Odokkc ngolu nolum luyircm ludung, bvrokvdvnga, lo:bagnckvdv:dcm luyirrang, Pcsonckvdv:dcm asincm bottcpc mc:molang, bo:lkama:nckvdv:dcm idumgvdumsulang, bulu appv:dok lcdulo mentvlang. 15Ka:langka jc nolukkolok sc:kosin aima:pc inamlok aimangcm ikutsuyoka, cmpige:la lo:dcm aincm akoncm akonc imvnsupc cmna malangka odokkc appv:lo:pc.
16Lo:dcm mc:polangka, mcma:pc kumnangka, 17appvng inamsa:namlo aipai bilangka; 18Kapila:nc cdcna Ru:ncpvnckc noluk lcgangc Kristo Jisukolo mcngkamc.
19Yalodcm midmoyoka, lungor lunamcm mcpagyoka, 20cmpige:la appvngcm anka:la ka:lang; 21okodc aidagji kvnggv:pc gagla du:lang, 22aima:nc ager appv:lokkc gc:rlangka.
23Mcngannclok Ru:ncpvncbv avdc nolum appvngcm lckko:pc narc:moteika; odokkc noluk yalodc odokkc atma:dc odokkc amvrdcm lujckko kama:dopc anpola du:dopc Ru:tum Jisu Kristokc gvdokudo:pc lcngkanlangka. 24Sc:kobv nolum gogdagji Bv mc:jvgjvrvgncko, odokkc bv cdcm iyc.
25Bvrokvdvnga, ngoluk lcgangc kumnang.
26Appvng bvrokvdv:dcm angunnc dosukki kumtadsulangka.
27Ru:tumkokki ngo nolum lutcmna pesubidung jc sc do:jvgscm appvng bvrokvdv:dcm pobilangka.
28Ngoluk Ru:tum Jisu Kristokc ayangc noluk lcdulo dungka: langka.
ទើបបានជ្រើសរើសហើយ៖
1 TISSALONIANG 5: MISIBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.