1 KORINTIANG KVDVNG 6
6
Kristan Ajoncm Gusor Monam
1Cdvlo nolukkc bvro akolok birudi:pc mc:nyingko du:yc, bv lujvgluro lcgangc dormo kama:ncdok kcra:do:pc gvpc ang mcla:donci angunnc tani:lo:pc gvma:pc. 2Nolu kinma:nci jc angunnc tani:kvdv:dc mo:pvscm kcbangcm ba:yc cmna? Odokkc mo:pvscm nolukokki kcbangcm ba:mvlo, nolu adjio:nc ajcngkvdv:dcm ba:pc ba:la:ma:nci? 3Nolu kinma:nci jc ngolu taycng lutad lunckvdv:dcm kcbang ba:ycku cmna. Cddvko bojcya:pc, sc turra du:namdokkcm abaya:pc! 4Nolu cdcmpinc ajcngcm la:domvlo, kapila cdcmbulum nolu mondoli:dok adji:oko mcnggcnam kvdv:dokbuluk kcra:do lubidang? 5Scmngo nolu anyi:suycpc cmna ludung. Nolukkolok tani:akosinci kama:pc ila:dagnci kinnc pa:ncpc ila kcba:lok tani:kvdv:dok bvroagomdcm lupenbila:ma:nc, 6cmpige:la akolok birudi:pc bvrro lujvglurolo:pc gvdonci, odokkc mc:jvgma:nckvdv:dok ara:lo?
7Lujvgluro ajcngko la:danpcgom akonc akonkokki mopvmvnsunapci idag nolukkcpc Kapila cdcmyam imurcm togcsuma:n? 8Cmpige:la nolu av-avkvdvngv:dc imurcm ido odokkc yaddo, odokkc jc noluk avkc bvrrangkvdv:dcmsinci.
9Nolu kinma:nci jc dormokama:nckvdv:dc Ru:ncpvnckc migom doko mo:pvdo dungkuma:yc? Yadkosuyoka; ager gernckvdv:dcmba aisi:ma:nc moimang kumnckvdv:dcm, cdcmanggom ami yamnc langgo:nckvdv:dcm, cdcmmanggom la:tcr la:tcr langgo:nc kvdv:dcm, 10cdcmanggom dopsongkvdv:dcm, cdcmanggom dorvkvdv:dcm, cdcmanggom rotkudnc kvdv:dc Ru:ncpvnckc migom doko mo:pvdok du:sonsukuncpc ima:yc. Odokkc noluk akke cdcmpinnckkai. 11Cmpige:la nolum vrpu:to, nolum narc:pc:scmoto, nolum Ru:tum Jisu Kristokc aminno ainc cmna kcbangcm ba:tobong odokkc ngoluk Ru:ncpvnckc Yalodo.
Noluk Adin-Amvrcm Ru:ncpvnckc Lcgangc Inagvnatoka
12“Appvng attarkvdv:dc ngokkcpc lujvglurodok lukamdcmpc idag,” cmpige:la appvng attarkvdv:dc agerlo kaboncmang. “Appvng attarc lujvglurodok lukampc ngokkcpc idag,” cmpige:la ngo okokokkisin pagbopc ikosumang. 13“Donamdc aki:dok lcgangc odokkc aki:dc donamdok lcgangc” odokkc Ru:ncpvncbv anyipakdcm akondcmna: akondcm anyipakdcm momvgyc. Amvrdcm aisi:ma:nc ager gernam lcgangcmang, cmpige:la Ru:tumkc lcgangc, odokkc Ru:tumbv amvrdok lcgangc. 14Odokkc Ru:ncpvncbv Ru:tummc turmotoku odokkc ngolumsin Bvk ilang gvlangkokki turmoycku.
15Nolu kinma:nci jc noluk amvrkvdv:dc Kristokc ager gerjonc cmna? Ngo cdcmpidag Kristokc ager gerjondcm la:ycnci odokkc bulum aminc:ng langgo:nam ager gerjonpc imoycnci? 16Cdvlosinmangkc! Nolu kinma:nci jc sc:kobv ami nc:ng lango:nclok du:bosudoji bvk lcdulo amvr atcro:pc ipakdag cmna? Kapila:nc, cdcm adla lc:namdcmpc, “cdc anyidc amvr akko:pc iycpc.” 17Cmpige:la sc:kobv Ru:tumkokki lckoka:ji Bvk lcdulo yalo akkongkopc idag.
18Aisi:ma:nc ager gernamcm mcpaktoka. Tani:akonc inam ake pa:p appv:dcm amvrdok ru:yido idag; cmpige:la aisi:ma:nc ager gernc tani:dc bvk avkc amvrdok birudivpc gerdag. 19Nolu kinma:nci jc noluk amvrkvdv:dc Angunnc Yalodok kumko cmna noluk arangv:do okodcm nolu Ru:ncpvnckolokkcm pa:toji? 20Nolu noluk avkcmang; nolum arckokki rctung. Cdcmpidag Ru:ncpvncmc noluk amvrkvdv:do amin gvmotoka.
ទើបបានជ្រើសរើសហើយ៖
1 KORINTIANG KVDVNG 6: MISIBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.