ខគម្ពីរពេញនិយមពី ရောမ 5

ចែក​រំលែក

ကွဲႏတွော့ꩻ နီ​အဝ်ႏ​ထွာ​နေ​က အ​ပဲစ်​သား ယံꩻ​တွင်ꩻ ဗွေႏ​ခ​ရစ်​တောႏ က​ခံႏ​သီ​ဖေႏ နီ​တာႏ​နဝ်ꩻ ဝွေꩻ​ဗွေႏ ရက်​ငါႏ​နီ ခွိုင်း​ကား​မုဲင်ꩻ​ကျောင်ꩻ ဗွေႏ​ဘု​ရာꩻ အွဉ်ႏ​နယ်​ဖေႏ​နီ​သွူ။

ထာꩻ​အဝ်ႏ​မောင်ꩻ​ယို​နဝ်ꩻ တ​မာꩻ​သꩻ​ကုဲင် ထိုꩻ​တဝ်း​နီ၊ ပွိုး​ဗွေႏ​ဘု​ရာꩻ က​ဖေႏ​ဒါႏ နီ​ဆု​ကေꩻ​ဇူꩻ​တွမ်ႏ ကြောင်း​စင် ဝိ​ညာဉ်ႏ​တောႏ​နဝ်ꩻ အဝ်ႏ​ထောက်ꩻ​ထန်ႏ​ဖေႏ ဝွေꩻ​ဗွေႏ ထာꩻ​ရက်​မေ​တ္တာႏ နီ​သꩻ​ကို​သွူ။

နီ​ကျွား​ဗာႏ​ပါ​က နီ​ထာꩻ​ဒု​က္ခ​သွူ။ ပွိုး​တွော့ꩻ နီ​အဝ်ႏ​သေ ထာꩻ​ဒု​က္ခ​နဝ်ꩻ မာꩻ​ထွာ​လွဉ် ထာꩻ​သယ်ꩻ​ခံႏ၊ ထာꩻ​သယ်ꩻ​ခံႏ​နဝ်ꩻ အီ​လွဉ်​ဖေႏ ဗွေႏ​ဘု​ရာꩻ ထာꩻ​ကျွိုက်​နစ်​သက်​တဲင်၊ ဝွေꩻ​ဗွေႏ ထာꩻ​ကျွိုက်​နစ်​သက်​နဝ်ꩻ မာꩻ​ထွာ​လွဉ်​ဖေႏ ထာꩻ​အဝ်ႏ​မောင်ꩻ​သွူ။

ယို​ခါ စွဉ်ႏ​ထာꩻ​ယွုမ်း​နဝ်ꩻ နီ​လꩻ​လဲဉ်း ထာꩻ​စွို့ꩻ​စွဉ်ႏ​ခွင်ꩻ ဗွေႏ​ဘု​ရာꩻ​ထျꩻ၊ စွဉ်ႏ​နီ​ဗွေႏ​ယေ​သျု ခ​ရစ်​တောႏ​နဝ်ꩻ နီ​လꩻ​လဲဉ်း ထာꩻ​ငိမ်ꩻ​ချမ်ꩻ​သာႏ ဗွေႏ​ဘု​ရာꩻ​ထျꩻ​သွူ။ စွဉ်ႏ​ထာꩻ​ယွုမ်း​နဝ်ꩻ ဝွေꩻ​ဗွေႏ ဟဲ့ꩻ​သော့ꩻ​နီ ဖေႏ​က​မော့ꩻ​ခွိုတ်ꩻ​ဗာႏ ဗွေႏ​ဘု​ရာꩻ ကေꩻ​ဇူꩻ​တောႏ​ကို နဝ်ꩻ​မꩻ ယို​ခါ နီ​အဝ်ႏ​စံႏ​စာꩻ​ဗာႏ​သွူ။ နဝ်ꩻမꩻ နီ​ကျွား​ဗာႏ​ဒျာႏ စွဉ်ႏ​ထာꩻ​အဝ်ႏ​မောင်ꩻ နီ​က​လꩻ​ဖ​ဒါႏ ဗွေႏ​ဘု​ရာꩻ အ​ဘွုန်ꩻ​သ​ရေႏ​တောႏ နဝ်ꩻ​သွူ။

နီ​ထာꩻ​အာႏ​ကွိုꩻ တ​အဲဉ်​ထဝ်း​ဒွုမ်​ချိန်ႏ၊ ဗွေႏ​ဘု​ရာꩻ က​လွိုက်​သေꩻ​ခါꩻ အ​ချိန်ႏ​ကာႏ​လ​နဝ်ꩻ လိုꩻ​မွိုက်​ကုဲင်​ဖုံႏ တွက်​တာႏ ဗွေႏ​ခ​ရစ်​တောႏ ခံႏ​သီ​ဖေႏ​သွူ။

စွဉ်ႏ​ဝွေꩻ​ဗွေႏ အ​သွီႏ​တောႏ​နဝ်ꩻ ယို​ခါ နီ​စွို့ꩻ​စွဉ်ႏ​လဲဉ်း တွမ်ႏ​ဗွေႏ​ဘု​ရာꩻ​နဝ်ꩻ​သွူ။ နဝ်ꩻ​လွုမ်ꩻ​တ​ကာႏ​တဝ်း အဝ်ႏ​ဗွေႏ​ဘု​ရာꩻ ထာꩻ​သꩻ​လျား​ကို၊ စွဉ်ႏ​ဗွေႏ​နဝ်ꩻ အီႏ​လွစ်​ကင်ꩻ​ဗာႏ​တဲင် နီ​အီႏ​လꩻ​လွို ထာꩻ​ကယ်ႏ​တင်ႏ ခွိုင်း​ကား​မုဲင်ꩻ။

ဗွိုန်​နုဲင်း လိုꩻ​တ​ဖြာꩻ တ​နာႏ​တဝ်း ငဝ်း​တွော့ꩻ အ​မာꩻ​ထွာ​ထိုꩻ​လိုꩻ​ဖုံႏ ကား​က​အဝ်ႏ အ​ပဲစ်​သား အ​တွိုင်ꩻ၊ ဗွိုန်​နုဲင်း​နဝ်ꩻ နေ​နေ ပွိုး​လိုꩻ​တ​ဖြာꩻ လွောက်ꩻ​နာႏ​ငဝ်း​အ​တွက် လိုꩻ​ဖုံႏ​ကား​က​အဝ်ႏ​နဝ်ꩻ လꩻ​ထာꩻ​စွို့ꩻ​စွဉ်ႏ​ခွင်ꩻ ဗွေႏ​ဘု​ရာꩻ​ထျꩻ​ဖုံႏ​သွူ။

နဝ်ꩻ​လွုမ်ꩻ​တ​ကာႏ​တဝ်း ကွပ်​ပွိုး ဗွေႏ​ဘု​ရာꩻ အဝ်ႏ​မာꩻ​လဲဉ်း စွဉ်ႏ​နီ​ဗွေႏ​ဘု​ရာꩻ ယေ​သျု ခ​ရစ်​တောႏ​နဝ်ꩻ ယို​ခါ ဗွေႏ​မာꩻ​ထွာ​လဲဉ်း​နီ အ​သွꩻ​အ​တွက် နီ​သꩻ​ပျောႏ​သွင်ႏ​ဗာႏ​သွူ။