متّانین رئوایت 27
27
یهودانین اؤلومی
1سحر چوخ تِزدن بوتون معبدئن باش کاهئنلری و خالقین آغساقّاللاری عئسانی اؤلدورمک اوچون مشورت الهدئلر. 2عئسانی باغلادیلار و اونی والی پئلاطین یانینا آپاریب اونا تسلئم الهدئلر.
3او زامان اونی تسلئم الهین یهودا، عئسانین محکوم اولدوغونی گؤروب پشمان اولدی و اوتوز گوموش پاراسینی باش کاهئنلر و آغساقّاللارا قایتاریب ددی: 4«من گوناه الهمئشم، چونکی تقصئرسئز بئر آدامین قانینی اَله ورمئشم.» اولار جاواب وردئلر: «بئزه نه؟ اؤزون بئل.» 5یهودا گوموشلری معبدئن ائچئنه آتیب اوردان چیخدی و گدئب اؤزونی آسدی. 6باش کاهئنلر گوموشی گؤتوروب ددئلر: «قان باهاسی اولدوغونا گؤره، بو گوموشلری معبدئن خزئنهسئنه قویماق جائز دیئل.» 7و مشورت الهیئب قرئبلری باسدیرماق اوچون او پول ائنان کوزهگر زمئسئنی آلدیلار. 8بونا گؤره او زمئیه بو گونه قدر قان زمئسی دیئلئر. 9او واخت اِرمیا پیغمبرئن واسئطهسی ائنن دِیئلن سؤز یِرئنه یتئشدی: «اولار اوتوز گوموش سئکهنی گؤتوردولر، او قئیمتی کی، ائسرایئل اوغوللاری اونون اوستونه قویموشدولار. 10و اونی ربّئن منه بویوردوغی کئمی کوزهگر زمئسی اوچون وردئلر.»
عئسا روم والئسی پئلاطین قاباغیندا
11بو آرادا، عئسا والئنئن قاباغیندا دوردی. والی اوندان سوروشدی: «سن یهودئلرئن پادشاهیسان؟» عئسا اونا ددی: «سن بِله دیئبسن.» 12آمّا باش کاهئنلر و آغساقّاللار عئسایا بؤهتان ووران زامان دا، او هچ بئر جاواب ورمهدی. 13او واخت پئلاط اونا ددی: «اشئتمئرسن کی، سنئن ضئدّئنه نه قدر شهادت ورئرلر؟» 14آمّا عئسا اونا هچ بئر جاواب ورمهدی. والی بوندان چوخ تعجّوب الهدی.
15والئنئن رَسمی بو ائدی کی هر بایرامدا، خالقین ائستهدئیئنه گؤره زئندانیلردن بئرئنی آزاد اِلئیه. 16او زامان باراَبّا آدیندا مشهور بئر زئندانی حبسده ساخلانیردی. 17بونا گؤره ده، جاماعات بئر یره ییغیلدیقلاری زامان، پئلاط اولارا ددی: «هانسینی ائستهیئرسئز کی، سئزئن اوچون آزاد الهیئم؟ باراَبّانی، یوخسا مسئح دیئلن عئسانی؟» 18چونکی بئلئردی کی، یهود خالقی عئسانی پاخیلّیقدان اونا تسلئم الهیئبلر. 19پئلاط حؤکم کورسوسونده اوتورموشدی کی، آروادی اونا خبر گؤندردی: «سنئن بو صالح آدام ائنان هچ بئر ائشئن اولماسین؛ چونکی بو گون اونون حاقّیندا یوخودا چوخ عذابلار چکمئشم.» 20آمّا باش کاهئنلر و آغساقّاللار جاماعاتی تحرئک الهیئردئلر کی، باراَبّانی ائستهسئنلر و عئسانی اؤلومه ورسئنلر. 21او زامان والی اولاردان سوروشدی: «ائکئسئندن هانسینی ائستهیئرسئز کی، سئزئن اوچون آزاد الهیئم؟» اولار دا ددئلر: «باراَبّانی.» 22پئلاط اولارا ددی: «بس مسئح دیئلن عئسا ائنن نه الهیئم؟» اولارین هامیسی ددئلر: «چارمیخا چک.» 23والی ددی: «نئیه، نه پئسلئک الهیئب؟!» آمّا اولار لاپ اوجادان باغیریب ددئلر: «چارمیخا چکئلسئن.»
24پئلاط گؤردی کی، هچ بئر شی آرتیق فایدا الهمئر، بلکی ائغتئشاش داها دا گوجلهنئر، سو گؤتوردی و خالقین قاباغیندا اَللرئنی یویوب ددی: «من بو صالح آدامین قانیندان تقصئرسئزم. اؤزوز بئلئن!» 25بوتون خالق جاواب ورئب ددی: «اونون قانی بئزئم بوینوموزا و اوشاقلاریمیزین بوینونا اولسون!» 26او زامان پئلاط اولارا باراَبّانی آزاد الهدی و عئسایا شالّاق ووردوراندان سورا اونی چارمیخا چکئلمهیه تسلئم الهدی.
سربازلار عئسانی تحقئر الهیئرلر
27او واخت، والئنئن سربازلاری عئسانی دئوانخانایا آپاردیلار؛ و بوتون سربازلار اونون باشینا ییغیلدی. 28اولار عئسانی سویوندوروب، اونا قیرمیزی بئر پالتار گیدئردئلر. 29تئکانلاردان بئر تاج هؤروب، باشینا قویدولار، صاغ الئنه ده بئر قامیش وردئلر؛ اونی اَله سالیب قاباغیندا دئز چؤکوردولر و دیئردئلر: «سالام، ای یهودئلرئن پادشاهی!» 30اونا توپوردولر، قامیشی گؤتوروب باشینا ووردولار. 31اونی اَله سالاندان سورا، پالتاری اونون اَینئندن چیخاردیب اؤز پالتارینی گیدئردئلر؛ و اونی چارمیخا چکمهیه آپاردیلار.
عئسا چارمیخا چکئلئر
32چؤله چیخاندا، شمعون آدیندا اولان کرِنِیلی بئر کئشئنی توتدولار و اونی مجبور الهدئلر کی، عئسانین چارمیخینی داشیسین. 33جولجوتا، یعنی «کلّه یری» آدیندا اولان یره گلدئکلری زامان، 34عئسایا عؤد ائنن قاریشیق تورش شراب وردئلر. آمّا عئسا اونی دادیب ائچمک ائستمهدی. 35اونی چارمیخا چکندن سورا، پوشک آتیب پالتارلارینی آرالاریندا بؤلوشدولر. 36و اوردا اوتوروب اونون کشئیئنی چکدئلر. 37اولار اونون تقصئرئنی ده یازیب باشی اوستونه ووردولار: «بودور یهودئلرئن پادشاهی عئسا.»
38او زامان اونونان ائکی اوغرونی دا چارمیخا چکدئلر؛ بئرئنی صاغ طرفئنده، او بئرئنی ده سول طرفئنده. 39اوردان کچنلر عئسانی سؤیوردولر و باشلارینی ترپهدئب، 40دیئردئلر: «ای معبدی ییخیب اوچ گونده تئکن! اگر تارینین اوغلوسان، اؤزونی نئجات ور و چارمیخدان آشاغی دوش!» 41باش کاهئنلر، تؤورات موعلّئملری و آغساقّاللار دا اونی مسخره الهیئب، دیئردئلر: 42«آیری آداملاری نئجات وردی، آمّا اؤزونی نئجات ورهبئلمئر! اگر ائسرایئلئن پادشاهیدیر، قوی ائندی چارمیخدان دوشسون و بئز ده اونا ائمان گتئرک. 43تارییا بل باغلاییردی؛ اگر تاری اونی سِوئر، قوی ائندی اؤزی اونی خئلاص الهسئن. چونکی دیئردی من تارینین اوغلویام.» 44اونونان چارمیخا چکئلن اوغرولار دا اونی سؤیوردولر.
عئسانین اؤلومی
45ناهارچاغی ساعات اون ائکئدن، ناهاردان سورا ساعات اوچه قدر، بوتون اؤلکهیه قارانلیق دوشدی. 46ناهاردان سورا ساعات اوچه یاخین، عئسا اوجا سَس ائنن قیشقیردی: «ائلویی، ائلویی، لاما سَبَقتهنی؟» یعنی «تاریم، تاریم، نه اوچون منی ترک الهدئن؟» 47اوردا دورانلاردان بعضئسی بونی اِشئدنده ددئلر: «ائلیانی چاغیریر.» 48او آندا، اولاردان بئری قاچیب بئر تئکه ابر گؤتوردی، تورش شراب ائنان دولدوروب بئر قامیشا تاخدی و اونا اوزاتدی کی، ائچسئن. 49آمّا قالانلاری دیئردئلر: «قویون گؤرک، آیا ائلیا اونی نئجات ورمهیه گلئر؟» 50عئسا گئنه اوجا سَس ائنن قیشقیریب روحونی تسلئم الهدی. 51او آندا معبدئن پردهسی یوخاریدان آشاغییا قدر ائکئیه بؤلوندی. یر لرزهیه گلدی، قایالار چاتلادیلار. 52قبئرلر آچیلیب، وفات اِلهمئش بئر چوخ موقدّسئن جسدی دئرئلدی. 53اولار قبئرلردن چیخیب، عئسانین دئرئلمهسئندن سورا، موقدّس شهره گئردئلر و بئر چوخ آداملارا گؤروندولر. 54روملی افسر و اونونان عئسانین کشئیئنی چکنلر، زلزلهنی و باشورن شیلری گؤروب قورخدولار و ددئلر: «دوغرودان دا بو آدام تارینین اوغلی ائدی.»
55بئر چوخ آرواد کی، جلئل وئلایتئندن عئسانین دالیسیجا گلئب اونا خئدمت الهمئشدئلر، اوردا دوروب اوزاقدان باخیردیلار. 56مجدللی مریم، یعقوب ائنان یوسانین آناسی مریم و زِبِدِیئن اوغوللارینین آناسی اولارین آراسیندا ائدی.
عئسانین باسدیریلماسی
57آخشام دوشَنده یوسئف آدیندا وارلی بئر آرئماتایلی کئشی گلدی کی، عئسانین شاگئردی اولموشدی. 58بو آدام پئلاطین یانینا گدئب عئسانین جسدئنی ائستهدی. او زامان پئلاط امر الهدی کی، جسد ورئلسئن. 59یوسئف جسدی آلیب تمئز بئر کتان پارچایا بوکدی. 60اونی داشدا تزه قازیلمیش اؤز مقبرهسئنه قویدی و مقبرهنئن آغزینا بئر ائری داش دیرلهدئب گتدی. 61مجدللی مریم ائنن او بئری مریم اوردا، قبئرئن قاباغیندا اوتورموشدولار.
مقبرهنئن کشئکئن چکنلر
62او گونون صاباحی، یعنی موقدّس شنبه گونی اوچون حاضیرلانماقدان بئر گون سورا، باش کاهئنلر و فرئسئلر پئلاطین یانینا ییغیلیب ددئلر: 63«جناب، بئز خاطیرلاییریق کی، او یالانچی، دئری اولان واختیندا دیئردی کی، اوچ گوندن سورا دئرئلهجهیم. 64بونا گؤره، امر اله کی، مقبرهنی قوروسونلار. اولماسین شاگئردلری گلئب اونی اوغورلاسینلار و خالقا دسئنلر کی، او، اؤلولردن دئرئلدی. بو آزدیرماق اوّلکئندن ده داها پئس اولار.» 65پئلاط اولارا ددی: «بئر دسته کشئکچی گؤتورون؛ گدئن بئلدئیئز کئمی مقبرهنی قورویون.» 66اولار گدئب مقبرهنئن قاباغیندا کشئکچی قویدولار و مقبرهنئن داشینی مؤهورلهدئلر و بله ده مقبرهنی بوتون خطرلردن قورودولار.
اکنون انتخاب شده:
متّانین رئوایت 27: CAB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
