متّانین رئوایت 26
26
عئسانین اؤلدورمک نقشه سی
1عئسا بوتون بو سؤزلری قورتاراندان سورا، شاگئردلرئنه ددی: 2«نجه کی، بئلئرسئز ده، ائکی گوندن سورا مایاسیز چؤرک پاسخا بایرامی باشلاناجاق و ائنسان اوغلی چارمیخا چکئلمک اوچون اَله ورئلهجک.»
3او زامان معبدئن باش کاهئنلری و خالقین آغساقّاللاری، قیافا آدیندا اولان لاپ بؤیوک کاهئنئن سارایینا ییغیشدیلار 4و مصلحتلشدئلر کی، نجه عئسانی حئیله ائنن توتوب اؤلدورسونلر. 5آمّا ددئلر: «بو ائش بایرام گونلرئنده اولماسین، یوخسا خالق آراسیندا ائغتئشاش باش ورَر.»
عئسا بیتعنیا کندئنده
6عئسا بیتعنیا کندئنده، جوذاملی شمعونون اِوئنده اولان واخت، 7بئر آرواد اونون یانینا گلدی. آرواد مرمر بئر قابدا چوخ قئیمتلی بئر عطئرلی یاغ گتئرمئشدی. عئسا سوفرهده اوتوراندا، آرواد عطئرلی یاغی اونون باشینا تؤکمهیه باشلادی. 8شاگئردلر، بونی گؤرن واخت، حئرصلهنئب ددئلر: «بو ائصراف نه اوچوندور؟ 9اولاردی کی، بو عطئر باها بئر قئیمته ساتیلیب یوخسوللارا ورئلسئن.» 10آمّا عئسا بونی بئلئب اولارا ددی: «نه اوچون بو آروادی ائنجئدئرسئز؟ او منه یاخشیلیق الهدی. 11یوخسوللار همئشه یانیزدادیرلار، آمّا من همئشه یانیزدا دیئلم. 12بو آرواد بو عطئری منئم بدنئمه تؤکمک ائنن منی باسدیریلماق اوچون حاضیرلادی. 13دوغروسونی سئزه دیئرم: ائنجئلئن بو خوش خبری دونیانین هاراسیندا اعلان اولونسا، بو آروادین گؤردئیی ائشده دیئلئب خاطیرلاناجاق.»
یهودانین خیانتی
14او زامان ائسکاریوتلی یهودا کی، اونائکی شاگئرلردن بئری ائدی، باش کاهئنلرئن یانینا گدئب ددی: 15«اونی اَله ورسم، منه نه وِرَرسئز؟» اولار دا یهودایا اوتوز گوموش پاراسی وعده وردئلر. 16او واختدان یهودا، بئر فورصت آختاریردی کی، عئسانی اولارا تسلئم الهسئن.
پاسخا یمهیی
17مایاسیز چؤرک بایرامینین بئرئنجی گونونده شاگئردلر عئسانین یانینا گلئب ددئلر: «هاردا ائستهیئرسن کی، سنئن اوچون پاسخا یمهیئنی حاضیر الهیک؟» 18عئسا اولارا ددی: «شهره گئرئب فئلانکسئن یانینا گدئن و اونا دیئن: ”اوستاد دیئر؛ منئم واختیم یاخیندیر. ائستهیئرم شاگئردلرئم ائنن بئر یِرده، پاسخا شامینی سنئن اِوئنده یِرئنه یتئرم.“» 19شاگئردلر عئسانین اولارا ددئیی کئمی الهیئب پاسخا شامینی حاضیرلادیلار.
20آخشام دوشَنده، عئسا اونائکی شاگئردی ائنن سوفره باشیندا اوتوردی. 21یمک یئینده عئسا ددی: «دوغروسونی سئزه دیئرم: سئزلردن بئری منی تسلئم اِلئیهجک.» 22اولار چوخ قمگئن اولدولار و بئر-بئر اوندان سوروشدولار: «حتمن کی، من دیئلم، آغا؟» 23عئسا جاواب وردی: «او آدام کی اَلئنی من ائنن کاسایا باتیریر، منی تسلئم الئیهجک. 24ائنسان اوغلی نجه کی، اونون بارهسئنده یازیلیب، گِدئر. آمّا وای او آدامین حالینا کی، ائنسان اوغلی اونون واسئطهسی ائنن تسلئم اولونور! او آدام هچ آنادان اولماسایدی، اونون اوچون چوخ یاخشی اولاردی.» 25اونی تسلئم الهین یهودا ددی: «حتمن کی، من دیئلم، اوستاد؟» عئسا دا اونا ددی: «ددئیئن کئمیدئر.»
26اولار یمک یئیَنده، عئسا چؤرهیی گؤتوروب شوکور الهدی و پارچالاییب شاگئردلره وردی و اولارا ددی: «آلین، ییئن! بو منئم بدنئمدئر.» 27سورا بئر پئیالانی گؤتوروب شوکور الهدی و اولارا ورئب ددی: «بوندان هامیز ائچئن. 28بو منئم قانیمدیر، تارینین تزه عهدی کی منئم قانیم ائنان مؤهورلهنئر، اله او قان کی چوخ آداملارین یولوندا گوناهلارین باغیشلانماسی اوچون تؤکولور. 29سئزه دیئرم: آرتیق اوزومون محصولوندان ائچمیهجهیم، او گونه قدر کی، اونی آتامین پادشاهلیغیندا سئز ائنن برابر تَزه سئنی ائچم.»
30و ائلاهی بئر ماهنی اوخویاندان سورا زیتون داغینا گتدئلر.
پطروسون ائنکار الهمهسی قاباقدان خبر ورئلئر
31او زامان عئسا اولارا ددی: «بو گجه هامیز مندن دؤنهجکسئز. چونکی یازیلیب:
”چوبانی ووراجاغام،
و سورونون قویونلاری داغیلاجاق.“
32آمّا من، دئرئلندن سورا، سئزدن قاباق جلئل وئلایتئنه گدهجهیم.» 33پطروس جاواب ورئب ددی: «هامی سندن دؤنسه ده، من سندن اصلا دؤنمهیهجهیم.» 34عئسا اونا ددی: «دوغروسونی سنه دیئرم: اِله بو گجه، خوروز بانلامامیش سن منی اوچ دفه ائنکار الئیهجکسن.» 35پطروس اونا ددی: «حتّی اگر لازیم اولسا کی سن ائنن اؤلَم، سنی ائنکار الهمئیهجهیم.» شاگئردلرئن هامیسی دا اِله ددئلر.
جِتسئمانی باغیندا
36او زامان عئسا شاگئردلری ائنن جتسئمانی آدیندا اولان بئر یِره گلئب اولارا ددی: «سئز بوردا اوتورون کی، من اورایا گدئب دوعا الهیئم.» 37عئسا پطروس ائنان زِبِدِیئن ائکی اوغلونی اؤزی ائنن گؤتوردی. قم و ائضطئراب عئسایا حاکئم اولماغا باشلامیشدی. 38او واخت اولارا ددی: «جانیم اؤلوم حدّئنده قمگئندئر. بوردا دورون و من ائنن اویاق قالین.» 39عئسا بئر آز ائرهلی گتدی، اوزی-اوسته یِره دوشوب دوعا الهدی: «ای آتام، اگر مومکوندور، قوی بو عذاب پئیالاسی مندن کِچسئن، آمّا گئنه ده منئم ائستهدئیئم یوخ، سنئن ائستهدئیئن اولسون.» 40سورا شاگئردلرئنئن یانینا گلدی و اولاری یوخولامیش تاپدی. پطروسا ددی: «سئز من ائنن بئر ساعات دا، اویاق قالماغا قادئر دِیئلدئز؟ 41اویاق قالین و دوعا الهیئن کی، ائمتاحانا دوشمهیهسئز. روح ائستهیئر، آمّا جئسم ضعئفدئر.» 42عئسا ائکئنجی دفه گدئب دوعا الهدی: «ای آتام، اگر مومکون دیئل کی، او پئیالا من اونی ائچمهدن کچسئن، قوی سنئن ائستهدئیئن اولسون.» 43و قاییدیب اولاری گئنه یوخولامیش تاپدی، چونکی اولارین گؤزلری آغیرلاشمیشدی. 44اولاری قویوب گئنه گتدی و اوچونجی دفه دوعا الهیئب گئنه همن سؤزلری ددی. 45او واخت شاگئردلرئنئن یانینا گلئب اولارا ددی: «سئز حله ده یاتیب ائستئراحت الهیئرسئز؟ باخین، ساعات یاخینلاشیب و ائنسان اوغلی گوناهکارلارین الئنه تسلئم اولونور. 46دورون گدک! باخین، منی تسلئم الهین گلئر!»
عئسا توتولور
47عئسا حله دانیشیردی کی، یهودا کی اونائکی شاگئردلردن بئری ائدی، یانیندا قیلینجلی و اَل آغاجلی بؤیوک بئر جاماعات ائنان یتئشدی. اولار باش کاهئنلر و خالقین آغساقّاللاری طرفئندن گؤندَرئلمئشدئلر. 48عئسانی تسلئم الهین اولار ائنان قرارلاشیب دمئشدی: «کئمی اؤپسم، عئسا اودور. اونی توتون.» 49و او آندا عئسایا یاخینلاشیب ددی: «سالام، اوستاد!» و اونی اؤپدی. 50عئسا دا اونا ددی: «دوستوم، نه اوچون گلدئیئنی اله!» او زامان اولار عئسایا یاخینلاشدیلار و اونی یاخالاییب توتدولار. 51عئسا ائنن اولانلاردان بئری ال آتیب، قیلینجینی چکدی و لاپ بؤیوک کاهئنئن قولونی ووروب قولاغینی کسدی. 52او زامان عئسا اونا ددی: «قیلینجینی یِرئنه قوی، چونکی بوتون قیلینج چکنلر قیلینج ائنان هلاک اولاجاقلار. 53مگر اله گومان الهیئرسئز کی، قادئر دیئلم آتامدان کؤمک ائستهیم؟! ائستهسم، اله ائندی بو آن منه ائکی قوشوندان چوخ ملک گؤندَرَر. 54اوندا بس نجه موقدس یازیلار دوغری چیخاردی کی، دیئر بو ائشلر گرک اولا؟» 55او زامان عئسا جاماعاتا ددی: «یول کسهنئن اوستونه گلن کئمی، قیلینجلار و اَل آغاجلار ائنان اوستومه گلئبسئز؟ من هر گون معبدده اوتوروب تعلئم ورئردئم و منی توتمادیز. 56آمّا بولارین هامیسی اونون اوچون باش ورئر کی، پیغمبرلرئن یازیلاری یرئنه یتئشسئن.» او زامان شاگئردلرئن هامیسی عئسانی قویوب قاچدیلار.
عئسا مئلّت شوراسینین قاباغیندا
57عئسانی توتانلار اونی لاپ بؤیوک کاهئن قیافانین یانینا گتئردئلر. تؤورات موعلّئملری و آغساقّاللار دا بوردا ییغیلمیشدیلار. 58پطروس باش کاهئنئن حیطئنئن ائچهرئسئنه قدر اوزاقدان عئسانین دالیسیجا گتدی و ائشئن آخیرینی گؤرمک اوچون موحافئظلرئن یانیندا اوتوردی. 59باش کاهئنلر و بوتون شورا عئسانی اؤلدورمک اوچون اونون ضئدّئنه یالان شهادت آختاریردیلار. 60اورتایا بئر چوخ یالانچی شاهئدلر چیخدیغی حالدا، آختاردیقلارینی تاپا بئلمهدئلر. آخیردا ائکی یالانچی شاهئد گلئب ددی: 61«بو آدام ددی کی، ”من تارینین معبدئنی ییخیب، اوچ گونده تئکه بئلهرم.“» 62لاپ بؤیوک کاهئن آیاغا قالخیب عئسایا ددی: «هچ جاواب ورمئرسن؟ بولارین سنئن ضئدّئنه وردئکلری شهادت نهدئر؟» 63آمّا عئسا سوکوت الهدی. لاپ بؤیوک کاهئن اونا ددی: «سنی آند ورئرم دئری تارییا، بئزه ده گؤرک، آیا سن وعده ورئلن مسئح تارینین اوغلوسان؟» 64عئسا اونا ددی: «ددئیئن کئمیدئر. حتّا بونی دا سئزه دیئرم؛ بوندان سورا ائنسان اوغلونی گؤرهجکسئز کی، تارینین قودرتئنئن صاغیندا اوتوروب، گؤیون بولودلاری اوستونده گلئر.» 65او زامان لاپ بؤیوک کاهئن اؤز پالتارینی جیریب ددی: «او کوفر دیئر، آرتیق شاهئدلره نه احتئیاجیمیز وار؟ باخین، اله ائندی اونون کوفر ددئیئنی اشئتدئز. 66سئز نه دیئرسئز؟» اولار جاواب ورئب ددئلر: «او، اؤلومه لایئقدئر.» 67او زامان عئسانین اوزونه توپوروب، اونا یومروق ووردولار. بعضئلری ده اونون اوزونه شئلّه ووروب، 68اوندان سوروشوردولار: «ای مسئح، نبئلئک اِله، ده گؤرک سنی کئم ووردی؟»
پطروس عئسانی ائنکار الهیئر
69بو زامان پطروس اشئکده، حیطده اوتورموشدی. بئر کنئز اونا یاخینلاشیب ددی: «سن ده جلئللی عئسا ائنن ائدئن.» 70آمّا او، هامینین قاباغیندا ائنکار الهیئب ددی: «سنئن نه ددئیئنی باشا دوشمورم.» 71سورا دروازایا ساری گتدی. اوردا آیری بئر کنئز اونی گؤروب اورداکیلارا ددی: «بو آدامدا ناصئرهلی عئسا ائنن ائدی.» 72پطرس، گئنه ائنکار الهیئب آند ائچدی کی: «او آدامی تانیمیرام.» 73بئر آز سورا اوردا دورانلار گلئب پطروسا ددئلر: «دوغرودان سن ده اولاردانسان، چونکی دانیشیغیندان بئلئنئر.» 74او زامان پطروس لعنت الئیه-الئیه آند ائچمهیه باشلادی: «او آدامی تانیمیرام.» و او آندا خوروز بانلادی. 75پطروس عئسانین ددئیی سؤزی یادینا گتئردی کی، اونا دمئشدی؛ «خوروز بانلامامیش سن اوچ دفه منی ائنکار الئیهجکسن.» پطروس اوردان چیخیب آجی-آجی آغلاماغا باشلادی.
اکنون انتخاب شده:
متّانین رئوایت 26: CAB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
