متّانین رئوایت 28
28
عئسانین دئرئلمهسی
1موقدّس شنبه گونی کچندن سورا، هفتهنئن اوّلکی گونی سحر چوخ تزدن، مجدللی مریم و او بئری مریم مقبرهنی گؤرمهیه گلدئلر. 2باخ، بؤیوک بئر زلزله اولموشدی: چونکی ربّئن بئر ملهیی گؤیدن انئب، داشی مقبرهنئن آغزیندان دیرلهدئب اوستونده اوتورموشدی. 3او ملهیئن گؤرونوشی ائلدیریم کئمی ائشیلداییردی؛ پالتاری دا قار کئمی آغ ائدی. 4کشئکچئلر اونون قورخوسوندان تئترهیئب اؤلی کئمی اولموشدولار. 5ملک آروادلارا ددی: «قورخمایین، بئلئرم کی، چارمیخا چکئلمئش عئسانی آختاریرسیز. 6او، بوردا دیئل، چونکی ددئیی کئمی دئرئلئب. گلئن ربّئن یاتدیغی یری گؤرون. 7و تز گدئب اونون شاگئردلرئنه دیئن: او، اؤلولردن دئرئلئب و سئزدن قاباق جلئله گدئر. اوردا اونی گؤرهجکسئز. ائندی، سئزه خبر وردئم.» 8آروادلار قورخی و بؤیوک شادلیق ائنان او ساعات مقبرهدن چیخدیلار و شاگئردلره خبر ورمهیه قاچدیلار. 9شاگئردلره خبر ورمهیه گدنده، بئردن عئسا اولارین قاباغینا چیخیب ددی: «سئزه سالام!» اولار دا یاخینلاشیب عئسانین آیاقلارینا دوشدولر و اونی پرستئش الهدئلر. 10او زامان عئسا اولارا ددی: «قورخمایین! گدئن، قارداشلاریما خبر ورئن کی، جلئله گتسئنلر. منی اوردا گؤرهجکلر.»
کشئکچئلرئن گتئردئیی خبر
11آروادلارین گتدئیئندن سورا، کشئکچئلردن بعضئسی شهره گلئب، باشورن بوتون شیلری معبدئن باش کاهئنلرئنه خبر وردئلر. 12اولار آغساقّاللار ائنان بئر یِره ییغیلیب مشورت اِله یندن سورا، سربازلارا چوخلی پول ورئب 13ددئلر: «دیئن کی، اونون شاگئردلری بئز یوخودا اولاندا گجه ائنن گلئب اونی اوغورلاییبلار. 14اگر بو بارهده خبر والئیه گلئب چاتسا، بئز اونی راضی اِلئیهرئک و سئزی بلادان قورتاراریق.» 15اولار دا پولی آلیب امر اولوندوغی کئمی الهدئلر. و بو سؤز بو گونه کئمی یهودئلر آراسیندا یاییلیبدیر.
بؤیوک مأمورئیت
16آمّا اون بئر شاگئرد جلئل وئلایتئنه، عئسانین اولارا بئلدئردئیی داغا گتدئلر. 17عئسانی گؤرن زامان، اونی پرستئش الهدئلر؛ آمّا بعضئلری شک ائچئنده ائدئلر. 18عئسا یاخینلاشیب اولارا ددی: «گؤیده و یر اوزونده بوتون قودرت منه ورئلئب. 19اونا گؤره گدئن و بوتون خالقلاری منه شاگئرد اِله یئن. و اولاری آتا، اوغول و موقدّس روحون آدی ائنن تعمئد ورئن. 20اولارا اؤیرَدئن کی، سئزه امر الهدئیئم بوتون شیلری ساخلاسینلار. باخین، من دونیانین آخیریناجاق هر گون سئز ائنَنم.»
اکنون انتخاب شده:
متّانین رئوایت 28: CAB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
