لوقا روایت 23
23
1اوندان سورا شورانین هامیسی آیاغا قالخیب عئسانی روملی والی پئلاطین یانینا آپاردیلار 2و عئسایا بؤهتان وورمایا باشلاییب ددئلر: «بئز بو آدامی مئلّتئمئزی یولدان آزدیرماقدا تقصئرلی تاپدیق. ائمپراطورا خراج ورمهیئمئزه مانع اولور و دیئر کی، او اؤزی وعده ورئلن مسئحدئر یعنی بئر پادشاه.» 3پئلاط عئسادان سوروشدی: «سن یهودئلرئن پادشاهیسان؟» عئسا اونون جاوابیندا ددی: «سن بِله دیئبسن.» 4او زامان پئلاط، معبدئن باش کاهئنلرئنه و جاماعاتا ددی: «من بو آدامدا هچ تقصئر تاپمیرام.» 5آمّا اولار ائصرار الهیئب دیئردئلر: «بو آدام جلئل وئلایتئندن توتموش حتّا بو یِره قدر، بوتون یهودئیهده تعلئم ورئب خالقی تحرئک الهیئر.»
6پئلاط جلئل آدینی اِشئدَنده سوروشدی کی، او آدام جلئللیدئر یا یوخ؟! 7اوندا کی بئلدی عئسا، هئرود حاکئمئن حؤکمرانلیق الهدئیی یِردن دئر، اونی هئرودون یانینا گؤندَردی. اله او واخت هئرود دا اورشلئم شهرئنده ائدی. 8هئرود عئسانی گؤرنده چوخ سِوئندی. چونکی چوخدان اونی گؤرمک ائستهیئردی؛ اونون اوچون کی، اونون حاقّیندا چوخ شیلر اِشئتمئشدی و اومئدی وار ائدی کی عئسادان بئر نچه مؤجوزه گؤره. 9هئرود عئسادان چوخ سوآللار سوروشدی، آمّا عئسا اونا هچ بئر جاواب ورمهدی. 10باش کاهئنلر و تؤورات موعلّئملری دورموشدولار و عئسایا آغیر بؤهتانلار ووردولار. 11هئرود و اونون سربازلاری عئسانی تحقئر الهیئب اَله سالدیلار. سورا اَینئنه گؤزل بئر پالتار گیدئرئب، پئلاطین یانینا قایتاردیلار. 12اِله او گونده پئلاط ائنان هئرود بئربئرلری ائنن دوست اولدولار. چونکی بوندان قاباق اولارین آراسیندا دوشمنچئلئک وارائدی.
13او زامان پئلاط، باش کاهئنلری، ریئسلری و خالقی بئر یِره چاغیریب، 14اولارا ددی: «سئز بو آدامی اونا گؤره منئم یانیما گتئردئز کی، خالقی یولدان آزدیریر. باخین، سئزئن حوضوروزدا اونی سوروشدوردوم و بو آدامی شئکایت اِله دئیئز مطلبلرئن هچ بئرئنده، تقصئرلی تاپمادیم. 15هئرود حاکئم ده بئر شی تاپمادی؛ چونکی اونی بئزئم یانیمیزا قایتاردی. باخین، او، اؤلومه لایئق اولان هچ بئر ائش گؤرمهیئب. 16بونا گؤره ده من اونا شالّاق ووروب، آزاد اِلئیهجهیم.» 17پئلاط هر بایرامدا، اولار اوچون بئر زئندانی آزاد اِله مهلی ائدی.
18آمّا اولارین هامیسی بئرلئکده چیغیریب ددئلر: «محو اِله بو آدامی! بئزه باراَبّانی آزاد اِله.» 19باراَبّا شهرده باشورن بئر عوصیان اوچون و آدام اؤلدورمک اوستونده زئندانا آتیلمیشدی. 20پئلاط عئسانی آزاد الهمک نئیّتی ائنن بئر دفعه ده اولار ائنان دانیشدی. 21آمّا اولار اِله چیغیریب دیئردئلر: «اونی چارمیخا چَک. اونی چارمیخا چَک.» 22پئلاط اوچونجی دفه اولارا ددی: «نئیه، نه پئسلئک الهیئب؟ من اوندا اؤلومه لایئق بئر شی تاپمامیشام؛ بونا گؤره ده اونا شالّاق ووروب آزاد اِلئیه جه یم.» 23آمّا اولار ائصرار الهیئب اوجا سَس ائنن باغیریب ائستهدئلر کی، عئسا چارمیخا چَکئلسئن؛ آخیردا اولارین سَسی قالئب گلدی. 24او زامان پئلاط تصمئم توتدی کی، اولارین ائستهدئکلرئنی یِرئنه یِتئرسئن. 25پئلاط او آدامی کی، عوصیان الهمک و آدام اؤلدورمک اوچون زئندانا سالینمیشدی، اولارین ائستهدئکلرئنه گؤره آزاد الهدی. آمّا عئسانی اولارین ائختئیارینا قویدی.
عئسا چارمیخا چکئلئر
26سربازلار عئسانی آپاراندا، کرِنِیلی شمعونی کی زمئدن گلئردی توتوب، چارمیخی اونون چئینئنه قویدولار کی، اونی عئسانین دالیسیجا آپارسین. 27خالقدان بؤیوک بئر جاماعات و بئر چوخلی آرواد دا کی عئسا اوچون آغلاییب شئوَن الهیئردئلر، اونون دالیسیجا گِدئردئلر. 28آمّا عئسا دؤنوب اولارا ددی: «ای اورشلئمئن قیزلاری، منئم اوچون آغلامایین، آنجاق اؤزوز و اوشاقلاریز اوچون آغلایین. 29چونکی باخین، اِله گونلر گلئر کی، دئیهجکلر: ”سونسوزلارین، دوغمامیش قارینلارین و اَمئزدئرمهمئش دؤشلَرئن خوش حالینا!“ 30او زامان داغلارا دئیهجکلر: ”اوستوموزه ییخیلین.“ و تپهلره دئیهجکلر: ”بئزی اؤرتون.“ 31اونا گؤره کی، اگر یاش آغاجا بولاری اِله یئرلر، بس قوری آغاجا نه اولاجاق؟!»
32ائکی جئنایتکار آدامی دا عئسا ائنن آپاریردیلار کی اونونان اؤلدورَلر. 33«کلّه» دِیئلن یِره گلدئکلری زامان، اوردا عئسانی و او ائکی جئنایتکاری چارمیخا چَکدئلر؛ بئرئنی عئسانین صاغ طرفئنده، او بئرئنی ده سول طرفئنده. 34عئسا ددی: «آتا! اولاری باغیشلا، چونکی نه الهدئکلرئنی بئلمئرلر.» سربازلار عئسانین پالتارلارینی بؤلوشمک اوچون پوشک آتدیلار. 35خالق دوروب باخیردی. آمّا ریئسلر عئسانی مسخره الهیئب دیئردئلر: «آیری آداملاری نئجات وردی. اگر او، تارینین مسئحی، اونون سچدئیی آدامدیر قوی اؤزونی ده نئجات ورسئن.» 36سربازلار دا اونی اَله سالیردیلار. اولار عئسایا یاخینلاشدیلار و اونا تورش شراب توتوب 37دیئردئلر: «اگر سن یهودئلرئن پادشاهیسان، اؤزونی نئجات وِر.» 38عئسانین باشی اوستونده بئر یازی دا وارائدی کی: «بو آدام یهودئلرئن پادشاهیدیر.»
39آسیلمیش اولان جئنایتکارلاردان بئری عئسانی سؤیوب دیئردی: «مگر سن وعده ورئلن مسئح دِیئلسن؟ هم اؤزونی هم ده بئزی نئجات ور.» 40آمّا او بئرئسی اونا آجیقلانیب ددی: «تاریدان قورخمورسان؟ سن اؤزون ده اله او جَزا آلتینداسان. 41بو جزا بئزئم حاقّیمیز دیر چونکی اؤز عمللرئمئزئن جزاسینی آلیریق؛ آمّا بو کئشی، هچ بئر خاطا اِله مهیئب.» 42و ددی: «عئسا، پادشاهلیغینا گلن زامان منی ده یادا سال.» 43عئسا اونا جاواب وردی: «دوغروسونی سنه دیئرم؛ بو گون من ائنن جنّتده اولاجاقسان.»
عئسانین اؤلومی
44گوندوز ناهارچاغی، ساعات اونائکئیه یاخین ائدی کی بوتون اؤلکه یه قارانلیق دوشدی و بو قارانلیق ناهاردان سورا ساعات اوچه جک وار ائدی. 45گونَش قارالدی. معبدئن پَردهسی آرادان ائکئیه بؤلوندی. 46او زامان عئسا اوجا سَس ائنن چاغیردی: «آتا! روحومی سنئن اَللرئنه تاپشیریرام.» بونی دیئب آخیر نفسئنی چَکدی. 47او روملی افسر بو حادئثهنی گؤرنده تارییا حمد و سئتایئش الهیئب ددی: «دوغرودان دا بو آدام گوناهسیز ائدی.» 48تاماشایا ییغیلان بوتون خالق باشورن حادئثهنی گؤرن واخت سئنهلرئنه دؤیه دؤیه، اِولرئنه قایتدیلار. 49عئسانی تانییانلارین هامیسی و اونون دالیسیجا، جلئل وئلایتئندن گلن آروادلار اوزاقدا دوروب بو شیلره باخیردیلار.
عئسانین باسدیریلماسی
50یوسئف آدیندا خیئرخاه و صالح بئر آدام وارائدی کی، یهودئلرئن شوراسینین عوضوی ائدی. یوسئف آرئماتایا شهرئندن ائدی. آرئماتایا یهودئلرئن شهرلرئندن بئری ائدی 51او، شورانین قرار و عمللرئنه راضی اولمامیشدی. و تارینین پادشاهلیغینی گؤزلهیئردی. 52بو آدام پئلاطین یانینا گِدئب عئسانین جسدئنی ائستهدی. 53سورا جسدی اِندئرئب کتان پارچایا بوکدی و اونی داشدا قازیلمیش بئر مقبرهیه قویدی کی هچ کئم او زاماناجاق بو مقبرهیه قویولمامیشدی. 54او گون حاضیرلاشماق گونی ائدی کی یهودئلر اؤزلرئنی پاسخا بایرامینا، حاضیرلاییردیلار. یهودئلرئن موقدّس شنبه گونی باشلانیردی. 55عئسا ائنن جلئل وئلایتئندن گلن آروادلار دا یوسئفئن دالیسیجا گِدئب مقبرهنی و عئسانین جسدئنئن نجه قویولدوغونی گؤردولر. 56اولار قاییدیب باحارات و عطئرلی یاغلار حاضیرلادیلار. شنبه گونونده تارینین امرئنه گؤره ائستئراحت الهدئلر.
اکنون انتخاب شده:
لوقا روایت 23: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
