لوقا روایت 24
24
عئسا دئرئلئر
1آروادلار اِله هفتهنئن اَوّلکی گونی سحر چوخ تِزدن، حاضیرلادیقلاری باحاراتلاری گؤتوروب مَقبرهنئن یانینا گتدئلر. 2اولار گؤردولَر کی مقبرهنئن آغزینی اؤرتَن او بؤیوک داش دئیئرلَنمئش. 3آمّا ائچهری گئرَن واخت، رب عئسانین جسدئنی تاپمادیلار 4آروادلار بو ائشدن حیرتده ائدئلر کی، پارلاق پالتار گیئنمئش ائکی کئشی بئردن اولارین یانیندا دوردولار. 5اله او حالدا کی آروادلار قورخوب، باشلارینی آشاغا سالمیشدیلار کئشئلر ددئلر: «نه اوچون سئز دئرئنی اؤلولر آراسیندا آختاریرسیز؟ 6او، بوردا دِیئل؛ او دئرئلئب. یادیزا سالین اوندا کی حله جلئل وئلایتئنده ائدی، نجه سئزه ددی کی؛ 7ائنسان اوغلی گرک گوناهکار ائنسانلارین اَلئنه ورئلئب چارمیخا چَکئلسئن و اوچونجی گون ده دئرئلسئن.» 8او زامان آروادلار عئسانین سؤزلرئنی یادلارینا گتئردئلَر. 9مقبرهدن قاییدیب بوتون بولاری او اون بئر شاگئرده و قالانلارین هامیسینا خبر وِردئلر. 10بو شیلری حوارئلره خبر ورن آروادلار، بولاردیلار: مَجدَللی مریم، یوحانا، یعقوبون آناسی مریم، و اولار ائنان اولان آیری آروادلار. 11آمّا آروادلارین بو سؤزلری حوارئلره هذیان کئمی گؤروندی و اولارا ائنانمادیلار. 12آمّا پطروس قالخیب مقبرهیه ساری قاچدی، اَیئلئب ائچری باخدی: آنجاق کتان پارچادان باشقا اوردا بئر شی گؤرمهدی. او بو حادئثهدن حیران قالیب اِوه گتدی.
اِماعوس یولوندا
13اِله او گون شاگئردلَردن ائکئسی، اِماعوس آدیندا بئر کنده گدئردئلر. اِماعوس اورشلئم شهرئندن ائکی آغاج اوزاق ائدی. 14اولار بئربئری ائنن باش ورمئش بوتون بو شیلرئن بارهسئنده صؤحبت الهیئردئلر. 15او حالدا کی اولار بئربئری ائنن صؤحبت الهیئب بحث الهیئردئلر، عئسا اؤزی اولارین یانینا گلئب، اولار ائنان یِرئمهیه باشلادی. 16آمّا اولارین گؤزلری توتولموشدی، اِله کی، گؤره-گؤره عئسانی تانیمادیلار. 17عئسا اولارا ددی: «یول گِده-گِده بئربئرئز ائنن نه بارهده بحث اِله یئرسئز؟» اولار دایاندیلار، اوزلری قَملی گؤرونوردی. 18سورا اولارین بئری کی، آدی کِلوپا ائدی، عئسایا جاواب ورئب ددی: «مگر اورشلئم شهرئنده بئرجه قَرئب سَنسن کی، بو گونلرده اوردا باشورن شیلردن خبرئن یوخدور؟» 19عئسا اولارا ددی: «هانسی شیلردن؟» اونا ددئلر: «ناصئرهلی عئسانین باشینا گلن شیلردن. او، تاری یانیندا و بوتون خالقین حوضوروندا هم عملده و هم سؤزده قودرَتلی بئر پیغمبر ائدی 20و نجه بئزئم باش کاهئنلر و ریئسلرئمئز اونی اؤلومه محکوم اولماق اوچون تسلئم الهیئب چارمیخا چَکدئلر. 21آمّا بئزئم اومئدئمئز وار ائدی کی، ائسرایئلی خئلاص الهین آدام اِله بو اولاجاق. بوندان علاوه، ائندی بو شیلرئن باش وردئیئنئن اوچونجی گونی دئر. 22اوسته لئک، بئزئم جاماعاتین بعضی آروادلاری دا بئزی حیرته سالدیلار؛ اولار سحر تِزدن مقبرهنئن یانینا گتدئلر، 23عئسانین جسدئنی اوردا تاپا بئلمهدئکلری زامان، قاییدیب خبر وردئلر کی، حتّا رؤیادا عئسانین دئری اولدوغونی دئیَن ملکلری ده گؤروبلر. 24بئزلردن بعضئلری مقبرهیه گدئب هر شیی آروادلارین ددئکلری کئمی گؤردولَر، آمّا عئسانی گؤرمهدئلر.» 25عئسا اولارا ددی: «ای عاغیلسیزلار کی پیغمبرلرئن بوتون ددئکلرئنه ائنانماقدا آغیرسیز! 26مگر لازیم دِیئلدی کی، وعده ورئلن مسئح بو عذابلاری چَکئب اوندان سورا اؤز جلالینا یِتئشسئن؟» 27و موسانین تؤوراتیندان و بوتون پیغمبرلرئن یازیلاریندان باشلاییب موقدّس یازیلارین هامیسیندا، اؤز حاقّیندا اولان مطلبلری اولارا توضئح وردی.
28گتدئکلری کنده یاخینلاشدیقلاری زامان عئسا اؤزونی اِله گؤرستدی کی، گویا لاپ اوزاق یِره گتمک ائستهیئر. 29آمّا اولار عئسایا چوخ ائصرار الهیئب ددئلر: «بئز ائنن قال، چونکی آخشام دوشور و گون باتماقدادیر.» عئسا دا ائچهری گئردی کی اولار ائنان قالسین. 30عئسا اولار ائنان سوفره باشیندا اوتوراندا چؤرهیی گؤتوروب شوکور الهدی و پارچالاییب اولارا وردی. 31اوندا اولارین گؤزلری آچیلدی و اونی تانیدیلار؛ آمّا عئسا، اولارین گؤزوندن قِیب اولدی. 32اولار بئربئرلرئنه ددئلر: «گؤردون او، یولدا بئز ائنن دانیشان واخت و موقدّس یازیلاری بئزه توضئح ورن واخت اورهیئمئز نجه آلیشیب یانیردی؟!» 33اولار اِله او ساعات قالخیب اورشلئم شهرئنه قاییتدیلار و او اونبئر شاگئردی و اولار ائنان اولانلاری تاپدیلار کی بئر یِره یغیلمیشدیلار 34و دیئردئلر: «رب عئسا دوغرودان دئرئلئب و شمعونا گؤرونوب.» 35اوندا او ائکی نفر ده یولدا باشورنلری و چؤرهیی پارچالایان زامان عئسانی نجه تانیدیقلارینی نقل الهدئلر.
عئسا اؤز شاگئردلرئنه گؤرونور
36شاگئردلر حله بو شیلرئن بارهسئنده دانیشیردیلار کی، عئسا اؤزی اولارین آراسیندا دایاندی و اولارا ددی: «سئزه سالام اولسون.» 37آمّا اولار دئسکئندئلر و وحشت الهدئلر و اِله گومان الهدئلر کی، بئر روح گؤرورلر. 38عئسا اولارا ددی: «نه اوچون وحشت اِله یئرسئز؟ نه اوچون اورَکلرئزه بله شَکلر دوشور؟ 39اَللَرئمی و آیاقلاریمی گؤرون؛ بو، من اؤزومَم. منه اَل وورون گؤرون؛ چونکی روحون، اَتی و سومویی اولماز آمّا منده گؤردویوز کئمی وار.» 40بونی دیئب اَللَرئنی و آیاقلارینی اولارا گؤرستدی. 41اولار حله شادلیقدان ائنانماییب حیرت ائچئنده اولان واخت عئسا اولارا ددی: «بوردا یمهلی بئر شیئز وار؟» 42اولار عئسایا بئر تئکه قیزارمیش بالیق وردئلر. 43او دا گؤتوروب اولارین گؤزلرئنئن قاباغیندا یِدی.
44سورا عئسا اولارا ددی: «اوندا کی حله سئز ائنن ائدئم بو شیلری سئزه دِدئم کی؛ موسا پیغمبرئن تؤوراتیندا، پیغمبرلرئن یازیلاریندا، و مزمورلار کئتابیندا منئم حاقّیمدا یازیلمیش شیلرئن هامیسی گرک یرئنه یِتئشسئن.» 45او زامان عئسا اولارین ذهئنلرئنی آچدی کی، موقدّس یازیلاری درک الهسئنلر. 46و اولارا ددی: «بله یازیلیب کی، وعده ورئلن مسئح گرک عذاب چَکسئن و اوچونجی گونده اؤلولردن دئرئلسئن، 47و اونون آدیندا تؤوبه الهمک و گوناهلارین باغیشلانماسی، گرگ بوتون مئلّتلره اعلان اولونسون، بو ائشئن باشلانماسی دا اورشلئم شهرئندن اولاجاق. 48سئز بو شیلرئن شاهئدلرئسئز. 49باخین، گؤیده کی آتامین وعده وردئیئنی سئزه گؤندَرئرم. آمّا سئز او واختاجاق کی گؤیدن گلن قووّت ائنن دولاسیز، اورشلئم شهرئنده قالین.»
عئسانین گؤیه گتمهسی
50عئسا اولاری شهردن چیخاردیب بیتعَنیا کندئنه قدر آپاردی و اَللَرئنی قالخیزیب اولارا برکت وردی. 51اله اولارا برکت ورنده اولاردان آیریلیب گؤیه آپاریلدی. 52اولار دا اونی پرستئش الهدئلر و بؤیوک بئر شادلیق ائنان اورشلئم شهرئنه قاییتدیلار. 53و دائم تارییا حمد و شوکور الهیئب، واختلارینی معبدده کِچئردئردئلر.
اکنون انتخاب شده:
لوقا روایت 24: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
