لوقا روایت 22
22
عئسانین اؤلدورولمه سئنئن نقشه سی
1یهودئلرئن مایاسیز چؤرک بایرامی کی، اونا پاسخا دِیئلئردی یاخینلاشیردی. 2معبدئن باش کاهئنلری و تؤورات موعلّئملری عئسانی اؤلدورمک اوچون بئر یول آختاریردیلار، چونکی خالقدان قورخوردولار. 3او زامان شیطان، ائسکاریوتلی آدلانان یهودانین اورهیئنه گئردی. یهودا، او اونائکی شاگئردلردن بئری ائدی. 4یهودا گدئب باش کاهئنلر و معبدئن موحافئظلرئنئن ریئسلری ائنن دانیشدی کی، عئسانی اولارا نه جور تسلئم الهسئن. 5اولار سِوئندئلر و توافق الهدئلر کی اونا پول وره لر؛ 6یهودا دا قبول الهیئب، بئر فورصت آختاریردی کی، جاماعات اولمادیغی بئر یِرده عئسانی اولارا تسلئم الهسئن.
آخیر شام
7مایاسیز چؤرک بایرامی گونی یِتئشدی کی، او گونده پاسخا قوزوسونی قوربان الهمک واجئب ائدی. 8عئسا دا، پطروس و یوحنّانی گؤندَرئب ددی: «گدئن، پاسخا شامینی بئزه حاضیرلایین کی یئیَک.» 9اولار اونا ددئلر: «هاردا ائستهیئرسن حاضیر اِله یک؟» 10عئسا اولارا ددی: «باخین، شهره گئردئیئز زامان سهنگ ائنن سو داشییان بئر کئشی سئزه راست گلهجک. اونون دالیسیجا گدئن و او گئرن اِوه گئرئن. 11و او اِوئن صاحئبئنه دیئن: ”اوستاد سنه دیئر: قوناق اوتاغی هاردادیر کی، شاگئردلرئم ائنن پاسخا شامینی اوردا یِیئم؟“ 12او سئزه بالاخانادا دؤشَنمئش بؤیوک بئر اوتاق گؤرسدهجک. اوردا پاسخا شامینی حاضیر الهیئن.» 13شاگئردلر گدئب هر شیی عئسانین اولارا ددئیی کئمی تاپدیلار و پاسخا شامینی حاضیرلادیلار.
14او واخت یتئشنده عئسا حوارئلر ائنن سوفره باشیندا اوتوردی. 15عئسا اولارا ددی: «چوخ گؤلوم ائستهیئردی کی، عذاب چَکمه یئمدن قاباق بو پاسخا شامینی سئز ائنن بئرلئکده یِیئم. 16چونکی سئزه دیئرم؛ من آرتیق پاسخا شامینی یِمیهجهیَم او زاماناجاق کی تارینین پادشاهلیغیندا یِرئنه یتئشه.» 17سورا عئسا بئر پئیالا گؤتوردی و شوکور الهیئب ددی: «بونی آلین و آرازدا بؤلوشدورون. 18چونکی سئزه دیئرم؛ او زاماناجاق کی تارینین پادشاهلیغی گله، آرتیق اوزومون محصولوندان ائچمیهجهیم.» 19سورا چؤرهیی گؤتوردی و شوکور الهیئب پارچالادی و اولارا ورئب ددی: «بو منئم بدنئمدئر کی، سئزئن اوچون وِرئلئر. منی خاطیرلاماق اوچون بونی یِرئنه یِتئرئن.» 20اِلهبوجور دا، شام یمهیئندن سورا، پئیالانی گؤتوروب ددی: «بو پئیالا تارینین تَزه عهدی دئر کی منئم قانیم ائنان مؤهورلهنئر، اله او قان کی سئزدَن اؤتری تؤکولور. 21آمّا باخین، منه خیانت اِلئیهنئن اَلی، منئم اَلئم ائنن بئرلئکده سوفرهدهدئر. 22چونکی ائنسان اوغلی قاباقدان موعیّن اولموش یولدان گِدئر. آمّا وای او آدامین حالینا کی، ائنسان اوغلی اونون واسئطهسی ائنن تسلئم اولونور.» 23شاگئردلر بئربئرئندن سوروشماغا باشلادیلار کی، اولاردان هانسی بو ائشی گؤره بئلَر.
24شاگئردلرئن آراسیندا بئر بَحث دوشدی کی، آرالاریندا کئم هامیدان لاپ بؤیوکدور. 25عئسا اولارا ددی: «آیری مئلّتلَرئن پادشاهلاری اولارا آغالیق الهیئرلر و بو حؤکمدارلیق اِله ینلره، نعمت صاحئبی دِیئلئر. 26آمّا سئز بله اولمایین. آرازدا لاپ بؤیوک اولان، لاپ کئچئک کئمی اولسون و ریئسلئک اِله یَن، خئدمتکار کئمی اولسون. 27کئم لاپ بؤیوکدور؟ سوفرهده اوتوران، یوخسا خئدمت اِله یَن؟ مگر سوفرهده اوتوران دِیئل؟! آمّا من سئزئن آرازدا خئدمتکار کئمییَم.
28سئز او آداملارسیز کی، کِچئرتدئیئم ائمتاحانلاردا من ائنن دایانیبسیز. 29نجه کی، گؤیده کی آتام منه بئر پادشاهلیق وردی، من ده سئزه بئر پادشاهلیق ورئرَم. 30اِله کی، سئزده منئم پادشاهلیغیمدا، سوفرَمده یِیئب ائچهسئز و تختلرده اوتوروب، ائسرایئلئن اونائکی قبئلهسئنه حؤکم اِلئیهسئز.
31شَمعون، شَمعون باخ! شیطان ائسته دی کی، سئزی بوغدا کئمی خَلبئرلهسئن. 32آمّا من سنئن اوچون دوعا الهمئشم کی، ائمانین آزالماسین؛ دؤنوب قاییتدیغین زامان، اؤز قارداشلارینا قووّت ور.» 33پطروس عئسایا ددی: «آغا! سن ائنن زئندانا دا، اؤلومه ده گِتمهیه حاضیرام.» 34عئسا اونا ددی: «پطروس، سنه دیئرم کی، بو گون خوروز بانلامامیش، سن منی تانیدیغینی اوچ دفه ائنکار اِلئیهجَکسن.»
35عئسا اولارا ددی: «اوندا کی، سئزی پول کئسهسئز، تورباسیز، و باشماقسیز گؤندَردئم، بئر اَسکئیئز اولدی؟» شاگئردلر جاواب وردئلر: «یوخ، هچ بئر شی.» 36عئسا اولارا ددی: «آمّا ائندی هر کسئن پول کئسهسی وار اونی گؤتورسون، تورباسی اولان دا بوجور الهسئن. قیلینجی اولمایان دا پالتارینی ساتیب قیلینج آلسین. 37چونکی سئزه دیئرم: موقدّس یازینین بو سؤزی کی، دیئر ”او، تقصئرکارلار ائنان بئر ساییلدی“، گرک منئم حاقّیمدا یِرئنه یِتئشه. چونکی منئم بارهمده یازیلان سؤز عنقَرئب یِرئنه یِتئشهجک.» 38اولار ددئلر: «آغا! باخ، بوردا ائکی قیلینج وار.» عئسا اولارا ددی: «بَس دئر.»
زیتون داغینداکی دوعا
39عئسا چیخیب عادتئنه گؤره زیتون داغینا گتدی، شاگئردلری ده اونون دالیسیجا گتدئلر. 40او یِره یِتئشنده، عئسا اولارا ددی: «دوعا الهیئن کی، ائمتاحانا دوشمهیهسئز.» 41عئسا اولاردان، بئر داش آتیمی قدر اوزاقلاشدی و دئز چؤکوب بِله دوعا اِله دی: 42«آتا، اگر راضیسان، بو عذاب پئیالاسینی مندن اوزاقلاشدیر، آمّا گئنه ده منئم ائستهدئیئم یوخ، سنئن ائستهدئیئن اولسون.» 43گؤیدن بئر ملک عئسایا گؤرونوب، اونا قووّت وِردی. 44عئسا اله او حالدا کی شئدّتلی ائضطئراب ائچئنده ائدی، لاپ چوخ دوعا الهدی، اوجور کی، تَری بؤیوک قان دامجیلاری کئمئن یِره تؤکولوردی. 45دوعادان قالخان زامان شاگئردلرئن یانینا گلدی، و گؤردی کی اولار قوصّهدن یاتیبلار. 46عئسا اولارا ددی: «نه اوچون یاتیبسیز؟ قالخین و دوعا الهیئن کی، ائمتاحانا دوشمهیهسئز.»
عئسا توتولور
47عئسا حَله دانیشیردی کی، جاماعات یِتئشدی. یهودا کی اونائکی شاگئردلردن بئری ائدی، اولارین قاباغیندا گلئردی. یهودا، عئسانی اؤپمک اوچون یاخینلاشدی. 48آمّا عئسا اونا ددی: «یهودا، ائنسان اوغلونی اؤپوش ائنن تسلئم اِله یئرسَن؟!» 49عئسانین دؤره سئنده کیلر نه اولاجاغی آنلایان زامان اونا ددئلر: «آغا، قیلینج ائنان ووراق؟» 50اولاردان بئری لاپ بؤیوک کاهئنئن قولونی، قیلینج ائنان ووروب صاغ قولاغینی کَسدی. 51آمّا عئسا ددی: «اَل ساخلایین.» و او قولون قولاغینا اَل قویوب، اونی شفا وردی. 52اوندان سورا اونون ضئدّئنه گلن باش کاهئنلره، معبدئن موحافئظلرئنئن رَیئسلرئنه، و آغساقّاللارا ددی: «یول کسهنئن اوستونه گلن کئمی، قیلینجلار و اَل آغاجلار ائنان اوستومه گلئبسئز؟ 53اوندا کی هر گون معبدده سئزائنن ائدئم، منه اَل اوزاتمادیز. آمّا ائندی سئزئن واختیزدیر، و قارانلیقین قووتئنئن واختیدیر.»
پطروس عئسانی ائنکار اِله یئر
54اوندان سورا عئسانی توتوب لاپ بؤیوک کاهئنئن اِوئنه گتئردئلر. پطروس اوزاقدان اولارین دالیسیجا گِدئردی. 55بئر دسته آدام، حَیَطئن اورتاسیندا اود یاندیریب دؤره سئنده بئرلئکده اوتورموشدولار. پطروس دا اولارین آراسیندا اوتوردی. 56پطروس، اود ائشیغیندا اوتورموشدی کی جاوان کنئزلردن بئری اونی گؤردی و اونا گؤز دئکئب ددی: «بو آدام دا عئسا ائنن ائدی.» 57آمّا پطروس ائنکار الهیئب ددی: «آرواد، من اونی تانیمیرام.» 58بئر آز سورا آیری بئری پطروسی گؤروب ددی: «سن ده اولاردانسان.» آمّا پطروس ددی: «کئشی، دِیئلم.» 59تَقرئبن بئر ساعات کِچمئشدی کی، آیری بئرئسی ائصرار ائنان ددی: «دوغرودان دا بو آدام دا عئسا ائنن ائدی. چونکی او دا جلئللی دئر.» 60آمّا پطروس ددی: «کئشی، نه ددئیئنی آنلامیرام.» و اِله او آندا، او حَله دانیشیردی کی، خوروز بانلادی. 61رب عئسا دؤنوب پطروسا باخدی. پطروس رب عئسانین ددئیی سؤزی یادینا گتئردی کی نجه اونا دمئشدی، «بو گون خوروز بانلامامیش، سن اوچ دفه منی ائنکار اِلئیهجَکسن.» 62پطروس اوردان چیخیب آجی-آجی آغلادی.
63عئسانی توتوب ساخلایان آداملار اونی مسخره الهیئب، دؤیوردولر. 64اولار عئسانین گؤزلرئنی باغلادیلار و هی اوندان سوروشوردولار: «نبئلئک اِله، ده گؤرک سنی کئم وورور؟» 65و اونون ضئدّئنه بئر چوخ کوفرلر ده دانیشیردیلار.
عئسا سَنهَدرئن مَجلئسئنده
66سحر آچیلاندا، خالقین آغساقّاللاری یعنی باش کاهئنلر و تؤورات موعلّئملری بئر یِره ییغیلیب، مجلئس قوردولار و عئسانی اولارین مجلئسئنه آپاردیلار. اولار ددئلر: 67«اگر سن وعده ورئلن مسئحسن، بئزه ده.» آمّا عئسا جاواب وردی: «اگر سئزه دِسَم، ائنانمایاجاقسیز. 68اگر ده سئزدن سوروشسام، منه جاواب ورمهیهجکسئز. 69آمّا بوندان سورا ائنسان اوغلی تارینین قودرتئنئن صاغیندا اوتوراجاق.» 70او زامان اولارین هامیسی ددئلر: «دِمهلی، سن تارینین اوغلوسان؟» عئسا اولارا جاواب وردی: «سئز دیئرسئز کی، من اویام.» 71او زامان اولار ددئلر: «آرتیق آیری شهادته نه احتئیاجیمیز وار؟ اؤزوموز اونون آغزیندان اِشئتدئک.»
اکنون انتخاب شده:
لوقا روایت 22: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
