یوحنّا روایت 8
8
1عئسا زیتون داغینا گتدی.
زئنادا یاخالانان آرواد
2و سحر تِزدن گئنه معبده گلدی و بوتون خالق اونون اطرافینا ییغیلدی. عئسا دا اوتوروب اولارا تعلئم وردی. 3فرئسی فئرقهسئنئن عالئملری و شرئعت موعلّئملری زئنا عملئنده یاخالانمیش بئر آروادی گتئردئلر و اورتادا دوردوروب، 4عئسایا ددئلر: «اوستاد، بو آرواد زئنا عملئنده یاخالانیب. 5موسا پیغمبر شرئعتده بئزه امر الهیئب کی، بله بئر آروادی داشلایاق. ائندی سن نه دیئرسن؟» 6اولار بو سوآل ائنان عئسانی ائمتاحان الهیئردئلر کی، اونا بؤهتان وورماق اوچون بلکه بئر سبب تاپسینلار. آمّا عئسا اَیئلئب بارماغی ائنن یره یازی یازدی. 7آمّا اولارین دایانمادان بو سوآلی سوروشدوقلارینا گؤره، قالخیب اولارا ددی: «آرازدا کئم گوناهسیزدیر، قویون بئرئنجی داشی او آتسین.» 8و گئنه اَیئلئب یره یازی یازماغا باشلادی. 9خالق بو سؤزی اِشئدنده آغساقّاللاردان توتموش لاپ کئچئیئنه قدر بئر-بئر اوردان گتدئلر و عئسا تک قالدی. او آرواد دا اورتادا دورموشدی. 10عئسا قالخیب اوندان سوروشدی: «آرواد، سندن شئکایت الهینلره نه اولدی؟ بئر کس سنی محکوم الهمهدی؟» 11آرواد ددی: «خیر، آغا.» عئسا اونا ددی: «من ده سنی محکوم اله مئرم. گت و آرتیق گوناه اله مه.»
عئسا، دونیانین نوری
12عئسا گئنه خالقا خئطاب الهیئب ددی: «دونیانین نوری منم. منئم دالیمجا گلن قارانلیقدا گزمیهجک بلکی اوندا حیات نوری اولاجاق.» 13او زامان فرئسئلر اونا ددئلر: «سن اؤز حاقّیندا شهادت ورئرسن، بو شهادتئن اعتئباری یوخدور.» 14عئسا جاوابیندا اولارا ددی: «حتّا اگر اؤز حاقّیمدا دا شهادت ورسم، شهادتئم اعتئبارلیدیر، چونکی هاردان گلدئیئمی و هارایا گده جه یئمی بئلئرم. آمّا سئز منئم هاردان گلدئیئمی و هارایا گدهجهیئمی بئلمئرسئز. 15سئز ائنسان گؤزی ائنن حؤکم الهیئرسئز، آمّا من هچ کسه حؤکم اله مئرم. 16آمّا حؤکم اله سم ده بله، منئم حؤکموم دوغرودور، چونکی تک دیئلم، بلکی منم و منی گؤندَرَن گؤیده کی آتا. 17سئزئن شرئعتئزده ده ائکی آدامین اعتئبارلی اولدوغی یازیلیب. 18من اؤز حاقّیمدا شهادت ورئرم و منی گؤندَرَن گؤیده کی آتا دا منئم حاقّیمدا شهادت ورئر.» 19او واخت عئسادان سوروشدولار: «سنئن آتان هاردادیر؟» عئسا جاواب وردی: «سئز نه منی تانیییرسیز نه ده آتامی. اگر منی تانیسایدیز، منئم آتامی دا تانییاردیز.» 20عئسا بو سؤزلری معبدده، خزانه صاندیغی اولان یرده خالقا ددی؛ آمّا هچ کئم اونی توتمادی، چونکی اونون واختی حله یتئشمهمئشدی.
عئسا اؤز اولومی بارهسئنده دیئر
21عئسا گئنه اولارا ددی: «من گدئرم و سئز منی آختاراجاقسیز، آمّا اؤز گوناهلاریزین آلتیندا اؤلهجکسئز. اورا کی من گدئرم سئز گلهبئلمزسئز.» 22او واخت یهودئلر ددئلر: «مگر اؤزونی اؤلدورهجک کی دیئر: ”اورا کی من گدئرم سئز گلهبئلمزسئز“ ؟!» 23عئسا اولارا ددی: «سئز آشاغیدانسیز، من یوخاریدانام. سئز بو دونیادانسیز، من بو دونیادان دیئلم. 24بوندان اؤتری سئزه ددئم کی، گوناهلاریزین آلتیندا اؤلهجکسئز، چونکی اگر ددئیئم آدام اولدوغوما ائنانمایاسیز، گوناهلاریزین آلتیندا اؤلهجکسئز.» 25او واخت اوندان سوروشدولار: «سن کئمسن؟» عئسا اولارا ددی: «من همن اویام کی، اوّلدن سئزه دیئرم. 26سئزئن حاقّیزدا دئیهجک و حؤکم اِلئیهجک چوخ شیلرئم وار، آمّا منی گؤندَرَن حاقدیر و من اوندان اشئتدئکلرئمی دونیایا دیئرم.» 27اولار آنلامادیلار کی، عئسا بو سؤزلری گؤیده کی آتانین بارهسئنده دیئردی. 28اوندان اؤتری عئسا ددی: «ائنسان اوغلونی قالخیزاندان سورا بئلهجکسئز کی، من اویام و اؤزومدن بئر شی اله مئرم، بلکی نجه کی گؤیده کی آتادان اؤیرنمئشم، سئزه دیئرم. 29و او کی منی گؤندَرئب من ائنن دئر. او، منی تک قویماییب، چونکی همئشه اونون خوشونا گدن ائشلری گؤرورم.» 30بو سؤزلری دئین زامان، چوخ آدام اونا ائمان گتئردی.
حقئقت سئزی آزاد اِلئیهجک
31عئسا اونا ائمان گتئرمئش یهودئلره ددی: «اگر سؤزومی ساخلایاسیز، حقئقتن منئم شاگئردلرئمسئز. 32و حقئقتی تانییاجاقسیز و حقئقت سئزی آزاد اِلئیهجک.» 33اولار عئسایا ددئلر: «بئز ائبراهئم اؤولادیییق و هچ کسئن نؤکری اولمامیشیق. پس نجه اولور کی، ”آزاد اولاجاقسیز“ دیئرسن؟» 34عئسا اولارا جاواب وردی: «دوغروسونی سئزه دیئرم، گوناه الهین هرکس گوناهین نؤکریدئر. 35نؤکر ابده کئمی عایئلهدن بئری دیئل، آمّا اوغول همئشه عایئلهدن بئریدئر. 36اونون اوچون اگر اوغول سئزی آزاد الهسه، دوغرودان آزاد اولارسیز.
ائبراهئم پیغمبرئن اؤولادلاری
37ائبراهئم پیغمبرئن اؤولادی اولدوغوزی بئلئرم، آمّا منی اؤلدورمک ائستهیئرسئز، اوندان اؤتری کی، منئم سؤزومی قبول اله مئرسئز. 38من گؤیده کی آتامین یانیندا گؤردوکلرئمی دیئرم و سئز آتازدان اشئتدئکلرئزی الهیئرسئز.» 39اولار جاوابدا عئسایا ددئلر: «بئزئم آتامیز ائبراهئم پیغمبردئر.» عئسا اولارا ددی: «اگر ائبراهئمئن اؤولادلاریسیز، ائبراهئمئن ائشلرئنی یرئنه یتئرئن. 40آمّا ائندی منی اؤلدورمک ائستهیئرسئز، من کی، تاریدان اشئتدئیئم حقئقتی سئزه دمئشم. ائبراهئم بله ائشلر گؤرمهدی. 41سئز آتازین ائشلرئنی گؤرورسوز.»
تارینین اؤرلادلاری و ائبلئسئن اؤرلادلاری
اولار عئسایا ددئلر: «بئز زئنادان دوغولمامیشیق! بئر آتامیز وار، او دا تاریدیر.» 42عئسا اولارا ددی: «اگر تاری سئزئن آتاز اولسایدی، منی سِوَردئز، چونکی من تارینین طرفئندن گلمئشم و ائندی بوردایام. اؤزومدن گلمهمئشم بلکی او، منی گؤندَرئب. 43ددئکلرئمی نئیه آنلامیرسیز؟ چونکی سؤزومه قولاق آسا بئلمئرسئز. 44سئز آتاز ائبلئسدنسئز و آتازین ائستهدئیئنی یرئنه یتئرمک ائستهیئرسئز. ائبلئس، باشلانیشدان قاتئل ائدی و حقئقت اوستونده دایانمادی، چونکی اوندا هچ دوغرولوق یوخدور. یالان دانیشان زامان ذاتیندان یالان دانیشیر؛ چونکی او، یالانچیدیر و یالانلارین آتاسیدیر. 45آمّا حقئقتی ددئیئم اوچون سئز منه ائنانمیرسیز. 46سئزدن کئم منئم گوناهکار اولدوغومی ائثبات الئیهبئلر؟ اگر من حقئقتی دیئرم، نئیه منه ائنانمیرسیز؟ 47تارینینکی اولانلار تارینین سؤزلرئنی اشئدرلر؛ آمّا سئز بو سببدن اشئتمئرسئز، چونکی تارینینکی دیئلسئز.»
ائبراهئم اولمامیشدان قاباق عئسا وار ائدی
48یهودئلر جاواب ورئب، عئسایا ددئلر: «سامئرهلی و دلی اولدوغونی دمکده دوغری دمئردئک؟!» 49عئسا ددی: «من دلی اولمامیشام، بلکی من آتامی جلال ورئرم، آمّا سئز منه ذئلّت ورئرسئز. 50من اؤزوم، اؤزوم اوچون جلال آختارمیرام، منئم اوچون جلال آختاران وار و حؤکم الهین ده اودور. 51دوغروسونی سئزه دیئرم، منئم سؤزومی ساخلایان آدام اصلا اؤلوم اوزی گؤرمهیهجک.» 52یهودئلر اونا ددئلر: «ائندی بئلدئک کی، دلی اولوبسان. ائبراهئم و پیغمبرلر اؤلدولر و سن دیئرسن ”منئم سؤزومی ساخلایان آدام اصلا اؤلمیهجک.“ 53مگر سن بئزئم آتامیز ائبراهئم پیغمبردن ده بؤیوکسن؟ ائبراهئم اؤلدی، پیغمبرلر ده اؤلدولر. سن اؤزونی کئم ساییرسان؟» 54عئسا جاواب وردی: «اگر من اؤزومی جلال ورئرم، بو جلال هچدئر. منی جلال ورن منئم گؤیده کی آتامدیر کی، سئز اونا ”تاریمیزدیر“ دیئرسئز. 55سئز اونی تانیماییبسیز، آمّا من اونی تانیییرام. و اگر اونی ”تانیمیرام“ دِسَم، سئزئن کئمی یالانچینین بئری اولارام. آمّا من اونی تانیییرام و اونون سؤزونی ساخلاییرام. 56آتاز ائبراهئم منئم گونومی گؤرهجهیی اوچون شاد اولدی؛ او، بو گونی گؤردی و سوئندی.» 57یهودئلر اونا ددئلر: «سنئن حله الّی یاشین یوخدور، ائبراهئم پیغمبری گؤروبسن؟!» 58عئسا اولارا ددی: «دوغروسونی سئزه دیئرم؛ ائبراهئم اولمامیشدان من وارام.» 59بو سؤزی اشئدن واخت، یهودئلر اونی داشلاماق اوچون داشلار گؤتوردولر، آمّا عئسا گئزلهنئب معبددن اشئیه چیخدی.
اکنون انتخاب شده:
یوحنّا روایت 8: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
