یوحنّا روایت 7
7
عئسا بایرام اوچون اورشلئمه گدئر
1بولاردان سورا عئسا جلئل وئلایتئنده گزئب، اؤزونی یهودئیه وئلایتئندن اوزاق ساخلاییردی. چونکی یهودئلر اونی اؤلدورمک ائستهیئردئلر. 2یهودئلرئن چادیر بایرامی یاخینلاشیردی، 3اونون اوچون ده عئسانین قارداشلاری اونا ددئلر: «بوردان چیخ، یهودئیه وئلایتئنه گت کی، شاگئردلرئن ده الهدئیئن ائشلری گؤرسونلر. 4چونکی اؤزونی تانیتدیرماق ائستهین آدام ائشئنی گئزلئجه گؤرمز. سن کی بو ائشلری الهیئرسن، اؤزونی دونیایا ظاهئر اله.» 5عئسانین قارداشلارینین هچ بئری اونا ائمان گتئرمهمئشدی. 6بو سببدن عئسا اولارا ددی: «منئم واختیم حله یتئشمهیئب. آمّا سئز هر واخت ائسته یه سئز گده بئلرسئز. 7دونیا سئزدن نئفرت الئیهبئلمز، آمّا مندن نئفرت الهیئر. چونکی اونون ائشلرئنئن پئس اولدوغونا شهادت ورئرم. 8سئز بایرام اوچون اورشلئم شهرئنه گدئن، من بو بایرام اوچون حله گتمئرم، چونکی منئم واختیم حله یتئشمهیئب.» 9عئسا بو سؤزلری اولارا دیئب جلئل وئلایتئنده قالدی.
10آمّا عئسانین قارداشلاری بایرام اوچون اوردان آیریلاندان سورا، اونون اؤزی ده اورشلئمه گتدی، آمّا آشکار یوخ، بلکی گئزلی. 11یهودئلر بایرامدا عئسانی آختاریب دیئردئلر: «بو آدام بس هاردادیر؟» 12جاماعات آراسیندا اونون حاقّیندا چوخ پیچیلتیلار گزئردی. بعضئلری دیئردئلر: «او، یاخشی آدامدیر.» آمّا بعضئلری ده دیئردئلر: «یوخ، خالقی آلدادیر.» 13آمّا یهودئلرئن بؤیوک باشلارینین قورخوسوندان، هچ کس آچیقجا بئر سؤز دمئردی.
عئسا بایرامدا تعلئم ورئر
14بایرامین یاریسی کچمئشدی کی، عئسا معبده گدئب تعلئم ورمهیه باشلادی. 15یهودئلر تعجّوبدن مات قالیب دیئردئلر: «بو آدام هچ تعلئم گؤرمهدئیی حالدا نجه موقدّس کئتابدان بو قدر بئلئر؟!» 16عئسا اولارا جاواب ورئب ددی: «منئم وردئیئم تعلئم اؤزومون دیئل، منی گؤندَرهنئندئر. 17اگر هر کس اونون ائستهدئیئنی یرئنه یتئرمک ائستهسه، وردئیئم تعلئمئن تاریدان اولدوغونی و یا منئم اؤزومدن اولدوغونی آنلایاجاق. 18اؤزوندن دانیشان، اؤز جلالینی آختارار، آمّا اونی گؤندَرهنئن جلالینی آختاران آدام، دوز آدامدیر و اوندا یالان تاپیلماز. 19آیا شرئعتی سئزه موسا پیغمبر ورمهدی؟ گئنه ده سئزدن هچ بئرئز شرئعتی یرئنه یتئرمئر. نه اوچون منی اؤلدورمک ائستهیئرسئز؟» 20جاماعات جاواب ورئب ددی: «مگر دلی اولوبسان! کئم سنی اؤلدورمک ائستهیئر؟» 21عئسا اولارا جاواب ورئب ددی: «بئر ائش گؤردوم و هامیز تعجّوبدن مات قالیبسیز. 22ختنه الهمهیی موسا پیغمبر سئزه وردئیی اوچون، شنبه گونونده اوشاغی ختنه الهیئرسئز. اصلئنده موسا یوخ، بلکی سئزئن آتالاریز ختنه اله مهیی باشلادی. 23موسادان قالان قانونون پوزولماماسی اوچون، شنبه گونونده اوشاغیزی ختنه الهیئرسئز، ائندی نئیه بئر آدامین بوتون بدنئنی شنبه گونونده شفا وردئیئم اوچون، منه قضبلهنئرسئز؟ 24ظاهئره گؤره حؤکم الهمهیئن، بلکی عدالت ائنن حؤکم الهیئن.»
آیا عئسا، وعده ورئلن مسئحدئر؟
25او زامان اورشلئملیلردن بعضئلری ددئلر: «اؤلدورمک ائستهدئکلری آدام مگر بو دیئل؟ 26بو کی، آچیقجا هر شیی دیئر، هچ کسده اونا بئر شی دمئر! بلکه ده ریئسلر اونون دوغرودان مسئح اولدوغونی بئلئبلر. 27آمّا بئز، بو آدامین هاردان اولدوغونی بئلئرئک، حال بو کی وعده ورئلن مسئح ظوهور الهینده، اونون هاردان اولدوغونی بئر کس بئلمیهجک.» 28بو آرادا عئسا معبدده تعلئم ورنده سسئنی اوجالدیب ددی: «سئز منی تانیییرسیز و منئم هاردان اولدوغومی بئلئرسئز. من اؤز طرفئمدن گلمهمئشم، منی گؤندَرَن دوغرودور و سئز اونی تانیمیرسیز. 29من اونی تانیییرام چونکی اوندانام و او منی گؤندَرئب.» 30سؤز بورا یتئشن واخت، اونی توتماق ائستهدئلر، آمّا هچ کس اونا اَل اوزاتمادی، چونکی اونون واختی حله یتئشمهمئشدی. 31جاماعات آراسیندان چوخ آداملار اونا ائمان گتئردئلر. اولار دیئردئلر: «مگر وعده ورئلن مسئح ظوهور الهینده، بو آدامدان آرتیق مؤجوزه گؤرسدهجک؟!»
32فرئسی فئرقهسئنئن عالئملری عئسانین حاقّیندا خالق آراسیندا اولان بله پیچیلتیلاری اشئتدئلر. معبدئن باش کاهئنلری و فرئسئلر عئسانی یاخالاماق اوچون معبدئن موحافئظلرئنی گؤندَردئلر. 33اله اوندا عئسا ددی: «داها آز بئر مودّت سئز ائنن وارام و سورا منی گؤندَرهنئن یانینا گدهجهیم. 34منی آختاراجاقسیز، آمّا تاپا بئلمهیهجکسئز و اولدوغوم یره سئز گله بئلمزسئز.» 35او واخت یهودئلر آرالاریندا ددئلر: «بو آدام هارایا گتمک ائستهیئر کی، بئز اونی تاپماغا قادئر اولمایاجاغیق؟ اولماسین ائستهیئر یونانئلر آراسیندا داغیلمیش یهودئلرئن یانینا گدئب، یونانئلره تعلئم ورسئن؟ 36”منی آختاراجاقسیز آمّا تاپا بئلمئیهجکسئز“ و ”منئم اولدوغوم یره سئز گلهبئلمزسئز“ سؤزوندن نه دمک ائستهیئر؟»
عئسانین آخیر گؤنده کی سؤزلری
37بایرامین آخیرینجی و بؤیوک گونونده عئسا دوروب اوجا سس ائنن خئطاب الهیئب ددی: «اگر بئر کس سوسوزدور، منئم یانیما گلئب ائچسئن. 38منه ائمان گتئرن آدامین ائچئنده حیات ورن سو، چایلار کئمی آخاجاق، نجه کی، موقدّس کئتاب دیئب.» 39عئسا بو سؤزی موقدّس روحون حاقّیندا دیئردی کی، اونا ائمان گتئرنلره ورئلهجک ائدی. موقدّس روح حله ورئلمهمئشدی، چونکی عئسا حله جلال تاپمامیشدی.
عئسانین اوزوندن خالق آراسینداکی ائختئلاف
40آداملاردان بعضئلری اونون بو سؤزلرئنی اِشئدنده ددئلر: «دوغرودان دا بو کئشی، اِله او پیغمبردئر.» 41بعضئلری ده دیئردئلر: «بو، وعدهسی ورئلمئش مسئحدئر.» آمّا بعضئلری گئنه دیئردئلر: «وعدهسی ورئلمئش مسئح نجه جلئلدن گلهبئلر؟! 42مگر موقدّس کئتاب دمئر کی، مسئح داوود نسلئندن و یاشادیغی بیتلِحِم کندئندن گلهجک؟!» 43بله ده عئسانین اوزوندن خالق آراسیندا ائختئلاف دوشدی. 44بعضئلری اونی توتماق ائستهدئلر، آمّا هچ کس اونا ال اوزاتمادی.
یهودئلرئن ریئسلرئنئن ائمانسیزلیقلاری
45معبدئن موحافئظلری باش کاهئنلرئن یانینا قاییداندا، اولار موحافئظلردن سوروشدولار: «نه اوچون اونی گتئرمهدئز؟» 46موحافئظلر ددئلر: «هچ کس بو زاماناجاق اونون کئمی دانیشماییب.» 47فرئسئلر ددئلر: «مگر سئز ده آزیبسیز؟! 48آیا ریئسلردن و یا فرئسئلردن بئر کس اونا ائنانیب؟ 49آمّا شرئعتدن بئخبر اولان بو خالق ملعوندور.»
50نئقودئموس کی، قاباقدان عئسانین یانینا گتمئشدی و اولاردان بئری ائدی، ددی: 51«مگر بئزئم شرئعتئمئز بئر کسی اشئتمهدن و اونون نه الهدئیئنی بئلمهدن محکوم اله یر؟» 52اولار جاواب ورئب ددئلر: «یوخسا سن ده جلئللیسن؟! آراشدیر و گؤررسن کی، جلئلدن بئر پیغمبر چیخماز.» 53اوندان سورا هرکس اؤز اِوئنه گتدی.
اکنون انتخاب شده:
یوحنّا روایت 7: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
