یوحنّا روایت 21
21
عئسا یدّی شاگئردئنه گؤرونور
1بو حادئثهلردن سورا جلئل گؤلونون قیراغیندا عئسا گئنه اؤزونی شاگئردلره گؤرستدی. بو ائش بله اولدی: 2شمعون پطروس، اکئز دیئلن توماس، جلئلئن قانا کندئندن اولان نتهناعئل، زِبِدِیئن اوغوللاری، و عئسانین شاگئردلرئندن آیری ائکی نفر بئر یرده ائدئلر. 3شمعون پطروس اولارا ددی: «بالیق توتماغا گدئرم.» اولار اونا ددئلر: «بئز ده سن ائنن گلئرئک.» اشئیه چیخیب قاییغا مئندئلر. آمّا او گجه هچ بئر شی توتا بئلمهدئلر. 4سحر آچیلاندا عئسا ساحئلده دورموشدی، آمّا شاگئردلر اونون عئسا اولدوغونی بئلمهدئلر. 5عئسا اولارا ددی: «اوشاقلار، یمک اوچون بئر شیئز وار؟» اولار اونا جاواب وردئلر: «خیر.» 6عئسا اولارا ددی: «توری قاییغین صاغ طرفئنه آتین کی، توتارسیز.» توری آتدیلار و بالیقلارین چوخلوغوندان اونی چکه بئلمئردئلر. 7او واخت عئسانین سودئیی شاگئرد پطروسا ددی: «ربدئر!» شمعون پطروس اونون رب اولدوغونی اشئدن واخت، اَینئندن چیخارتدیغی پالتارینا بورونوب، اؤزونی گؤله آتدی. 8آمّا او بئری شاگئردلر بالیق تورونی چکهچکه قاییق ائنان گلدئلر، چونکی ساحئلدن اوزاق دیئلدئلر، آنجاق دوخسان متر اولاردی.
9قورولوغا چیخدیقلاری زامان اودون کؤمورون یاندیغینی گؤردولر. اودون اوستونده بالیق، یانیندا دا چؤرک وار ائدی. 10عئسا اولارا ددی: «ائندی توتدوغوز بالیقلاردان گتئرئن.» 11شمعون پطروس گدئب، توری قورولوغا چکدی. تور یوز الّی اوچ ائری بالیق ائنان دولموشدی و بو قدر چوخ اولدوغی حالدا تور ییرتیلمامیشدی. 12عئسا اولارا ددی: «گلئن سحر یمهیئنی ییئن.» شاگئردلردن هچ بئری اوندان «سن کئمسن؟» سوروشماغا جسارت الهمئردی. چونکی اونون رب اولدوغونی بئلئردئلر. 13عئسا گلدی و چؤرهیی گؤتوروب اولارا وردی، و بالیغی دا وردی. 14بو اوچونجی دفه ائدی کی، عئسا اؤلومدن دئرئلندن سورا، شاگئردلره گؤرونوردی.
عئسا و پطروس
15سحر یمهیئنی یئیندن سورا، عئسا شمعون پطروسا ددی: «یونا اوغلی شمعون، آیا سن منی بولاردان داها چوخ سوئرسن؟» شمعون اونا ددی: «بلی یارب، بئلئرسن کی، سنی سوئرم.» عئسا اونا ددی: « منئم قوزولاریمی گؤزله.» 16عئسا گئنه ائکئنجی دفه شمعونا ددی: «یونا اوغلی شمعون، آیا منی سوئرسن؟» شمعون اونا ددی: «بلی یارب، بئلئرسن کی، سنی سوئرم.» عئسا اونا ددی: «قویونلاریما چوبان اول.» 17عئسا اوچونجی دفه اونا ددی: «یونا اوغلی شمعون، آیا منی سوئرسن؟» عئسانین اوچونجی دفه اوندان «آیا منی سوئرسن؟» سوروشماسی پطروسی پرت الهدی. پطروس عئسایا ددی: «یارب، سن هر شیی بئلئرسن. بئلئرسن کی، سنی سوئرم.» عئسا اونا ددی: «منئم قویونلاریمی گؤزله. 18دوغروسونی سنه دیئرم، جاوان اولدوغون زامان اؤزون اؤز بلئنی باغلاییب، ائستهدئیئن یره گدَردئن، آمّا قوجالیغیندا اللرئنی اوزاداجاقسان و اؤزگه بئری سنئن بلئنی باغلایاجاق و ائستمهدئیئن یره آپاراجاق.» 19عئسا بو سؤزی دمکده او اؤلومه ائشاره الهیئردی کی، پطروس اونونان تارینی عئزّتلندئرهجک ائدی. و سورا اونا ددی: «منئم دالیمجا گل.»
20پطروس دؤنوب عئسانین سودئیی شاگئردئنئن آرخالاریندا گلمهسئنی گؤردی، او شاگئردی کی، شام یمهیئنده عئسانین سئنهسئنه سؤیکهنئب، اوندان سوروشموشدی: «یارب سنه خیانت الهین کئمدئر؟» 21پطروس بو شاگئردی گؤروب عئسایا ددی: «یارب، بس بو نه اولاجاق؟» 22عئسا پطروسا ددی: «اگر من گلنه کئمی اونون قالماسینی ائستهسم، بوندان سنه نه؟ سن منئم دالیمجا گل.» 23بله ده «او شاگئرد اؤلمهیهجک» سؤزی قارداشلارین آراسیندا یاییلدی. آمّا عئسا پطروسا «او، اؤلمهیهجک» دمهمئشدی. بلکی دمئشدی «اگر من گلنه کئمی اونون قالماسینی ائستهسم، بوندان سنه نه؟»
24بو همن او شاگئرددئر کی، بو شیلرئن حاقّیندا شهادت ورئب و یازیب و بئلئرئک کی، اونون شهادتی دوغرودور.
خاتمه
25عئسانین الهدئیی آیری چوخ شیلر حله وار کی، اگر تک-تک یازیلسایدی، گومان الهیئرم یازیلان کئتابلارا دونیادا یِر اولمازدی.
اکنون انتخاب شده:
یوحنّا روایت 21: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
