یوحنّا روایت 20
20
اؤلولر آراسیندان دئرئلن عئسا
1هفتهنئن اوّلکی گونی، مجدللی مریم سحر تِزدن قبئرئن یانینا گلدی. هاوا حله قارانلیق ائدی. آمّا قبئرئن آغزینی اؤرتن دَیئرمان داشینی بئر یانا دئیئرلَنمئش گؤردی. 2او واخت قاچیب شمعون پطروس و عئسانین چوخ سودئیی او بئری شاگئردئن یانینا گتدی و اولارا ددی: «ربّی قبئردن گؤتوروبلر و بئلمئرئک کی، هارایا آپاریب قویوبلار.» 3پطروس و او بئری شاگئرد اِودن چیخیب قبئره ساری یولا دوشدولر. 4یولدا برابر قاچیردیلار، آمّا او بئری شاگئرد پطروسی اؤتوب، اوندان اوّل قبئره یتئشدی. 5اَیئلئب ائچَری باخدی. کتان پارچا اوردا یرده ائدی. آمّا گئنه ده قبئرئن ائچئنه گئرمهدی. 6او واخت شمعون پطروس اونون دالیسیجا یتئشدی و قبئرئن ائچئنه گئرئب عئسانین کفنئنی اوردا یرده گؤردی. 7عئسانین باشینی بورودوکلری دسمال، کفن ائنن دیئلدی و آیری بئر یره بوکولموش حالدا قویولموشدی. 8بو زامان اوّلده قبئرئن یانینا یتئشن او بئری شاگئرد ده قبئرئن ائچئنه گئردی. او گؤردی و ائناندی. 9آمّا گئنه ده موقدّس کئتابین یازدیغینی بئلمئردئلر کی، عئسا گرک اؤلولردن دئرئلسئن. 10بوندان سورا شاگئردلر اِوه قاییتدیلار.
عئسا مجدللی مریمه گؤرونور
11آمّا مریم قبئرئن یانیندا دورموشدی و آغلاییردی. آغلایا-آغلایا باشینی اَیئب قبئرئن ائچئنه باخدی. 12اله او واخت آغ گیئنمئش ائکی ملک گؤردی. عئسانین جسدئنئن قویولدوغی یرده ملکلردن بئری اونون باشی اولان یرده، او بئرئسی ده اونون آیاقلاری اولان یرده اوتورموشدی. 13ملکلر مریمه ددئلر: «آرواد نه اوچون آغلاییرسان؟» مریم ددی: «ربّئمی گؤتوروب آپاریبلار و بئلمئرم هارایا قویوبلار .» 14بونی دئیندن سورا دالییا دؤندی و عئسانین اوردا دوردوغونی گؤردی، آمّا اونون عئسا اولدوغونی بئلمهدی. 15عئسا اونا ددی: «آرواد نه اوچون آغلاییرسان؟ کئمی آختاریرسان؟» مریم اونی باغبان گومان الهیئب اونا ددی: «آغا، اگر سن اونی گؤتوروب آپاریبسان، هارایا قویدوغون یری منه ده کی گدئم اونی گؤتوروم.» 16عئسا اونا ددی: «مریم!» مریم دؤنوب عئبرانی دئلئنده اونا ددی: «ربّونی» یعنی اوستاد. 17عئسا اونا ددی: «منه توخونما، چونکی حله آتانین یانینا قالخمامیشام. آمّا قارداشلاریمین یانینا گت و اولارا ده کی، آتامین یانینا و اولارین آتاسینین یانینا، تاریمین یانینا و اولارین تاریسینین یانینا قالخیرام.» 18مجدللی مریم گدئب شاگئردلره خبر وردی کی، ربّی گؤرموشم و هر نه کی رب اونا دمئشدی اولارا ددی.
عئسا شاگئردلرئنه گؤرونور
19اله او گون آخشامچاغی کی، هفتهنئن اوّلکی گونی ائدی، شاگئردلر یهودئلرئن قورخوسوندان قاپیلاری باغلاییب ائچهرئده بئر یره ییغیلمیشدیلار. عئسا گلئب اولارین آراسیندا دوردی و اولارا ددی: «سئزه سالام!» 20بونی دئیندن سورا اللرئنی و بؤیرونی اولارا گؤرستدی. شاگئردلر ربّی گؤردوکلرئنه گؤره چوخ سوئندئلر. 21عئسا اولارا گئنه ددی: «سئزه سالام. نجه کی، آتا منی گؤندَردی، من ده سئزی گؤندَرئرم.» 22و بونی دئیندن سورا نَفَسئنی اولارا پئلهدی و ددی: «موقدّس روحی آلین. 23کئمئن گوناهلارینی باغیشلایاسیز، باغیشلاناجاق. کئمئن ده گوناهلارینی باغیشلامایاسیز، باغیشلانمایاجاق.»
عئسا و توماس
24اکئز دیئلن توماس کی، اونائکی شاگئرددن بئری ائدی، عئسا اولارا گؤرونن واخت، اولار ائنان بئر یرده دیئلدی. 25اونون اوچون ده گلدئیی واخت، او بئری شاگئردلر اونا ددئلر: «ربّی گؤردوک!» آمّا توماس اولارا ددی: «میخلارین یاراسینی اونون اللرئنده گؤرمهیئنجه، بارماغیمی همن یارایا سوخمایینجا، الئمی اونون یارالی بؤیرونه قویمایینجا ائنانمارام!» 26سکّئز گوندن سورا شاگئردلر گئنه اِوده بئر یره ییغیشمیشدیلار و بو زامان توماس دا اولار ائنان ائدی. قاپیلار باغلی ائدئلر عئسا گلئب، اولارین آراسیندا دوردی و اولارا ددی: «سئزه سالام!» 27سورا توماسا ددی: «گل، بارماغینی اوزات، اللرئمه باخ! گل، الئنی بؤیرومه قوی. ائمانسیز اولما، بلکی ائنان!» 28توماس جاواب ورئب اونا ددی: «ربّئم! تاریم!» 29عئسا اونا ددی: «منی گؤردویون اوچون ائناندین؟ بختور او آداملار کی، منی گؤرمهمئش ائنانیب ائمان گتئرئرلر.»
بو کئتابین هدفی
30عئسا شاگئردلرئنئن گؤزلری قاباغیندا آیری چوخ علامتلر گؤرستدی کی، بو کئتابدا یازیلماییب. 31آمّا بو قدر یازیلیب کی، ائناناسیز عئسا اله همن وعده ورئلن مسئح و تارینین اوغلودور و ائمان گتئرمک ائنن اونون آدیندا حیاتیز اولسون!
اکنون انتخاب شده:
یوحنّا روایت 20: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
