یوحنّا روایت 16
16
1بو سؤزلری اوندان اؤتری سئزه ددئم کی، ائمانیز سوستلاشماسین. 2سئزی عئبادتگاهلاردان قوواجاقلار. حتّا اله واخت گلر کی، سئزی اؤلدورَن هر کس گومان اِله ر کی تارییا خئدمت الهیئر. 3و بو ائشلری اِله رلر، چونکی نه آتانی تانیییرلار نه ده منی. 4آمّا بو شیلری سئزه ددئم کی، همن واخت گلنده، بولاری سئزه ددئیئمی خاطیرلایاسیز. بو شیلری باشلانیشدان سئزه دمهدئم، چونکی اؤزوم سئز ائنن ائدئم.
موقدّس روحون ائشی
5آمّا ائندی منی گؤندَرهنئن یانینا گدئرم و سئزدن هچ بئرئز مندن سوروشمور؛ ”سن هارایا گدئرسن؟“ 6بو شیلری سئزه ددئیئم اوچون اورهیئز قم ائنن دولوب. 7آمّا حقئقتی سئزه دیئرم؛ منئم گتمهیئم سئزئن اوچون خیئرلیدئر. چونکی گتمهسم، تسلّی ورن سئزئن یانیزا گلمز؛ آمّا اگر گِتسَم، اونی سئزئن یانیزا گؤندَرهرَم. 8او، گلدئیی زامان، دونیانین آداملارینا گوناهین نه اولدوغونی، صالحلئیئن نه اولدوغونی و تارینین موحاکئمهسئنئن نه اولدوغونی بئلدئرهجک. 9اولارین گوناهینی گؤرسدهجک، چونکی منه ائمان گتئرمئرلر. 10حقئقی صالحلئیی اولارا آشکار اِلئیهجک، چونکی آتانین یانینا گدئرم و آرتیق منی گؤرمهیهجکسئز. 11و تارینین موحاکئمهسئنئن نه اولدوغونی دا اولارا گؤرسدهجک، چونکی بو دونیایا حؤکمدارلیق الهین روح محکوم اولونوب.
12«سئزه دمهلی چوخ سؤزلرئم وار، آمّا ائندی اولاری درک الئیهبئلمزسئز. 13آمّا او، یعنی حقئقت روحی گلنده، سئزی بوتون حقئقته هئدایت اِلئیهجک؛ چونکی او اؤزوندن هچ بئر شی دمهیهجک، بلکی نه اشئدئر، اولاری دئیهجک و گلن گونلرده اولاجاقلاری سئزه خبر ورهجک. 14او منه جلال ورهجک، چونکی منئم اولانلاردان آلیب سئزه بئلدئرهجک. 15آتانین هر شیی وار، منئمدئر. اونون اوچون ده ددئم کی، منئم اولانلاردان آلیب سئزه بئلدئرهجک.
عئسا شاگئردلری تسلّی ورئر
16«آز بئر زاماندان سورا منی آرتیق گؤرمهیهجکسئز و آز بئر زاماندان سورا منی گئنه گؤرهجکسئز.» 17شاگئردلردن بعضئلری بئربئرلرئنه ددئلر: «”آز بئر زاماندان سورا منی آرتیق گؤرمهیهجکسئز و آز بئر زاماندان سورا منی گئنه گؤرهجکسئز“ و ”چونکی آتانین یانینا گدئرم“ سؤزدن نه نئیّتی وار؟» 18اونا گؤره ده دیئردئلر: «”آز بئر زامان“ دمکدن قصدی نهدئر؟ اونون ددئیئنی آنلامیریق.» 19عئسا اولارین سوروشماق ائستهدئکلرئنی آنلاییب اولارا ددی: «”آز بئر زاماندان سورا منی آرتیق گؤرمهیهجکسئز“ و ”آز بئر زاماندان سورا منی گئنه گؤرهجکسئز“ ددئیئم اوچون بئربئرلرئزدن سوروشورسوز؟ 20دوغروسونی سئزه دیئرم، سئز آغلاییب یاس توتاجاقسیز آمّا دونیا شادلیق اِلئیهجک؛ سئز ماتم توتاجاقسیز، آمّا سئزئن ماتمئز شادلیغا دؤنهجک. 21آرواد، اوشاغینین دوغوم واختی یتئشن زامان، آغری چکر؛ آمّا اوشاغینی دوغاندان سورا، بئر ائنسان بو دونیایا گتئرمهسئنه گؤره، شادلیغیندان آغری یادیندان چیخار. 22اله بله ائندی سئز ده قوصّهلهنئرسئز، آمّا سئزی گئنه گؤرهجهیم و اورهیئز سوئنهجک و هچ کئم سئزئن شادلیغیزی سئزدن آلمایاجاق. 23او گون مندن هچ بئر شی سوروشمایاجاقسیز. دوغروسونی سئزه دیئرم؛ آتادان هر نه کی منئم آدیمدا ائستیهسئز، سئزه ورهجک. 24ائندئیه کئمی منئم آدیمدا هچ بئر شی ائستمهیئبسئز؛ ائستهیئن و آلاجاقسیز کی، شادلیغیز کامئل اولسون.
25«بو شیلری مثللر ائنن سئزه دمئشم؛ او زامان گلئر کی، آرتیق سئزه مثللر ائنن دانیشمایاجاغام، بلکی آتا حاقّیندا سئز ائنن آچیقجا دانیشاجاغام. 26او گون منئم آدیمدا ائستهیهجکسئز و دمئرم کی، سئزدن اؤتری آتادان ائستیه جه یم، 27چونکی آتا اؤزی سئزی سوئر، اونا گؤره کی، منی سوئبسئز و اونون یانیندان گلدئیئمه ائنانیبسیز. 28من آتانین یانیندان چیخیب بو دونیایا گلمئشم. دونیانی ترک الهیئب گئنه آتانین یانینا گدئرم.»
29شاگئردلری ددئلر: «آها! ائندی آچیقجا دانیشیرسان و هچ بئر مثلدن ائستئفاده اله مئرسن. 30ائندی آنلاییریق کی سن هر شیی بئلئرسن و حتّا احتئیاجین یوخدور کی، بئر کس سندن سوآل سوروشسون. بوندان ائنانیریق کی، تارینین یانیندان چیخیب گلئبسن.» 31عئسا اولارا ددی: «ائندی ائنانیرسیز؟! 32او زامان گلئر و اله ائندی ده گلئبدئر کی، هر بئرئز اؤز طرفئزه داغیلاجاقسیز و منی تک-تنها بوراخاجاقسیز؛ آمّا من تک دیئلم، چونکی آتا دا من ائنن دئر. 33بو شیلری سئزه ددئم کی، منده باریشیز اولسون. بو دونیادا زحمت آلتینداسیز، آمّا جسور اولون! من دونیایا قالئب گلمئشم.»
اکنون انتخاب شده:
یوحنّا روایت 16: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
