حوارئلرئن ائشلری 23
23
پولوس شورانین قاباغیندا
1پولوس شورانین آداملارینا باخیب ددی: «قارداشلار، من بو گونه قدر حیاتیمی صاف وئجدان ائنان تارینین حوضوروندا یاشامیشام.» 2لاپ بؤیوک کاهئن حنانئیا اونون یانیندا دورانلارا امر الهدی کی، پولوسون آغزینا وورسونلار. 3او واخت پولوس اونا ددی: «ای آغاردیلمیش دووار! تاری سنی ووراجاق! سن اوتورورسان کی، منی شرئعته موطابئق موحاکئمه الئیهسن، آمّا شرئعتی آیاق آلتینا قویوب امر الهیئرسن کی، منی دؤیسونلر؟»
4آمّا یانیندا دورانلار ددئلر: «تارینین لاپ بؤیوک کاهئنئنی سؤیورسن؟»
5پولوس دا ددی: «قارداشلار، اونون لاپ بؤیوک کاهئن اولدوغونی بئلمئردئم، چونکی یازیلیب: ”اؤز خالقینین ریئسی ضئدّئنه پئس سؤز دمه.“»
6پولوس اولارین بئر قئسمئنئن صادوقئلر و او بئری قئسمئنئن فرئسئلر اولدوغونی بئلدئکده، شورادا اوجا سس ائنن ددی: «قارداشلار، من فرئسی اوغلی بئر فرئسییَم؛ اؤلولرئن دئرئلمهسی اومئدی اوچون موحاکئمه اولونورام!» 7بونی دئین واخت، فرئسئلر و صادوقئلر آراسیندا جرّی-بحث قالخدی و جاماعات ائکئیه بؤلوندی. 8چونکی صادوقئلر دیئرلر کی، نه دئرئلمه وار، نه مَلَک، نه ده روح. آمّا فرئسئلر هامیسینی قبول الهیئرلر.
9بؤیوک قیشقیر-باغیر اولدی و فرئسی دستهسئندن اولان بعضی شرئعت موعلّئملری قالخیب، چوخ قیزمیش بحث الهیئردئلر: «بئز بو آدامدا بئر پئسلئک تاپمیریق. اگر بئر روح و یا بئر ملک اونونان دانیشمیش اولسا، نه؟» 10جرّی-بحث چوخ بؤیوینده، فرمانده قورخدی کی، اولمایا پولوس اولارین الئنده تئکه-تئکه اولسون. پس سربازلارا امر الهدی کی، آشاغی انسئنلر و زور ائنان اونی آرالاریندان آلیب، قالایا آپارسینلار.
11او گونون گجهسی رب پولوسون یانیندا ظاهئر اولوب ددی: «جسور اول! چونکی منئم حاقّیمدا اورشلئمده نجه شهادت وردئن، رومدا دا گرک بو جور شهادت ورهسن.»
پولوسون ضئدّئنه نقشه
12سحر آچیلاندا، یهودئلر بئر نقشه قوروب آند ائچدئلر کی، پولوسی اؤلدورمهیئنجه نه یسئنلر، نه ده ائچسئنلر. 13بو نقشهنی حاضیرلایانلارین ساییسی قیرخ نفردن چوخ ائدی. 14اولار باش کاهئنلر و آغساقّاللارین یانینا گلئب ددئلر: «بئز آغیر بئر آند ائچمئشئک کی، پولوسی اؤلدورمهیئنجه هچ بئر شی دادمایاق. 15بله ده، ائندی سئز و شورا، بو بهانه ائنن کی گویا پولوسون مسلهسئنی داها دقئق آراشدیرماق ائستهیئرسئز، فرمانده دن ائستهیئن کی اونی سئزئن یانیزا گتئرسئن. بئز ده حاضیریق کی، بورایا گلمهمئشدن اونی اؤلدورک.»
16آمّا پولوسون باجیسی اوغلی اولارین بو نقشهسی بارهده اشئتدی و گلئب قالایا گئردی و پولوسا خبر وردی.
17پولوس دا افسرلردن بئرئنی یانینا چاغیریب ددی: «بو جاوانی فرماندهئن یانینا آپار، چونکی اونا ورمهلی بئر خبری وار.» 18افسر جاوانی گؤتوروب، فرماندهئن یانینا آپاردی و اونا ددی: «زئندانی پولوس منی یانینا چاغیردی و خاهئش الهدی کی، بو جاوانی سنئن یانینا گتئرئم، چونکی سنه دمهلی بئر خبری وار.»
19فرمانده جاوانین اَلئندن توتدی و خلوت بئر یره چکئب اوندان سوروشدی: «منه دمهلی نه خبرئن وار؟»
20جاوان اونا ددی: «یهودئلر سؤزی بئر الهیئبلر کی، پولوسون ائشئنی لاپ دقئق آراشدیرماق اوچون سندن ائستهسئنلر کی، صاباح اونی شورانین حوضورونا گتئرهسن. 21آمّا سن اولارا قولاق آسما. چونکی قیرخ نفردن آرتیق آدام کمئنده اونی گؤزلهیئرلر و آند ائچئبلر کی، اونی اؤلدورمهیئنجه ییئب-ائچمهسئنلر. ائندی اولار حاضیردیرلار و سندن بئر جاواب گؤزلهیئرلر.»
22او واخت فرمانده جاوانی بوراخدی و اونا امر الهدی: «هچ کئمه دمه کی، بولاری منه خبر ورئبسن.»
پولوس قیصرئیّهیه آپاریلیر
23فرمانده افسرلردن ائکی نفری چاغیریب ددی: «قیصرئیّه شهرئنه گتمک اوچون گجه ساعات دوقوزدا ائکی یوز سرباز، یتمئش آتلی و ائکی یوز نئزهچی حاضیرلایین.» 24پولوس اوچون ده بئر آت حاضیرلایین کی، اونی والی فِلئکسه صاغ-سالامات چاتدیراسیز.»
25و بئر نامه ده یازدی کی بله یازیلمیشدی:
26«کلودئیوس لئسئیاسدان
لاپ مؤحتشم والی فِلئکسه،
سالام.
27بو آدامی یهودئلر توتموشدولار و عنقرئب اؤلدورهجک ائدئلر، آمّا اونون روم تبعهسی اولدوغوندان خبردار اولوب، سربازلار ائنان یتئشدئم و اونی خئلاص الهدئم. 28و نهدن اؤتری اونی موتّهم الهدئکلر بئلمک اوچون، اونی اولارین شوراسینا گتئردئم؛ 29و آنلادیم کی، اؤز شرئعتلری بارهسئنده اونا ائتّئهام وورورلار، آمّا اؤلومه و یا حبسه لایئق بئر گوناه تاپمادیم. 30و اونون ضئدّئنه قورولان نقشهنی منه خبر وِرنده، اونی فورَن سنئن یانینا گؤندَردئم. اونا ائتّئهام وورانلارا دا تؤوصئیه الهدئم کی، اونون بارهسئنده اولان شئکایتلرئنی سنئن حوضوروندا بیان الهسئنلر.»
31بله ده، سربازلار، آلدیقلاری امرلره گؤره، پولوسی گؤتوروب گجه ائنن آنتئپاتِرئس شهرئنه گتئردئلر. 32صاباحیسی آتلیلاری اونونان گتمک اوچون قویوب اؤزلری قالایا قاییتدیلار. 33آتلیلار قیصرئیّه شهرئنه گلئب نامهنی والئیه وردئکلری زامان، پولوسی دا اونون حوضورونا گتئردئلر. 34والی نامهنی اوخویاندان سورا، پولوسون هانسی وئلایتدن اولدوغونی سوروشدی. کئلئکئیادان اولدوغونی اؤیرَننده 35ددی: «ائتّئهام وورانلارین گلندن سورا، سؤزلرئنی اشئدهرم.» سورا امر الهدی کی، پولوس هئرودون ساراییندا ساخلانسین.
اکنون انتخاب شده:
حوارئلرئن ائشلری 23: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
