حوارئلرئن ائشلری 22
22
1«قارداشلار و آتالار، ائندی سئزه ورهجهیئم دئفاعئیهنی اشئدئن.»
2اوندا کی اولار اِشئتدئلر پولوس عئبرانی دئلئنده اولار ائنان دانیشیر، آرتیق ساکئت اولدولار.
پولوس ددی: 3«من بئر یهودئیم، کئلئکئیا وئلایتئنئن طرسوس شهرئنده آنادان اولموشام، آمّا بو شهرده، غَمالایئلئن آیاقلاری آلتیندا، اجدالاریمیزین شرئعتئنه گؤره جئدّی بئر شکئلده بؤیوموشم و تارییا دا قیرتلی بئر آدام ائدئم، نجه کی، بو گون سئز هامیز اله سئز. 4من بو ”طرئقت“ اهلئنه اؤلوم درجهسئنه قدر عذاب ورئب، کئشئلر و آروادلاری باغلاییب زئندانا سالاردیم. 5نجه کی، لاپ بؤیوک کاهئن و شورانین بوتون آغساقّاللاری بونی تصدئق الئیه بئلرلر. حتّا من اولاردان قارداشلارا نامهلر آلدیم و دمشق شهرئنه طرف یولا دوشدوم کی، اوردا اولانلاری دا توتوب اورشلئمه گتئرئم کی، جزالارینی آلسینلار.
6گون اورتاچاغی یولدا گدنده، دمشقه یاخین، بئردن گؤیدن بؤیوک بئر ائشیق بوتون اطرافیمی ائشیقلاندیردی. 7یره ییخیلدیم و بئر سس اشئتدئم کی، منه دیئر: ”شاعول، شاعول، نه اوچون منه عذاب ورئرسن؟!“
8جاواب وردئم: ”سن کئمسن، یارب؟“
او دا منه ددی: ”من سنئن عذاب وردئیئن ناصئرهلی عئسایام.“ 9من ائنن اولانلار یقئن کی، ائشیغی گؤردولر، آمّا من ائنن دانیشانین سسئنی آنلامادیلار.
10ددئم: ”یارب، من نه الهمهلئیم؟“ و رب منه ددی: ”دور و دمشقه گت. اوردا بوتون او ائشلر کی اله مهیئن اوچون تعیئن اولونوب، سنه دیئلهجک.“ 11او ائشیغین جلاسیندان کور اولدوغوما گؤره، یانیمدا اولانلار الئمدن توتوب دمشقه گتئردئلر.
12«شرئعتی رئعایت الهین حنانئیا آدیندا بئر آدام کی، اوردا یاشایان بوتون یهودئلر آراسیندا اعتئبارلی ائدی، 13یانیما گلدی و دایانیب ددی: ”شاعول قارداش، گؤزلرئن گؤرسون!“ من ده اِله او آندا، گؤزلرئم آچیلدی و اونی گؤردوم.
14«او منه ددی: ”آتالاریمیزین تاریسی سنی تعیئن الهیئب کی، اونون ائرادهسئنی بئلهسن و او صالح اولانی گؤرهسن و آغزیندان کلام اشئدهسن. 15چونکی سن بوتون آداملارا، گؤردویون و اشئتدئکلرئن بارهده اونون شاهئدی اولاجاقسان. 16ائندی نه اوچون یوبادیرسان؟ قالخ، تعمئد آل و اونون آدینی چاغیریب اؤز گوناهلارینی یو.“
17«اورشلئمه قاییدیب معبدده دوعا الهدئیئم زامان، هوشسوزلوق حالینا دوشدوم 18و ربّی گؤردوم کی، منه دیئر: ”تَلَس! تز اورشلئمدن چیخ، چونکی سنئن شهادتئنی منئم حاقّیمدا قبول الهمئیهجکلر.“
19«ددئم: ”یارب، اولار اؤزلری ده بئلئرلر کی، من عئبادتگاهدان عئبادتگاها گدئب سنه ائمان گتئرنلری حبس الهیئب دؤیَردئم. 20و سنئن شاهئدئن استئفانین قانی تؤکولدویی زامان، من ده اوردا بونی تصدئق الهیئب دورموشدوم و اونی اؤلدورنلرئن عبالارینی ساخلاییردیم.“
21«رب منه ددی: ”گت، چونکی من سنی اوزاغا، قیرییهودئلرئن یانینا گؤندَرهجهیم.“»
پولوس، روم تبعهسی
22پولوسا بو سؤزه قدر قولاق آسدیلار و سورا قیشقیر-باغیر سالیب ددئلر: «بله بئر آدامی یر اوزوندن محو اله، چونکی او یاشاماغا لایئق دیئل.»
23اولار باغیریب، عبالارینی آتدیلار. هاوایا توز سوووران حالدا، 24فرمانده امر الهدی کی، پولوسی قالایا آپارسینلار و ددی کی، پولوسا شالّاق وورالار و اوندان ائستئنطاق الئیهلر، اله کی معلوم اولسون، اونون حاقّیندا کی قیشقیرمالارین دلئلی نهدئر. 25آمّا اونی قاییشلار ائنان باغلادیقلاری زامان، پولوس یانیندا دوران افسره ددی: «آیا ائختئیاریز وار کی، بئر روم تبعهسئنی محکوم اولونمامیش شالّاق ووراسئز؟»
26بونی اشئدن زامان افسر فرماندهئن یانینا گدئب اونا ددی: «نه الهیئرسن؟! بو آدام روم تبعهسیدئر.»
27فرمانده پولوسون یانینا گلئب اونا ددی: «دِه گؤروم سن روم تبعهسیسن؟»
او دا ددی: «بلی.»
28فرمانده جاواب ورئب ددی: «من چوخلی پول گوجی ائنن بو روم تبعهسی اولماغینی آلمیشام.»
پولوس ددی: «آمّا من روم تبعهسی آنادان اولموشام.»
29اونی ائستئنطاق الهمک ائستهینلر آنن دالی چکئلدئلر؛ فرمانده ده اونون روم تبعهسی اولدوغونی بئلَنده قورخدی، چونکی اونی باغلاتدیرمیشدی.
یهود شوراسیندا
30آمّا او گونون صاباحی، فرمانده بو قصد ائنن کی، دقئق بئلسئن یهودئلر پولوسی نهیه موتّهم الهیئبلر، اونی حبسدن چیخاردیب، امر الهدی کی، باش کاهئنلر و بوتون شورا بئر یره ییغیلسین. اوندا پولوسی آشاغی اندئرئب، اولارین حوضورونا گتئردی.
اکنون انتخاب شده:
حوارئلرئن ائشلری 22: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
