حوارئلرئن ائشلری 24
24
پولوس فِلئکسئن حوضوروندا
1بش گوندن سورا لاپ بؤیوک کاهئن حنانئیا، آغساقّاللار و تِرتولوس آدیندا بئر وکئل ائنن گلئب، پولوسون ضئدّئنه والئیه شئکایت الهدئلر. 2پولوسی احضار الهیندن سورا، تِرتولوس اونا ائتّئهام وورماغا باشلاییب ددی: «عالئجناب فِلئکس، سنئن ساینده صولح ائچئندهیئک و سنئن بصئرتئن ائنن بو خالق اوچون هر یرده ائصلاحات باش ورئر. 3بئز اؤز وظئفه مئز بئلئرئک کی همئشه و هر زامان سئزدن قدردانلیق الهیک. 4آمّا سنه داها آرتیق باش آغریسی ورمهمک اوچون، خاهئش الهیئرم کی، اؤز مرحمتئن ائنن بئزه قیسا بئر زامان قولاق آساسان.
5«بئز بو آدامی دوغرودان دا موفسئد تاپمیشیق، بوتون یر اوزونده یاشایان یهودئلری عوصیانا قالخیزیر و نَصرانی فئرقهنئن ده رهبریدئر. 6بو آدام حتّا اللَشدی کی، معبدی حؤرمتسئز الهسئن. بئز اونی توتدوق و ائستهدئک کی، اؤز شرئعتئمئزه گؤره اونی موحاکئمه الهیک. 7آمّا فرمانده لئسئیاس گلئب، اونی زور ائنان الئمئزدن آلدی. 8و اوندان شئکایت الهینلره امر وردی کی، سنئن یانینا گلسئنلر. سن اؤزون ده بوتون بو مطلبلر حاقّیندا اونی ائستئنطاق الهیئب، ووردوغوموز ائتّئهاملارین دوغری اولدوغونا یقئن تاپا بئلرسن.»
9یهودئلر ده بو ائتّئهام وورماغا قوشولوب، بو شیلرئن بله اولماسینی تصدئق الهدئلر.
10والی، پولوسا دانیشماق اوچون ائشاره الهینده، پولوس جاواب وردی: «سنئن چوخ ائللردن بری بو خالقا قاضی اولدوغونی بئلئرم، اونا گؤره ده، راضیلیق ائنان حاقّیمدان دئفاع الهیئرم. 11اؤیرنه بئلرسن کی، اورشلئمه عئبادت الهمک اوچون گلدئیئمدن، هچ اونائکی گون کچمهیئب. 12منی نه معبدده، نه عئبادتگاهدا، نه ده شهرده گؤرمه یئبلر کی، بئری ائنن بحث الهیم، یا دا عوصیان قالخیزیم. 13سنئن حوضوروندا منه ووردوقلاری ائتّئهاملاری دا ثابئت الئیهبئلمئرلر. 14آمّا بونی سنئن حوضوروندا قبول الهیئرم کی، اولارین فئرقه ددئیی طرئقته گؤره، من آتالاریمیزین تاریسینا خئدمت الهیئرم، شرئعتده و پیغمبرلرده یازیلان شیلرئن هامیسینا دا ائنانیرام. 15و اولارین اؤزلرئنئن ائناندیقلاری کئمی، منئم ده تارییا اومئدئم وار کی، هم صالح آداما، هم ده پئس آداما اؤلولرئن دئرئلمهسی اولاجاق. 16بونا گؤره، دائم اللشئرم کی، تاری و ائنسانلار قاباغیندا وئجدانیم پاک اولسون.
17چوخ ائللردن سورا گلدئم کی، خالقیما صدقهلر گتئرئم و قوربان تقدئم الهیئم. 18بو ائشلره مشغول ائدئم کی، منی او حالدا کی، طاهئر اولماق رسمئنی یرئنه یتئرمئشدیم معبدده تاپدیلار. اطرافیمدا دا نه قالابالیق وار ائدی، نه ده ولوله. 19آمّا بعضی آسئیالی یهودئلر ده من ائنن وار ائدئلر کی، اولارین دا بوردا اولماسی لازیمدیر کی، اگر منئم ضئدّئمه شئکایتلری وار دیر، سنئن حوضورونا تقدئم الهسئنلر. 20یا دا قوی اله اؤزلری دسئنلر کی، شورانین حوضورونا چیخدیغیم زامان، نه حاقسیزلیق منده تاپدیلار. 21مگر بو بئر سؤز اوچون کی، اولارین آراسیندا اولان زامان قیشقیریب ددئم: ”من بو گون اؤلولرئن دئرئلمهسی اوچون سئزئن حوضوروزدا موحاکئمه اولونورام.“»
22آمّا والی فِلئکسئن طرئقت بارهسئنده داها دقئق معلوماتی اولدوغونا گؤره، ائشی تأخئره سالیب ددی: «فرمانده لئسئیاس گلندن سورا سئزئن ائشئزه یتئشهجهیم.» 23سورا افسره امر الهدی کی، پولوسی نظارت آلتیندا ساخلاسین، آمّا اونا آزادلیق ورسئن و دوستلارینین هچ بئرئسئنئن اونا خئدمت الهمهسئنه مانع اولماسین.
24آمّا بئر نچه گوندن سورا، والی فِلئکس یهودی آروادی دروسئلا ائنن گلئب، پولوسی چاغیرتدی و اونون مسئح عئسایا اولان ائمانی حاقّیندا دانیشدیغینی اشئتدی. 25پولوس صالحلئکدن، نفسه حاکئم اولماقدان و گلهجک موحاکئمه گونوندن بحث الهینده، فِلئکس قورخویا دوشوب ددی: «ائندی مورخّصسن، گت. واختیم اولاندا سنی چاغیرتدیرارام.» 26همن زاماندا اومئدی وار ائدی کی، پولوس اونا پول ورهجک. بونا گؤره ده، اونی تز-تز چاغیرتدیریب اونونان صؤحبت الهیئردی.
27آمّا ائکی ائل کچئب گدندن سورا، فِلئکسئن یرئنه پورکئیوس فِستوس گلدی. فِلئکس ده یهودئلرئن ریضاسینی قازانماق اوچون پولوسی حبسده ساخلادی.
اکنون انتخاب شده:
حوارئلرئن ائشلری 24: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
