Pahayag 2
2
U Sulat tu Gurupo nu Mánnampalataya hide ti Efeso
1Nadid, isulat mo tu anghel nu mánnampalataya hide ti Efeso:
Iye u pekagi nu te tatawed tu pitto a biton tu kawanan na a kamát a maglakad tu bállog nu pitto a págtupuwan ti simbuwan a ginto. 2Tukoy ko u gimet moy hide, u pagud sakay u tiyaga moy. Tukoy ko a awan moy kákkonsentiyán u mágkadukás a tolay. Pero pinurbaan moy u magware-ware hide a apostol, kaya napatunayan moy a mágkabule hide. 3Tukoy ko be a matiyaga kam a nagtiis tu makpal a hirap alang-alang nikán sakay awan moy inadággen u pánnapalataya moy nikán sakay awan kam nanghina. 4Pero tehhodák a essa a bagay a umád nikam: nanglamig dán u págmahal moy nikán a awan konna tu págmahal moy tu purumero. 5Isipán moy u date moy a kalagayan; ni kodya kam a nanglamig tu pánnampalataya moy. Magsise kamon sakay gimitán moy a huway u date moy a gággimitán tu purumero. Ni awan ka magsise ay angayák hina sakay ibutan ko tu páppágyanan na u simbuwan moy. 6Pero sabi iye i panggustuwan kuwáy nikam: sasala moy be a konna nikán u gággimitán nu Nicolaita hide.
7Ni makaintendi kam, ay pakasanigán moy u kákkagiyán nu Banal a Ispirito tu gurupo nu mánnampalataya hide.
“U magtagumpay ay atádden ko ti karapatan a kuman tu bunga nu kayo a makapangatád ti biyag a katoy tu kahariyan nu Diyos.”#2:7 Ti Griego: Paraiso
U Sulat tu Gurupo nu Mánnampalataya hide ti Esmirna
8“Nadid, isulat mo iye tu anghel nu mánnampalataya hide ti Esmirna:
Iye u pekagi nu Sapul ay tu Katapusan, u natay sakay nabiyag a huway. 9Tukoy ko u pagsubuk a dáddanasán mo. Tukoy ko a mahirap kam, pero i tatahodinay ay mayaman kam. Sakay tukoy ko be u pangsássida nikam nu bakán hide a Judio, pero i tahoday ay sakup hide ni Satanas. 10Dyan kam manteng tu hirap a adene moy dán a danasán. Tandaan moy: pepireso ni Satanas u sangan nikam bilang pagsubuk; magtiis kam tu alay nu sapulo a aldew. Magtulos-tulos kam la a matapat hanggan tu kamatayan, tánni premyuwan takam ti biyag a awan ti kahád.”
11Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!
U magtagumpay ay awan dán makadanas tu kaduwwa a kamatayan.
U Sulat tu Gurupo nu Mánnampalataya hide ti Pergamo
12Isulat mo tu anghel nu mánnampalataya hide ti Pergamo:
Iye u pekagi nu te tatawed tu matalas a ispada a te magdiliputan ti ngahab: 13Tukoy ko a mámmágyan kam tu lugar a paghariyan ni Satanas, pero tulos-tulos kam padi a tapat nikán. Awan moy inadággen u pánnampalataya moy. Maski ni binuno ti Antipas, a matapat ko a tagapagserbi ti lugar moye a páppágyanan ni Satanas. 14Pero tehhodák a sangan a pangsalaan nikam: tehhod nikam a mangunonod tu toldu ni Balaam. Iye u nangtoldu ni Balak para igiyya na u Israelita hide a magkasala. Kaya kinuman hide tu makan a nealay tu diyos-diyosan hide sakay naggimet ti mágkahalay a gimet. 15Tehhod be a sangan nikam a umunonod tu toldu nu Nicolaita hide. 16Kaya magsise kamon sakay adággen u kasalanan moy hide! Ta ni awan ay angayák hina a pagdaka sakay labanan ko i tolayan hiden na tu pamamag-itan nu ispada a lumuwas ti labi kuwáy.
17“Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!
U magtagumpay ay atádden ko tu netagu a manna. Sakay atádden ko siya ti mapudew a bito a sássulatan nu essa a bigu a ngahan a awan ti makatuko-tukoy maliban nikuna.”
U Sulat tu Gurupo nu Mánnampalataya hide ti Tiatira
18Isulat mo tu anghel nu gurupo nu mánnampalataya hide ti Tiatira:
“Iye u pekagi nu Anak nu Diyos a tehhod a mata a kumán a maggehab a apoy sakay u tikád na ay kumán a magkinang-kinang a pinakintab a tangso. 19Tukoy ko u gimet moy, u págmahal, katapatan, págserbi sakay págtiyaga moy. Tukoy ko a lalo a maganda u gággimitán moy nadid nan tu itod. 20Pero sabi iye i pangsalaan kuwáy nikam: páppabayan moy la ti Jezebel, u bábbey a magkukunware a prupeta nu Diyos, a tolduwan sakay linlangán u tagapagserbi ko hide a mangibábbey oni mangilállake sakay kuman tu nealay hide tu diyos-diyosan. 21Inatádden ko siya ti pagkakataun para magsise sakay adággen u madukás na a kákkabiyag, pero umád na. 22Kanya nadid: magkasakit siya ti matindi sakay u nákduhog nikuna. Magdanas hide ti matindi a kahirapan ni awan de pagsisiyan u mágkadukás a gimet de kagunan i bábbiyán itod. 23Sakay pati be u immunonod hide tu toldu na ay parusaan ko ti kamatayan tu pamamag-itan nu peste, tánni matukuyan nu atanan a mánnampalataya a hikán u makatukoy tu puso sakay tu isip nu tolay. Premyuwan ko u balang essa nikam ayun tu ginimet moy. 24Pero u agum hina nikam ti Tiatira a awan nágsaneg tu toldu ni Jezebel, sakay awan summunud tu ‘mágkadsalad kan a lihim ni Satanas,’ ay awan kudán dagdagen ti dágge. 25Pero dapat kam a magtulos-tulos a tapat nikán hanggan tu káddemát ko. 26U magtagumpay sakay sumunud tu kagustuwan ko hanggan ti katapusan ay atádden ko siya ti kapangyariyan a mamahala tu bansa hide, 27konna tu kapangyariyan a inyatád nikán nu Ama. Sakay pamahalaan na hide tu pamamag-itan nu sahukod a bakal, sakay mogmugán na u bansa hide a konna tu pángmogmog tu banga. 28Sakay iyatád ko be nikuna u talang umaga a paketan tu tagumpay na.”
29Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!
اکنون انتخاب شده:
Pahayag 2: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.