Pahayag 3
3
U Sulat tu Gurupo nu Mánnampalataya hide ti Sardis
1“Nadid, Isulat mo iye tu anghel nu mánnampalataya hide ti Sardis:
Iye u pekagi nu tehhod nikuna u pitto a gawain a Ispirito nu Diyos sakay tu pitto a biton. Tukoy ko u gimet moy; tu pangileng ay biyag kam, pero i tahoday ay patay kamon. 2Lumukag kamon, sakay pabegsákkán moy u nawahak nikam a pánnampalataya moy nikán, dipo ni awan ay matuluyan dán a matay. Dipo netan ko a awan palla karapat-dapat u gimet moy hide tu pangileng nu Diyos ko. 3Kanya ngani, isipán moy u toldu hide a tinanggap moy sakay nasaneg, sunudán moy ina hide sakay pagsisiyan moy u kasalanan moy hide. Ni awan kam lumukag ay angayák hina a konna tu káddemát nu mágtakaw, awan moy matukuyan u odas nu káddemát ko. 4Konna pa man hod ay tehhod a sasangan hina ti Sardis a awan immaheg tu mágkadukás a gimet nu agum, kumán de a iningatan u badu de a malinis, kaya makaguman ko hide a nakabadu ti mapudew dipo karapat-dapat hide. 5U magtagumpay ay pabaduwan be ti mapudew, sakay awan ko ibu-ibutan u ngahan na tu libro nu biyag. Tenggiyán ko siya tu atubang nu Ama ko sakay tu anghel ko hide.
6Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!
U Sulat tu Gurupo nu Mánnampalataya hide ti Filadelfia
7Isulat mo be iye tu anghel nu gurupo nu mánnampalataya hide ti Filadelfia:
Iye u pekagi nu banal sakay u tatahoden, hod nikuna u susi oni kapangyariyan a nagsapul tu pághare ni David. Siya u maghatul ni ti deya u makasaddáp tu kahariyan na, nan awan ti makapángsiradu tu binukasan na, sakay awan ti makapangbukas tu siniraduwan na: 8Tukoy ko u gággimitán moy hide. Tukoy ko a sabadit la u kakayanan moy, pero sinunud moy u toldu ko sakay nagin matapat kam nikán. Nan binukasan ko u pintuwan a sáddáppan moy a awan mesiradu nu maskin ti deya. 9Tandaan moy! Utusan ko u gurupo ni Satanas a mágkabule sakay mapagkunware a Judio, a angay lumuhud tu atubang moy. Sakay hod de a matukuyan a hikam u mahal ko. 10Dipo sinunud moy u utus ko a magtiyaga ay ingatan takam be káddemát nu pagsubuk a dumemát tu atanan a tolay ti munduway. 11Adeniyák dán a sole. Kaya itulos-tulos moy u mágkaganda moy a gimet, tánni awan ti makapang-agew tu piremyo moy a kurona. 12U magtagumpay ay ibilang ko a tolay ko magpakahanggan a konna tu adigi tu templo nu Diyos ko dipo mágyan dán siya hod hanggan-hanggan. Isulat ko nikuna u ngahan nu Diyos ko, sakay u ngahan nu banuwan nu Diyos ko. Iye ay u bigu a Jerusalem a sumidung a gábwat tu Diyos ko ti langet. Isulat ko be nikuna u bigu ko a ngahan.
13Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!
U Sulat tu Gurupo nu Mánnampalataya hide ti Laodicea
14Isulat mo be iye tu anghel nu gurupo nu mánnampalataya hide ti Laodicea:
Iye u pekagi nu te ngahan a Amen, u matapat sakay tatahoden a tistigu, sakay siya u pinaggábwatan nu atanan a linalang nu Diyos. 15Tukoy ko u gimet moy. Kagi moy a mannampalataya kam pero awan ti patunay. Kumán kam a dinom a awan malamig pero awan be mainit. Masmaganda pa ni malamig kam dálla a lalabba oni mainit! 16Dipo maligamgam kam, awan kam mainit oni malamig ay iloktab takam! 17Dipo kagi moy a, ‘Mayaman kame sakay sagana tu atanan a bagay sakay awan kame dán ti iba a kailangan!’ Pero u awan moy tukoy ay lubu-lubus kam sakay kakagbi, mahirap a tahod, eklas, sakay buhák. 18Kaya ngani ipayo ko nikam a mamale kam nikán ti puro a ginto tánni yumaman kam. Mamale kam be nikán ti mapudew a badu tánni mabaduwan i eklas moye a bággi, sakay gamot ti mata tánni maketa kam. 19Atanan nu mahal ko ay páppasunungán sakay dáddisiplinaan ko. Kaya ngani magsikap kam; magsise kamon sakay adággen u kasalanan moy hide. 20Tandaan moy, mágtaknággák tu luwas nu pintuwan a makán toktokán. Ni deya man u mangsaneg tu boses ko sakay bukasan na u pintuwan ay sumáddáppák tu bilay na sakay mággatubang kame a kuman. 21U magtagumpay ay paetnudán ko a kasadát nu trono ko. Konna nikán a nagtagumpay, kaya nadid ay mággetnudák tu sadát nama ko tu trono na.
22Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!”
اکنون انتخاب شده:
Pahayag 3: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.