Pahayag 1
1
U Pahayag ni Jesu-Cristo a Insulat ni Juan
1Nadid, iye u libro a sássulatan nu pahayag ni Jesu-Cristo tungkul tu bagay hide a adene dán a mangyare. Iye ay kinagi nu Diyos ni Jesu-Cristo para ipatukoy na iye nikitam a tagapagserbi na. Iye ay impahayag na ni Juan tu pamamag-itan nu pinaangay na a anghel. 2Kinagi ni Juan u atanan a netan na tungkul tu impahayag nu Diyos sakay pinatunayan ni Jesu-Cristo. 3U tolay a mangbasa oni mágsaneg sakay mangtupad tu atanan a nakasuslat ti iye ay pagpalaán nu Diyos! dipo i atananan iye ay adeni dán a mangyare.
Pángngumusta tu Pitto a Gurupo nu Mánnampalataya hide
4Iye ay gábwat nikán a ti Juan:
U sulat ko a iye ay para nikam a pitto a grupo nu mánnampalataya hide ni Cristo a mamaggipun-ipun tu pitto a banuwan ti Asia.
Magkahod kam nakwa ti kapayapaan sakay págpapala a gábwat tu Diyos. Diyos tu kasalukuyan, Diyos tu nakalipas, sakay Diyos tu pademát. Sakay gábwat tu Ispirito a te pitto a gawain, a katoy tu atubang nu trono na. 5Sakay gábwat be iye ni Jesu-Cristo, u tapat a tistigu, ti bagayan iye hide, u kadipalonguwan a nabiyag a huway, sakay Hare nu atanan a hare ti munduway.
Siya ay puriyán tam, dipo tunay a mahal na kitam. Sakay pinalaya na kitam gábwat tu kákkaalipin tam tu kasalanan tam hide tu pamamag-itan nu kákkebuhus nu dige na tu kudus. 6Sinakup na kitam tu kahariyan na, para makaguman na kitam a maghare a kaguman na. Imbilang na kitam be a saserdote a magserbi tu Diyos a Ama. U kapuriyan sakay u kapangyariyan a awan ti kahád ay para la ni Cristo! Amen. 7Tandaan moy! Dumemát siya a huway a napalebutan nu diklam, sakay ketan nu atanan a tolay maski u nangpika hide ni kuna tu wahes na tu itod. Sakay u atanan a tolay ti munduway a awan sumampalataya nikuna ay magsanget dipu tu ánteng de tu págparusa na nide. Talaga a konna he u mangyare! Amen.
8Kinagi nu Panginoon a Diyos, “Hikán u Alpa sakay u Omega.”#1:8 Alpa sakay Omega: Iye u purumero a letra sakay u katapusan a letra tu alpabeto ni Griego. U Sapul sakay Katapusan nu atanan a bagay. Siya u Diyos a hoddán hina tu sapul pa, sakay katoy hanggan nadid, sakay hanggan-hanggan. Siya u Diyos a makapangyariyan tu atanan.
U Pangitain tungkul ni Cristo
9Hikán u kapatkákka moy a ti Juan tu pánnampalataya sakay kaguman moy tu pághirap sakay págtiis a danasán nu kaguman hide tu kaharian nu Diyos dipo tu pákpagkaessa tam ni Cristo. Neangayák tu puduk a Patmos dipo inpakapospos ko u upos nu Diyos sakay u tatahoden a inpahayag ni Jesus. 10Sakay mentras a heyák hod, netaun be a aldew tu itod nu pággipun-ipun para sumamba tu Pangioon Jesus, hikan ay inggiya nu Ispiritu nu Diyos sakay nasaneg ko tu áadággen ko u mabegsák a boses a kumán a tánnog ni trumpeta. 11Kinagi na a, “Isulat mo u atanan a ketan mo, sakay ipatawed mo tu pitto a grupo nu mánnampalataya hide: ti Efeso, Esmirna, Pergamo, Tiatira, Sardis, Filadelfia, sakay ti Laodicea.”
12Linumingaták tánni ketan ko ni deya u magupos, tu kállingat ko ay naketaák ti pitto a págdáttonan ti simbuwan a ginto. 13Sakay tu bállog nu simbuwan hide ay te netanák a mágtaknág a kumán a Anak nu Tolay. Nakabadu siya ti malayon a hanggan tu bulong na. Sakay tehhod a baregkás a ginto a umáabadáy tu hakaw na. 14U buuk na ay konna tu pudew nu dotdut nu tupa sakay niyebe, sakay u mata na ay kumán a apoy a maggehab. 15Magkinang-kinang u tikád na a kumán a tangso a nagdaman ti apoy sakay pinakintab. Sakay u boses na ay kumán a tánnog nu sánnad. 16Táttawed na u pitto a biton tu kawanan na a kamát sakay magluwas tu labi na u ispada a magdiliputan ti ngahab. Sakay makasile u hupa na a konna tu mainit a tanghale.
17Pákketa ko nikuna ay kumánnák a patay a nalugmuk tu atubang na. Pero intupo na nikán u kawanan na a kamát sakay kinagi na, “Dyan ka manteng! Hikán u Sapul sakay u Katapusan, 18sakay Hikán u Biyag. Natayák pero ilingán mo, biyagák nadid sakay awanák dán mata-matay maski nikan. U kamatayan sakay u páppágyanan nu patay#1:18 Ti Griego: Hades ay katoy dán tu disalad nu kapangyariyan ko. 19Kanya isulat mo u atanan a netan mo, u mangyare nadid sakay u mangyare palla tu tamuwán. 20Iye u gusto a kagiyán nu pitto a biton a netan mo a táttawed ko tu kawanan ko a kamát sakay u pitto a págtupuwan ti simbuwan a ginto: u pitto a biton ay u anghel hide nu pitto a gurupo nu mánnampalataya. Sakay u pitto be a págtupuwan ti simbuwan a ginto ay u pitto a gurupo nu mánnampalataya hide.”
اکنون انتخاب شده:
Pahayag 1: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.