Gimet 24
24
Indimanda nu Judio hide ti Pablo
1Nadid, kállipas nu limma a aldew ay dimmemát ti Cesarea u pinakapuno nu saserdote hide a ti Ananias, kaguman u sangan tu pinuno hide nu banuwan sakay essa a abugadu a u ngahan na ay ti Tertulo. Inyatubang de tu gobernador u dimanda de kontara ni Pablo.#24:1 Basaán tu Gimet 4:5-23, Tito 1:5. 2Sakay nikuna meatubang dán ti Pablo ay sinapulan dán ni Tertulo a ingkagi u reklamo na kontara ni Pablo. Kinagi na,
“Kagalang-galang a Gobernador Felix, dipo tu maganda mo a pámmalakad ay nagin payapa u bansa me, makpal pa a pagbabagu para tu kapiyyaan ni bansa miyáy. 3Maski ni hádya sakay maski nikan, tenggiyán me iye a utang a luub sakay grabi ti kadakál u pasalamat me niko. 4Tánni awan kam masiyadu a maabala, nakwa sanigán moy i kagiyán miyáy awan la mamalay. 5Dipo netan me i tolayan iye a mággaguluwán. Gágguluwán na u atanan a Judio, maski hádya siya angayan sakay siya u puno nu tolay hide a simmunud tu toldu nu essa a lállake a taga Nazaret. 6Pati u templo me ay awan na inggalang, kanya dinakáp me siya. Hatulan mi dán nakwa siya sigun tu Kautusan, 7pero dimmemát ti Lisias a puno nu sundalo hide, sakay inagew na nikame ti Pablo. 8Sakay kinagi na a ireklamo mi kan dálla niko i tolayan iye. Ni imbistigaan mo siya ay matukuyan mo u atanan nu reklamo me kontara nikuna.” 9Inayunan be nu Judio hide u atanan a kinákkagi ni Tertulo.
Inpagtanggul ni Pablo u Sadile na tu atubang ni Felix
10Sakay sininyasan nu gobernador ti Pablo a magupos kaya kinagi na,
“Kagalang-galang a gobernador, tukoy ko a nalay ka dán a Huwes ti iye a bansa, kanya masayaák a mangatuwiran ti atubang muwe. 11Awan palla ti sapulo ay ti duwwa a aldew sapul dimmemátták ti Jerusalem para sumamba. Matukuyan mo iye ni magimbistiga ka. 12Sakay awanák di palla netan a nákpagdima maskin deya tu disalad nu templo, oni naggulo tu sinagoga oni maskin hádya a parte nu banuwan. 13Awan hide ti mepeta a katibayan ti ibábbintang diye nikán. 14Pero aminán ko a sumássampalatayaák tu Diyos nu nuno me hide sigun tu intoldu ni Jesus a kákkagiyán de a liwat a rilihiyon. Pero maniwalaák be tu atanan nu nakasulat tu Kautusan ni Moises sakay tu atanan a insulat nu prupeta hide. 15Konna nide, sumampalatayaák tu Diyos a huway na a biyagán u atanan a tolay, matuwid oni awan matuwid. 16Kanya gimitán ko u atanan nu makaya ko tán awanák magkasala tu atubang nu Diyos sakay tu tolay hide.
17Sangan dán a taon a awanák ti Jerusalem; nagsoliyák para magtugán ti tulung tu kalugaran ko hide, sakay mag-alay tu Diyos. 18Ina u ginimet ko nikuna a demáttanák de tu templo natapos ku dán a gimitán tu itod u atanan a bagay para tu páglinis sigun tu Kautusan, sasangan la a tolay u kaguman ko tu itod sakay awanák nanggulo. #24:17-18 Basaán tu Gimet 21:17-28. 19Pero u hed la hod ay u sangan la hide a Judio a gábwat ti Asia. Hide nakwa u immadene niko para magreklamo kontara nikán ni tehhod hide a reklamo. 20Sakay dipo awan he hide, u tolay la hide a atoy he u magkagi nite napatunayan hide a tehhodák a nagimet a kasalanan nikuna hikán ay iyatubang de tu Sanedrin. 21U maare dila a ibintang nikán ay u impákhaw ko a konna he, ‘Imbistigaanák moy nadid dipo tu pánniwala ko a huway a mabiyag u patay hide.’”#24:21 Basaán tu Gimet 23:6.
22Dipo tukoy dán ni gobernador Felix u tungkul tu Toldu ni Jesus, kanya impeimang na u pággimbistiga. Kinagi na, “Iyatád ko u hatul ko ti kasuwan iye káddemát ni Lisias.” 23Káttapos ay inyutus na tu kapitan a bantayan ti Pablo, pero diyan de siya higpitan nan payagen dila siya a bisitaán sakay tulungan nu amigu na hide.
Nagupos ti Pablo tu atubang di Gobernador Felix ay ti Drusila
24Nadid kállipas nu sangan a aldew ay simmole ti gobernador Felix kaguman u kabanga na ati Drusila. Impadulaw na ti Pablo sakay nágsaneg siya tu kákkagiyan ni Pablo tungkul tu pánnalig ni Cristo Jesus. 25Pero nikuna ipaliwanag ni Pablo a dapat mabiyag a malinis u tolay, sakay magpugád tu sadile para awan magkasala, sakay impaliwanag nabe u tungkul tu pághatul a dumemát ay neántingan ti gobernador Felix. Kinagi na, “Maare ka dán a lumakad, ipadulaw taka dálla a huway ni tehhodák dámman a odas.” 26Pirme na a padulaw ti Pablo sakay kauhunán, dipo makán uhayan siya a pasoksukan siya ni Pablo ti pilak.
27Pero kállipas nu duwwa a taon ay pinalitan ni Porcio Festo ti Felix bilang gobernador. Dipo tu soh ni Felix a magustuwan siya nu Judio hide ay pinabayan na ti Pablo a pumáppireso.
اکنون انتخاب شده:
Gimet 24: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.
