Gimet 23
23
1Nadid, lináttángngan ni Pablo u pinuno hide, sakay kinagi na, “Kákkapatkákka ko hide, tukoy nu Diyos a natupad ko u atanan a gusto na a gimitán ko a maganda u kaluuban ko hanggan nadid a aldew.” 2Pákkakagi he ni Pablo ay inyutus nu pinakapuno a saserdote a ti Ananias tu mágtaknág hide tu adene na a dapangán siya. 3Kanya kinagi ni Pablo nikuna, “Dapangán ka nakwa nu Diyos! kumán ka a kudal a bito a pinintoran la ti mapudew, ta mapagpakunware ka! Mággetnod ka hina tán hatulanák sigun tu Kautusan, pero labag tu Kautusan u pángpadapang mo nikán.”#23:2-3 Basaán tu Gimet 7:54-58. 4Kinagi nu mágtaknág hod hide, “Awan ka ti gagalang tu pinakapuno a saserdote nu Diyos!” 5Timmábbeg ti Pablo, “Kákkapatkákka ko, awan ko tukoy a siya bál u puno a saserdote. Dipo nakasulat ngani, ‘Dyan ka magupos ti madukás kontara tu pinuno nu banuwan.’”#23:5 Basaán tu Exodo 22:28.
6Natukuyan ni Pablo a tehhod hod a Saduseo sakay Pariseo hide, kanya kinagi na ti mabegsák, “Kákkapatkákka ko hide, Pariseowák, anakák nu Pariseo hide. Naimbistigaanák nadid dipo tu pánniwala ko a mabiyag a huway u patay hide.”#23:6 Basaán tu Gimet 26:5. 7Pákkakagi he ni Pablo ay namagtalu-talo u Pariseo hide sakay u Saduseo hide, kanya nahate u katolayan. 8(Dipo u pánniwala nu Saduseo hide ay awan mabiyag a huway u patay hide sakay awan ti anghel oni ispirito, pero u Pariseo hide ay maniwala ti atananan iye.) #23:8 Mateo 22:23, Markos 12:18, Lukas 20:27. 9Kanya bimmegsák u pákhawan de. Timmaknág u sangan a Pariseo a tagapagtoldu tu Kautusan sakay impagpumilit de a awan hide umayun sakay kinagi de, “Awan kame ti ketan a kasalanan ni tolayan iye. Makay ni tehhod nikuna a nagupos a ispirito oni anghel?”#23:6-9 Basaán tu Juan 3:1, Gimet 23:6, Filipos 3:5.
10Sakay nikuna mainit dán u pamagtalu-talo de ay nanteng u puno nu sundalo hide a makay matay ti Pablo dipo pamágpáttangan nu magdilupot a grupo, kanya inutusan na u sundalo hide, sakay impaangay na ti Pablo sakay impesáddap na tu kampo.
11Ti gibi labiyan itod ay pimmeta u Panginoon ni Pablo sakay kinagi na nikuna, “Begsákkan mo isip muwe! Nagpatunay ka tungkul nikán ti Jerusalemáy; konna be hina u gimitán mo ti Roma.”
Binalak de a Bunuwán ti Pablo
12Tu kadimadimangan ay nágkasundu u Judio hide sakay nagpananto a awan kuman oni uminom mentaras awan de mabuno ti Pablo. 13Mahigit a áppat a pulo a lállake u nanumpa ti konna hod. 14Sakay immangay hide tu puno nu saserdote hide sakay tu pupuno nu banuwan, sakay kinagi de, “Nagpananto kame a awan kuman mentaras awan me mabuno ti Pablo. 15Kanya agidán moy tu Sanedrin tu pinuno nu sundalo hide a iyangay di he a huway ti Pablo. Kagiyán moy a gusto moy pa a imbistigaan ti husto u kaso na tánni tu dilan palla ay bunuwán mi dán.”
16Nadid, u balak de ay nasaneg nu pamangkin ni Pablo, anak a lállake nu wadi na a bábbey, kanya immangay siya tu kampo sakay ingkagi na ni Pablo. 17Dinulawan ni Pablo u essa tu kapitan hide sakay kinagi na, “Aguman mo ped i ulitowan iye tu pinuno moy dipo tehhod siya a gusto a kagiyán.” 18Inaguman ngani siya nu kapitan tu pinuno nu sundalo hide sakay kinagi na, “Dinulawanák nu pireso a ti Pablo sakay pinaagum na i ulitowáy a angay he, dipo tehhod kan siya a kagiyán nikam.” 19Tinawiden nu pinuno u kamát nu ulito sakay inyadeyo na sakay tinanung na, “Ánya kagiyán muwáy nikán?” kagi na. 20Timmábbeg siya, “Pinamágkaessaan nu Judio hide a agidán niko a iyatubang ti Pablo niilaw tu Sanedrin sakay magkukunware a paimbistigaan ti husto. 21Pero diyan kam maniwala, dipo tambangan siya nu mahigit a áppat a pulo a tolay a nagpananto a awan kuman oni uminom mentaras a awan de mabuno ti Pablo. Nakahanda dán hide, u disisyon mo dálla u uhayán de.” 22“Diyan mo kagiyán maskin ti deya a ingkagi mo iye nikán,” kagi nu pinuno nu sundalo hide. Sakay pinagsole na siya.
Inyangay de ti Pablo tu kán Gobernador a Felix
23U pinuno ay nangdulaw ti duwwa a kapitan sakay kinagi na nide, “Mánghanda kam ti duwwa a datos a sundalo, magkuyog kam be ti pitto a pulo a nakakabayo sakay duwwa a datos a te gayang tán angay ti Cesarea nadid a alas nuwebe ti gibi. 24Mánghanda kam be ti kabayo a págsakayan ni Pablo sakay itugán moy tu kán Gobernador Felix. Bantayan moy siya ti husto para awan ti madukás a mangyare nikuna tu dilan!” 25Sakay nagsulat u kapitan ni gobernador Felix ti konna he: 26“Kagalang-galang a gobernador Felix, kumusta ka la? Gabwat iye nikán, ti Claudio Lisias! 27Dinakáp nu Judio hide i lállakeyan iye sakay laan di dán nakwa a bunuwán. Nadid natukuyan ko a Romano bál siya, kanya nángkuyugák tu sundalo hide sakay inligtas siya. 28Sakay tu pagkagusto ko a matukuyan ni anya u kasalanan a ibábbintang de nikuna ay impeangay ko siya tu Sanedrin. 29Natukuyan ko a tungkul la tu bagay ate kaugnayan tu Kautusan de u ibábbintang di nikuna pero awan itod sapat a dahilan para ipabuno di siya oni ipepireso. 30Natukuyan ko be a planuwán siya a bunuwan nu Judio hide kanya agad ko siya a impeangay niko. Kinagi ko tu makanbintangán hide nikuna a niko dálla hide a magreklamo.”
31Sinunud be nu sundalo hide u utus nide. Tu kagibiyan ay inangay de ti Pablo sakay inyangay ti Antipatris. 32Tu kadimadimangan ay nagsole tu kampo u agum hide a sundalo pero nagwahak u nakakabayo hide para bantayan ti Pablo. 33Nikuna makademát dán hide ti Cesarea ay inyatád de u sulat tu gobernador sakay inpaubaya de ti Pablo nikuna. 34Pákkabasa na tu sulat ay tinanung nu gobernador ni taga hadya ti Pablo. Sakay nikuna matukuyan na a taga-Cilicia ay 35kinagi na, “Sanigán ko u kaso mo káddemát nu nángkaso hide niko.” Sakay pinabantay na ti Pablo tu palasyo ni Herodes.
اکنون انتخاب شده:
Gimet 23: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.
