Gimet 12
12
U Matindi a Pághirap nu Mánnampalataya hide
1Nadid, ti panahun biyan itod ay sinapulan ni hare a Herodes a páppahirapan u sangan a gurupo nu mánnampalataya hide. 2Pinaputol na u ulo ni Santiagu a ákka ni Juan tu pamamag-itan nu áttak. 3Sakay nikuna metan na a nasaya u Judio hide ay impadakáp na pa ti Pedro. (Nangyare iye tu Piyesta nu Tinapay a Awan ti Págpaalsa.) 4Sakay nikuna madakáp de siya ay impepireso na sakay pinabantay na tu áppat a gurupo nu sundalo hide ti tággi-áppat. U balak ni Herodes ay iyatubang na siya tu katolayan káttapos nu Piyesta. 5Kanya nanatile a pumáppireso ti Pedro. Pero mahigpit siya a idáddasal nu mánnampalataya hide.#12:5 Basaán tu Gimet 7:60, Roma 10:1.
Pinaluwas nu Anghel ti Pedro
6Ti gibiyan itod ay tidug ti Pedro tu sállat nu duwwa a sundalo. Pinungo de siya ti duwwa a kadena te guwardiya pa a mágbantay tu pintuwan nu págpiresuwan. Balak a iyatubang ni Herodes ti Pedro tu Judio hide tu sumunud a aldew. 7Nadid, bigla dálla a te pimmeta a anghel nu Panginoon, kaya nagdemlag ti husto u piresuwan. Kinuyág-kuyág na u wahes ni Pedro para malukag. Kinagi na, “Umikat ka, magalisto ka!” Sakay pagdaka a naokbis u kadena tu kama-kamát na. 8Sakay kinagi nikuna nu anghel, “Isulot mo badu muwe sakay ti sandalyas muwe.” Konna ngani hod u ginimet na. Kinagi pa nu anghel nikuna, “Iyalikábkáb mo i malayon muwe a badu sakay umusoseg ka nikán.” 9Ummusoseg ti Pedro tu Anghel a paluwas tu piresuwan. Pero awan na tukoy ni tatahoden u gággagamitán na. U buung-akala na ay mágtagináp la siya. 10Nalampasan de u purumero sakay u kaduwwa a guwardiya sakay nakademát hide tu pintuwan a bakal a lálluwasan a patamo tu banuwan. Kusa iye a bimmukas kanya limmuwas hide. Kállipas de tu essa dilan ay bigla dálla a nawan u anghel.#12:6-10 Basaán tu Mateo 1:20-24.
11Sakay hod la a nahiwaswasan ti Pedro a bakán bál a taginap u nangyare nikuna. Kinagi na, “Nadid ku la a natukuyan a tatahoden bál iye a atanan! Pinaangay nu Panginoon u anghel na para iligtasák na ni Herodes sakay tu atanan a áasaan nu Judio hide a gimitán de nikán.”
12Nikuna maisip na u atanan a nangyare ay immangay siya tu bilay ni Maria a ina ni Juan a ngángngahanan de a Markos Makpal hod a mánnampalataya a napisan-pisan a mágdadasalán. 13Timmoktok ti Pedro tu pintuwan sakay angay inileng nu utusan a bábbey a Roda u ngahan na ni deya u nagtoktok. 14Nabosesan na agad ti Pedro, tu saya na ay awan na dán nahawe a bukasan u pintuwan nu kudal. Nan gumággenan a pasaddáp sakay imbaheta na a mágtaknág ti Pedro tu pintuwan. 15Kinagi de nikuna, “Nagaheng ka dáwwad?” Pero ipákpagpilit na a ti Pedro u katoy tu luwas. Kanya kinagi de, “Bakay anghel itona ni Pedro!” 16Pero tulos-tulos la u págtoktok ni Pedro.
Kaya binukasan de u pintuwan. Nikuna ketan de ti Pedro ay awan hide makapaniwala. 17Pero sininyasan na hide a tumahimik, sakay kinagi na nide ni kodya siya a inluwas nu Panginoon tu piresuwan. Sakay inbilin na be a ibaheta di ni Santiago sakay tu agum hide a mánnampalataya u nangyare. Káttapos ay naghektat dán siya a angay ti iba a lugar.
18Nadid tu kadimadimangan na ay namágkagulo u guwardiya hide tu kákkawan ni Pedro. Awan de tukoy ni ánya nangyariyay nikuna. 19Pinaehyok siya ni Herodes pero awan de siya netan. Kanya inpaimbistiga na u guwardiya hide sakay impabuno na hide.
Sakay káttapos, ay limmakad ti Herodes ti Judea sakay immangay ti Cesarea sakay he dán hod a nágyan.
U Kákkatay ni Herodes
20Nadid, nalay dán a maiyamut ti hare a Herodes tu tolay hide ti Tiro sakay ti Sidon. Kanya namágkaessaan nu tolay hide a umadene nikuna. U ginimet de ay inamigu de ti Blasto a mayordomo nu hare a aguman na hide para mákpag-ayus ni Herodes, dipo gábwat tu banuwan nu hare u pagalapan de ti makan. 21Nikuna aldew dán nu pákpágguhon ni Herodes tu taga-Tiro hide sakay tu taga-Sidon hide ay insulot na u damit na a panghare sakay nággetnod tu trono sakay nagupos.#12:21 Basaán tu Juan 19:2-3, 1 Timoteo 2:9-10. 22Sakay pimmakhaw u tolay hide, “Essa a diyos i magupuse, bakán a tolay!” 23Ti odas biyan itod ay pinagkasakit siya nu anghel nu Panginoon, dipo inangkin na u kapuriyan a para tu Diyos; inuhád siya hanggan a natay. #12:23 Basaán tu Lukas 2:9-14, Hebreo 1:14.
24Pero u Upos nu Diyos ay kimmalat sakay nágkakakáppal u mánnampalataya hide.
25Sakay di Bernabe ay ti Saulo ay limmakad dán ti Jerusalem káttapos de a netugán u tulung de hide tu mánnampalataya hide ti Jerusalem. Kinuyog di be ti Juan a ngángngahanan de a Markos.
اکنون انتخاب شده:
Gimet 12: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.
