Gimet 11
11
U Paliwanag ni Pedro tu Págbawtismo na tu Banal a Ispirito
1Nadid, nabaheta nu apostol hide sakay nu mánnampalataya hide ti buo Judea a naniwala be u Hentil hide tu upos nu Diyos. 2Kanya nikuna immangay ti Pedro ti Jerusalem, ay binaháng siya nu mánnampalataya hide a Judio a nature.
3Kinagi de, “Bakin náktulos ka tu bakán hide a ture a Hentil, sakay nákkan ka pa nide?” 4Kanya inpaliwanag nide ni Pedro u atanan a nangyare.
5Kinagi na, “Nikuna hedák ti Joppa a magdasal ay naketaák ti pangitain. Netan ko u kumán a ulás a tummonton tu atubang ko a gábwat ti langet; sakay bumábbátten tu áppat a suluk. 6Pinakamalas ko itod sakay netan ko hod u atanan a kalase ni hayup: u maglakad hide, u magahakas hide, pate u mágkailam hide a hayup sakay tu magegbáh hide. 7Sakay nasaneg ko u boses a nagkagi nikán, ‘Tumaknág ka Pedro, magbuno ka dán sakay kuman!’ 8Pero kinagi ko, ‘Umád ko Panginoon! Dipo maski nikan ay awanák padla kikimman tu ánya man a bagay a nebilang a madangát oni awan karapat-dapat.’ 9Pero nasaneg ko a huway u boses a gábwat ti langet kinagi na, ‘Diyan mo ituring a madangát u bagay hide a imbilang nu Diyos a malinis!’ 10Pumentállo iye a nangyare sakay káttapos ay nabatak dán a huway a patamu't langet u ulás. 11Ti itod be a odas ay dimmemát tu tinulusan ko u tállo a lállake a manguwet nikán a gábwat ti Cesarea. 12Sakay kinagi nikán nu Banal a Ispirito a diyanák magalangan a mákkuyog nide. Nákkuyog be nikán u ánnám a mánnampalataya nikuna immangay kame tu bilay ni Cornelio. 13Káddemát mi hod ay inyistorya nikame ni Cornelio a naketa siya ti anghel a mágtaknág tu disalad nu bilay na, sakay kinagi na nikuna, ‘Ipauwet mo ti Simon a ngángngahanan de a Pedro ti Joppa. 14Kagiyán na niko ni kodya ka a maligtas sakay u kasabilay mo hide.’ 15Magsapulák padla a magupos ay dimmibbe dán nide u Banal a Ispirito konna tu káddibbe na nikitam tu itod. 16Sakay naisip ko u kinagi nu Panginoon, ‘Ti Juan ay nagbawtismo ti dinom, pero bawtismuwan kam nu Banal a Ispirito.’ 17Ni inatádden hide nu Diyos ti kaloob a konna tu inyatád na nikitam nikuna maniwala kitam tu Panginoon a ti Jesu-Cristo, deyaák para humadlang tu Diyos?”#11:4-17 Basaán tu Gimet 10:1-48. 18Nikuna masaneg di iye ay awan dán hide nagbaháng nan nagpure hide tu Diyos, kinagi de “Ni konna hod ay inatádden be nu Diyos u Hentil hide ti pagkakataun a magsise tu kasalanan de sakay magbagu tánni maligtas.”#11:18 Basaán tu Gimet 3:19-20, 2 Corinto 7:10.
U Mánnampalataya hide ti Antioquia
19Nadid, u mánnampalataya hide ay minawatak-watak dipo tu págpahirap nide sapul nikuna mabuno ti Esteban. Te nakademát ti Fenicia, ti Chipre hanggan ti Antioquia. Maskin hadya demáttán diyay ay ipáppangaral de u Maganda a Baheta pero tu Judio la hide.#11:19 Basaán tu Gimet 8:4. 20Pero u iba tu mánnampalatay hide a taga-Chipre sakay taga-Cirene, a immangay ti Antioquia sakay nangaral be tu Griego hide tu Maganda Baheta tungkul tu Panginoon a ti Jesu-Cristo. 21U kapangyariyan nu Panginoon ay katoy nide sakay makpal a naniwala sakay nanalig tu Panginoon.#11:21 Basaán tu Juan 10:28-29.
22Nabaheta iye nu mánnampalataya hide ti Jerusalem, kanya pinaangay de ti Antioquia ti Bernabe. 23Nikuna dumemát hod sakay netan na u págpapala nu Diyos nide ay nasaya siya sakay pinayuwan na hide a atanan a manatile hide a tapat tu Panginoon. 24Mabait a tolay ti Bernabe, sakay u Banal a Ispirito u giyya na tu biyag na sakay matibay u pánnampalataya na kanya makpal pa u tolay a naakit tu Panginoon.#11:24 Basaán tu Lukas 4:1, Gimet 7:55, Efeso 5:18.
25Kanya immangay ti Bernabe ti Tarso para ehyukán na ti Saulo. 26Sakay nikuna netan na dán siya ay kinuyog na ti Antioquia. Tu buo a sa taon ay nágyan hide hod a kakaguman nu mánnampalataya hod hide sakay nangaral tu makpal a tolay. Ti Antioquia u kadipalonguwan a lugar a nangahanan a Cristiyano u mánnampalataya hide.
27Nadid ti panahunan itod ay te dimmemát a sangan a prupeta hide ti Antioquia a gábwat ti Jerusalem. 28Timmaknág u essa nide, u ngahan na ay ti Agabo. Tu pamamag-itan nu Banal a Ispirito ay nagpahayag siya a te dumemát a matindi a sák-aláp ti munduwáy. (Nangyare iye tu kapanahunan ni Emperador a Claudio.)#11:28 Basaán tu Mateo 2:1-18, Gimet 21:10-27. 29Kanya nagplano u disepulus hide a magpatawed ti tulung tu mánnampalataya hide a mámmágyan ti Judea, ayun tu makaya nu bawat essa. 30Konna ngane hod u ginimet de, inpatawed de u tulung de tu pinuno de hide ti pánnampalataya tu pamamag-itan di Bernabe sakay ti Saulo.#11:30 Basaán tu Gimet 20:17-35, Tito 1:5.
اکنون انتخاب شده:
Gimet 11: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.
