Gimet 13
13
U Kállakad di Bernabe ay ti Saulo
1Nadid, u mannampalataya hide ti Antioquia ay tehhod a sangan a magpahayag tu Maganda a Baheta sakay tehhod be a sangan a magtoldu tu mánnampalataya hide. Kaguman he di Bernabe, ti Simon a nginahanan de a Negro, sakay ti Lucio a taga-Cirene, ti Manaen (a kaguman ni gubernador a Herodes nikuna anak palla hide a duwwa) sakay ti Saulo. 2Essa aldew mentaras a magkulasyon sakay magpure hide tu Panginoon, kinagi nu Banal a Ispirito nide, “Ibukod moy di Bernabe sakay ti Saulo. Tehhodák a inlaan a tarabaho para nide.” 3Káttapos de a magkulasyon sakay magdasal ay intupo de tu duwwa u kamát de sakay pinaghektat di dán hide.#13:2-3 Basaán tu Mateo 24:14, Gimet 1:8, Markos 1:14.
U Pángngaral di Bernabe sakay ti Saulo ti Chipre
4Nadid, inyutus nu Banal a Ispirito di Bernabe ay ti Saulo a umangay ti Seleucia. Sapul hod ay nággabeng hide tu dakal a abeng a paangay ti Chipre a dakál a puduk. 5Nikuna dummemát hide ti Salamina ay inpangaral de u Upos nu Diyos tu sinagoga nu Judio hide. Sakay kakaguman di ti Juan, a ngángngahanan di a Markos a timmulung nide.
6Nikuna nalebut de u buo a puduk hanggan tu siyudad a Pafos ay nesapulan di hod u essa a mággalbularyo a Judio a magkukunware a prupeta. Bar-Jesus u ngahan na. 7Kaguman siya ni Sergio Paulo a gubernador, essa a malalake a tolay. Impadulaw nu Gobernador di Bernabe ay ti Saulo dipo gusto na a masaneg u Upos nu Diyos. 8Pero sinaway hide nu mággalbularyo a ti Elimas (iye u ngahan na tu upos a Griego) tánni awan sumampalataya u gubernador. 9Pero ti Saulo a ngángngahanan di labe a Pablo, ay putat tu kapangyariyan nu Banal a Ispirito. Lináttángngan na ti Elimas,#13:9 Basaán tu Juan 1:42, Pahayag 3:12. 10sakay kinagi na, “Hiko! Anak ka nu diyablo! Kadima mo u atanan a bagay a tama! Katoy niko atanan a kakabuliyan sakay págdaya! Bakin pirme mo a baliktadan u tatahoden tungkul tu Panginoon?#13:10 Basaán tu Oseas 14:9. 11Kaya maparusaan ka nadid! Mabuhák ka hanggan tu aldew a intakda nu Diyos!” Kaya pagdaka a nabate ni Elimas a kumán a tinakáppan ti mangitet a diklam u mata na sakay nagkapa-kapa siya ti mangantabay nikuna. 12Summampalataya u gubernador nikuna netan na u nangyare sakay minagtaka siya tu intoldu di Bernabe tungkul tu Panginoon.
Ti Antioquia a Banuwan ti Pisidia
13Nadid, limmakad di Pablo sakay tu kaguman na hide ti Pafos, sakay bimmiyahe hide a paangay ti Perga a sakup ni Panfilia. Kaddemat di hod ay himmiwalay nide ti Juan, a ngángngahanan a Markos, sakay nagsole ti Jerusalem. 14Pero di Pablo ay nagtulos-tulos ti Antioquia a sakup ni Pisidia. Sakay tu Aldew nu Káimang ay immangay hide tu sinagoga nu Judio hide sakay nággetnod. 15Káttapos a mabasa u sangan a parte nu libro nu Kautusan sakay tu prupeta hide, ay kinagi nide nu puno hide nu sinagoga, “Kákkapatkákka ko hide, ni tehhod kam a makagi a makapagpabegsak tu tolay hide ay kagiyán moy dán!” 16Kanya timmaknág ti Pablo sakay sininyasan na hide a tumahimik.
“Hikam a Israelita hide sakay tolay hide a tehhod a ánteng tu Diyos, magsaneg kam! 17U Diyos nu bansa tam a Israel u nangpile tu ninuno tam hide. Pinakakpal na hide ti husto mentaras a mámmágyan hide ti Egipto. Inluwas na hod hide tu pamamag-itan nu kapangyariyan na. 18Nagtiisan na hide a inalagaan ti áppat a pulo a taon nikuna a katoy hide tu parang.#13:18 Basaán tu Deuteronomio 1:31. 19Sakay káttapos na a sidaan u pitto a bansa ti Canaan, ay inyatád na nide u lugar de bilang mana,#13:17-19 Basaán tu Juan 6:31-32, Gimet 7:36-41, 1 Corinto 10:1-5. 20tu luub nu halus áppat a datos sakay limmapulo a taon.
Sakay káttapos ay inatádden na hide ti huwes a magin puno de hanggan ni prupeta a Samuel. 21Nikuna nangaged hide ti hare ay inatádden hide nu Diyos ti essa a lállake a gábwat tu lahe ni Benjamin, ti Saulo a anak ni Cis. Naghare ti Saulo ti áppat a pulo a taon.#13:21 1 Samuel 8:5; 10:2. 22Sakay nikuna ibutan siya nu Diyos tu katungkulan na ay inpalit na ti David para magin hare. Sakay konna he u kinagi nu Diyos tungkul nikuna, ‘Netan ko ni David a anak ni Jesse u atanan a gusto ko, dipo tukoy ko a nakahanda siya a sumunud tu atanan a iyutus ko!’ #13:22 Basaán tu Gimet 7:45-46. 23Gábwat tu lahe ni lállakeyan iye u inpananto nu Diyos tu lahe hide ni Israel a Tagapagligtas. 24Bago siya dummemát ay impangaral ni Juan tu buo a Israel a dapat hide a magsise tu kasalanan de hide sakay magpabawtismo.#13:24 Basaán tu Markos 1:1-4. 25Sakay nikuna adene dán a matapos ti Juan tu gimet na ay kinagi na tu tolay hide, ‘Ti deyaák beman tu palagay moy? Bakán a hikán u Cristo. Pero dumemát siya a kasunud ko. Sakay awanák karapat-dapat maskin tagaibut tu sandalyas na.’”#13:25 Basaán tu Juan 1:20, Mateo 3:11, Markos 1:7, Lukas 3:16.
26Kinagi pa ni Pablo, “Kákkapatkákka ko hide a gábwat tu lahe ni Abraham, sakay hikam a Hentil a tehhod a anteng tu Diyos. Sanigánnák moy, hikitam u nángpatawidan nu Diyos tu Maganda a Baheta tungkul tu kaligtasan.#13:26 Basaán tu Roma 9:3-4, Santiagu 2:15. 27Awan tinengge nu taga-Jerusalem hide sakay u puno de hide a ti Cristo u Tagapagligtas. Maski u Kasulatan a hula nu prupeta hide a bábbasaán de kada Aldew nu Káimang nu Judio hide ay awan de naintendiyan. Hide pa u nángpatupad ti hulaan itod nikuna hatulan de ti kamatayan ti Jesus.#13:27 Basaán tu Lukas 4:16-19, Gimet 15:21. 28Maskin awan hide ti katibayan para hatulan siya ti kamatayan ay inaged de ni Pilato a ipabuno siya. 29Sakay nikuna matupad di dán u atanan nu nakasulat tungkul nikuna ay inyogsad di siya tu kudus sakay inlábbáng. 30Pero biniyag siya a huway nu Diyos. 31Makpal a aldew a pimmeta siya tu nákkuyoyog hide nikuna ti Jerusalem a gábwat ti Galilea. Nadid, hide dán u mangpatunay tungkul nikuna. 32Katoy kami he para ibaheta nikam u Maganda a Baheta. Iye u pananto nu Diyos tu nuno tam hide. 33Tinupad na dán itod nadid tu pangbiyag na a huway ni Jesus. Konna tu nakasulat tu libro nu Kansiyon:
‘Hiko u Anak ko,
Sakay nadid hikán dán u Ama mo.’#13:33 Basaán tu Awit 2:7.
34Tungkul tu kákkabiyag na a huway sakay tu awan kákkahunot nu bággi na ay konna he u kinagi nu Diyos,
‘Tatahoden a pagpalaán taka a konna tu inpananto ko ni David.’#13:34: Basaán tu Isaias 55:3.
35Sakay kinagi na pa tu agum a bahagi nu libro nu Kansiyon a,
‘Awan mo pabayan a mahunot u bággi nu banal mo a Tagapagserbi.’#13:35 Basaán tu Awit 16:10.
36Nikuna masunud dán ni David u atanan a kagustuwan nu Diyos ay natay siya sakay nelábbáng a kaguman nu ninunu na hide sakay nahunot. 37Pero ti Jesus a biniyag a huway nu Diyos ay awan dimmanas ti kákkahunot.#13:30-37 Basaán tu Gimet 2:24-32, 1 Corinto 15:1-20. 38Dapat moy a matukuyan kákkapatkákka ko hide a tu pamamag-itan ni Jesus ay napatawad dán u kasalanan tam. 39Sakay u atanan nu summampalataya hide nikuna ay napatawad dán tu atanan nu kasalanan de a awan mapatawad maski tu págsunud tu Kautusan hide ni Moises.#13:39 Basaán tu Mateo 3:15, Roma 8:2-4, Galacia 3:10. 40Kanya magingat kam tánni awan mangyare nikam u kinagi nu prupeta hide,
41‘Hikam a makán upusán ti mágkadukás kontara tu Diyos,
Magtaka kam sakay mepahamak!
Dipo gimitán ko tu kapanahunan moy
u essa bagay a awan moy mapaniwalaan
maskin ipakapospos di nikam!’”
42Nikuna paluwas dán di Pablo sakay ti Bernabe tu sinagoga, nákkekagbi u tolay hide a mangaral hide a huway tungkul ti iye hide a bagay tu sumunud a Aldew nu Káimang. 43Káttapos nu pamággipun-ipun ay immunonod di Pablo sakay ti Bernabe u mákpal a Judio sakay u bakán hide a Judio a nák-agum tu rilihiyon nu Judio hide. Kinauhon hide nu apostol hide sakay pinayuwan a itulos-tulos di la a magtiwala tu kabaitan nu Diyos.#13:43 Basaán tu Roma 8:32, Efeso 2:8.
44Tu sumunud a Aldew nu Káimang ay ngahe-ngahe a atanan nu tolay tu banuwan ay namágpisan-pisan tánni mágsaneg tu Upos nu Diyos. 45Pero nikuna ketan nu Judio hide u tuna't káppal a tolay ay nagsállap hide, kaya kinontara de u kákkagiyan ni Pablo sakay impasanike de siya. 46Pero tunay ti begsák u isip di Pablo sakay ti Bernabe a nagupos, “Dapatay ay hikam pa u purumero me a pángpakapospusan tu Upos nu Diyos. Pero dipo awan moy tinanggap iye, impeta moy a awan kam karapat-dapat tu biyag a awan ti kahád, kanya angay kame dálla mangaral tu bakán hide a Judio. 47Dipo sa iye u inyutus nikame nu Panginoon,
‘Indátton taka a magin demlag nu Hentil hide
Tánni mebaheta mo u kaligtasan hanggan tu kaontok-ontukan ni munduway.’”#13:47 Basaán tu Isaias 49:6.
48Nikuna nasaneg iye nu hentil hide ay tunay u saya de sakay nagpure hide tu Panginoon dipo tu upos na. Sakay atanan a pinile nu Panginoon a magkahod ti biyag a awan ti kahád ay summampalataya.#13:44-48 Basaán tu Gimet 10:34-35, Gimet 15:1-21.
49Kanya kimmalat u Upos nu Panginoon ti lugaran itod. 50Pero sinulsulan nu Judio hide u bábbey hide a igággalang, sakay u lállake hide a pinuno tu banuwan a kalabanán di Pablo sakay ti Bernabe tánni mapalakad di hide ti banuwanan itod. 51Kanya impagpag nu duwwa u alikabuk tu tikád de ti itod a banuwan bilang tanda a awan dán hide ti pananagutan nide, sakay immangay hide ti Iconio. 52U disepulus hide ti Antioquia ay tunay ti saya sakay naputat hide tu Banal a Ispirito.
اکنون انتخاب شده:
Gimet 13: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.
