Gimet 10
10
U Pangitain ni Pedro
1Nadid, tehhod a essa a lállake a taga-Cesarea, u ngahan na ay ti Cornelio. Kapitan siya nu sundalo hide a Romano, a dáddulawan de a “Batalyon nu Italyano.” 2Tehhod siya a ánteng tu Diyos, pati u buo na a pamilya. Palagi siya a mangatád ti tulung tu Judio hide, sakay pirme a magdasal tu Diyos. 3Nikuna magala-alas tres dán ti apon ay netan na tu pangitain u essa a anghel nu Diyos a simmáddáp tu bilay na sakay kinagi na, “Cornelio!” 4Ináeleng na siya sakay grabi u ánteng na a tummábbeg, “Ánya itod, Panginoon?” Tummábbeg u anghel, “Sinaneg nu Diyos u dasal mo hide sakay nasaya siya niko tu káttulung mo tu mágkahirap hide. 5Sakay nadid ay mangutus ka ti sangan a lállake a angay tu banuwan nu Joppa. Sakay paangay mo ti Simon a ngángngahanan de a Pedro. 6Náktulos siya tu bilay ni Simon a máglinis ti koblet ni hayup para gimitán a gagamit. U bilay na ay adene tu diget.” 7Nikuna nakalakad dán u anghel ay dinulawan ni Cornelio u duwwa tu utusan na hide sakay u essa a sadile na sundalo a maki Diyos. 8Sakay inyistorya na nide u atanan a nangyare, sakay pinaangay na hide tu siyudad a Joppa.
9Tu sumunud a aldew ay adene dán tu siyudad a Joppa u inutusan hide ni Cornelio. Ti Pedro ay simmangkay tu bubungan nu bilay para magdasal. Magtatanghali dán hod, #10:9 U bilay de tu itod ay pantay u bubungan na, sakay ni agum ay he hod hide umimang, para magdasal, 10kanya tunay dán u alap na sakay gusto na dán a kuman. Pero tu alay de a mangpospos tu pangaldew de ay naketa siya ti pangitain. 11Netan na u langet a nabukasan sakay tehhod a malabang a kumán a ulás a netostos sakay umáegut tu áppat a suluk. 12Ti ulássán itod ay katoy hod u atanan a klase ni hayup: u maglakad hide, u magahakas hide tu luta, sakay u magegbáh hide. 13Sakay tehhod siya a nasaneg a boses a nagupos, “Tumaknág ka Pedro, magbuno ka dán sakay kuman.” 14Pero timmábbeg ti Pedro, “Awan ko itona magimet, Panginoon! Dipo maskin nikan ay awanák kimman tu ánya man a bagay a inbilang a madangát sakay awan karapat-dapat.” 15Nasaneg na huway u boses a nagupos nikuna, “Diyan mo ibilang a madangát u bagay hide a inbilang dán nu Diyos a malinis.” 16Pumentállo iye a nangyare sakay káttapos ay nagpaontok dán u ulás a tamo ti langet.#10:1-16 Basaán tu Mateo 14:23, Gimet 9:11-12, 2 Corinto 12:7-9.
17Nadid mentaras a áisipán padla ni Pedro ni ánya u gusto a kagiyán ni pangitainan itod ay dimmemát be u inutusan hide ni Cornelio. Sakay hide ay naguhay tu sássáddáppan nu bilay, 18Intanung de ni he hod a náktulos ti Simon a ngángngahanan de a Pedro.#10:18 Basaán tu Gimet 18:9. 19Aisipán padla ni Pedro u gusto a kagiyán nu pangitain nikuna kagiyan siya nu Banal a Ispirito, “Te tállo a lállake a magehyok niko. 20Umogsad ka dán sakay dyan ka magalangan a mákkuyog nide dipo hikán u nangutus nide.” 21Kanya immogsad ti Pedro sakay kinagi na tu tolay hide, “Hikán u áehyukán moy. Ánya u kailangan moy nikán?” 22Kanya kinagi de, “Pinaangay kame he nu kapitan nu sundalo hide a ti Cornelio. Mabait siya a tolay sakay te ánteng tu Diyos, igággalang siya nu atanan a Judio. Kinagi nikuna nu anghel nu Diyos a paangay na ka sakay sanigán na u kagiyán mo.” 23Pinatulos hide ni Pedro sakay hod na dán hide a pinatidug ti gibiyan itod.
Tu kadimadimangan ay nákkuyog siya nide, sakay kaguman u sangan a mánnampalataya a taga-Joppa. 24Maghapun hide a naglakad bagu hide a nakademát ti Cesarea. Maguhay dán nide ti Cornelio, pate u kákkapatkákka na hide a inakit na sakay tu matalik na hide a Amigu. 25Káddemát ni Pedro ay tinagbu siya ni Cornelio sakay limmuhud tu atubang na a simmamba. 26Pero kinagi ni Pedro, “Tumaknág ka. Tolayák labe a kapareho mo.” 27Mentaras a pasáddáp hide tu bilay ay mágguhon hide. Netan ni Pedro a makpal a tolay a napisan hod. 28Kinagi na, “Tukoy moy a bawal tu relihiyon me a Judio u mákpisan oni bumisita tu bakán a Judio; pero inpeta nikán nu Diyos a maskin deya man ay dyan ko ituring a madangát oni awan karapat-dapat. 29Kanya nikuna pinauwiták moy ay awanák nagitamad a nákkuyog. Gusto ko matukuyan ni bakin impaangayák moy.”
30Kinagi ni Cornelio, “Áppat dán a aldew u nakalipas tu konna labe he a odas, nagdasalák ti bilay miyáy nikuna bigla timmaknág tu atubang ko u essa a lállake a magdemlag u damit na. 31Kinagi na, ‘Cornelio, sinaneg nu Diyos u dasal mo hide sakay kinasayaan na u págtulung mo tu mágkahirap hide. 32Ipaangay mo ti Simon tu banuwan a Joppa, u ngángngahanan di labe a Pedro. Náktulos siya tu bilay ni Simon a máglinis ti koblet ni hayup a gimitán a gagamit, adene tu diget u bilay na.’ 33Kanya pagdaka taka a impauwet; makpal a salamat ta nakaangay ka he. Nadid ay napisan kame para sanigán u ipekagi nu Panginoon.”
U Kinagi ni Pedro
34Kanya kinagi ni Pedro, “Nadid ko a natukuyan a pare-pareho u pangileng nikitam nu Diyos. 35Nasaya siya tu tolay a te ánteng nikuna sakay u maggimet ti tama, maskin ánya a ka lahe. #10:34-35 Basaán tu Gimet 13:44-48. 36Nadid inpakapospos nu Diyos tu Israelita hide u Maganda a Baheta tungkul tu pákpágkasundu tu pamamag-itan ni Jesu-Cristo, u Panginoon nu atanan! 37U Maganda a Baheta ay nepangaral tu buo a Judea, sapul ti Galilea káttapos a mepangaral ni Juan u tungkul tu bawtismo. 38Tukoy moy ti Jesus a taga-Nazaret, siya u nángkaluuban nu Diyos tu Banal a Ispirito sakay kapangyariyan bilang patunay a siya u napile. Katoy nikuna u Diyos kanya maski hádya i angayan naay ay maggimet siya ti maganda sakay palayaán na u páppahirapan hide nu diyablo.#10:38 Basaán tu Gimet 4:26-27, Gimet 17:3. 39Hikame u mangpatunay tu atanan a ginággimet na tu lugar nu Judio hide sakay ti Jerusalem. Binuno de siya, sakay nepako tu kudus. 40Pero biniyag siya nu Diyos tu katállo a aldew sakay pimmeta siya, 41bakán a tu atanan a tolay nan nikame la a pinile nu Diyos bilang patunay. Hikame u kaguman na a kimman sakay umminom nikuna nabiyag siya a huway.#10:39-41 Basaán tu Gimet 3:15, Hebreo 12:1. 42Sakay inutusan na kame a mangaral tu tolay hide, sakay mángpatunay a siya u inlaan nu Diyos a magin tagapaghatul tu biyag hide sakay tu nágkatay dán hide.#10:42 Basaán tu Mateo 24:30, Juan 5:26-29, 1 Corinto 15:23-25. 43Siya u kákkagiyán nu prupeta hide nikuna ipahayag de a, ‘Ni deya man u maniwala nikuna ay patawadán na u kasalanan de tu pamamagitan nu ngahan na.’”#10:43 Basaán tu Gimet 3:19, 1 Juan 1:9.
44Pasiyaan padla a magupos ti Pedro, nikuna dimmibbi u Banal a Ispirito tu tolay hide a mágsaneg tu Maganda a Baheta. 45Nagtaka u mánnampalataya hide a Judio a kaguman ni Pedro, dipo nepagkaluub be tu bakán hide a Judio u Banal a Ispirito. 46Natukuyan de iye dipo nasaneg de a nagupos tu iba-iba a upos sakay nagpure tu Diyos u Hentil hide. Kanya kinagi ni Pedro, 47“Tehhod pa beman a makahadlang para bawtismuwan hide tu dinom? Konna labe hide nikitam a napagkaluuben ti Banal a Ispirito.” 48Sakay inyutus na a bawtismuwan hide tu ngahan ni Jesu-Cristo. Sakay impákpágguhon de ni Pedro a mákpágyan pala hod ti sangan a aldew.#10:48 Basaán tu Mateo 3:11, Gimet 8:12-17, Gimet 19:1-6.
اکنون انتخاب شده:
Gimet 10: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.
