मत्ति 26
26
इसुहेङ सेअ्लि भोका
(मरकुस १४:१-२; लुका २२:१-२; युहन्ना ११:४५-५३)
1इसु इदोइ गोताङ काथा दोअ्लि दोकान्हुअ्सो ताइको चात्यागेलाइहेङ दोअ्हि, 2“नेलाइ गिसुखेना, एलाको न्हेनिन्हुअ्सो लाअ्पिका पारबा ल्वाङ, कालाउ का द्याङको चान कुरुसता टाङगाइन्हालि रिमनिङचाङका।”#दामालाअ्का १२:१-२७
3कालाउ काइयाफा मिङ हिका बारका धामिको महलता मुल धामिगेलाइ रो आगुवागेलाइ जोम्हि। 4कालाउ एम्बालाइ इसुहेङ हेसापा रिम्लि रो सेअ्लि दोअ्तेङ साल्हा पाहि 5रो एम्बालाइ दोअ्हि, “पारबाको पहरता माको। माकुनुते द्याङगेलाइता खाइला बाइला ज्यावा।”
इसुको पुरिङता आतर हुपिका
(मरकुस १४:३-९; युहन्ना १२:१-८)
6इसु बेथानिया देराको सिमोन दोअ्का द्याङको साअ्ता हानिहि। जाइ लाम्फा रोग्याखोअ्का हिघाहि। 7इन्ता वा चालि योम्लाउ एअ्मि बेबाल एलोङ सिसिता जाङका आतर चुमातेङ इसुकोता लोहि रो वाको पुसिङता गोताङ आतर हुपिहि।#लुका ७:३७-३८ 8इदोइ तिङतेङ चात्यागेलाइ चेरताम्पातेङ एसा दोअ्हि, “हाइको भाअ्सिङ इदोइझोको आतर माअ्पान्हा? 9भुरुङ इदोइ आतर हेन्जा दामता पिअ्तेङ इङको टाका मान्थुकालाइहेङ पिलि दोधाङ।”
10कालाउबुङ इसु इदोइ गोताङ काथा गितेङ एम्बालाइहेङ दोअ्हि, “नेलाइ इदोइ बेबालहेङ हाइपालि तु:पिसुखेना? याते काङको भाअ्सिङ एलोङ रेम्का काम पाका हि। 11हाइपानु मान्थुकालाइ नेलाइदोफा दिनाङ हिखे। कालाउबुङ का नेलाइदोफा दिनाङ माह्याङका।#न्याम १५:११ 12इङको इदोइ आतर काङको जिउता हुपितेङ लिअ्लिको भाअ्सिङ कासेहेङ त्यार पाका हि। 13जातिङको, का नेलाइहेङ दोअ्खा, दुनियाता जेता इदोइ रेम्काबानाल हिम्पावा, इन्ता या बेबालको पाका इदोइ काम बुङ वाको फोमको भाअ्सिङ पान्हावा।”
इसुहेङ रिम्पालि यहुदा त्यार जेङका
(मरकुस १४:१०-११; लुका २२:३-६)
14कालाउ तेन्हेमि चात्यागेलाइता एअ्मि यहुदा इस्करियोत दोअ्काचाहिँ मुल धामिकोता हानिहि 15रो दोअ्हि, “का वासेहेङ नेलाइको खुरता रिम्पापिनु, कासेहेङ हाइ पिस्वाना?” एम्बालाइ इङकोहेङ रुपाको एअ्कुरिते टाका पिहि।#जकरिया ११:१२ 16इङकोङ पहरसो यहुदा इस्करियोत इसुहेङ रिम्पापिलि दाउ भोलि तेङहि।
आखिरि भतेर
(मरकुस १४:१२-२६; लुका २२:७-२३; युहन्ना १३:२१-३०; १ कोरिन्थि ११:२३-२५)
17एला साउरि मामिसालाइका तोलेको पारबाको लाङ दिना चात्यागेलाइ इसुकोता लोतेङ दोअ्हि, “नाङको भाअ्सिङ लाअ्पिका पारबाको भतेर चाका थामे हिता त्यार पाङ?” 18वा एम्बालाइहेङ दोअ्हि, “पुरता एअ्मि द्याङकोता हानिसु रो वासेहेङ दोअ्सु, ‘मास्टर दोअ्काहि, काङको पहर भेरपा लोका हि। का ताइको चात्यागेलाइदोफा नाङको साअ्ता लाअ्पिका पारबा मान्याङका।’” 19कालाउ इसुको दोअ्का भाइपा चात्यागेलाइ पाहि रो एम्बालाइ लाअ्पिका पारबाको आनेमाने मिलिपाहि।
20दिलिमा जेङकान्हुअ्सो इसु तेन्हे चात्यागेलाइदोफा चालि योम्हि। 21ओबालाइ चाकाताङपाका पहरता वा दोअ्हि, “जातिङको, का नेलाइहेङ दोअ्खा, नेलाइता एअ्मि कासेहेङ रिपाप्यावा।” 22इदोइ काथा हिङतेङ चात्यागेलाइ हेन्जाङ मन तुपातेङ झाराङ वासेहेङ हिअ्लि तेङहि, “प्रभु, हाइ इङको का हिघा?” 23कालाउ इसु एम्बालाइहेङ दोअ्हि, “जाइ कादोफाङ थालिता तोले चोभेरका हि, इङको कासेहेङ रिमपाप्यावा।#ले ४१:९ 24का द्याङको चान ते काङको बारेता धरमकिताबता लेखिकाभाइपा हानिलिदोङ गोयाङ। कालाउबुङ धिकार इङको द्याङहेङ, जाइसो का द्याङको चान रिमन्हाङका। इङको द्याङते भुरुङ जोलोम माजेङका हिनु दोङ इङकोको भाअ्सिङ रेम्का जेङधाङ।” 25कालाउ वासेहेङ रिम्पापिका यहुदा इस्करियोत हिअ्हि, “मास्टर, हाइ इङको का?” इसु इङकोहेङ दोअ्हि, “ना ताइमिदोङ दोअ्दोङखेना।”
26एम्बालाइ भतेर चाकाताङ पालाउ इसु तोले र्हुहि, च्याबास पिकान्हुअ्सो वा इङको पेङहि, चात्यागेलाइहेङ पिहि रो दोअ्हि, “र्हुसु, चासु, इदोइ काङको जिउ।”
27कालाउ बाति र्हुतेङ सहसाम्पा पितेङ वा एम्बालाइहेङ एसा दोअ्तेङ पिहि, “नेलाइ झाराङ इदोइसो आम्सु। 28हाइदोनु इदोइ नावा केराको काङको हिति, जाइ हेन्जाङको पापको दुस माअ्पालिको भाअ्सिङ झोपावा।#दामालाअ्का २४:८; यरमिया ३१:३१-३४ 29कालाउबुङ का नेलाइहेङ दोअ्खा, आङगुरको निघार का कालाउथिकापा माआमाङका, जेलाउथिकापा ताइको आबाको सारभिता नेलाइदोफा नावा पातेङ माआमाङका।”
30कालाउ एलोङ ले लेकान्हुअ्सो ओबालाइ जाइतुन आरदाङभारि ओल्हितेङ हानिहि।
पत्रुस इसुहेङ मानाल्खा दोअ्तावा
(मरकुस १४:२७-३१; लुका २२:३१-३४; युहन्ना १३:३६-३८)
31कालाउ इसु एम्बालाइहेङ दोअ्हि, “नानि न्हिसिङता काङको भाअ्सिङ नेलाइ कासेहेङ लाअ्तेङ हानिस्वाना। हाइदोनु धरमकिताबता एसा लेखिन्हाका हि:
‘का घोकालाइहेङ सुतायाङका
रो भेरागेलाइ जेसोकोसोङ खेङन्हातेङ हानावा।’ #
जकरिया १३:७
32 “कालाउबुङ कासेहेङ सिकासो सिन्हुपाकान्हुअ्सो का नेलाइखान्तेङ लाम्फा गालिलता हानाङका।” #
मत्ति २८:१६
33पत्रुस इसुहेङ दोअ्हि, “नाङको भाअ्सिङ झाराङ लाअ्लाउ बुङ का नासेहेङ हेअ्लाउ मालाअ्ताङका।”
34इसु इङकोहेङ दोअ्हि, “जातिङको, का नासेहेङ दोअ्खा, नानिङ न्हिसिङता धाङगाइ ओका लाम्फा ना कासेहेङ सुमखे मामानाल्खा दोअ्ताना।”
35पत्रुस इसुहेङ दोअ्हि, “नादोफा सिलिगोइलाउ बुङ का नासेहेङ मामानाल्खा मादोअ्ताङका।” बो झाराङ चात्यागेलाइ बुङ एन्साङ दोअ्हि।
गेतसमनि बागाइचाता इसु पारथाना पाका
(मरकुस १४:३२-४२; लुका २२:२९-४६)
36कालाउ इसु गेतसमनि दोअ्का थामेता चात्यागेलाइदोफा हानिहि रो एम्बालाइहेङ दोअ्हि, “नेलाइ इताङ हिसु, काचाहिँ आसा ओसो हानितेङ पारथाना पाङका।” 37कालाउ ताइमिदोफा पत्रुस रो जब्दियाको न्हेमि चानगेलाइहेङ चुमपुतेङ हानिहि रो वा हेन्जाङ सुरता पातेङ ताइको मन तु:पालि तेङहि। 38कालाउ वा एम्बालाइहेङ दोअ्हि, “काङको मन हेन्जाङ सोकता दुबिका हि। नेलाइ इताङ हिसु रो कादोफा नाङघातेङ हिसु।”
39कालाउ इसु आसा ओसो हानितेङ भोनोता पोम्भेलेतेङ एसा दोअ्तेङ पारथाना पालि तेङहि, “काङको आबा, जेङलि दोनु इदोइ तु:को बाति कासो लाअ्ताको। कालाउबुङ काङको इछा भाइपा माको, नाङको इछा भाइपा ज्याको।”
40कालाउ इसु चात्यागेलाइकोता लोतेङ एम्बालाइहेङ निन्धातेङ हिका दुसुहि रो पत्रुसहेङ दोअ्हि, “हाइ नेलाइ कादोफा एअ् घान्टा बुङ जाग्वान हिलि मादोसुन्हा? 41जाचता मावानाङका दोअ्तेङ जाग्वान हिसु, पारथाना पासु। हाङसा ते रेम्फापालि जातिङको त्यार हि, कालाउबुङ जिउचाहिँ निरधो हि।”
42इसु आरोङ हानितेङ पारथाना पालि तेङहि, “काङको आबा, का इदोइ तु:को बाति माआम्सा माज्याङ पानु, नाङकोङ इछा पाकाभाइपाङ ज्याको।” 43वा आरोङ लोतेङ एम्बालाइहेङ निन्धातेङहिकाङ दुसुहि, हाइपानु एम्बालाइ मिँ हेलि दोङ मादोहि।
44इदोङभाअ्सिङ इसु आरोङ एम्बालाइहेङ लाअ्धितेङ हानिहि रो लाम्फाको काथा दोराइतेङ सुमखेको पालाता आरोङ पारथाना पाहि। 45कालाउ वा चात्यागेलाइकोता लोतेङ एम्बालाइहेङ दोअ्हि, “नेलाइ एला बुङ निन्धातेङ हिसुन्हा? खाङसु, पहर भेरपा लोका हि। का द्याङको चानहेङ पापिगेलाइको खुरता रिम्पापिका पहर जेङलिदोहोइ। 46ल्होसु, हानाइने। खाङसु, रिम्पापिका द्याङ भेरपाङ हि।”
इसु रिमनिङचाका
(मरकुस १४:४३-५०; लुका २२:४७-५३; युहन्ना १८:३-१२)
47इसु धुइकाधुइकाताङ तेन्हेमि चात्यागेलाइता यहुदा इस्करियोत दोअ्का एअ्मि चात्या इन्ता लोहि। इङकोदोफा मुल धामिगेलाइ रो आगुवागेलाइ दिङगिल्का एलोङ बारका चेअ्सु काति रो लाठि चुमातेङ लोहि। 48वासेहेङ रिम्पापिका एम्बालाइहेङ एसा दोअ्का हिघाहि, “जाइहेङ का चुमायाङका इङको दोङ इसु, वासेहेङदोङ रिम्सु।” 49इङको दोङ पहर यहुदा इस्करियोत इसुकोता हानितेङ “मास्टर, सेउपाखा!” दोअ्तेङ वासेहेङ चुमाइहि। 50कालाउ इसु इङकोहेङ दोअ्हि, “सानाइति, ना जेदोङ पालि लोका हिना, इङको पा।” कालाउ यहुदा इस्करियोतदोफा लोका द्याङगेलाइ इसुको आगाता लोतेङ वासेहेङ रिम्हि।
51इदोइ तिङतेङ इसुको एअ्मि चात्या ताइको काति होअ्तेङ मुल धामिको कामत्याको न्हातोङ पुक्कापापिहि। 52कालाउ इसु इङकोहेङ दोअ्हि, “नाङको काति दाबिता ह्वाअ्, हाइदोनु काति चालाइकालाइ झाराङ कातिहोइ दोङ सेअ्न्हावा। 53ना हाइ चिताइखेना, का ताइको आबाहेङ पारथाना पानु, हाइ वा इघुरिताङ स्वरगदुतगेलाइको तेन्हे फाउजखान्तेङ हेन्जा काङको भाअ्सिङ मापिगिलावा कुनु? 54कालाउबुङ का र्हेनु ते धरमकिताबता कासेहेङ इस्का जेङलिगोयाङ दोअ्तेङ लेखिका काथा हेसापा पोङघालि द्वावा कुनु?”
55इङकोन्हुअ्सो इसु ताइमिहेङ रिम्लि लोका द्याङगेलाइहेङ दोअ्हि, “हाइ का डाकु हिघा कुनु नेलाइ लाठि रो काति चुमतेङ कासेहेङ रिम्लि लोसुन्हा? का दिनाङ थानता बिद्या पितेङ हिघाखा, इङको पहर नेलाइ कासेहेङ हाइपालि मारिम्सुन्हा?#लुका १९:४७; २१:३७ 56कालाउबुङ परमेस्वर पाहासो धुइकालाइ धरमकिताबता लेखिका काथा पोङघाको दोअ्तेङ दोङ इदोइ गोताङ जेङलि लोका हिघाहि।” कालाउ झाराङ चात्यागेलाइ इसुहेङ लाअ्तेङ खाअ्हि।
बाराकचहरिको आगाता इसु
(मरकुस १४:५३-६५; लुका २२:५४-५५,६३-७१; युहन्ना १८:१३-१४,१९-२४)
57इसुहेङ रिम्कालाइ वासेहेङ बारका धामि काइयाफाकोता चुमपुहि। इन्ता धरम मास्टर रो आगुवागेलाइ जोम्का हिघाखे। 58पत्रुसचाहिँ इसुहेङ दुरेसोङ पिताइतेङ बारका धामिको साअ्को सालेङता थुकाहि। कालाउ इन्ता हाइ ज्याङ बे दोअ्तेङ खाङलि वा लिअ्ता दुल्तेङ पालेगेलाइदोफा योम्हि। 59कालाउ मुल धामिगेलाइ रो बाराकचहरिको झाराङ सदस्यगेलाइ इसुहेङ सिकासाजाइ पिलि दोङ गोयाङ दोअ्तेङ वाको खिलापता ढाटाइका दासि भोलि तेङहि। 60कालाउ इन्ता हेन्जा ढाटाइका दासि पिकालाइ लोतेङ वासेहेङ दुसिहि, कालाउबुङ एम्बालाइ हिदिङ दासि मानिङहि। इङकोन्हुअ्सो न्हेमि आगाता लोहि 61रो दोअ्हि, “इदोइ द्याङ ‘का परमेस्वरको थान र्हाअ्तेङ सुमनिता यासेहेङ बान्हाइलि द्वाङका’ दोअ्का हिघाहि।”#युहन्ना २:१९
62कालाउ बारका धामि ल्होतेङ इसुहेङ हिअ्हि, “हाइ ना हाइदोङ जाबाफ माप्याना? नाङको खिलापता एबालाइको पिका दासिको बारेता नासेहेङ हाइदोङ दोअ्लि मान्थु?” 63कालाउबुङ इसु सिपापा हि। बारका धामि वासेहेङ दोअ्हि, “सिन्हुका परमेस्वरको मिङता केरा चातेङ केलाइहेङ दोअ्, हाइ ना परमेस्वरको चान ख्रिस्ट हिन्हा?” 64इसु जाबाफ पितेङ दोअ्हि, “इङकोते ना ताइमिदोङ दोअ्दोङखेना। कालाउबुङ का नेलाइहेङ दोअ्खा, एलासो ओसो नेलाइ का द्याङको चानहेङ सरबङ हिका परमेस्वरको दाम्पाहा गादिता योम्का रो आकासको बादेलता लोकाताङपाका तिङस्वाना।”#दानिएल ७:१३
65कालाउ इदोइ काथा हिङतेङ बारका धामि ताइको धाबा थेअ्हि रो दोअ्हि, “ते खाङसु, या परमेस्वरको बादानामि पाका नेलाइ हिङसुहोइना, एला केलाइहेङ बो हाइ दासि गोयाङ कुनु?#लेबि २४:१६ 66ते दोअ्सु, नेलाइ हाइ दोअ्सुखेना?” एम्बालाइ झाराङ दोअ्हि, “या जिबन दार निङलिङ गोयाङ।” 67कालाउ एम्बालाइ इसुको र्हाइता थोअ्तेङ वासेहेङ भुकिन्दिहि रो आधिमि चाउर्हितेङ एसा दोअ्हि,#यासाइया ५०:६ 68“ना ख्रिस्ट आङ, नासेहेङ हासु दान्हाइहि? आगमबानि धुइ।”
पत्रुस इसुहेङ मानाल्खा दोअ्का
(मरकुस १४:६६-७२; लुका २२:५६-६२; युहन्ना १८:१५-१८,२५-२७)
69इङको पहरथिकापा पत्रुस बाहार सालेङता दोङ योम्तेङ हिघाखे। कालाउ एअ्मि कामत्याइनि वाकोता लोतेङ दोअ्हि, “ना बुङ ते गालिलको इसुदोफाङ हिघान्हा, माको कुनु?”
70कालाउबुङ पत्रुस एम्बालाइ झाराङको आगाता मानाल्खा दोअ्तेङ दोअ्हि, “ना हाइ दोअ्दोङखेना, का मागिखा।”
71कालाउ पत्रुस सालेङको द्वारभेरपा ओल्हिकान्हुअ्सो भेनेङ एअ्मि कामत्याइनि वासेहेङ तिङहि रो इन्ता हिका द्याङगेलाइहेङ दोअ्हि, “इदोइ द्याङ बुङ ते नासरतको इसुदोफाङ हिघाहि।”
72आरोङ पत्रुस केरा चातेङ दोअ्हि, “का इङको द्याङहेङ मामानाल्खा।”
73आसा न्हुअ्सो इन्ता हिका द्याङगेलाइ पत्रुसकोता लोतेङ दोअ्हि, “जातिङको, ना बुङ वादोफाङ हिघान्हा, हाइपानु नाङको धुइका गालिलको द्याङगेलाइको भाइकाङ हिङखे।”
74कालाउ पत्रुस दोअ्हि, “का आरोङ परमेस्वरको मिङता केरा चातेङ दोअ्खा काते इङको द्याङहेङ मामानाल्खा।” कालाउ एन्सा दोअ्तेङसाङ धाङगाइ ओहि।
75इङको पहर पत्रुसहेङ इसुको दोअ्का इदोइ काथा फोम जेङहि, “धाङगाइ ओका लाम्फा ना कासेहेङ सुम्खे मानाल्खा दोअ्ताना।” कालाउ वा बाहार हानितेङ घोनोघोपा खारहि।
اکنون انتخاب شده:
मत्ति 26: DHIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
