मत्ति 27
27
इसुहेङ बाराहाकिम पिलातसकोता चुमपुका
(मरकुस १५:१; लुका २३:१-२; युहन्ना १८:२८-३२)
1एअ् र्हिमाङ, झाराङ मुल धामिगेलाइ रो आगुवागेलाइ इसुहेङ सेअ्लि दोअ्तेङ साल्हा पाहि। 2कालाउ एम्बालाइ वासेहेङ धेउतेङ चुमपुहि रो बाराहाकिम पिलातसहेङ जिम्मा लागाइहि।
यहुदा इस्करियोत सिका
(साल्तेङ दिङगिल्का १:१८-१९)
3कालाउ इसुहेङ साजाइहुकुम पिका काथा गितेङ वासेहेङ रिम्पाका यहुदा इस्करियोत ताइको मन तु:पाहि। कालाउ मुल धामिगेलाइ रो आगुवागेलाइहेङ रुपाको एअ्कुरिते टाका घुरिपालि चुमाहि#साल्तेङ दिङगिल्का १:१८-१९ 4रो दोअ्हि, “का दुस मान्थुका द्याङहेङ रिम्पातेङ पाप पाका हिघा।” कालाउबुङ एम्बालाइ दोअ्हि, “केलाइहेङ हाइ मतलब? ना ताइमिङ गि।” 5कालाउ रुपाको इङको टाकागेलाइ थानता थालतेङ इङको हानिहि रो वा ताइमिङ तोइन्हातेङ सिहि।
6मुल धामिगेलाइ रुपाको इङको टाकागेलाइ कुर्हाइतेङ दोअ्हि, “याते हितिको मोलको टाका, थानको भाकारता यासेहेङ ताअ्लि ठिक माज्याङ।” 7एम्बालाइ इङको टाकाहोइ बोमुलुकको द्याङगेलाइ लिअ्लिको भाअ्सिङ कुम्हालको भोनो चोल्लि साल्हा पाहि। 8इदोङभाअ्सिङ इङको भोनो नानिथिकापा बुङ “हितिको मोलको भोनो” दोअ्खे।
9कालाउ यरमिया परमेस्वर पाहासो धुइकाको काथा पोङघाहि, “एम्बालाइ रुपाको एअ्कुरिते टाका र्हुहि, जेदोङ दाम इस्राएलिगेलाइ वाको भाअ्सिङ तोकिका हिघाखे#जकरिया ११:१२-१३; यरमिया ३२:६-९ 10रो परमप्रभु कासेहेङ हुकुम पिकाभाइपा कुम्हालको भोनोको भाअ्सिङ एम्बालाइ पिहि।”
पिलातसको आगाता इसु
(मरकुस १५:२-१५; लुका २३:३-५,१३-२५; युहन्ना १८:२९-१९:१६)
11जेलाउ इसु रोमि बाराहाकिम पिलातसको आगाता जाअ्तेङ हिघाहि, कालाउ बाराहाकिम वासेहेङ हिअ्हि, “जातिङको ना यहुदिगेलाइको राजा हिन्हा?” इसु दोअ्हि, “ना ताइमिङ एन्सा दोअ्दोङखेना।” 12कालाउ मुल धामिगेलाइ रो आगुवागेलाइ इसुहेङ दुसिहि, कालाउबुङ वा हाइदोङ जाबाफ मापिहि। 13कालाउ पिलातस इसुहेङ दोअ्हि, “नाङको खिलापता एम्बालाइ हेन्जाङ काथागेलाइता दुसिदोङखे, हाइ ना माहिङखेना?” 14कालाउबुङ इसु वासेहेङ एलोङ काथाको बुङ जाबाफ मापिहि। इदोइ तिङतेङ बाराहाकिम पिलातस बुङ हेन्जाङ भारभुसाइहि।
15लाअ्पिका पारबाता द्याङगेलाइको दोअ्का भाइपा बाराहाकिम एअ्मि काइदि लाअ्पिका चलन हिघाहि। 16इङको पहर बारब्बा मिङ हिका एअ्मि काइदि हेन्जाङ मारेम्का दोअ्तेङ नाल्का द्याङ बुङ थुनाता हिघाहि। 17जेलाउ द्याङगेलाइ इन्ता जोम्हि, बाराहाकिम पिलातस एम्बालाइहेङ हिअ्हि, “नेलाइ हाइ भोसुखेना? का नेलाइको भाअ्सिङ हासुहेङ लाअ्प्याङका? बारब्बा ना ख्रिस्ट दोअ्का इसुहेङ?” 18हाइदोनु एम्बालाइ इसुहेङ इख पातेङ जिम्मा लागाइका हिघाखे दोअ्तेङ वा गिका हिघाहि।
19कालाउ पिलातस निया पाका थामेता योम्का पहर वाको बेअ् एसा दोअ्तेङ बानाल पिगिल्हि, “इङको दुस मान्थुका द्याङहेङ हाइदोङ मापा, हाइपानु नानि न्हिसिङता का वाको बारेता मारेम्का सोपोन्दा तिङतेङ हेन्जाङ तु: निङचाका हिघा।” 20कालाउबुङ मुल धामिगेलाइ रो आगुवागेलाइ बारब्बाहेङ लाअ्पिलि रो इसुहेङ सेअ्लि गोयाङ दोअ्तेङ द्याङगेलाइहेङ तोल्हिहि। 21बाराहाकिम पिलातस आरोङ एम्बालाइहेङ हिअ्हि, “इदोइ न्हेमिता हिदोइचाहिँहेङ का नेलाइको भाअ्सिङ लाअ्प्याङका दोअ्का नेलाइ भोसुखेना?” एम्बालाइ दोअ्हि, “बारब्बाहेङ।”
22पिलातस एम्बालाइहेङ दोअ्हि “कालाउ ख्रिस्ट दोअ्का इसुहेङ चाहिँ का हाइ पाङका?” एम्बालाइ झाराङ दोअ्हि, “इङको कुरुसता टाङगाइन्हाको।”
23पिलातस दोअ्हि, “हाइपालि? इङको हाइ कसुर पाका हि कुनु?” कालाउबुङ एम्बालाइ झन बारका गालाता र्हिकाइतेङ एसा दोअ्हि, “इङको कुरुसता टाङगान्हाको।”
24एला पिलातसहेङ हाइदोङ सिप मालाग्याङभाइपा जेङहि। कालाउ खाइला बाइला मच्याङवाला दोअ्का गितेङ वा चि र्हुतेङ झाराङको आगाता ताइको खुर झा:तेङ दोअ्हि, “नेलाइ ताइमिङ गिसु, इदोइ द्याङको हितिको दुस कासेहेङ माको, कालाउबुङ नेलाइहेङ दोङ लाग्याको।”#न्याम २१:६-९ 25एम्बालाइ झन बारका गालापातेङ र्हिकाइतेङ दोअ्हि, “ज्याङ ज्याङ, याको हितिको दुस केलाइ रो केलाइको खालर्हुता दोङ पर्याको।”
26कालाउ पिलातस एम्बालाइको भाअ्सिङ बारब्बाहेङ लाअ्पिहि, कालाउबुङ इसुहेङ द्वालि म्हेअ्तेङ कुरुसता टाङगाइलि सिपालाइहेङ जिमा पिहि।
सिपाल्हाइ इसुहेङ गिल्ला पाका
(मरकुस १५:१६-२०; युहन्ना १९:२-३)
27इङकोन्हुअ्सो बाराहाकिम पिलातसको सिपाल्हाइ इसुहेङ महललिअ्ता चुमपुहि रो झाराङ पल्टनगेलाइहेङ वाको आगाता जोम्पाहि। 28एम्बालाइ इसुको धाबा होअ्तेङ वासेहेङ राजाको भाइपाङ इका धाबा लागाइपिहि। 29कालाउ चुइको ताज बान्हाइतेङ वाको पुरिङता लागाइपिहि रो वाको दाम्पाहा खुरता नाले ताअ्पितेङ वाको आगाता तिर्हो थोतेङ वासेहेङ निन्दा पातेङ एसा दोअ्हि, “ओइ यहुदिगेलाइको राजा, सेउपाखा।” 30कालाउ एम्बालाइ इसुहेङ थोअ्हि रो इङकोङ नाले घिङतेङ वाकोङ पुरिङता दान्हाइहि। 31कालाउ एम्बालाइ वासेहेङ खुजालाइलि दोकान्हुअ्सो इका धाबा होअ्पितेङ वाको ताइकोङ धाबा लागाइपिहि रो वासेहेङ कुरुसता टाङगाइलि चुमपुहि।
इसुहेङ कुरुसता टाङगाइका
(मरकुस १५:२१-३२; लुका २३:२६-४३; युहन्ना १९:१७-२७)
32कालाउ दामाता हानिकाताङ पालाउ एम्बालाइ सिमोन मिङ हिका कुरेनि पुरता हिका एअ्मि द्याङहेङ दुसुहि। इङकोन्हुअ्सो एम्बालाइ वासेहेङ बलजफ्ति पातेङ इसुको कुरुस फालि लागाइहि। 33कालाउ एम्बालाइ गलगथा दोअ्का थामेता थुकालिलोहि, (गलगथा दोअ्काचाहिँ सिका द्याङको पुरिङभाइका थामे।) 34इन्ता थुकातेङ एम्बालाइ इसुहेङ खाका मिसालाइका आङगुरको निघार आम्लि पिहि। चाखेकान्हुअ्सो वा इङको आम्लि माकिअ्हि।#ले ६९:२१
35इङकोन्हुअ्सो एम्बालाइ इसुहेङ कुरुसता टाङगाइकान्हुअ्सो चिठा ह्वाअ्तेङ वाको धाबागेलाइ ताताइमिता बाखाराइहि।#ले २२:१८ 36कालाउ इन्ता हितेङ एम्बालाइ वासेहेङ र्हुम्लि तेङहि। 37वाको पुरिङर्हुता एम्बालाइ कुरुसता “इसु, यहुदिगेलाइको राजा” दोअ्तेङ वाको खिलापको दुस चिथि टाङगाइपिहि। 38इसुहेङ कुरुसता टाङगाइलाउ एम्बालाइ न्हेमि डाकुगेलाइहेङ बुङ वाको दाम्पाहा रो केपाहा कुरुसता टाङगाइका हिघाखे।
39इङको दामा जेङतेङ हानिका द्याङगेलाइ ताताइको पुरिङ हेङगालाइतेङ इसुहेङ बादानामि पातेङ#ले २२:७; १०९:२५ 40एसा दोअ्घाहि, “ओइ थान र्हाअ्तेङ आरोङ सुमनिता बान्हाइलि दोका नाआङ माको? ना परमेस्वरको चान हिन्हा पानु ताइमिहेङ बान्चिपातेङ कुरुससो खुअ्तेङ लेता लोउ।”#मत्ति २६:६१; युहन्ना २:१९ 41एन्साङपातेङ मुल धामिगेलाइ, धरम मास्टरगेलाइ रो यहुदि आगुवागेलाइ इसुहेङ खुजालाइहि। 42एम्बालाइ दोअ्हि, “या बोमिहेङ ते सिन्हुपाहि कालाउबुङ ताइमिहेङ चाहिँ सिन्हुपालि मादोहि। या इस्राएलको राजा कुनु? हिनुते एला कुरुससो खुअ्तेङ ल्वाको कालाउ कि केलाइ यासेहेङ खान्धुर पाङ। 43या परमेस्वरहेङ खान्धुर पाघाखे रो ‘का परमेस्वरको चान’ दोअ्तेङ दोअ्खे। एसापा परमेस्वर यासेहेङ मोन्दातानु वा यासेहेङ एलादोङ सिन्हुपाको।”#ले २२:८
44एन्साङपातेङ इसुदोफाङ कुरुसता टाङगाइन्हाका इङको डाकुगेलाइसुदाङ वाको निन्दा पाहि।
इसु सिका
(मरकुस १५:३३-४१; लुका २३:४४-४९; युहन्ना १९:२८-३०)
45कालाउ नितिमाको तेन्हे बजेसो सुम बजेथिकापा गोताङ मुलुकता कितिकितिका जेङहि। 46सुम बजेगेलाइ इसु एसा दोअ्तेङ बारका गालाहोइ र्हिकाइहि, “एलि, एलि, लामा सबखथनि?” जाइको माने, “काङको परमेस्वर, काङको परमेस्वर, ना कासेहेङ हाइपालि लाअ्न्हा?”#ले २२:१ 47इसु एसापा र्हिकाइका हिङतेङ इन्ता जाअ्कालाइता आधिमि दोअ्हि, “इदोइ द्याङते एलियाहेङ कि काइदोङखे।”
48एम्बालाइता एअ्मि धाअ्पुतेङ हानितेङ पुर्हिका आङगुरको निघारता चोभेरतेङ चुमाहि रो इङको चेन्थारा नालेको तुपाता खेअ्पातेङ इसुहेङ आम्लि पिहि।#ले ६९:२१ 49कालाउबुङ बोगेलाइ दोअ्हि, “खानाइने, एलिया लोतेङ यासेहेङ सिन्हुपालि ल्वाङ बे?” 50कालाउ इसु आरोङ बारका गालापातेङ र्हिकाइहि रो ताइको हाङसा लाअ्हि।
51कालाउ इङकोङ पहर थानलिअ्ता टाङगाइका पारदा र्हुतासो लेताथिकापाङ न्हे भाग जेङतेङ थेअ्न्हाहि। भोनो हेङगालाइन्हालि तेङहि रो उन्ठुइगेलाइ भोइन्हाहि।#दामालाअ्का २६:३१-३३ 52तोमगेलाइ हेन्हाहि रो सिलिदोका परमेस्वरको हेन्जाङ पुनित जनगेलाइको सिका जिउ सिन्हुतेङ ल्होहि। 53एम्बालाइ तोमगेलाइसो ओल्हिहि रो इसु सिकासो सिन्हुकान्हुअ्सो एम्बालाइ पुनित पुर यरुसलेमता दुल्हि रो हेन्जाङ द्याङगेलाइकोता देखाल पिहि।
54जेलाउ काप्तान रो इङकोदोफा इसुहेङ र्हुमकालाइ भोनो हेङगालाइन्हाका रो इन्ता जेङतेङहिका घाटाना तिङहि, कालाउ थितेङ एम्बालाइ एसा दोअ्हि, “जातिङको, याते परमेस्वरको चान हिघाखे।”
55इन्ता गालिलसो लोका हेन्जाङ बेबालाइ बुङ हिघाखे। एम्बालाइ दुरेङसो इदोइ गोताङ खाङतेङ हिघाखे। एम्बालाइ इसुको सेवा पातेङ गालिलसो वासेहेङ पिताइतेङ लोका हिघाखे।#लुका ८:२-३ 56एम्बालाइता मरियम मग्दलिनि, याकुब रो योसेफको आमाइ मरियम कालाउ जब्दियाको न्हेमि चानगेलाइ याकुब रो युहन्नाको आमाइ हिघाखे।
इसुहेङ तोमता ताअ्का
(मरकुस १५:४२-४७; लुका २३:५०-५६; युहन्ना १९:३८-४२)
57बेल्हाकान्हुअ्सो आरिमाथियाको योसेफ मिङ हिका एअ्मि मालिक द्याङ लोहि। वा बुङ इसुकोङ चात्या जेङका हिघाखे। 58वा पिलातसकोता हानितेङ इसुको सिका जिउ र्हेहि रो पिलातस बुङ वासेहेङ पिलि हुकुम पाहि। 59योसेफ सिका जिउ चुमपुतेङ एलोङ नावा रेम्का सुतेको धाबाता लुन्दाइहि। 60इङकोन्हुअ्सो वा उन्ठुइता खोपाइतेङ ताइको भाअ्सिङ बान्हाइतेङ ताअ्का नावा तोमता इसुको सिका जिउहेङ चुमपुतेङ ताअ्हि। कालाउ एलोङ बारका उन्ठुइ चुमातेङ तोमको नुइ थुमपितेङ वा इन्तासो हानिहि। 61तोमको आगाता मरियम मग्दलिनि रो भेनेङ मरियम बुङ योम्तेङ हिघाखे।
सिपाल्हाइ इसुको तोम र्हुमका
62जुम्निदिना माइसाका दिनाता मुल धामिगेलाइ रो फरिसिगेलाइ पिलातसकोता जोम्हि, 63रो दोअ्हि, “केलाइहेङ फोम हि, इङको ठग सिन्हुपा हिलाउ, ‘का सितेङ सुम्नि दिनाता आरोङ ल्होकाङका’ दोअ्का हिघाहि।#मत्ति १६:२१; १७:२३; २०:१९; मरकुस ८:३१; ९:३१; १०:३३-३४; लुका ९:२२; १८:३१-३३ 64इदोङभाअ्सिङ सुम्नि दिनाथिकापा इङको तोम र्हुम्लि हुकुम पि। माकुनु वाको चात्यागेलाइ लोतेङ इङको खुतेङ चुमप्वावा रो ‘इङकोते सिकासो सिन्हुतेङ ल्होहि’ दोअ्तेङ द्याङगेलाइहेङ दोअ्तावा। इङको न्हुअ्सोको जाल लाम्फाखान्तेङ बुङ मारेम्का जेनावा।” 65कालाउ पिलातस एम्बालाइहेङ दोअ्हि, “नेलाइ ताइकोङ सिपाल्हाइ चुमतेङ हानिसु रो जेसापा जेङखे एम्बालाइहेङ रेम्फा र्हुम्लि लागाइसु।” 66कालाउ एम्बालाइ हानितेङ तोमहेङ हिफाजत ताअ्लि तोमको नुइ थुम्का उन्ठुइता छाप लागाइहि रो सिपाल्हाइहेङ र्हुम्लि लागाइहि।
اکنون انتخاب شده:
मत्ति 27: DHIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
