मत्ति 25
25
तेमि बेजालाइको उदारन
1इसु आरोङ दोअ्हि, “कालाउ स्वरगको सारभि ते कान्यागेलाइदोफा दाजिलि द्वाङ। एम्बालाइ ताताइको गेसा चुमतेङ दारुवाहेङ दुसुलि ओल्हिहि।#लुका १२:३५ 2इङकोता नामि आकिल मान्थुका रो नामिचाहि आकिल हिका हिघाखे। 3हाइपानु जेलाउ आकिलमान्थुकालाइ गेसा चुमपुहि, कालाउबुङ एम्बालाइदोसा चुइतिचाहिँ माचुम्पुहि। 4आकिलहिकालाइ चाहिँ ताइको चेरादोफादोफाङ भान्दाता चुइति बुङ चुमपुहि। 5दारुवा बेलोमलाउ एम्बालाइ झाराङ निन्धा म्हातेङ जिम्हि।
6 “कालाउबुङ आधान्हिसिङता ‘खाङसु दारुवा लोहि’ दोअ्का गाला लोहि। 7कालाउ इङको झाराङ कान्यागेलाइ नाङघाहि रो ताताइको गेसा त्यार पाहि। 8आकिल मान्थुका कान्यागेलाइ आकिलहिकालाइहेङ दोअ्हि, ‘नेलाइदोफा हिका आतुइसा चुइति केलाइहेङ बुङ पिसु, हाइदोनु केलाइको गेसा ते सिलि तोम्होइ।’ 9कालाउबुङ आकिलहिकालाइ एसा दोअ्हि, ‘केलाइ रो नेलाइ न्हेमिहेङ थेम्का चुइति मान्थु वाला, भुरुङ नेलाइ दुकानता हानितेङ चोलतेङ चुमासु।’
10 “एम्बालाइ चोल्लि हानिलाउ दारुवा थुकालिलोहि रो त्यार हिकालाइ वाकोदोफा बिहुको भतेरता लिअ्ता दुल्हि रो फिनु गिअ्न्हाहि।
11 “न्हुअ्सो इङको बो कान्यागेलाइ थुकालिलोहि रो एसा दोअ्लि तेङहि, ‘प्रभु, प्रभु, केलाइको भाअ्सिङ फिनु हेपि!’ 12कालाउबुङ वा उतर पितेङ दोअ्हि, ‘जातिङको, का नेलाइहेङ दोअ्खा, का नेलाइहेङ मानाल्खा!’#लुका १३:२५
13 “इदोइभाअ्सिङ नाङघातेङ हिसु, हाइपानु का घुरितेङ लोका इङको दिना रो पहर नेलाइ मागिस्वाना।
सोनाको टाकाको उदारन
(लुका १९:११-२७)
14 “आरोङ स्वरगको सारभि चाहिँ हिदिङ द्याङभाइका हि, जाइ बोमुलुक हानिलाउ ताइको कामत्यागेलाइहेङ काइतेङ ताइको टाका काउरि एम्बालाइहेङ सुम्पिहि। #
लुका १९:११-२७
15इङको झाराङहेङ एम्बालाइको ताताइको योग्यताआन्सार एअ्मिहेङ नालोङ सोनाको टाका, भेनेङहेङ न्हेलोङ सोनाको टाका रो भेनेङहेङ एलोङ सोनाको टाका पितेङ वा बोमुलुक हानिहि। 16कालाउ ना सोनाको टाका निङका ओदोङघरि हानितेङ इङको पाइकारता लागाइतेङ बो ना टाका काम्हाइहि। 17एन्सा दोङ न्हे टाका निङका बुङ बो न्हे टाका काम्हाइहि। 18कालाउबुङ एअ् टाका निङका चाहिँ हानितेङ भोनो तोतेङ ताइको मालिकको टाका म्होअ्तेङ ताअ्हि।
19 “हेन्जा दिनान्हुअ्सो इङको कामत्यागेलाइको मालिक लोहि रो वा एम्बालाइदोफा हिसाब र्हेहि। 20कालाउ ना सोनाको टाका निङका कामत्या लोतेङ बो ना टाका चुमातेङ मालिकको आगाता लोतेङ एसा दोअ्हि, ‘ना कासेहेङ ना टाका पिका हिघाना। का बो ना टाका काम्हाइका हिघा।’
21 “मालिक इङकोहेङ दोअ्हि, ‘च्याबास, रेम्का रो खान्धुरि कामत्या! ना आतुइका काथाता खान्धुरि जेङन्हा, एला का नासेहेङ हेन्जा काथाको जिम्मा प्याङका। ना लोतेङ कादोफा लेङचा।’
22 “न्हे टाका निङका बुङ लोतेङ दोअ्हि, ‘ना कासेहेङ न्हे टाका पिका हिघाना। खाङ, का बो न्हे टाका काम्हाइका हिघा।’
23 “इङकोको मालिक इङकोहेङ दोअ्हि, ‘च्याबास, रेम्का रो खान्धुरि पालि दोका कामत्या! ना आतुङका काथाता खान्धुरि पालि दोका जेङन्हा, एला का नासेहेङ हेन्जाङ काथाको जिम्मा प्याङका। ना बुङ लोतेङ कादोफाङ लेङचा।’
24 “एलोङ सोनाको टाका निङका बुङ लोतेङ दोअ्हि, ‘माथिङका मिलिङसो चेका रो मायाअ्का थामेसो जोम्पाका ना थाङका मन हिका द्याङ हिन्हा दोअ्का कासेहेङ था हिघाहि। 25एसाङ का थिघा रो हानितेङ नाङको टाका का भोनो लेता म्होअ्तेङ ताअ्घा। खाङ, इदोइ नाङको टाका र्हु।’
26 “इङकोको मालिक वासेहेङ दोअ्हि, ‘ओइ दुरजन, कुरिह्या कामत्या! माथिङका थामेता चेखा, मायाअ्का थामेसो जोम्पाखा दोअ्तेङ ना गिकाङ हिघान्हा पानु, 27ना काङको टाका साहुकोता ताअ्लिगोइधाना रो लोतेङ का काङको टाकाको सुदसुदाङ निङधाङका। 28इदोइभाअ्सिङ इङकोसो इदोइ टाका घिङसु रो जाइदोफा ते टाका हि इङकोहेङ पिसु। 29हाइदोनु जाइदोफा हि, इङकोहेङ आरोङ प्यावा रो जाइदोफा मान्थु इङकोदोफा हिका बुङ घिनावा।#मत्ति १३:१२; मरकुस ४:२५; लुका ८:१८ 30इङको निकम्मा कामत्याहेङ चाहिँ बाहार कितिकितिकाता थालगिल्सु। जेता द्याङगेलाइ खारावा रो तासिङ रेअ्तावा।’#मत्ति ८:१२; २२:१३; लुका १३:२८
नियाको दिना
31 “जेलाउ द्याङको चान गोताङ स्वरगदुतगेलाइदोफा ताइको पारतापता ल्वावा, कालाउ वा ताइको गादिता योमावा। #
मत्ति १६:२७; १९:२८ 32इङको पहर सुमिङता गोताङ जात्यागेलाइ काङको आगाता जोमावा, जेसापा घोकालाइ भेरा रो मेअ्साहेङ खेङखे, एन्सा दोङ का एम्बालाइहेङ एलोङहेङ भेनाङसो खेनाङका। 33का भेरागेलाइहेङ ताइको दाम्पाहा रो मेअ्सागेलाइहेङ ताइको केपाहा खेङतेङ ताअ्ताङका।
34 “कालाउ राजा ताइको दाम्पाहाकोगेलाहेङ दोअ्तावा, ‘लोसु, काङको परमेस्वर आबासो सहसाम्पा निङकालाइ! दुनियाको सिरजाइसो नेलाइको भाअ्सिङ त्यार पाका सारभिहेङ खाबारा पासु। 35हाइदोनु का म्हितुका हिघाखा, नेलाइ कासेहेङ चालि पिसुन्हा। का आम्लि किअ्का हिघाखा, नेलाइ कासेहेङ आम्लि पिसुन्हा। का बोमुलुकको हिघाखा, नेलाइ कासेहेङ हिलि पिसुन्हा। 36का नाङघाङ हिघाखा, नेलाइ कासेहेङ धाबा लागाइपिसुन्हा। का मासाअ्धेका हिघाखा, नेलाइ कासेहेङ खाङलि लोसुन्हा। का थुनाता हिघाखा, नेलाइ कासेहेङ दुसुलि लोसुन्हा।’
37 “कालाउ धरम द्याङगेलाइ दोअ्तावा, ‘प्रभु, हेअ्लाउ केलाइ नासेहेङ म्हितुपा हिका तिङन्हाहि रो चालि पिन्हाहि? आम्लि किअ्का तिङन्हाहि रो चि आम्लि पिन्हाहि? 38हेअ्लाउ केलाइ नासेहेङ बोमुलुकको तिङन्हाहि रो हिलि पिन्हाहि? नाङघाङ तिङन्हाहि रो धाबा लागाइपिन्हाहि? 39हेअ्लाउ केलाइ नासेहेङ मासाअ्धेका तिङन्हाहि रो खाङलि लोन्हाहि? हेअ्लाउ ना थुनाता हिघान्हा रो केलाइ नासेहेङ दुसुलि लोन्हाहि?’
40 “कालाउ राजा नेलाइहेङ दोअ्तावा, ‘जातिङको, का नेलाइहेङ दोअ्खा, नेलाइ इदोइ काङको ओनेगेलाइता झाराङखान्तेङ म्हुइका एअ्मिहेङ जेदोङ झोको पासुन्हा, इङको नेलाइ कासेहेङ दोङ पासुन्हा।’
41 “इङकोन्हुअ्सो वा केपाहाको द्याङगेलाइहेङ दोअ्तावा, ‘साराप निङचाका द्याङगेलाइ, कासो दुरे जेङसु। साइतान रो इङकोको काम पाकालाइको भाअ्सिङ त्यार पाका हेअ्लाउ मासिका मेता हानिसु। 42हाइदोनु का म्हितुका हिघाखा, नेलाइ कासेहेङ चालि मापिसुन्हा। आम्लि किअ्का हिघाखा, नेलाइ कासेहेङ चि आम्लि मापिसुन्हा। 43का बोमुलुकको हिघाखा, नेलाइ कासेहेङ हिलि मापिसुन्हा। का नाङघा हिघाखा नेलाइ कासेहेङ धाबा मालागाइ पिसुन्हा। का मासाअ्धेका हिघाखा, नेलाइ कासेहेङ खाङलि मालोसुन्हा। का थुनाता हिघाखा नेलाइ कासेहेङ दुसुलि मालोसुन्हा।’
44 “कालाउ एम्बालाइ बुङ एसा दोअ्तावा, ‘प्रभु, हेअ्लाउ केलाइ नासेहेङ म्हितुपाङ हिका, चि आम्लि किअ्का, बोमुलुकको, नाङघाङहिका, मासाअ्धेका, थुनाता हिका तिङन्हाहि रो वास्ताङ मापान्हाहि?’
45 “कालाउ वा एम्बालाइहेङ दोअ्तावा, ‘जातिङको, का नेलाइहेङ दोअ्खा, इदोइ झाराङखान्तेङ म्हुइकालाइता एअ्मिहेङ हाइ हाइ मापासुन्हा, इङको नेलाइ काङको भाअ्सिङ मापासुन्हा।’ 46कालाउ एबालाइ हेअ्लाउ मामुअ्का दारको भागि ज्यावा, कालाउबुङ धरमाति द्याङगेलाइ हेअ्लाउ मामुअ्का जिबन निनावा।”#दानिएल १२:२
اکنون انتخاب شده:
मत्ति 25: DHIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
