मत्ति 24
24
आखिरि दिनाको चिनोगेलाइ
(मरकुस १३:१-१३; लुका २१:५-१९)
1इसु थानसो ओल्हितेङ हानिलि तोमलाउ वाको चात्यागेलाइ वासेहेङ थानको साअ्गेलाइ तिम्पालिको भाअ्सिङ वाको भेरपा लोहि। 2कालाउबुङ इसु एम्बालाइहेङ दोअ्हि, “नेलाइ इदोइ गोताङ तिङसुखेना माको कुनु? जातिङको, का नेलाइहेङ दोअ्खा, एलोङ उन्ठुइर्हुता भेनेङ उन्ठुइ बुङ माह्यावा, इङको गोताङ र्हाअ्तेङ थालन्हावा।”
3इङकोन्हुअ्सो इसु जाइतुन आरदाङता हानितेङ योम्तेङ हिलाउ चात्यागेलाइ सिपापा लोतेङ वासेहेङ हिअ्हि, “मास्टर, केलाइहेङ दोअ्, इदोइ काथा हेअ्लाउ जेनावा? कालाउ नाङको लोका रो इदोइ जुगको आखिरको चिनो केलाइ हेसापा गिलि द्वाङ?”
4कालाउ इसु एम्बालाइहेङ दोअ्हि, “होस पातेङ हिसु, हासु बुङ नेलाइहेङ माआवाइपाको 5हाइदोनु हेअ्मि काङको मिङर्हुतेङ ‘का ख्रिस्ट हिघा’ दोअ्तेङ ल्वावा रो हेन्जाङहेङ आवाइपावा। 6नेलाइ धुमगेलाइ जेङका रो धुमजेङका काथागेलाइ हिङस्वाना। माथिसु, इदोइ जेङलि दोङ गोयाङ, कालाउबुङ दोकादिना ते इङको दोङ पहर माज्याङ। 7हाइदोनु जात्याको खिलापता जात्या रो सारभिको खिलापता सारभि ल्होकावा। थामेथामेता आनिकाल रो भुइचाल हानावा। 8कालाउबुङ इदोइ गोताङ तु:को थालनि खिनिङ ज्यावा।
9 “कालाउ एम्बालाइ नेलाइहेङ रिमावा रो साजाइ पिलि चुमप्वावा, नेलाइहेङ सेअ्तावा रो काङको मिङको भाअ्सिङ गोताङ जात्याको द्याङगेलाइ नेलाइहेङ खाङलि माकिअ्तावा। #
मत्ति १०:२२
10इङको पहर हेन्जाङ ताइको खान्धुरहेङ लाअ्तावा। एअ्मि भेनेङहेङ बाइमानि पातेङ सुमप्यावा रो खाङलि माकिअ्तावा। 11हेन्जा द्याङगेलाइ ‘कादोङ परमेस्वर पाहासो धुइका हिघा’ दोअ्तेङ ढाटाइकालाइ ओल्ह्यावा रो हेन्जाङ द्याङहेङ आवाइपावा। 12दुरजन काम हेन्जाङ बार्हेनाङसिङ एअ्मि भेनेङहेङ माया पालि लाअ्तावा। 13कालाउबुङ न्हुअ्थिकापा थिर हिकालाइहेङचाहिँ बान्चिपावा।#मत्ति १०:२२ 14कालाउ स्वरगको सारभिको इदोइ रेम्काबानाल दुनियाको गोताङ जात्यागेलाइता दासिको भाअ्सिङ हिम्पावा। इङकोन्हुअ्सो दोकादिना ल्वावा।
थिकाभाइका तु:को पहर
(मरकुस १३:१४-२३; लुका २१:२०-२४)
15 “इदोइभाअ्सिङ परमेस्वर पाहासो धुइका दानिएलसो ‘थानको पुनित थामेता दिगमिगजेङका काथा ताअ्काहि’ दोअ्का नेलाइ तिङस्वाना। (याको माने पर्हिकालाइ ग्याको)। #
दानिएल ९:२७; ११:३१; १२:११ 16कालाउ यहुदियाता हिकालाइ लाखभारि खाअ्ताको। 17बुरजाता हिकालाइ ताइको साअ्ता हिका आनेमाने ओल्हिपालि लेता माखुअ्ताको।#लुका १७:३१ 18मिलिङबारिता हिका ताइको धाबा नानि घुरितेङ माल्वाको। 19गान्धितेअ्कालाइ रो कोल्हेता जामाल हिका आमाइगेलाइहेङ इङको पहर हेन्जा तु: ज्यावा। 20कालाउबुङ चुङदिङता रो माइसाका दिनाता नेलाइ खाअ्लि मागोयाको दोअ्तेङ पारथाना पासु 21हाइपानु इङको पहर इस्का बारका आपत जेनावा, जाइ दुनियाको लाङसो एलाथिकापा जेङका मान्थु, ना आरोङ हेअ्लाउ जेनावा।#दानिएल १२:१; पारकास ७:१४ 22इङको दिना मापोतोपाका हिनु हासुङ द्याङ सिन्हुलि मादोधावा, कालाउबुङ साल्तेङ दिङगिल्कालाइको भाअ्सिङ इङको दिना पोतोपावा।
23 “कालाउ नेलाइहेङ हासुङ ‘खाङसु, ख्रिस्ट इता हि’ माकुनु ‘इन्ता हि’ दोअ्नु नेलाइ खान्धुर मापासु। 24हाइपानु ‘कादोङ ख्रिस्ट’ हिघा दोअ्तेङ रो ‘कादोङ परमेस्वर पाहासो धुइका’ हिघा दोअ्तेङ ढाटाइकालाइ ओल्हितेङ ल्वावा। जेङलि दोनु साल्तेङ दिङगिल्कालाइहेङ बुङ भाडकाइलि बाबारका भारभुसाइका काम रो सरबङको कामगेलाइ तिङपावा। 25फोम पासु, का नेलाइहेङ लाम्फासोङ दोअ्पिका हिघा।
26 “द्याङगेलाइ नेलाइहेङ, ‘खाङसु, वा उदादाङका थामेता हि’ दोअ्लाउ बुङ नेलाइ बाहार ओल्हितेङ मान्हेसु। कालाउ ‘खाङसु, वा लिअ्ता कोठागेलाइता हि’ दोअ्लाउ बुङ खान्धुर मापासु #
लुका १७:२३-२४
27हाइपानु जेसापा बिजुलि नुहेँसो चिल्कालाउ दिहेँथिकापाङ फाइसालाम्खे, एन्सा दोङ का द्याङको चान लोलाउ ज्यावा। 28जेता सिका जिउ हिखे, इन्ता सिघुनगेलाइ बुङ जोमावा!#लुका १७:३७
द्याङको चान तिङका दिना
(मरकुस १३:२४-२७; लुका २१:२५-२८)
29 “इङको आपतको दिनाको ओदोङघरिन्हुअ्सो, बेला कितिकितितावा, तालि फाइसालाम्लि लाअ्तावा। फुरुगेलाइ आकाससो हुलावा रो आकासको सरबङगेलाइ हेङगालाइन्हावा। #
यासाइया १३:१०; ३४:४; इजकिएल ३२:७; योएल २:१०,३१; ३:१५; पारकास ६:१२-१३ 30कालाउ द्याङको चानको चिनो आकासता तिनावा रो सुमिङता गोताङ जात्यागेलाइ बिलाप पावा। एम्बालाइ का द्याङको चानहेङ आकासको बादेलगेलाइता सरबङ रो बारका पारतापसो लोतेङहिका तिनावा।#दानिएल ७:१३; जकरिया १२:१०-१४; पारकास १:७ 31वा ताइको स्वरगदुतगेलाइहेङ धुतुरुको बारका गालाता दिङगिलावा। एम्बालाइ आकास लेता हिका सुमिङको चारपाहाङसो वाको साल्कालाइहेङ जोम्पावा।
दुमरिको सिङसो बिद्या
(मरकुस १३:२८-३१; लुका २१:२९-३३)
32 “एला दुमरिको सिङसो इदोइ बिद्या धिरसु: जेलाउ इङकोको दालेङ नोनो जेनावा रो नावा ल्हाअ्बा दोरावा, कालाउ धाङका पहर लोहोइ दोअ्तेङ नेलाइ गिसुखेना। 33एन्सा दोङ नेलाइ बुङ जेलाउ इदोइ गोताङ काथा जेङका तिङस्वाना, कालाउ वा भेरपाङ, फिनुताङ हि दोअ्तेङ गिसु। 34जातिङको, का नेलाइहेङ दोअ्खा, इदोइ गोताङ मापोङघापाधाउ इदोइ खालको द्याङगेलाइ मुअ्तेङ मान्हावा। 35आकास रो सुमिङ मुअ्तेङ हानावा, कालाउबुङ काङको बचन मुअ्तेङ मान्हावा।
चालाक जेङलिगोइका बिद्या
(मरकुस १३:३२-३७; लुका १७:२६-३०,३४-३६)
36 “कालाउबुङ इङको दिना रो पहर हेअ्लाउ ल्वाङ इङको हासुङ मागिखे। ना स्वरगदुतगेलाइ, ना का द्याङको चान दोङ गिखा। इदोइ काथाको बारेता परमेस्वर आबा खिनिङ गिखे। 37का द्याङको चानको लोका बुङ नोआको दिनागेलाइभाइपाङ जेनावा।#सिरजाइ ६:५-८ 38हाइपानु जेसापा सुमिङ चिता दुबिकाखान्तेङ लाम्फा नोआ चिजाहाजलिअ्ता दुल्का दिनाथिकापा, द्याङगेलाइ चातेङहिका, आम्तेङहिका रो बिहु पातेङहिका पादोङघाखे। 39कालाउ बाने लोतेङ एम्बालाइ झाराङहेङ झोपातेङ माचुम्पुपाधाउ एम्बालाइ हाइदोङ मागिहि। का द्याङको चान लोलाउ बुङ एन्साङ ज्यावा।#सिरजाइ ७:६-२४
40 “इङको पहर न्हेमि मिलिङता ह्यावा, एअ्मि चुमप्वावा रो भेनेङ लाअ्धिन्हावा। 41न्हेमि बेबालाइ जान्ता म्हाइतेङहिका ह्यावा, एअ्मि चुमप्वावा रो भेनेङ लाअ्धिन्हावा।
42 “इदोइभाअ्सिङ नाङघातेङ हिसु, हाइपानु हिदोइ दिना नेलाइको प्रभु ल्वावा, इङको नेलाइ मागिस्वाना। 43कालाउबुङ इदोइ गिसु, साअ्को मालिक खुका न्हिसिङको हिदोइ पहरता लोखे दोअ्तेङ गिका हिनु, वा नाङघातेङ हिधावा रो ताइको साअ् खुलि मापिधावा।#लुका १२:३९-४० 44इदोइभाअ्सिङ नेलाइ बुङ त्यार हिसु, हाइपानु का द्याङको चान नेलाइ माचिताइका पहरता ल्वावा।
रेम्का रो मारेम्का कामत्या
(लुका १२:४१-४८)
45 “खान्धुरि रो आकिल हिका कामत्या हासु, जाइहेङ इङकोको मालिक ताइको जाहानको कामत्यागेलाइहेङ ठिक पहरता चालि प्याको दोअ्तेङ खाटाइका हिखे। 46इङको कामत्या सहसाम्पा निङका ज्यावा, जाइहेङ मालिक लोलाउ एन्साङपातेङ हिका दुस्यावा। 47जातिङको, का नेलाइहेङ दोअ्खा, मालिक इङकोहेङ ताइको गोताङ टाका काउरिको जिम्मा प्यावा। 48कालाउबुङ इङको दुरजन कामत्या ‘काङको मालिक बेलोमतावा’ दोअ्का गितेङ, 49ताइमिदोफाङ काम पाका कामत्यागेलाइहेङ दान्हाइलि, म्हाकालाइदोफा चालि रो आम्लि पानु, 50इङको कामत्याको मालिक इङको माचिताइका दिना रो मागिका पहरता थुकालिल्वावा। 51कालाउ मालिक चिम्काटागेलाइको माझाता थालप्यावा। जेता द्याङगेलाइ खारावा रो तासिङ रेअ्तावा।”
اکنون انتخاب شده:
मत्ति 24: DHIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
