मत्ति 21
21
यरुसलेमता लोलाउ इसुहेङ जाय जाय पाका
(मरकुस ११:१-११; लुका १९:२८-४०; युहन्ना १२:१२-१९)
1जेलाउ ओबालाइ यरुसलेमको भेरपा जाइतुन आरदाङको बेथफागे देराता थुकालिलोहि, कालाउ इसु न्हेमि चात्यागेलाइहेङ एसा दोअ्तेङ दिङगिल्हि, 2“नेलाइ भेरपाको देराता हानिसु। इन्ता थुकातेसाङ नेलाइ एलोङ गाधा रो इङकोको चान धेउतेङ ताअ्का निङस्वाना। इङकोहेङ खाइतेङ काङकोता चुमासु। 3इङको पहर एदि आधिमि नेलाइहेङ हिअ्नु ‘प्रभुहेङ याको जरुरि हि’ दोअ्सु रो वा ओदोङघरि इङको पिगिलावा।”
4परमेस्वर पाहासो धुइकासो धुइका बचन पोङघाको दोअ्तेङ इदोइ जेङका हि:
5“यरुसलेमको द्याङगेलाइहेङ दोअ्सु,
खाङसु, नेलाइको राजा नेलाइकोता लोदोङखे,
वा नोइका जेङतेङ गाधाता,
गाधाको चानर्हुता दोङ धोल्तेङ लोदोङखे।”#यासाइया ६२:११; जकरिया ९:९
6कालाउ चात्यागेलाइ हानिहि रो इसुको दोअ्का भाइपाङ पाहि। 7एम्बालाइ गाधाको चान आमाइ दोफाङ चुमाहि, एम्बालाइको गान्धिता ताइको धाबा दाअ्पिहि, इसु एम्बालाइर्हुता योम्हि। 8हेन्जाङ द्याङगेलाइ ताइको धाबा दामाता दाअ्हि रो बोगेलाइ सिङको दालेङ पेङतेङ दामाता दाअ्पिहि। 9इसुको आगा रो न्हुअ् तेका झाराङ द्याङगेलाइ एसा दोअ्तेङ र्हिकाइहि, “दाउदको खालको जाय ज्याको! परमप्रभुको मिङता लोकालाइ सहसाम्पा निनाको!”#ले ११८:२५-२६
10जेलाउ इसु यरुसलेमता दुल्हि, गोताङ पुरता काथा चारचाराइहि। द्याङगेलाइ हिअ्लि तेङहि, “इदोइ हासु?” 11इन्ता हिका द्याङगेलाइ जाबाफ पिहि, “या गालिल माउजाको नासरत पुरसो लोका परमेस्वर पाहासो धुइका इसु।”
इसु थानता हानिका
(मरकुस ११:१५-१९; लुका १९:४५-४८; युहन्ना २:१३-२२)
12कालाउ इसु परमेस्वरको थानता हानिहि। वा थानता चोलतेङपिअ्तेङ पाका झाराङहेङ गिल्गिल्हि। वा टाका सोकालाइको टेबुल रो पारेउ पिअ्कालाइको योम्का थामे थाइपिगिल्हि। 13वा एम्बालाइहेङ दोअ्हि, “धरमकिताबता इस्का लेखिका हि: ‘काङको साअ् पारथाना पाका साअ् जेङलिगोयाङ।’ कालाउबुङ नेलाइ यासेहेङ डाकुगेलाइको आडा बान्हाइका हिसुन्हा।”#यासाइया ५६:७; यरमिया ७:११
14इङकोन्हुअ्सो कान्हा रो नेङगारागेलाइ थानता इसुकोता लोहि रो वा एम्बालाइहेङ एल्पाहि। 15कालाउबुङ जेलाउ मुल धामिगेलाइ, धरम मास्टरगेलाइ चाहिँ वाको पाका भारभुसाइका काम तिङहि रो जामालाइ थानता “दाउदको सान्तानको जाय ज्याको!” दोअ्तेङ र्हिकाइका हिङहि, कालाउ एम्बालाइ चेरताम्पाहि। 16एम्बालाइ इसुहेङ दोअ्हि, “हिङदोङसुखेना, एबालाइ हाइ दोअ्दोङखे?” कालाउ इसु एम्बालाइहेङ दोअ्हि, “हिङदोङखा, कालाउबुङ ‘जामालाइ रो दुदु आम्कालाइको नुइसो ना बाखिन्लि लागाइका हिन्हा’ दोअ्तेङ हाइ नेलाइ धरमकिताबता पर्हिका मान्थुसुन्हा?”#ले ८:२ 17कालाउ एम्बालाइहेङ लाअ्तेङ वा यरुसलेम पुरसो ओल्हितेङ बेथानिया देराता हानिहि रो इन्ताङ बासा हि।
मासेका दुमरिको सिङ
(मरकुस ११:१२-१४,२०-२४)
18एअ् र्हिमाङ यरुसलेम पुरभारि घुरिलाउ इसु म्हितुहि। 19दामाको भेरपा दुमरिको सिङ तिङहि। वा इङको सिङको भेरपा जाअ्हि, कालाउबुङ इङकोता ल्हाअ्बाबिना बो हाइदोङ मानिङहि। कालाउ वा इङकोहेङ दोअ्हि, “एलासो नाता हेअ्लाउ फल मास्याको।” इङको दुमरिको सिङ ओदोङघरि सेङहि।
20इदोइ तिङतेङ चात्यागेलाइ भारभुसाइतेङ दोअ्हि, “इदोइ दुमरिको सिङ हेसापा उदोङघरि सेङहि?” 21इसु एम्बालाइहेङ दोअ्हि, “जातिङको, का नेलाइहेङ दोअ्खा, नेलाइ खान्धुरपातेङ हेअ्लाउ साङखा मापासुन्हा पानु, दुमरिको सिङहेङ जेदोङ पान्हाहि इङको खिनिङ माको, कालाउबुङ इदोइ आरदाङहेङ बुङ ‘उअ्न्हातेङ जाहादिता हुल’ दोअ्नु एन्साङ ज्यावा।#मत्ति १७:२०; १ कोरिन्थि १३:२ 22खान्धुरपातेङ पारथानाता जेदोङ र्हेस्वाना इङको नेलाइ निङस्वाना।”
इसुको खाबाराको बारेता हिअ्का
(मरकुस ११:२७-३३; लुका २०:१-८)
23इसु थानता दुल्हि कालाउ वा बिद्या पिलाउ मुल धामिगेलाइ, आगुवागेलाइ वाकोता लोतेङ दोअ्हि, “हिदोइ खाबाराहोइ ना निङतेङ इदोइ कामगेलाइ पादोङखेना? रो हासु नासेहेङ इदोइ खाबारा पिहि?” 24इसु एम्बालाइहेङ दोअ्हि, “का बुङ नेलाइहेङ एलोङ काथा हिअ्ताङका। कासेहेङ इङकोको जाबाफ पिसुन्हा पानु, का हिदोइ खाबाराहोइ इदोइ काम पाखा, इङको नेलाइहेङ दोअ्प्याङका। 25ते दोअ्सु, युहन्नाको चिभुअ्लि हितासो जेङहि? परमेस्वरसो ना द्याङसो?” एम्बालाइ ताताइमिता एसा दोअ्तेङ काथा पालि तेङहि, “एला केलाइ हाइ दोअ्लि वाला? ‘परमेस्वरसो’ दोअ्ताङ पानु, ‘नेलाइ युहन्नाहेङ हाइपालि खान्धुर मापासुन्हा?’ दोअ्तेङ वा हिअ्तावा। 26कालाउबुङ ‘द्याङगेलाइसो’ दोअ्ताङ पानु, केलाइ द्याङगेलाइपाहासो थिन्हाखे। हाइदोनु झाराङ युहन्नाहेङ परमेस्वर पाहासो धुइका दोअ्तेङ मानिखे।”
27इदोइभाअ्सिङ एम्बालाइ इसुहेङ जाबाफ पिहि, “केलाइ मागिन्हाखे।” कालाउ इसु दोअ्हि, “का बुङ हिदोइ खाबाराहोइ इदोइ काम पाखा, इङको नेलाइहेङ मादोताङका।”
न्हेमि चानको उदारन
28कालाउ इसु आरोङ दोअ्हि, “नेलाइ हाइ बिचार पासुखेना? एअ्मि द्याङको न्हेमि चान हिघाखे। वा जेठाकोता लोतेङ दोअ्हि, ‘चान, हानितेङ नानि आङगुर बारिता काम पापि।’ 29वा दोअ्हि, ‘का मान्हाङका।’ कालाउबुङ न्हुअ्सो हानिका मनपातेङ वा हानिहि। 30भेनेङ चानकोता लोतेङ वा एन्साङ दोअ्हि। चान दोअ्हि, ‘आबा, का हानाङका।’ कालाउबुङ मान्हेहि। 31एला इदोइ न्हेमिता हिदोइचाहिँ आबाको दोअ्का साअ्हि?” एम्बालाइ दोअ्हि, “दादा चाहिँ।” इसु एम्बालाइहेङ दोअ्हि, “जातिङको, का नेलाइहेङ दोअ्खा, तिरो ल्होपाकालाइ रो कासबिरिगेलाइ नेलाइखान्तेङ लाम्फा स्वरगको सारभिता दुलावा। 32हाइपानु युहन्ना नेलाइकोता रेम्का दामा तिम्पालि लोहि, कालाउबुङ नेलाइ वासेहेङ खान्धुर मापासुन्हा। भुरुङ तिरो ल्होपाका रो कासबिरगेलाइ वासेहेङ खान्धुर पाहि। नेलाइ इदोइ तिङतेङ बुङ मापास्ताइसुन्हा, कालाउ वासेहेङ खान्धुर मापासुन्हा।”#लुका ३:१२; ७:२९-३०
आध्यारगेलाइको उदारन
(मरकुस १२:१-१२; लुका २०:९-१९)
33इसु एम्बालाइहेङ दोअ्हि, “भेनेङ उदारन हिङसु। हासुङ एअ्मि मालिक हिघाहि। जाइ बारिता आङगुर थिङहि रो इङकोको कोरबितिङ बेर्हेम खोराइहि। इन्ता आङगुर पेलिका एलोङ कोल ताअ्हि रो एलोङ चान्चा बान्हाइपिहि। कालाउ आध्यारगेलाइहेङ आध्या पितेङ बोमुलुक हानिहि।#यासाइया ५:१-२ 34जेलाउ आङगुर सान्तेका पहर जेङहि, वा ताइको आध्यारगेलाइकोता ताइ निङका भागर्हुलि ताइ कामत्यागेलाइहेङ दिङगिल्हि। 35कालाउबुङ आध्यारगेलाइ वाको कामत्यागेलाइहेङ रिमतेङ एअ्मिहेङ दान्हाइहि, भेनेङहेङ सेअ्हि रो भेनेङहेङ उन्ठुइहोइ तोहि। 36आरोङ वा लाम्फाको खान्तेङ हेन्जा कामत्यागेलाइ दिङगिल्हि। एम्बालाइहेङ बुङ आध्यारगेलाइ इन्सिकाङ आनिबानि पाहि।
37 “न्हुअ्सो वा ‘काङको चानहेङ ते एम्बालाइ मान पाङ’ दोअ्तेङ, ताइकोङ चानहेङ आध्यारगेलाइकोता दिङगिल्हि।
38 “कालाउबुङ एम्बालाइ चानहेङ तिङतेङ ताताइमिता दोअ्हि, ‘याते मालिककोङ चान। लोसु, इङकोहेङ सेअ्ताइने रो इङकोको टाका काउरि ताइको बान्हाइने।’ 39कालाउ एम्बालाइ इङकोहेङ रिम्तेङ आङगुर बारि बाहार चुमपुतेङ सेअ्हि।”
40इसु हिअ्हि, “ते दोअ्सु, जेलाउ आङगुर बारिको मालिक ल्वावा कालाउ वा आध्यारगेलाइहेङ हाइ पावा?” 41एम्बालाइ वासेहेङ दोअ्हि, “वा इङको दुरजनगेलाइहेङ हेन्जाङ तु: पितेङ सेअ्तावा रो आङगुर बारि बो आध्यारगेलाइहेङ काम्हाइलि प्यावा। इङको कामाइकालाइ मालिकहेङ ताइ निङका भाग पहरताङ प्यावा।” 42इसु एम्बालाइहेङ दोअ्हि, “हाइ नेलाइ धरमकिताबता पर्हिका मान्थुसुन्हा?
जेदोङ उन्ठुइहेङ साअ् धाम्कालाइ खारेज पाहि,
इङकोचाहिँ कोन्हाको मुल उन्ठुइ जेङहि,
इदोइ काम ते परमप्रभु दोङ पाका हि,
कालाउ केलाइको नजरता इदोइ भारभुसाइका हि। #
ले ११८:२२-२३
43 “इदोइभाअ्सिङ का नेलाइहेङ दोअ्खा, स्वरगको सारभि नेलाइसो घिङतेङ परमेस्वरको इछा आन्सार चोलिका जात्याहेङ प्यावा। 44इदोइ उन्ठुइर्हुता हुल्काचाहिँ चारामचुरुम तावा। कालाउ जाइर्हुता इङको उन्ठुइ हुलावा, वासेहेङ चाप्पापावा।”
45जेलाउ मुल धामिगेलाइ रो फरिसिगेलाइ इसुको उदारन हिङहि, कालाउ एम्बालाइकोङ बारेता वा इदोइ दोअ्का हिघाहि दोअ्तेङ गिहि। 46एम्बालाइ वासेहेङ रिम्लि भोहि कालाउबुङ एम्बालाइ द्याङगेलाइदोफा थिहि, हाइदोनु द्याङगेलाइ इसुहेङ एअ्मि परमेस्वर पाहासो धुइका दोअ्तेङ मानिघाखे।
اکنون انتخاب شده:
मत्ति 21: DHIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
