मत्ति 20
20
जनगेलाइको उदारन
1इसु दोअ्काताङ हानिहि, “स्वरगको सारभि बारिको एअ्मि मालिकभाइका। जाइ एअ् र्हिमाङ ताइको आङगुर बारिता जेलाता काम पापालि द्याङगेलाइ भोलि हानिहि। 2जनगेलाइदोफा एअ्निता निङका जेला तोकितेङ वा एम्बालाइहेङ ताइको आङगुर बारिता काम पालि दिङगिल्हि।
3 “कालाउ क्हा बजेभारि बाहार ओल्हिलाउ वा हातेता काम माकोसिङ जाअ्तेङ हिका द्याङगेलाइहेङ तिङहि। 4वा एम्बालाइहेङ दोअ्हि, ‘नेलाइ बुङ काङको आङगुर बारिता काम पालि हानिसु रो नेलाइको निङलिगोइका ठिक जेला का नेलाइहेङ प्याङका।’ 5कालाउ एम्बालाइ काम पालि हानिहि। आरोङ वा तेन्हे बजेभारि रो सुम बजेभारि बुङ बो द्याङगेलाइहेङ एन्साङपातेङ कामता लागाइहि।
6 “आरोङ वा ना बजे हातेभारि हानिलाउ बोगेलाइहेङ जाअ्तेङ हिका तिङहि रो एम्बालाइहेङ दोअ्हि, ‘नेलाइ हाइपालि इता काम माकोसिङ लिअ्पाङ जाअ्तेङ हिसुन्हा?’
7 “एम्बालाइ वासेहेङ दोअ्हि, ‘हासुङ केलाइहेङ कामता लागाइका मान्थु।’ वा एम्बालाइहेङ दोअ्हि, ‘एन्सानु नेलाइ बुङ काङको आङगुर बारिता काम पालि लोसु।’
8 “जेलाउ बेला दुबिहि, कालाउ आङगुर बारिको मालिक ताइको कामत्याहेङ दोअ्हि, ‘जनगेलाइहेङ काइतेङ न्हुअ्सो लोकालाइसो लाम्फा लोकालाइ सुदाङहेङ एम्बालाइको जेला पि।’ #
लेबि १९:१३; न्याम २४:१५ 9ना बजे कामता लागिकालाइ लोहि रो एम्बालाइ झाराङ पुरा दिनाको जेला निङहि। 10जेलाउ लाम्फा कामता लागिकालाइ लोहि, कालाउ एम्बालाइ हेन्जा दोङ जेला निनाङ वाला दोअ्तेङ फोम पाका हिघाहि, कालाउबुङ एम्बालाइ झाराङ एअ्निको जेला खिनिङ निङहि। 11जेला निङकान्हुअ्सो एम्बालाइ आङगुर बारिको मालिककोता हानितेङ गनगन पालि तेङहि, 12एम्बालाइ दोअ्लि तेङहि, ‘इदोइ न्हुअ्सो लोकालाइ एअ् घान्टा खिनिङ काम पाहि, केलाइ ते लिअ्पाङ धाङका सानेता काम पान्हाहि। कालाउबुङ ना एम्बालाइहेङ बुङ केलाइहेङ झोको दोङ जेला पिका हिन्हा।’
13 “कालाउबुङ वा एम्बालाइता एअ्मिहेङ उतर पिहि, ‘सानाइति, का नासेहेङ हाइदोङ बेमान पाका मान्थुघा। हाइ ना कादोफा पुरा एअ्निको जेलाता काम पालि मन्जुर पाका माको? 14नाङको निङका जेला चुमतेङ हाने। कान्हुअ्सो कामता लोकालाइहेङ बुङ नासेहेङ झोको दोङ जेला पिलि भोखा। 15काङको जेथे हि, इङको का ताइमिको दोअ्का भाइपा पालि मानिनाङका कुनु? ना ताइको मिँ हाइपालि तु:पाखेना?’”
16कालाउ इसु दोअ्हि, “एसादोङ न्हुअ्कालाइ लानावा रो लाङकालाइ न्हुअ्तावा।”#मत्ति १९:३०; मरकुस १०:३१; लुका १३:३०
इसु सुमखे ताइमि सिका काथा पाका
(मरकुस १०:३२-३४; लुका १८:३१-३४)
17इसु यरुसलेमभारि हानिकाताङ पालाउ तेन्हे चात्यागेलाइहेङ एपाहा चुमपुतेङ दोअ्हि, 18“हिङसु, केलाइ यरुसलेमभारि हानिदोङन्हाखे। एला का द्याङको चानहेङ मुल धामिगेलाइ रो धरम मास्टरगेलाइको खुरता सुमप्यावा। एम्बालाइ वासेहेङ सिकासाजाइको दुस लागायावा। 19कासेहेङ गिल्ला पालि, द्वालि म्हेअ्लि रो कुरुसता टाङगाइलि दोअ्तेङ एम्बालाइ कासेहेङ बोजात्यागेलाइको खुरता सुमप्यावा। कालाउबुङ सुमनिता का सिन्हुतेङ ल्होकाङका।”
एअ्मि आमाइको बिम्ति
(मरकुस १०:३५-४५; लुका २२:२४-२७)
20कालाउ जब्दियाको चान याकुब रो युहन्ना ताइको आमाइदोफा इसुकोता लोहि। कालाउ एम्बालाइको आमाइ इसुको आगाता तिर्हो थोतेङ सेउपातेङ एसा दोअ्हि, “कासेहेङ दाया पा।” 21इसु वासेहेङ हिअ्हि, “ना हाइ भोखेना?” वा दोअ्हि, “हुकुम पा, नाङको सारभिता काङको इदोइ न्हेमि चानगेलाइता एअ्मि नाङको दाम्पाहा रो भेनेङ नाङको केपाहा योम्लि निनाको।” 22कालाउबुङ इसु दोअ्हि, “नेलाइ हाइ र्हेसुखेना, इङको नेलाइ मागेस्वाना। जेदोङ तु:का सहेलि भोदोङखा, हाइ इङको नेलाइ सहेलि दोस्वाना?” एम्बालाइ दोअ्हि, “द्वाङ।” 23इसु दोअ्हि, “काङको तु: ते नेलाइ सहिस्वाना, कालाउबुङ काङको दाम्पाहा रो केपाहा योम्लि पिका काङको खुरता मान्थु। इदोइ थामे एम्बालाइको हि, जाइको भाअ्सिङ काङको आबा त्यार पालि दोका हि।”
24इदोइ हिङतेङ तेमि चात्यागेलाइ इङको न्हेमि ओनेदोफा चेरताम्पाहि। 25कालाउबुङ इसु एम्बालाइहेङ ताइकोता काइतेङ दोअ्हि, “नेलाइदोङ गिसुखेना, बोजात्याको राज पाकालाइ ताइमन पातेङ हक चालाइखे रो बाबारकालाइ बुङ ताइ आधिनता हिका द्याङगेलाइहेङ खाबारा जामाइखे।#लुका २२:२५-२६ 26नेलाइको माझाता इस्का माज्याङ, कालाउबुङ जाइ नेलाइता बारालि भोखे, इङको नेलाइको सेवा पाका जेङलिगोयावा।#मत्ति २३:११; मरकुस ९:३५; लुका २२:२६ 27जाइ नेलाइता लाङ जेङलि इछा पाखे, इङको नेलाइको बान्धाइ जेङलिगोयावा। 28जेसापा का द्याङको चान सेवा निङलि माको, कालाउबुङ बोमिको सेवा पालि रो हेन्जाङहेङ लाअ्पाकाको मोल चुकाइतेङ ताइको जिबन पिलि लोघा।”
इसु न्हेमि कान्हाहेङ एल्पाका
(मरकुस १०:४६-५२; लुका १८:३५-४३)
29ओबालाइ यरिहो पुरसो हानिकाताङ पालाउ, द्याङगेलाइको बारका चेअ्सुमेअ्सुका इसुहेङ पिताइहि। 30दामाको भेरपा योम्तेङ हिका न्हेमि कान्हागेलाइ इसु इङको दामा हानिदोङखे दोअ्का हिङतेङ एसा दोअ्तेङ र्हिकाइहि, “प्रभु, दाउदको चान, केलाइहेङ दाया पा।” 31द्याङगेलाइ एम्बालाइहेङ सिकापा हिसु दोअ्तेङ हाकाराइहि, कालाउबुङ एम्बालाइ एसा दोअ्तेङ झन हापाङ र्हिकाइहि, “प्रभु, दाउदको चान, केलाइहेङ दाया पा।” 32कालाउ इसु थिङगापा जाअ्हि रो एम्बालाइहेङ काइतेङ दोअ्हि, “नेलाइ हाइ भोसुखेना? का नेलाइको भाअ्सिङ हाइ पाप्याङका?” 33एम्बालाइ वासेहेङ दोअ्हि, “प्रभु, केलाइहेङ मिँ तिङका बान्हाइपि।” 34इसु दायातेङ एम्बालाइको मिँ साइपितेङसाङ एम्बालाइ तिङका जेङहि रो एम्बालाइ वासेहेङ पिताइहि।
اکنون انتخاب شده:
मत्ति 20: DHIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
