मत्ति 22
22
बिहु भतेरको उदारन
(लुका १४:१५-२४)
1इसु आरोङ एम्बालाइहेङ उदारनगेलाइता दोअ्हि, 2“स्वरगको सारभिहेङ एअ्मि राजादोफा दाजिलि द्वाङ, जाइ ताइको चानको बिहु भतेर त्यार पाहि। 3कालाउ भतेरता नेउता पिका द्याङगेलाइहेङ काइलि ताइको कामत्यागेलाइहेङ दिङगिल्हि, कालाउ एम्बालाइ लोलि माकिअ्हि।
4 “आरोङ वा बो कामत्यागेलाइहेङ एसा दोअ्तेङ दिङगिल्हि, ‘नेउता पिकालाइहेङ दोअ्सु, का काङको भतेर त्यार पाका हिघा, काङको पियागेलाइ रो तोइका तोइका गुपुसगेलाइ सेअ्का हि। गोताङ सामानगेलाइ त्यारका हि, बिहु भतेरता लोसु।’
5 “कालाउबुङ एम्बालाइ वास्ताङ मापासिङ एअ्मि ताइको मिलिङभारि रो भेनेङ ताइको पाइकारभारि हानिहि। 6दाइकालाइ चाहिँ वाको सिपालाइहेङ रिम्तेङ मारेम्का बेभार पातेङ एम्बालाइहेङ सेअ्हि। 7कालाउ राजा चेरताम्पातेङ ताइको सिपाल्हाइ दिङगिल्तेङ इङको सेअ्कालाइहेङ सेअ्लि लागाइहि रो एम्बालाइको पुर चोअ्पिहि।
8 “कालाउ वा ताइको सिपालाइहेङ दोअ्हि, ‘बिहु भतेर त्यार हि, कालाउबुङ नेउता निङकालाइ भतेर चालि लाएकको माजेङहि। 9इदोङभाअ्सिङ नेलाइ मुल दामागेलाइता हानिसु रो जाइजाइहेङ तिङस्वाना, एम्बालाइहेङ बिहु भतेरता नेउता पिसु।’ 10कालाउ कामत्यागेलाइ मुल दामागेलाइता हानितेङ निङका झोको रेम्का मारेम्का झाराङहेङ जोम्पाहि रो बिहु साअ् बान्सालाइहोइ पोङघाहि।
11 “कालाउबुङ जेलाउ राजा बान्सालाइहेङ खाङलि दोअ्तेङ लिअ्ता लोहि, कालाउ वा बिहुता होङलि गोइका धाबा माहोङका एअ्मिहेङ तिङहि। 12वा इङकोहेङ हिअ्हि, ‘सानाइति, बिहुको धाबा मालागाइसिङ ना हेसापा इता लिअ्ता लोन्हा?’ इङको हाइदोङ दोअ्लि मादोहि। 13कालाउ राजा ताइको कामत्यागेलाइहेङ दोअ्हि, ‘इङकोको खुर खोकोइ धेउतेङ इङकोहेङ बाहार कितिकितिकाता थालपिसु। जेता द्याङगेलाइ खारावा रो तासि रेअ्तावा।’#मत्ति ८:१२; २५:३०; लुका १३:२८
14 “न्हुअ्सो इसु दोअ्हि, काइगिल्का हेन्जाङ हि, कालाउबुङ सालन्हाका आतुइसा हि।”
तिरो तिरिका बारेता हिअ्का
(मरकुस १२:१३-१७; लुका २०:२०-२६)
15कालाउ फरिसिगेलाइ हानितेङ इसुहेङ वाकोङ काथाता वासेहेङ हेसापा फासेपालि दोअ्तेङ साल्हा पाहि। 16एम्बालाइ ताइको चात्यागेलाइहेङ हेरोदको द्याङगेलाइदोफा इसुकोता दिङगिल्हि। एम्बालाइ दोअ्हि, “ओइ मास्टर, केलाइ गिन्हाखे, ना जातिङको हिन्हा रो द्याङगेलाइहेङ परमेस्वरको जातिङको काथा धिरपाखेना। ना हासुङदोफा माथिखेना, ना द्याङगेलाइको र्हाइ खान्तेङ काथा बुङ मापाखेना। 17इदोङभाअ्सिङ केलाइहेङ दोअ्, रोमि माहाराजा काइसरहेङ तिरो तिरिलि ठिक ना माको?” 18कालाउबुङ इसु एम्बालाइको चालबाजि गितेङ दोअ्हि, “ओइ चिम्काटा, कासेहेङ हाइपालि जाचिसुखेना? 19खोइ तिरो तिरिका टाका कासेहेङ तिम्पासु।” कालाउ एम्बालाइ वाकोता एलोङ टाका चुमाहि। 20इसु एम्बालाइहेङ दोअ्हि, “इदोइ छाप हासुको, कालाउ हासुको मिङ खोपिका हि?” 21एम्बालाइ इसुहेङ दोअ्हि, “काइसरको।” कालाउ वा एम्बालाइहेङ दोअ्हि, “इदोइभाअ्सिङ जेदोङ काइसरको हि, इङको काइसरहेङ पिसु। जेदोङ परमेस्वरको, इङको परमेस्वरहेङ पिसु।” 22इदोइ हिङतेङ एम्बालाइ भारभुसाइहि रो वासेहेङ लाअ्तेङ हानिहि।
सिकासो सिन्हुका बारेता हिअ्का
(मरकुस १२:१८-२७; लुका २०:२७-४०)
23इङकोङ दिना सिकालाइ सिन्हुतेङ माल्होखे दोअ्का सदुकिगेलाइ इसुकोता लोतेङ एम्बालाइ वासेहेङ हिअ्हि,#साल्तेङ दिङगिल्का २३:८ 24“मास्टर, मोसा दोअ्का हि, हिदिङ द्याङ चानचामिन्दि माकोसिङ सिनु वाको ओने दादाको बेअ्हेङ चुमातेङ दादाको खाल जाअ्पालिगोयाङ।#न्याम २५:५ 25एला केलाइको माझाता न्हिअ्मि दादाओनेगेलाइ हिघाखे। जेठा दादा बिहु पाहि, कालाउबुङ चानचामिन्दि माजेङपासिङ सिहि। एन्साजेङलाउ माहिला ओने ताइको भाउजिहेङ ताअ्हि। 26वा बुङ जेठा दादा भाइपाङ चानचामिन्दि माजेङपासिङ सिहि। एन्साङपातेङ माहिला ओने भाइपाङ साहिँला रो बो ओनेगेलाइ बुङ ताइको भाउजिहेङ ताअ्हि। कालाउबुङ एम्बालाइ बुङ चानचामिन्दि माजेङपासिङ सिहि। 27एम्बालाइ झाराङ सिकान्हुअ्सो इङको बेबाल बुङ सिहि। 28इदोइभाअ्सिङ न्हुअ्दिनाता सिकालाइ सिन्हुकान्हुअ्सो इदोइ न्हिअ्मि दादाओने मध्येता इङको बेबाल हासुको बेअ् ज्यावा? हाइदोनु इङको झाराङको बेअ् जेङलिदोका हिघाहि।”
29इसु एम्बालाइहेङ दोअ्हि, “नेलाइ आवाइसुन्हा, हाइपानु नेलाइ धरमकिताब रो परमेस्वरको सरबङ मागिसुखेना। 30सिकालाइ सिन्हुकान्हुअ्सो द्याङगेलाइ बिहु मापाखे, ना बिहु पापिखे, कालाउबुङ एम्बालाइ स्वरगको स्वरगदुतभाइपा जेङखे। 31कालाउबुङ सिकालाइ सिन्हुतेङ ल्होका बारेता परमेस्वर नेलाइहेङ हाइ दोअ्का हि, इङको नेलाइ धरमकिताबता पर्हिका मान्थुसुन्हा? 32वा दोअ्का हिघाहि ‘का आब्राहामको परमेस्वर, इसहाकको परमेस्वर रो याकुबको परमेस्वर हिघा।’ एन्साङ परमेस्वर सिकालाइको परमेस्वर माको, कालाउबुङ सिन्हुकालाइको परमेस्वर हि।”#दामालाअ्का ३:६ 33इदोइ हिङतेङ द्याङगेलाइ वाको बिद्याता भारभुसाइहि।
झाराङखान्तेङ बारका हुकुम
(मरकुस १२:२८-३४; लुका १०:२५-२८)
34इसु सदुकिगेलाइहेङ सिपा पाहि दोअ्का हिङतेङ फरिसिगेलाइ वाकोता जोम्हि। 35एम्बालाइता एअ्मि धरम मास्टर इसुहेङ जाच पाका बिचारहोइ वासेहेङ हिअ्हि, 36“मास्टर, न्यामता झाराङखान्तेङ बारका हुकुम हिदोइ हि?” 37इसु वासेहेङ दोअ्हि, “‘ना परमप्रभु ताइको परमेस्वरहेङ ताइको गोताङ कोन्धाङहोइ, ताइको गोताङ हाङसाहोइ रो ताइको गोताङ मनहोइ माया पा।’#न्याम ६:५; लुका १०:२७ 38झाराङखान्तेङ बारका रो लाङ हुकुम इदोइ हि। 39न्हे बुङ इस्काङ हि, ‘ना ताइको भेरपाकोहेङ ताइमिहेङ भाइपाङ माया पा।’#लेबि १९:१८ 40गोताङ न्याम रो परमेस्वर पाहासो धुइकालाइको बिद्याको मुल काथा दोङ इदोइ न्हे हुकुमगेलाइ हि।”
ख्रिस्टको बारेता हिअ्का
(मरकुस १२:३५-३७; लुका २०:४१-४४)
41जेलाउ फरिसिगेलाइ जोम्का हिघाहि, कालाउ इसु एम्बालाइहेङ हिअ्हि, 42“ख्रिस्टको बारेता नेलाइ हाइ दोअ्सुखेना? वा हासुको खाल हि?” एम्बालाइ इसुहेङ दोअ्हि, “दाउदको खाल।” 43इसु एम्बालाइहेङ दोअ्हि, “एन्सानु दाउद पुनित हाङसासो हाउसाला निङतेङ ख्रिस्टहेङ ‘प्रभु’ दोअ्तेङ हेसापा काइलि दोहि? वा दोअ्खे:
44 ‘परमप्रभु काङको प्रभुहेङ दोअ्हि,
ना काङको दाम्पाहा योम,
जेलाउथिकापा का नाङको दुस्मनगेलाइ
नाङको खोकोइको पाइतालालेता माताअ्ताङका।’ #
ले ११०:१
45 “एसापा दाउद ख्रिस्टहेङ ‘प्रभु’ दोअ्नु, वा हेसापा दाउदको खाल जेनावा कुनु?” 46कालाउ हासु बुङ वासेहेङ हाइदोङ दोअ्लि मादोहि। इङको दिनासो हासु बुङ वाकोदोफा हिअ्लि लुर मापाहि।
اکنون انتخاب شده:
मत्ति 22: DHIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
